1. Kanmahle kanmah zei biahalnak dah kan i hal khawh men?

 HMAILEI ah a cang dingmi a hmaan lomi biaknak hrawhnak, Magog ram i Gog dohnak le Armageddon raltuknak kong hna na ruah tikah a caan ah na thin a phang maw? Hitin na ruat bal maw: ‘Cu bantuk ṭih a nungmi thil hna a can tikah zumhfek tein ka um kho lai maw?’ Cutin na ruah bal ahcun cherhchanmi Baibal caang i Jesuh bia nih aan bawmh lai. Jesuh nih a zultu pawl kha hihin a ti hna: “Khuaruahhar lungrethei in um hlah u. Pathian kha zum u.” (Johan 14:1) A fekmi zumhnak nih hmailei ah a cang dingmi thil hna inkhawh awkah a kan bawmh lai.

2. Kan zumhnak kha zeitindah kan fehter khawh, hi capar ah zei kong dah kan i ruah hna lai?

² Atu ah kan tonmi hneksaknak kan tawnghtham ning kan i dothlatnak thawngin hmailei ah kan ton dingmi hneksaknak zeitindah kan tawnghtham lai i zei zawn ah dah kan zumhnak kan fehter lai ti kha kan hngalh lai. Mah nih hmailei ah kan ton dingmi hneksaknak hna kha inkhawh awkah a kan bawmh lai. Hi capar ah Jesuh zultu pawl nih zumhnak tam deuh in langhter a herhnak thil sining pali kong kha kan i ruah hna lai. Cun tuchan zongah cu bantuk hneksaknak kan tong kho timi kong le mah thil hna nih hmailei caah zeitindah a kan timhtuah khawh timi kong zong kan i ruah hna lai.

3. Matthai 6:30, 33 ah a chim bantukin zumhnak he aa tlaiin Jesuh nih zei kong dah fiang tein a chim?

³ Chungkhar lu in pa pakhat nih a chungkhar pawl herhmi eidin, thilpuan le umnak inn hna bawmh a duhmi hna cu a  phung a si ko. Asinain atu bantuk harnak caan ah cutin bawmh cu a fawi peng lo. An si khawh chungin an i zuam ko nain rian dinhter le rian dang hmuh ti lo zongin an um kho. Khrihfa he aa tlak lomi rian a si caah an cohlan lomi zong a si kho. Cu bantuk thil sining hna ah Jehovah nih lam khatkhat in kan chungkhar herhmi a kan bawmh lai ti kha fek tein kan zumh a hau. Mah kong kha Jesuh nih Tlangcung Cawnpiaknak ah fiang tein a rak chim. (Matthai 6:30, 33 rel.) Kannih zong Jehovah nih a kan kaltak lai lo ti kha fek tein kan zumh ahcun Pennak kha hmasa bik ah kan chiah peng khawh lai. Cun Jehovah nih pumsalei kan herhmi zeitindah a kan bawmh ti kha kan hmuh tikah amah he kan i naih deuh lai i kan zumhnak zong a fek chin lai.

4-5. Pumsalei herhbaunak ruangah lungrethei in a ummi chungkhar pakhat cu zeitindah bawmhnak an hmuh?

⁴ Jehovah nih pumsalei herhbaunak ruangah lungrethei in a ummi Venezuela i chungkhar pakhat a bawmh hna ning kong hi ruathmanh. A hlan ah cun Castro chungkhar cu an ngeihmi lo in an pum an i cawm kho. Asinain a hnuah meithal aa tlaihmi phu hna nih an lo kha an chuh hna. An pa Miguel nih hitin a ti: “Atu cu kan hlanmi hmun hmete ah lo kan tuah. Nifatin khua a deile cangka in Jehovah sinah nikhat caah kan herhmi thil hna rak kan pe tiah thla ka cam.” An chungkhar nunnak cu a har tuk ko nain nifatin an herhmi thil hna kha vancung kan Pa nih a kan pek lai ti kha an zumh. Cucaah pumhnak le phungchimnak ah hmaan tein an i tel. An nunnak ah Pennak kha hmasa bik ah an chiah caah Jehovah nih an herhmi kha a pek hna.

⁵ Miguel le a nupi Yurai nih harnak an ton chung dihlak Jehovah nih zeitindah a zohkhenh hna ti kha an hngalh. A caan ah an herhmi pawl bawmh awk asiloah aa tlakmi rian hmuh awkah Jehovah nih unau pawl hmangin a bawmh hna. A caan ah zung ṭengnge i har tongmi hna bawmhnak timhtuahnak in a hrampi an herhmi kha a bawmh hna. Jehovah nih zeitikhmanh ah a kaltak bal hna lo. Cucaah an chungkhar ningin an zumhnak cu a fek chin. Jehovah nih a bawmh hna ning an hmuh hnuah an fanu upa bik Yoselin nih hitin a ti: “Jehovah nih a kan bawmh ning fiang tein ka hmuhmi nih ka lung a ka suk tuk. Anih cu a ka bawm zungzal dingmi ka hawikom in ka hun hmuh khawh. Kan chungkhar tonmi heksaknak hna nih hmailei ah kan ton dingmi, a fak deuhmi hneksaknak caah timhcia a kan siter.”

