1-2. Jehovah Tehte tampi nih zei bantuk zuamcawhnak dah an ton?

TIMOTE nih phungchim rian kha a si khawh chungin a ṭuan nakhnga lamkaltu Paul nih tha a rak pek. (2 Tim. 4:5) Kan dihlak in Paul ruahnak cheuhnak kha kan zulh i kan si khawh chungin Pathian rian kha kan ṭuan. Asinain a caan ah cutin tuah cu a har. Unau tampi nih phungchim rian ṭuan kha an ṭih. (2 Tim. 4:2) Tahchunhnak ah, kan rian ṭuannak an khenkhamnak ram ah a ummi unau pawl kong kha ruathmanh. Phung kan chim ahcun thongthlak kan si lai ti kha an hngalh ko nain phung an chim.

² Jehovah miphun pawl cu an lung a donghter khomi buaibainak tampi an tong. Tahchunhnak ah, unau tampi cu an chungkhar herhmi thil bawmh awkah suimilam tampi chung rian an ṭuan. Phungchim rian ah tam deuh in i tel an duh ko nain zarh a donghnak lei ahcun an tha a ba tuk cang. Unau cheukhat cu an ngan a dam lo ca, an kum a upat ca le inn in an chuah khawh lo caah Jehovah rian kha tlawmpal lawng an ṭuan khawh. Cun cheukhat cu Jehovah caah man kan ngei lo timi ruahnak an ngei. Mary * timi unaunu nih hitin a ti: “Ka tha a bat i ka lung a dongh tikah ka intuarnak kha uk khawh awkah fakpi in kaa zuam. Phungchim rian ah i tel khawh lo tiangin ka caan le ka thazaang ka hman caah ka sual timi ruahnak a ka ngeihter.”

3. Hi capar ah zei kong dah kan i ruah hna lai?

³ Zei bantuk buaibainak kan ngeih hmanhah Jehovah nih a rian kha kan si khawh chungin kan ṭuan khawh nakhnga a herhmi thazaang a kan pek. Jehovah nih a kan bawmh khawh ning kong kan i ruah hlanah Paul le Timote nih harnak an tong ko nain phungchim rian an liim khawh nakhnga Jehovah nih thazaang a pek hna ning kong kha i ruah hmasa hna u sih.

4. Paul cu zei bantuk zuamcawhnak dah a ton?

⁴ Paul cu harnak tampi a rak tong. Tuknak a in lio, lung cheh a si lio le thong a tlak lioah a hleiin thazaang peknak a rak herh. (2 Kor. 11:23-25) Paul nih a caan ah a ṭhalomi ruahnak a dohnak kong chim kha a ning a zak lo. (Rom 7:18, 19, 24) Paul cu ‘a pum ah fahnak pakhat’ a simi ngandam lonak zong a ngei i mah kha Pathian nih ka hlohpiak seh ti a duh.—2 Kor. 12:7, 8.

5. Zuamcawhnak tampi a rak tong ko nain Paul nih zeidah a rak liim?

⁵ Jehovah nih Paul kha har tampi a tong ko nain phungchim rian a ṭuan peng khawh nakhnga thazaang a rak pek. Paul nih hlawhtlinnak a hmuhmi kong hi ruathmanh. Tahchunhnak ah, Rom i thong a tlak lioah cozah nawlngeitu hna hmai le Judah hruaitu hna hmaiah phung a rak chim. (Lam. 28:17; Fil. 4:21, 22) Cun Siangpahrang Inn Cawngtu tampi le amah a rak lengmi vialte hna sin zongah phung a rak chim. (Lam. 28:30, 31; Fil. 1:13) Mah caan lioah Paul cu cakuat ṭial dingin thawchuah hnawh a si i mah nih tuchan i a hmaanmi Khrihfa hna kha a ṭhathnemh hna. Mah lengah Paul kong nih Rom khua i Khrihfabu kha thazaang a pek hna. Cucaah unau pawl cu “an ral a ṭha chinchin i ṭih lo tein thawngṭha bia kha an chim.” (Fil. 1:14) Paul cu a duh tlukin thil tampi a tuah kho lo nain a ṭha bik in a rak tuah i a cung i thil a tlungmi kha “thawngṭha karh tertu” a rak siter.—Fil. 1:12.

