CAWN AWK CAPAR 20
HLA 67 “Phung Kha Chim”
Dawtnak Nih Phungchim Peng Awkah In Forh Ko Seh
“Thawngṭha bia cu miphun kip sinah chim hmasa a si lai.” —MAR. 13:10.
A BIK IN LANGHTERMI
Dawtnak nih lungtho tein le lungthin dihlak in phungchim rianṭuan awkah zeitindah a kan forh.
1. 2023 rian kong meeting ah zei kong hna dah kan theih?
2023 rian kong meeting a ah kan hngalhthiam ning an thlenmi kong le phungchim rianṭuannak kong he aa tlaiin lung cawlcangh awk ngai a simi thawngthanhnak kong hna kan theih. Tahchunhnak ah, mi cheukhat cu A Liannganmi Babilon hrawh a si hnu hmanh ah Jehovah miphun pawl he i fonh awkah caanṭha an ngei kho men timi kong hna kan theih. Cun 2023, November thawk in Pennak kong a chimtu hna nih phungchim rianṭuannak kong he aa tlaiin report pek a hau ti lo timi kong zong kan theih. Mah bantuk thlennak ruang ah phungchim rianṭuannak cu a hlan tlukin a biapi ti lo tinak a si maw? A si hrimhrim lo.
2. Nikhat hnu nikhat in phungchim rianṭuannak cu zeicah a biapit chinchin? (Marka 13:10)
2 Nikhat hnu nikhat in phungchim rianṭuannak cu a biapi chinchin. Zeicah? A caan a um tuk ti lo caah a si. Ni hmanung bik i phungchim rianṭuannak kong he aa tlaiin Jesuh chimchungbia kong kha ruathmanh. (Marka 13:10 rel.) Matthai Baibal ning in Jesuh nih “donghnak” caan a phanh hlanah miphun vialte hna sinah thawngṭha chim a si lai tiah a ti. (Matt. 24:14) Mah nih hi Satan vawlei ṭha lo donghnak caan kha a chim duhmi a si. Jehovah nih a rauhhlan ah a cang dingmi kong he aa tlaiin ‘a ni le a caan’ kha ri a khiah cang. (Matt. 24:36; 25:13; Lam. 1:7) Nifatin mah caan kha kan naih chinchin cang. (Rom 13:11) Cucaah donghnak caan a phanh hlan tiang phung kan chim peng a hau.
3. Phungchim awkah zeinihdah a kan forh?
3 Mah hi kan dihlak in kan ruah awk a simi a biapimi biahalnak a si: Zeicah thawngṭha kan chim? A sawhsawh tein chim ahcun dawtnak ruang ah a si. Phung kan chim tikah thawngṭha kan sunsak, mi pawl kan dawt hna i a bik in Jehovah le a min kan sunsak ti kha kan langhtermi a si. A kong pakhat cio kha i ruah hna u sih.
Thawngṭha Kan Sunsak Caah Phung Kan Chim
4. Thawngṭha kan theih tikah zeitindah kan lehrulh?
4 Na nunnak ah lung cawlcangh awk ngai a simi thil a can lioah zeitindah na um ti kha ruathmanh. Na chungkharmi pakhat fa a ngeihmi asiloah mi pakhat nih na herh taktakmi rian aan pekmi a si kho men. Mah thawngṭha kha na chungkhar le na hawile sinah chim na duh tuk lai ti cu a fiang ko. Zeizong vialte lak ah a ṭha bikmi thawngpang a simi Pathian Pennak kong na theih lioah tah cutin na si maw?
5. Baibal biatak na theih hmasa bik lioah zeitindah na um? (Hmanthlak zong zoh.)
5 Baibal in biatak na theih hmasa bik lioah zeitindah na um ti kha ruat ṭhan hmanh. Vancung na Pa nih aan dawt, amah a biami chungkharmi siter an duh, lungfahnak le sifah harnak ka donghter lai tiah bia aan kamh, na dawtmi a thimi hna cu vawlei thar ah an tho ṭhan lai i nan i tong ṭhan lai timi ruahchannak aan pekmi kong le a dang a kong tampi zong kha na hun hngalh. (Mar. 10:29, 30; Johan 5:28, 29; Rom 8:38, 39; Biat. 21:3, 4) Mah biatak nih na lung aan suk tuk. (Luka 24:32) Na hngalhmi kong kha na duh tuk i mah kong kha mi kip sinah chim na duh.—Jeremiah 20:9 he tahchunh.
