1. Jehovah nih zei tuahnak nawl dah a kan pek?

JEHOVAH nih zeitindah kan nun lai timi kong he aa tlaiin biakhiahnak nawl a kan pek. A ṭhami biakhiahnak tuah khawh ning kha a kan cawnpiak i a lung a lawmhtermi biakhiahnak kan tuah tikah hlawhtlinnak hmuh awkah a kan bawmh. (Salm 119:173) Baibal ah kan hmuhmi fimnak kha kan zulh deuhdeuh tikah a ṭhami biakhiahnak kan tuah khawh deuhdeuh ve.—Heb. 5:14.

2. Biakhiahnak kan tuah hnuah zeidah kan i harh khawh men?

² Asinain a ṭhami biakhiahnak kan tuah tik hmanhah mah kha liim awkah kan i harh men lai. Tahchunhnak cheukhat hi ruathmanh: Mino unaupa nih Baibal kha a uk ningin rel awkah biakhiahnak a tuah. Zarh tlawmpal chung cu a rel ko nain a kong cheukhat ruangah a ngol ṭhan. Unaunu pakhat nih hmaanhmaan hmaikal ṭuan dingin biakhiahnak a tuah, asinain a thawk lai caan kha a thawn ṭhan lengmang. Khrihfa upa phukhat nih an Khrihfabu ah tuukhal lennak tuah hna dingin biakhiahnak an tuah. Asinain thla tampi a rauh hnuah an tuah ṭhan ti lo. Mah thil sining cu aa lo dih lo, asinain aa lawhnak a um. Biakhiahnak cu an tuah, asinain an biakhiahnak ningin an tuah lo. Kumzabu pakhatnak i Korin Khrihfa hna cu cu bantuk zuamcawhnak an rak tong. An sinin zeidah kan i cawn khawh ti kha i ruah hna u sih.

3. Korin Khrihfa hna nih zei biakhiahnak dah an tuah, asinain zeidah a cang?

³ AD 55 hrawngah Korin Khrihfa hna nih a biapi tukmi biakhiahnak an tuah. Jerusalem le Judea ah a ummi unau pawl cu harnak le pamnak an tong i a dang Khrihfabu nih anmah bawmhnak caah tangka an kholh hna ti kha an hngalh. Korin Khrihfa hna cu zaangfahnak a ngeimi le a siangmi an si caah  unau pawl kha bawmh an duh ve hna. Cucaah lamkaltu Paul kha zeitindah kan bawmh khawh hna lai tiah an hal. Lamkaltu Paul nih an Khrihfabu ah lamhruainak ca a kuat hna i Titas kha tangka kholh dingin rian a pek. (1 Kor. 16:1; 2 Kor. 8:6) Thla tlawmpal hnuah Korin Khrihfa hna nih bia an khiahmi ningin tangka an pe ti lo ti kha Paul nih a hngalh. A phichuak cu a dang Khrihfabu thawhlawm he Jerusalem ah kuat caan a phanh tikah an laksawng cu timhcia a si ti lo.—2 Kor. 9:4, 5.

4. Paul nih Korin Khrihfa hna kha 2 Korin 8:7, 10, 11 ningin zei tuah awkah dah tha a pek hna?

⁴ Korin Khrihfa hna nih a ṭhami biakhiahnak an tuah. A fekmi zumhnak le siang ngaiin pek duhnak lungthin an ngeih caah Paul nih a thangṭhat hna. Asinain an rak thawk cangmi rian kha liim awkah tha zong a pek hna. (2 Korin 8:7, 10, 11 rel.) Zumhfekmi Khrihfa hna hmanh nih an biakhiahnak ningin tuah awkah an i harh ti kha mah nih a kan cawnpiak.

5. Zei biahalnak dah kan i ruah hna lai?

⁵ Kannih zong Korin Khrihfa hna bantukin kan biakhiahnak ningin tuah awkah kan i harh men lai. Zeicah? Mitling lo kan si caah a caan kan thawn khawh men. Asiloah kan i ruahchan lomi thil hna kan tong kho men. Mah nih kan biakhiahnak ningin tuah awkah a harter khawh. (Pct. 9:11; Rom 7:18) Kan biakhiahnak kha zeitindah kan dothlat ṭhan khawh i kan biakhiahnak thlen a herh le herh lo kha zeitindah kan hngalh khawh? Cun kan thawk cangmi rian kha zeitindah kan liim khawh?

6. Kan biakhiahnak cu zeitikah dah thlen a herh khawh men?

⁶ A biapimi biakhiahnak cheukhat cu thlen khawh an si ti lo. Tahchunhnak ah, Jehovah biak ding timi kan biakhiahnak kha fek tein kan i tlaih i kan innchunghawi cungah zumhawktlak tein um peng dingin bia kan khiah. (Matt. 16:24; 19:6) Asinain a dang biakhiahnak cheukhat cu thlen a hau men lai. Zeicah? Thil sining aa thlen caah a si. A ṭha bikmi biakhiahnak tuah khawh awkah zeinihdah a kan bawmh khawh?

