A LUANCIA kum tampi lioah Izipt mi hna nih phaikung in sermi catlap kha caṭialnak caah a bik in an hman ti kha mi tampi nih an hngalh. Greek le Rom mi hna zong nih caṭialnak caah phaikung kha an hman ve. * Asinain phaikung kha caṭialnak ca lawngah si loin tilawng saknak ca zongah an hman ti kha mi tlawmte lawng nih an hngalh.

A luancia 2,500 lioah profet Isaiah nih “Ethiopia ramchung tiva hna ralchan ah” a ummi hna cu “phaikung in sermi tilawng in an rung” tiah a ti. A hnuah Media le Persia nih Babilon an doh tikah Babilon miphun hna i “phaikung in sermi tilawng” hna kha an khangh lai tiah profet Jeremiah nih a chimchung.—Isa. 18:1, 2; Jer. 51:32.

Baibal cu Pathian thawchuah hnawhmi a si caah thilhlun hlathlaitu hna nih Baibal chan lioah phaikung kha tilawng saknak ah an hman ti a langhtermi thil hna an hmuh tikah Baibal siangngakchia hna cu an khuaruah a har lo. (2 Tim. 3:16) Zei hna dah an hmuh? Thilhlun hlathlaitu hna nih Izipt ah phaikung in tilawng an rak ser ti a langhtertu thil a dikthliar hna kha an hmuh.

Izipt mi pawl thlan vanpang ah an suaimi zuk hna nih phaikung an khiah ning le tilawng an sak ning kha a langhter. Pa pawl nih phaikung kha an tan, an tom i hmunkhat ah fek tein an ṭem. Phaikung cu kil pathum a ngei. Cucaah hmunkhat ah an ṭem chih tikah a fek tuk. Cauk pakhat (A Companion to Ancient Egypt) nih phaikung in sermi tilawng cu pe 55 (17 m) a sau kho i khatlei veve ah tilawng a zahtu cu minung 10 asiloah 12 tiang an i tlum kho tiah a ti.

Phaikung cu Izipt ram i Nile Tiva Nelrawn ah tampi hmuh khawh a si. Mah lengah phaikung in tilawng sak cu a fawi. Tilawng nganmi saknak ah thing an hun hman cang ko nain ngatlaitu hna le ramvai mi hna nih cun phaikung in sermi lawng le tilawng hna kha an rak hman rih.

Caan saupi tiang mi pawl nih phaikung in sakmi tilawng kha an rak hman peng rih. Lamkaltu hna chan lioah a nungmi, Greek caṭialtu Plutarch nih amah chan lioah mi pawl nih phaikung in sermi tilawng hna kha an hman rih tiah a ti.