Baibal in biatak kong kan theih hmasa bik lioah kan lung a cawlcang tuk i mi kip sinah mah kong kha chimh kan duh hna (Catlangbu 5 zoh)
6. Ernest le Rose hmuhtonnak in zeidah na cawn khawh?
6 Mah hmuhtonnak kong hi ruathmanh. Ernest b timi unaupa cu kum hra a si ah a pa nih a thihtak hna. Ernest nih hitin a ti: “Hitin khua ka ruat: ‘Ka pa cu van ah a kai hnga maw? Asiloah a zungzal in maw a thih lai?’ Pa a ngeimi a dang ngakchia pawl kha ka nahchuah hna.” Ernest cu a pa thlan ah a kal peng, cun a khuk aa bil i hitin thla a cam: “Pathian zaangfahnak in ka pa hi khoika ah dah a um ti kha theih ka duh.” A pa a thih in kum 17 hnuah Ernest cu Baibal cawnpiak awkah sawm a si i a cohlan colh. A thimi hna cu thi thlup in aa hngilhmi bantuk in zei hmanh an hngal lo i hmailei ah an tho ṭhan lai timi Baibal biakam kong a hngalh tikah a lung a cawlcang tuk. (Pct. 9:5, 10; Lam. 24:15) A donghnak ah caan saupi chung hngalh a duhmi biahalnak a phi kha a hun hngalh. Ernest cu a cawnmi Baibal biatak ruang ah a lung a cawlcang tuk. A nupi Rose zong Baibal a cawng ve i anih zong a cawnmi kong kha a duh tuk ve. Cucaah 1978 ah tipil an ing. An zumhnak kong kha an chungkharmi, an hawile le a dang ngaih a duhmi hna sin paoh ah lungtho tein an chimh hna. A phichuak cu Ernest le Rose nih mi 70 leng kha Jehovah kong hngalh awk le tipil in awkah an bawmh khawh hna.
7. Baibal biatak kha kan sunsak taktak ahcun zeidah kan tuah lai? (Luka 6:45)
7 Baibal biatak kha kan sunsak taktak ahcun midang sinah chim loin kan um kho lai lo. (Luka 6:45 rel.) Jesuh sinah hitin a chimmi kumzabu pakhatnak i zultu hna bantuk in kan ruah ve lai: “Kan hmuh komi le kan theih komi cu chim lo cun kan um kho bal lai lo.” (Lam. 4:20) Biatak kha kan sunsak tuk caah mi tam khawh chung tam sinah mah kong kha chimh kan duh hna.
Mi Pawl Kan Dawt Hna Caah Phung Kan Chim
8. Midang sinah zeicah thawngṭha chim kan duh? (“ Mi Kha Daw Hna Law Zultu Siter Hna” timi rinli kulh ah zoh.) (Hmanthlak zong zoh.)
8 Jehovah le a Fapa bantuk in mi pawl kha kan dawt hna. (Ptb. 8:31; Johan 3:16) ‘Pathian a ngei lomi’ le ‘ruahchannak a ngei lomi’ pawl kha kan zaangfak tuk hna. (Efe. 2:12) Buaibainak tam tuk an ngeih caah khor thukpi chung ah a tlami bantuk in an i ruat. Asinain kannih cu leng ah a chuahter khomi hri kan ngei. Mah cu Pathian Pennak kong thawngṭha a si. Mi kha kan dawt hna i an cung ah zaangfahnak kan ngeih caah kan si khawh chung in thawngṭha kha chimh kan duh hna. Mah thawngṭha an theih tikah ruahchanhnak an ngei, atu an nunnak ah an i nuam deuh i vawlei thar ah “nunnak taktak a simi” zungzal nunnak hmuh awkah caanṭha a ngeihter hna.—1 Tim. 6:19.