7. Zei caah dah thla kan cam awk a si, zei ruangah?

⁷ Fimnak hmuh awkah thla cam. Jehovah lamhruainak thawngin Jeim nih hitin a ti: “Fimnak a baumi nan um ahcun, Pathian sinah thla cam sehlaw Pathian nih a pek ko lai.” (Jeim 1:5) Kan dihlak in lam khatkhat in “fimnak a baumi” kan si. Cucaah biakhiahnak na tuah tik le na biakhiahnak thlen a herh tikah Jehovah sinah bawmhnak hal. Jehovah nih a ṭhami thimnak tuah khawh awkah aan bawmh lai.

8. Biakhiahnak kan tuah hlanah zeidah kan hlathlai awk a si?

⁸ Ṭha tein hlathlainak tuah. Baibal kha hlathlai, Jehovah bupi nih a kan chuahpiakmi cauk kha rel law a ṭhami ruahnak cheuhnak aan pe khomi hna he bia i ruah. (Ptb. 20:18) Rian i thlennak, i ṭhialnak asiloah phungchim rianṭuannak ah aan bawm kho hngami fimcawnnak kong he aa tlaiin biakhiahnak na tuah hlanah cutin hlathlainak tuah cu a biapi tukmi a si.

9. Kanmahle kanmah dingfel tein kan i dothlat ahcun zeitindah ṭhatnak kan hmuh lai?

⁹ Bia na khiahnak a ruang kha ṭha tein dothlat. Jehovah nih thil pakhatkhat kan tuahnak a ruang kha biapi ah a chiah. (Ptb. 16:2) Zei thil paohah dingfel tein um hna seh ti a duh. Cucaah biakhiahnak kan tuah tikah cutin kan tuahnak a ruang he aa tlaiin kanmahle kanmah cungah siseh, midang cungah siseh a dingfelmi si kha kan duh. A dingfel lomi kan si ahcun kan biakhiahnak ningin tuah awkah kan i harh lai. Tahchunhnak ah, mino unaupa pakhat nih hmaanhmaan hmaikal ṭuan dingin bia a khiah men lai. Asinain caan tlawmpal hnuah hal a simi suimilam kha tlinh awkah aa harh i phungchimnak ah aa nuam ti lo. Hmaikal ka ṭuannak  a ruang cu Jehovah lunglawmhter ka duh caah a si tiah a ruah men lai. Asinain a ruang taktak cu a nu le a pa asiloah midang lunglawmhter a duh caah a si kho men.

10. Thlennak tuah awkah zeidah a herh?

¹⁰ Kuak zuk ti lo dingin biakhiahnak a tuahmi Baibal a cawngmi pakhat kong kha ruathmanh. A hmasa ahcun aa harh tuk, zarhkhat asiloah zarhhnih chung kuak zuk loin a um kho nain a hnuah a zuk ṭhan lengmang. Asinain a donghnak ah cun aa phiat khawh. Jehovah a dawt ca le a lunglawmhter a duh caah mah ziaza kha a hloh khawh.—Kol. 1:10; 3:23.

11. Zeicah cuset khaset tiin hmuitinh na ngeih awk a si?

¹¹ Cuset khaset tiin hmuitinh ngei. Na hmuitinh kha cuset khaset tiin na chiah ahcun phanh awkah naa fawih deuh lai. Tahchunhnak ah, nifatin Baibal rel awkah bia na khiah men lai. Asinain cuset khaset tiin timhtuahnak na ngeih lo ahcun naa tinhnak ningin na tuah kho lai lo. * Asiloah Khrihfa upa hna nih tuukhal lennak hmaan tein tuah awkah biakhiahnak an tuah men lai. Asinain caan tlawmpal hnuah an biakhiahnak kha an zul ti lo. Hlawhtlinnak an hmuh khawh nakhnga mah biahalnak hna hi an i hal kho: “Tuukhal lennak in a hleiin ṭhathnemhnak a hmu hngami unau pawl kha kan hngal hna maw? Anmah pawl len awkah cuset khaset tiin a caan kan pe maw?”

12. Zeidah kan tuah a herh khawh men, zeicah?

¹² Thil sining taktak a hmu thiammi si. Tuah kan duhmi paoh tuah dih awkah a caan, thazaang asiloah thilti khawhnak kan ngei lo. Cucaah thil sining taktak a hmu thiammi le a tlarimi si. A herh ahcun na tuah khawh ti lo dingmi na biakhiahnak hna kha na thlen a hau men lai. (Pct. 3:6) Asinain na biakhiahnak kha na dothlat ṭhan, cun a herh ningin na thlen i ka liim khawh lai tiah na ruah hei ti u sih. Na thawk cangmi rian liim khawh awkah aan bawmh khomi, na tuah khawhmi thil panga a um.

13. Na biakhiahnak ningin tuah khawh awkah na herhmi thazaang kha zeitindah na hmuh khawh?

¹³ Tuah khawhnak thazaang ngeih awkah thla cam. Na biakhiahnak ningin tuah khawh awkah Pathian nih “tuah khawhnak ṭhawnnak” aan pek khawh. (Fil. 2:13, NW) Cucaah na herhmi ṭhawnnak aan pek nakhnga Jehovah sinah a thiang thlarau kha hal. Ka thlacamnak cu a ka let colh lo tiah na ruah hmanhah a zungzal in thlacam. Jesuh nih hitin a ti: “Hal u law [thiang thlarau] pek nan si lai.”—Luka 11:9, 13.