6. Paul kha phungchim rian liim khawh awkah 2 Korin 12:9, 10 ningin zeinihdah a bawmh?

⁶ Paul nih Jehovah rian ah a tuah khawhmi zei thil paoh kha amah thazaang si loin Jehovah pekmi thaazang thawngin a si ti kha a hngalh. Cun Pathian ṭhawnnak cu ‘derthawmnak ah a lang’ tiah a ti. (2 Korin 12:9, 10 rel.) Paul cu hremnak, thongthlaknak le a dang zuamcawhnak hna a tong ko nain Jehovah nih a thiang thlarau hmangin phungchim rian kha a liim khawh nakhnga ṭhawnnak a pek.

7. Timote nih a rian liim khawh awkah a harter khomi zei zuamcawhnak dah a ton?

⁷ Paul rian ṭuanṭi hawi mino Timote zong nih phungchim rian ṭuan khawh awkah Pathian ṭhawnnak kha a rak i bochan. Paul missionary khualtlawnnak ah lam hlapi tiang a rak zulh. Cun Paul nih Khrihfabu pawl tlawn awk le  thazaang pek awk zongah Timote kha a rak thlah. (1 Kor. 4:17) Mah tikah Timote nih kaa tlak lo tiah a ruah men lai. Cucaah Paul nih Timote kha hitin a ti: “Na kum a no ruangah ahohmanh nih in zomhtaih hna hlah seh.” (1 Tim. 4:12) Cun mah lioah Timote cu a pum ah “a fak lengmangmi” hling chunh bantuk a simi fahnak zong a tuar. (1 Tim. 5:23) Asinain Timote nih thawngṭha chim awk le unau pawl rian ṭuanpiak awkah Jehovah nih a ṭhawngmi a thiang thlarau hmangin a herhmi thazaang a ka pek lai ti kha a hngalh.—2 Tim. 1:7.

8. Jehovah nih tuchan ah a miphun pawl kha zeitindah thazaang a pek hna?

⁸ Tuchan ah Jehovah nih a miphun pawl kha “thilti khawhnak ṭhawnnak” a pek hna caah annih nih zumhfek tein a rian an ṭuan khawh peng. (2 Kor. 4:7) Jehovah nih a cungah zumhfek tein kan um peng khawh nakhnga a kan bawmh ning le thazaang a kan pek ning a kong pali kha i ruah hna u sih. Mah cu thlacamnak, Baibal, Khrihfa i hawikomhnak le phungchim rianṭuannak an si.

9. Thlacamnak nih zeitindah a kan bawmh khawh?

⁹ Thlacamnak thawngin thazaang a kan pek. Efesa 6:18 ah kan hmuh bantukin Paul nih Pathian sinah “zeitik caan paohah thlacam” dingin a kan forh. Pathian nih a kan bawmhnak thawngin kan thlacamnak kha a kan leh lai. Bolivia ah a ummi Jonnie cu buaibainak tampi a ton lioah Jehovah bawmhnak kha a rak hmuh. A nu le a pa le a nupi cu caankhat te ah fakpi in an zaw. Cucaah an herhmi vialte zohkhenh cu Jonnie caah a har tukmi a si. A nu cu a rak thi i a nupi le a pa cu caan saupi tiang an rak dam kho lo. Mah kong he aa tlaiin Jonnie nih hitin a ti: “Hneknak tampi kan ton tikah a ka bawm zungzalmi thil pakhat cu cuset khaset tiin thla ka cammi kha a si.” Jehovah nih Jonnie kha inkhawhnak ngeih awkah a herhmi thazaang a rak pek. Bolivia ah a ummi Khrihfa upa Ronald nih a nu cu cancer a ngei ti kha a theih. Thlakhat a rauh hnuah a nu cu a rak thi. Mah a har tukmi caan ah zeinihdah a bawmh? Hitin a ti: “Jehovah sin i thla ka cam tikah ka intuarmi kha ka chimh dih. Aho nakhmanh in le keimah le keimah kaa hngalhmi nakhmanh in Pathian nih a ka hngalh deuh ti kha ka hngalh.” Cu bantuk caan ah kan ngaih a chia tuk men lai asiloah zei kong dah kan cam lai ti kha kan hngal men lai lo. Asinain kan intuar ning kha chim awkah kan i harh hmanhah Jehovah nih a sinah thlacam dingin a kan sawm.—Rom 8:26, 27.