Mi pawl dawtnak le zaangfahnak nih kan si khawh chung in thawngṭha chimh hna awkah a kan forh (Catlangbu 8 zoh)
9. Hmailei kong he aa tlaiin zei ralrinnak dah kan pek hna, zeicah? (Ezekiel 33:7, 8)
9 Mi pawl dawtnak nih hi vawlei ṭha lo donghnak caan cu a nai tuk cang tiah ralrin pek hna awk zong ah a kan forh. (Ezekiel 33:7, 8 rel.) Jehovah a bia lomi kan chungkharmi hna i tel in mi kip cung ah zaangfahnak kan ngei. Mi tampi cu “vawlei hramthawk in nihin ni tiang ah a ummi harnak a zeihmanh nakin cu caan i a ummi harnak cu a let tampi in a fak lai. Cu bantuk harnak cu a um zong a um bal ti lai lo” timi kong hngalh loin khua an sa. (Matt. 24:21) Cucaah mah biaceihnak caan chung ah zeidah a cang lai timi kong kha chimh kan duh hna. A hmasa bik ah a hmaan lomi biaknak cu hrawh a si lai i mah hnuah hi vawlei pumpi cu Armageddon in hrawh a si cang lai. (Biat. 16:14, 16; 17:16, 17; 19:11, 19, 20) Atu ah mah ralrin peknak kha mi tam khawh chung tam nih an lehrulh nakhnga le a thiangmi biaknak ah an i tel khawh ve nakhnga thla kan cam. Kan dawtmi kan chungkharmi hna i tel in atu ah mah ralrin peknak a ngai duh lomi hna kong ah tah zeitin?
10. Mi pawl ralrin pek peng cu zeicah a biapit tuk?
10 A hmasa capar ah a fianter cang bantuk in a Liannganmi Babilon hrawh a simi an hmuh tikah an lungthin aa thlengmi hna kha Jehovah nih a khamh khawh men hna. Cutin a si ahcun atu ah mi pawl ralrin pek peng cu a biapi tukmi a si. Mah hi ruathmanh: Atu in kan chimh hna lawng ah a hnuah an i cinken dingmi thil cheukhat an ngei lai. (Ezekiel 33:33 he tahchunh.) Ralrin kan pekmi hna kha an i cinken ṭhan lai i mah nih a caan a tlai tuk hlan ah a thiangmi biaknak ah i fonh ding in a forh hna lai. A fakmi “li a hun i hnin” hnuah a lungput aa thlengmi Filipi khua i thonginn bawi bantuk in A Liannganmi Babilon hrawhnak nih vawleicung pumpi a hninh dih hnuah atu ah thawngṭha a lehrulh duh lomi hna cu an lungput aa thleng kho ve men.—Lam. 16:25-34.
Jehovah Le A Min Kan Sunsak Caah Phung Kan Chim
11. Jehovah kha zeitindah sunparnak, upatnak le lianhngannak kan pek khawh? (Biathlam 4:11) (Hmanthlak zong zoh.)
11 Thawngṭha kan chimnak a biapi bikmi a ruang cu Jehovah Pathian le a min kan sunsak caah a si. Phungchim rian kha kan dawtmi Pathian thangṭhat khawhnak lam in kan hmuh. (Biathlam 4:11 rel.) Jehovah Pathian cu zumhfek tein amah a biami hna sinin sunparnak, upatnak le lianhngannak hmuh awkah aa tlak ti kha kan hna a tla. Midang sinah zumhnak he Pathian cu “zeizong vialte” sertu a sinak kong le amah ruang ah kan um khawhmi a si timi kong kan chimh hna tikah Pathian kha sunparnak le upatnak kan pekmi a si. Kan sining nih a pek ning in phungchim rianṭuannak ah kan caan, kan thazaang le kan thilri kan hman tikah kan thazaang kha Pathian kan pekmi a si. (Matt. 6:33; Luka 13:24; Kol. 3:23) A sawhsawh tein chim ahcun kan dawtmi Pathian kong kha chim kan duh tuk. Cun midang sinah a min le zei bantuk Pathian dah a si timi kong zong chim kan duh. Zeicah?
Kan sining nih a pek ning in phungchim rianṭuannak ah kan caan, kan thazaang le kan thilri kan hman tikah kan thazaang kha Pathian kan pekmi a si (Catlangbu 11 zoh)
12. Phungchim rianṭuannak ah zeitindah Jehovah min kan thianter khawh?
12 Jehovah kan dawtnak nih a min thianter awkah a kan forh. (Matt. 6:9) Satan nih Jehovah min kong he aa tlaiin a chimmi cu a hmaan lomi a si ti kha midang sinah chimh kan duh hna. (Gen. 3:1-5; Job 2:4; Johan 8:44) Phung kan chim tikah kan bia a ngaimi hna kha Jehovah cu ahodah a si i zei bantuk Pathian dah a si taktak ti kha chimh kan duh hna. Cun a lang bikmi a sining cu dawtnak a si, a uk ning cu a ding i a dik, a Pennak nih a rauhhlan ah sifah harnak vialte a donghter dih lai i minung chungkhar ah daihnak le lawmhnak a umter lai timi kong kha mikip nih hngal hna seh ti zong kan duh. (Salm 37:10, 11, 29; 1 Johan 4:8) Midang sinah mah kong kan chimmi cu Jehovah min kan thiantermi a si. Kan min ning in kan nung timi hngalhnak zong nih lungsinak a kan pek. Zeitin in dah?