14. Phungthlukbia 21:5 ah aa telmi phunglam nih na biakhiahnak ningin tuah khawh awkah zeitindah an bawmh khawh?

¹⁴ Timhtuahnak ngei. (Phungthlukbia 21:5 rel.) Na thawkmi zei rian paoh liim khawh awkah timhtuahnak na ngeih a hau. Cun naa timhtuahmi ning zongin na tuah a hau. Cu bantukin biakhiahnak na tuah tikah mah ningin na tuah khawh nakhnga tuah a herhmi thil pawl kha cazin tuah. Rian ngan kha rian hme tete in ṭhen, cutin na tuah ahcun liim awkah naa fawih deuh lai. Paul nih Korin Khrihfa hna kha amah a phanh hnu lawngah tangka kholh si loin “zarh i a nikhatnak ni fatin” an tangka kha a dang tein chiah dingin tha a pek hna. (1 Kor. 16:2, NW) Cun rian ngan kha rian hme tete in ṭhennak nih ka liim kho lai lo timi ruahnak ngeih lo awk zongah aan bawmh khawh.

15. Timhtuahnak na ngeih hnuah zeidah na tuah khawh?

¹⁵ Tuah naa timhmi kha ca in na ṭial ahcun tuah awkah naa fawih deuh lai. (1 Kor. 14:40) Tahchunhnak ah, Khrihfa upa pawl cu biakhiahnak an tuahmi kip kha ṭial awkah Khrihfa upa pakhat kha rianpek dingin lamhruainak pek an si. Anih nih ahodah rian pek a  si i zeitikah dah liim ding a si timi biakhiahnak hna zong kha a ṭial a hau. Khrihfa upa hna nih mah lamhruainak kha an zulh tikah an biakhiahnak ningin an tuah khawh deuh. (1 Kor. 9:26) Nifatin na nunnak zongah cutin tuah khawh i zuam. Tahchunhnak ah, nifatin na tuah dingmi thil kha cazin na tuah khawh. Cun na tuah hmasa dingmi kha a hmasa bik ah ṭial. Mah nih na thawk cangmi rian liim awk lawng si loin caan tlawmpal chungah tam deuh ṭuan khawh awk zongah aan bawmh lai.

16. Na biakhiahnak ningin tuah khawh awkah zeidah a herh, mah kha Rom 12:11 ah zeitindah a langhter?

¹⁶ Fakpi in i zuam. Naa timhtuahmi ningin tuah khawh awk le na thawkmi rian liim khawh awkah fakpi in naa zuam a hau. (Rom 12:11 rel.) Paul nih Timote kha cawnpiaktu ṭha si awkah i zuam “lengmang” dingin le mah kha “ngol loin tuah lengmang” dingin a forh. Jehovah caah tuah kan duhmi zei thil paohah Paul ruahnak cheuhnak kha kan zulh khawh.—1 Tim. 4:13, 16.

17. Na biakhiahnak ningin tuah khawh awkah Efesa 5:15, 16 kha zeitindah na zulh khawh?

¹⁷ Na caan kha fimkhur tein hmang. (Efesa 5:15, 16 rel.) Na biakhiahnak ningin tuah khawh awkah a caan suai law mah kha thleng ti hlah. Na rian thawk awkah na tlam a tlin dih tiang hngak hlah. Na tlam a tlin dih caan cu a um men lai lo. (Pct. 11:4) A biapi deuhmi thil tuahnak caah na herhmi a caan le thazaang kha a biapi tuk lomi thil tuahnak ah tam tuk na hman sual nakhnga lo i ralring. (Fil. 1:10) A si khawh ahcun midang nih hna an in hnawh nakhnga lo a caan kha ṭha tein i thim. Lungthin na pek khawh nakhnga a caan pek na herhnak kha midang hngalhter hna. Cun na phone kha phit law na e-mail asiloah social media hna kha a hnuah check. *

18-19. A har tik caan hmanhah na biakhiahnak ningin tuah peng khawh awkah zeinihdah aan bawmh khawh?

¹⁸ A phichuak ah lungthin pe. Na biakhiahnak a phichuak cu khual na tlawn duhnak hmun he aa lo. Mah hmun kha phanh na duh taktak ahcun cuka hmun phanh khawh awkah lam dangin kal a hau ti na hngalh hmanhah na kal peng ko lai. Cu bantukin kan biakhiahnak a phichuak ah lungthin kan pek ahcun dawnkhantu thil asiloah harnak hna kan ton hmanhah fawi tein kan lung a dong lai lo.—Gal. 6:9.

¹⁹ A ṭhami biakhiahnak tuah cu a har i mah biakhiahnak liim cu zuamcawhnak a si kho. Asinain Jehovah bawmhnak thawngin na thawk cangmi rian kha liim khawh awkah a herhmi fimnak le thazaang na hmu kho.