10. Hebru 4:12 ningin Baibal rel le kan relmi kong ruah cu zeicah a biapit tuk?

¹⁰ Baibal hmangin thazaang a kan pek. Paul nih thazaang peknak le hnemhnak hmuh awkah Baibal kha a rel. Kannih zong cutin kan tuah ve a hau. (Rom 15:4) Baibal kha kan rel i kan ruah tikah Baibal nih a kan bawmh khawh ning kha hngalhthiam awkah Jehovah nih a kan bawmh khawh. (Hebru 4:12 rel.) A hmasa ah langhtermi Ronald nih hitin a ti: “Zan fatin Baibal rel dingin kaa zuam tikah kaa nuam tuk. Jehovah i a sining hna le a miphun pawl a zohkhenh hna ning kong kha ṭha tein ka ruah. Mah nih thazaang a ka ngeihter.”

11. Ngaihchiatnak a tongmi nuhmeinu pakhat kha Baibal nih zeitindah thazaang a pek?

¹¹ Baibal kong kan ruah tikah mah nih kan tonmi buaibainak kong he aa tlaiin a hmaanmi lungput ngeih awkah a kan bawmh. Ngaihchiatnak a tongmi nuhmeinu pakhat nih Baibal in ṭhathnemhnak a hmuh ning kong hi ruathmanh. Khrihfa upa pakhat nih Job Baibal relnak in bawmtu a simi kong hna na hmuh khawh tiah ruahnak a cheuh. Cutin a tuah  tikah Job i a hmaan lomi a ruahnak he aa tlaiin sual a phawt colh. A mitthlam ah a cuanter i Job kha hitin ralrin a pek: “Job, a ṭhalomi ruahnak ngei hlah.” Asinain Job he kan ruahnak aa khat tuk ti kha a hun hngalh. Mah nih a hmuh ning remh awk le a vapa a thih ruangah a ngaihchiatnak kha inkhawh awkah thazaang ngeih dingin a rak bawmh.

12. Jehovah nih zumtukhat unau pawl hmangin zeitindah thazaang a kan pek?

¹² Khrihfa i hawikomhnak thawngin thazaang a kan pek. Jehovah nih Khrihfa pawl thazaang a pek hnanak a dang lamkhat cu zumtukhat unau pawl thawngin a si. Paul nih a cakuat ah thlaraulei unau pawl he ‘pakhat le pakhat i bawmh’ kha ka duh tuk tiah a ti. (Rom 1:11, 12) A hmasa ah langhtermi Mary nih cu bantuk i hawikomhnak kha a sunsak tuk. Hitin a ti: “Jehovah nih ka tonmi buaibainak kong a hngal lomi unau pawl hmanh kha a hman hna. Annih nih thazaang peknak bia hna an ka chimh asiloah caṭialmi card hna an ka kuat. Mah cu ka herh tukmi a si. Mah nih keimah bantuk buaibainak a tongmi hna he bia i ruah awkah a ka bawmh i an hmuhtonnak in cawn awk zongah a ka bawmh. Cun Khrihfa upa pawl nih Khrihfabu ah man a ngeimi ka si timi ruahnak zong an ka ngeihter zungzal.”

13. Khrihfabu pumhnak ah pakhat le pakhat zeitindah thazaang kan i pek khawh?

¹³ Pakhat le pakhat thazaang i peknak caah a ṭha bikmi hmun cu Khrihfabu pumhnak a si. Naa pumh tikah unau pawl kha na dawt hnanak kong na chimh hnanak thawngin le an tuahmi kong he aa tlaiin naa lawmhnak kong na chimh hnanak thawngin thazaang na pek khawh hna. Tahchunhnak ah, pumh hlanah Khrihfa upa Peter nih zumlotu innchunghawi a ngeimi unaunu pakhat kha hitin a ti: “Naa pumhmi cu thazaang petu taktak a si. Na fale paruk kha a phi pek awkah timhcia an si nakhnga na bawmh zungzal hna.” Mah tikah aa lawmh tuk ruangah a mitthli a ha i “tu ni ah cu bantuk bia theih cu ka herh tukmi a si” tiah a ka ti.

14. Phungchim rianṭuannak nih zeitindah a kan bawmh khawh?

¹⁴ Phungchim rianṭuannak thawngin thazaang a kan pek. Phung kan chim tikah mi nih an ngaih zong, ngaih lo zongah hrimhnak kan hmu i kan i nuam. (Ptb. 11:25) Unaunu Stacy cu phungchim rianṭuannak in thazaang a rak hmu. A chungkhar pakhat bu chungin chuah a si tikah a ngaih a chia tuk i hitin aa hal peng: ‘Amah bawmh awkah tam deuh in ka tuah khawhmi a um maw?’ Stacy cu mah buaibainak kong ruah loin a um kho lo. Cu bantuk thil sining tawnghtham khawh awkah zeinihdah a bawmh? Phungchim rianṭuannak nih a rak bawmh. Phungchim rianṭuannak aa tel tikah lohmun i bawmhnak a herhmi hna kong kha a ruah. Hitin a ti: “Mah caan lioah Jehovah nih khulrang in a ṭhangchomi Baibal cawnpiaknak pakhat a ka pek. Mah nih thazaang tampi a ka ngeihter. Ka nunnak ah lungdaihnak a ka pe bikmi cu phungchim rianṭuannak kha a si.”

