Careltu Hna Sinin Biahalnak
Salm 12:7, NWT ah hmuhmi “nangmah nih himte in na hupphenh ko hna lai” timi bia nih (caang 5) ah a chimmi “retheimi” hna maw a chim duhmi a si asiloah (caang 6) ah a chimmi “BAWIPA biakamnak” dah a chim duhmi a si?
A cung, tang bia ning in mah Baibal caang nih mi pawl kha a chim duhmi hna a si.
Salm 12:1-4 ah “miṭha an um ti lo i lihchim lomi an um ti lo” tiah a ti. Cun Salm 12:5-7 ah hitin a ti:
“‘BAWIPA nih aa thawh i,
Sifakmi cu an hrem hna i,
retheimi cu aihram lengmang in an tuah hna caah
atu cu ka ra lai i an ngaihmi himnak cu ka pek hna lai’ a ti.
BAWIPA biakamnak cu zumh awk tlak an si;
somei chung ah voi sarih tiang erletmi ngun tluk in an thiang.
BAWIPA, nangmah nih himte in kan huppheng ko;
hi mi hna sin hin kan kilveng ko.”
Caang 5 ah Pathian nih “retheimi” hna caah a tuah dingmi kong kha a langhter. A khamh hna lai.
Caang 6 ah “BAWIPA biakamnak cu zumh awk tlak an si” i ‘ṭha tein thianhmi ngun bantuk a si’ tiah a ti chap. Mah nih Jehovah bia kong he aa tlaiin kan intuarnak kong kha a langhter.—Salm 18:30; 119:140.
Atu a changtu Baibal caang a simi Salm 12:7, NWT kha i ruah hna u sih. Hitin a ti: “BAWIPA, nangmah nih himte in huppheng ko hna, hi mi hna sin hin kilveng ko hna.” “Hna” timi nih zeidah a chim duhmi a si?
Caang 6nak ah “BAWIPA biakamnak” kong a chim caah caang 7nak i “hna” timi bia nih Pathian chimmi kha a langhter duhmi a si tiah mi cheukhat nih an ruah khawh men. Mi tampi cu Baibal ralchanh awk le hrawh awkah an i zuam ko nain Pathian nih Baibal a kilven ti kha kan hngalh.—Isa. 40:8; 1 Pet. 1:25.
Asinain caang 5nak ah a chim bantuk in Pathian nih mi pawl a huhphenh hna ti cu a hmaanmi a si. Jehovah nih “retheimi” le ‘aihrammi’ hna kha a bawmh peng hna i a khamh zong a khamh hna lai.—Job 36:15; Salm 6:4; 31:1, 2; 54:7; 145:20.
Cu a si ah caang 7nak i “hna” timi nih zeidah a chim duhmi a si?
A cung, tang bia ning in mah Baibal caang nih mi pawl kha a chim duhmi hna a si.
Salm 12:1 ah “miṭha” pawl cu hlen an tong tiah a ti. Mah hnuah Pathian nih bia ṭha lo a chimmi hna kha a doh hna lai tiah a ti. Cucaah salm caṭialtu pa nih Pathian biakam cu zumhawktlak a si caah Pathian nih a miphun pawl aiawh in thil a tuah lai ti kha a kan zumhter.
Cucaah caang 7nak i Jehovah nih lam a hruai hna lai i a huhphenh “hna” lai timi bia nih miṭhalo pawl ruang ah harnak a tongmi pawl kha a chim duhmi hna a si.
Zumh khawh a simi Hebru Baibal an tlenmi ning in mah Baibal caang ah “hna” timi kha a hman. Hebru Baibal, Greek in an leh hmasa bikmi Baibal ah “kan” timi biafang kha voihnih a hman. Cucaah retheimi hna le a aihram in a ummi zumhfekmi hna kha a chim duhmi hna a si lai. Caang 7nak ah zumhfekmi hna kha duhpaoh in khua a sami “hi mi hna” kut in a huhphenh hna lai tiah a ti. Mah cu ‘ṭhatlonak a karhtermi’ miṭhalo pawl kha an si. (Salm 12:7, 8) Hebru Baibal, Aramaic in an lehmi ning in caang 7 ah hitin a ti: “MAW BAWIPA, nangmah nih miṭha pawl kha na huhphenh hna lai, a ṭha lomi hi mi hna kut in na huhphenh zungzal hna lai.” Mah ruang ah Salm 12:7 nih Pathian biakam kha a chim duhmi a si lo ti cu a fiang ko.
Mah Baibal caang ning in ‘zumhfekmi hna’ caah ruahchannak a um i mah cu Pathian nih a khamh hna lai timi ruahchanhnak a si.
