BAIBAL chan ah thilri zohkhenhtu nih midang inn asiloah thilri kha a zohkhenh. “Thilri zohkhenhtu” tiah lehmi Hebru le Greek biafang nih a caan ah hruaitu asiloah innchung thil a tawlreltu kha a sawh duhmi a si.

Jakob fapa Josef cu Izipt ram i sal a tan lioah a bawipa inn i thilri vialte zohkhenhtu a hung si. A bawipa nih “a ngeihmi thil vialte cu Josef kut chungah khan a chiah dih.” (Gen. 39:2-6) A hnuah Josef cu amah thengte Izipt ram ah nawl a ngei tukmi uktu a hung si, mah tikah Josef nih a inn zohkhenh awkah mi pakhat kha a thim.—Gen. 44:4.

Jesuh chan ah lo ngeitu hna cu an lo he aa hlatnak khua ah an um. Cucaah lo ngeitu hna nih nifatin lo i rian a ṭuanmi hna zohkhenh awkah zohkhenhtu kha an thim hna.

Thilri zohkhenhtu in rian ṭuan awkah ahodah sining a tlinh? Kumzabu pakhatnak i Rom caṭialtu Columella nih hruaitu asiloah thilri zohkhenhtu in rian pek a simi sal pakhat cu lo rian ṭuannak ah “hmuhtonnak a ngeimi,” “puarhrang loin rianṭuantu pawl a tlangtla khotu” a si awk a si tiah a ti. Cun hitin a ti chap: “Thilri zohkhenhtu pakhat caah a biapi tukmi cu a hngalh lomi kha a hngalmi bantukin um lo awk le thil thar cawn duhnak lungthin ngeih zungzal awk kha a si.”

Baibal ah thilri zohkhenhtu le a rian kha Khrihfabu i rian cheukhat he zong a tahchunh. Tahchunhnak ah, lamkaltu Peter nih Khrihfa pawl kha “Pathian laksawng kengtu ṭha bantukin” Pathian pekmi thilti khawhnak kha “midang ca ṭhatnak” caah hman dingin tha a pek hna.—1 Pet. 4:10.

Jesuh theng nih thilri zohkhenhtu kong tahchunhnak kha Luka 16:1-8 ah a hman. Mah lengah Siangpahrang pakhat in a ratnak ding hmelchunhnak kong a chimchung lioah Jesuh nih a zultu pawl kha “zumh awk a tlakmi le a fimmi sal” asiloah zumhawk a tlakmi zohkhenhtu kha ka thim hna lai tiah a ti hna. Mah zohkhenhtu hna i a biapi bikmi an rian cu donghnak caan chungah Khrih zultu pawl thlarau rawl pek kha a si. (Matt. 24:45-47; Luka 12:42) Zumhnak a fehtermi cauk pawl vawleicung pumpi ah kan hmuh khawh nakhnga a kan timhtuahpiak caah zumhawk a tlakmi le a fimmi sal cungah kan i lawm tuk.