Jehovah lunglawmhter awkah zumhnak kan ngeih a hau. Asinain Baibal ah ‘mi vialte in zumhnak an ngei lo’ tiah a ti. (2 Thes. 3:2) Lamkaltu Paul nih cutin a chim tikah “miṭhalo mi hna le misual mi hna” a simi, amah a hremtu pawl kong kha a chim duhmi a si. Asinain zumhnak kong a chimmi cu mi cheukhat ca zong ah a hmaan. Mi cheukhat nih zei zong vialte a sertu cu Pathian a si ti kha an cohlang duh lo. (Rom 1:20) Mi chuekhat nih cun thil cheukhat asiloah mah nakin a ṭhawng deuhmi mi pakhat kha kan zumh tiah an ti men lai. Asinain Pathian lunglawmhter awkah mah lawng in a za lo.

Jehovah cu a um taktakmi a si i a cung ah a fekmi zumhnak a ngeimi hna ‘laksawng a petu’ a si ti kha kan zumh a hau. (Heb. 11:6) Zumhnak timi cu thiang thlarau nih a chuahtermi ziaza a si. Cucaah Jehovah sinah thiang thlarau kan hmuh nakhnga thla kan cam a hau. (Luka 11:9, 10, 13) Thiang thlarau kan hmuh khawh ning a biapimi lamkhat cu Baibal relnak thawng in a si. Cun kan relmi kong kha kan ruah khawh i kan hngalhmi ning in zulh awkah kan i zuam kho. Cutin kan tuahnak thawng in Jehovah lung a lawmhtermi zumhnak kan ngei ti a langhtermi nunning in nun awkah thiang thlarau nih a kan bawmh lai.