13. Jehovah Tehte tiah auh kan simi kha zeicah kan i uanthlar? (Isaiah 43:10-12)
13 Jehovah nih a “tehte” tiah a kan auh. (Isaiah 43:10-12 rel.) A luancia kum tlawmpal lio i Uktu Bu sinin a rami cakuat ah hitin a ti: “Kan ngeih khawhmi lak ah a sunglawi bikmi tinvo sung cu Jehovah Tehte tiah auh kan simi hi a si.” Zeicah? Mah tahchunhnak hi ruathmanh. Thil ṭha lo na tuah tiah sualpuh na si hei ti u sih. Mah sualpuhnak cu lihbia a si i cu bantuk thil a tuah bal lomi miṭha na si ti kha mi dang sinah a chim hngami mi pakhat na herh. Ahodah na chimh lai? Na hngalh i na zumhmi le midang nih an zumh dingmi minṭha a ngeimi pakhat sinah na chimh lai ti cu a fiang ko. Cucaah Jehovah nih a Tehte si ding in a kan thimmi cu kan kong ṭha tein a hngalh ca le midang sinah amah lawng hi a hmaanmi Pathian a si ti kha an chimh hna lai tiah a kan zumh caah a si. A Tehte sinak tinvo sung kha kan sunsak tuk caah caanṭha kan hmuh fatin a min kha mi kan hngalhter hna i a kong he aa tlaiin lihbia kha kan phuan. Cuticun uangthlar ngaiin kan i lakmi Jehovah Tehte timi min he aa tlak in kan nung.—Salm 83:18; Rom 10:13-15.
Donghnak A Phanh Hlan Tiang Phung Kan Chim Peng Lai
14. Hmailei ah lung cawlcangh awk ngai a simi zei thil dah a cang lai?
14 Hmailei ah a cang dingmi kong hngalh awkah kan lung a cawlcang tuk. Jehovah thluachuah thawng in harnak nganpi aa thawk hlan ah mi tampi nih biatak an cohlan lai tiah kan i ruahchan. A har bikmi caan a simi harnak nganpi chung hmanh ah mi tampi cu Satan vawlei in an chuak lai i kanmah he Jehovah an thangṭhatṭi lai caah kan lung a cawlcang tuk.—Lam. 13:48.
15-16. Zeidah kan tuah peng awk a si, zeitik tiang dah?
15 Mah caan chung ah zeitikhmanh ah kan ṭuan ṭhan bal ti lai lo dingmi a biapimi rian kan ngei. Mah cu vawleicung pumpi ah Pathian Pennak kong thawngṭha chim kha a si. Caankhatte ah a rauhhlan ah a cang dingmi kong he aa tlaiin mi kha ralrin kan pek peng hna zong a hau. Mi nih hi vawlei ṭhalo donghnak cu khualrang in a ra lai ti kha an hngalh a hau. Cun biaceih caan a phanh tikah kan chimmi thawngpang cu Jehovah Pathian sinin a rami a si ti kha an hngalh lai.—Ezek. 38:23.
16 Cucaah zei tuah awkah dah bia kan khiah awk a si? Dawtnak nih thawngṭha sunsak awk, mi pawl dawt awk le Jehovah le a min sunsak awkah a kan forh. Cucaah Jehovah nih “chim ti hlah u” a kan ti hlan tiang a biapimi lungput he lungtho tein phung chim peng hna u sih.
HLA 54 Hi Cu Lam A Si
a 2023, October 7 ah Jehovah Tehte Hna nih U.S.A, New York, Newburgh khua i Assembly Hall ah rian kong meeting an tuah. Program dihlak kha JW Broadcasting® ah thlah a si. Ṭhen 1nak kha 2023, November ah thlah a si i Ṭhen 2 kha 2024, January ah thlah a si.
b 2015, February 1, Vennak Innsang, “Baibal Nih An Nuning A Thlen—Zumhawk A Tlak I A Fiangmi Baibal A Phi Nih Ka Lung A Ka Suk Tuk” timi capar ah zoh.