15. Mary chimmi in zeidah na cawn?

¹⁵ Mi cheukhat nih an sining ruangah phungchim rian ah tampi kan i tel kho lo tiah an ruah men lai. Cu bantuk ruahnak na ngeih ve ahcun a ṭha bik in na tuahmi nih Jehovah lung aa lawmhter ti kha i cinken. Mary kong kha ruat ṭhan hmanh. Holh dang a hmangmi hna hmun i aa ṭhial tikah san ka tlai lo timi ruahnak a ngei. Hitin a ti: “Caan saupi chung cu a sawhsawh tein a phi ka pek, Baibal caang caangkhat hna ka rel asiloah lohmun ah cazual pakhat kha ka pekṭhenh hna.” Mah holh ṭha tein a thiammi hna he tahchunh tikah san ka tlai lo timi ruahnak a ngei. Asinain a ruah ning kha a rak thlen. An holh ṭha tein a thiam lo hmanhah Jehovah nih a ka hman khawh ti kha a hun  hngalh. Hitin a ti: “Baibal chimmi cu a sawhsawh te a si ko nain mah nih mi pawl nunnak kha a thlen khawh.”

16. A leng ah a chuak kho lo nain phungchim a duhmi hna kha zeinihdah a bawmh khawh hna?

¹⁶ A leng kan chuah khawh lo hmanhah phungchim rian ṭuan kan duhmi kha Jehovah nih a hngalh i a sunsak. Cucaah a kan zohkhenhtu asiloah siibawi le nurse pawl sinah phungchim dingin caan ṭha a kan pek khawh. Hlanlio ah kan rak tuah khawhmi thil le atu ah kan tuah khawhmi thil kha kan tahchunh ahcun kan lung a dong kho men. Asinain atu ah Jehovah nih a kan bawmh ning kha kan hngalhthiam ahcun kan tonmi harnak paoh kha lunglawm tein inkhawh awkah a herhmi thazaang kan ngei lai.

17. Phungchimtu 11:6 ningin a phichuak kan hmuh colh lo hmanhah phungchim rian kha zeicah kan ṭuan peng awk a si?

¹⁷ Biatak thlaici kan tuhmi ah zei kha dah a hram aa sih lai i a ṭhang lai ti kha kan hngal lo. (Phungchimtu 11:6 rel.) Tahchunhnak ah, kum 80 leng a simi unaunu Barbara cu telephone le cakuat in phungchimnak ah hmaan tein aa tel. A cakuat pakhat ah “Na Caah Pathian Nih Aan Tuahpiakmi Thil Hna” timi 2014, March 1, Vennak Innsang [Myanmar] kha a sanh chih. A cakuat cu caan saupi Jehovah Tehte a si ti lomi nuva hna sinah a phan ti kha a hngal lo. Annih nih mah mekazin kha atu le atu an rel i Jehovah nih direct in a ka chawnhmi bantuk a si tiah a vapa nih a ruah. Mah tikah an nuva in an hun i pum ṭhan i kum 27 hnuah a cawlcangmi Jehovah Tehte an hung si ṭhan. Barbara nih a cakuat pakhat ruangah a ṭha tukmi a phichuak a hmuh tikah zeitlukin dah thazaang a ngeih lai ti kha na mitthlam ah cuanter hmanh.

18. Pathian ṭhawnnak in ṭhathnemhnak kan hmuh nakhnga zeidah kan tuah khawh?

¹⁸ Jehovah nih a ṭhawnnak kan hmuh nakhnga caan ṭha tampi a kan pek. Jehovah bawmhnak a simi thlacamnak, Baibal, Khrihfa i hawikomhnak le phungchim rianṭuannak hna i kan i tel tikah Jehovah sining kan i bochan le Jehovah nih bawmh a kan duh ti kan zumh kha kan langhtermi a si. Cucaah “amah lei i an lung soisel awk a um lomi hna cungah a ṭhawnnak kha a langhter” tiah kan zumh zungzal awk a si.—2 Chan. 16:9.