6. Chawlehnaklei i harnak na ton tikah na zumhnak kha zeitindah na fehter khawh?

⁶ Nangtah chawlehnaklei ah harnak na tong ve maw? Na ton ve ahcun mah cu a har tuk ko lai. Asinain mah bantuk harnak lakah na zumhnak kha na fehter khawh. Jehovah sinah thlacam, cun Matthai 6:25-34 i Jesuh bia kha rel law ruat. Pathian rianṭuannak ah an rian aa tamtermi tuchan unau pawl kha Jehovah nih a bawmh hna ning hmuhtonnak kong hna kha ruat. (1 Kor. 15:58) Cutin na tuah ahcun  Jehovah nih nangmah he nan sining aa khatmi midang a bawmh hna bantukin nang zong aan bawmh ve lai ti kha na zumh chin lai. Pathian nih na herhmi kha a hngalh i bawmh khawh ning lam zong a hngalh. Na nunnak ah Jehovah nih aan bawmh ning kha na hmuh tikah na zumhnak cu a fek chin lai i hmailei ah mahnak in a fak deuhmi hneksaknak hna kha na inkhawh lai.—Hab. 3:17, 18.

7. Matthai 8:23-26 ningin “thlichia” nih zultu pawl zumhnak kha zeitindah a rak hneksak?

⁷ Voikhat cu Jesuh le a zultu pawl lawng in khual an tlawn lioah thlichia a rak hrang. Jesuh nih mah thil sining kha hmangin a zultu pawl nih an zumhnak fehter a hauhnak zawn kha an hngalhthiam nakhnga a rak bawmh hna. (Matthai 8:23-26 rel.) Thlichia cu fakpi in a hrang i an lawng chungah ti a lut dih, asinain Jesuh cu a rak i hngilh. A zultu pawl nih thinphang ngaiin Jesuh kha an ṭhangh i khamh awkah an nawl. Mah tikah Jesuh nih hitin a ti hna: “Zeicahdah cu ti lawmmam cun nan thin a phan? Nan hei ka bochan lo hringhran dah?” Jehoavh nih Jesuh he a kan khamh khawh ti kha a zultu pawl nih an hngalh awk a si. Mah in zeidah kan cawn khawh? A fekmi zumhnak nih “thlichia” taktak asiloah thlichia bantuk a simi harnak hna kha inkhawh awkah a kan bawmh khawh.

8-9. Anel zumhnak cu zeitindah hneksak a si, zeinihdah a bawmh?

⁸ A harmi hneksaknak a inkhawh caah a zumhnak a fek chinmi Puerto Rico i unaunu Anel kong hi ruathmanh. Thlichia taktak hrannak kha a rak tong. 2017 ah Hurricane Maria ruangah Anel inn cu a rak rawk i rian zong a rak ngei ti lo. Anel nih hitin a ti: “Mah bantuk harnak caan ah ka lungre cu a thei ko nain thla ka cam i Jehovah i bochan awk le thinphang thlalau in um lo awkah kaa zuam.”

⁹ Anel nih hneksaknak inkhawh awkah a ka bawmmi thil pakhat cu nawlngaihnak a si tiah a ti. Hitin a ti: “Bupi lamhruainak zulhnak nih lungdai tein um awkah a ka bawmh. Cun unau pawl nih pumsalei le thlaraulei in an ka bawmhnak thawngin Jehovah bawmhnak kha ka hmuh. Jehovah nih ka halmi nakin tam deuh a ka pek lai ti ka zumhnak cu a fek chinchin.”

10. “Thlichia” hrannak na ton ahcun zeidah na tuah khawh?

¹⁰ Nangtah “thlichia” hrannak na tong bal maw? Mah cu leiser ral zong a si kho. Asiloah ngamdam lonak ti bantuk langhternak thlichia zong a si kho. Mah ruangah lungdong in zei tuah awk hngal loin na um kho men. Asinain na lungretheihnak ruangah Jehovah zum ti lo ti bantukin um hlah. Lungtak tein thlacam law Pathian kha naih. Cun Jehovah nih aan rak bawmhmi kong hna kha ruat law na zumhnak kha fehter. (Salm 77:11, 12) Atu ah siseh hmailei ah siseh Jehovah nih zeitikhmanh  ah aan kaltak bal lai lo ti kha na zumh khawh.

11. Hruaitu pawl nawlngaih awkah zeicah bia kan khiah awk a si?

¹¹ Harnak hna inkhawh awkah a dang zei hna nih dah aan bawmh khawh rih? Anel nih a chim bantukin nawlngaihnak a si. Jehovah le Jesuh a zummi hna kha i bochan hna. A caan ah hruaitu pawl nih kan caah sullam a ngei lomi tiah kan ruahmi lamhruainak hna an kan pek khawh men. Asinain nawl a ngaimi hna kha Jehovah nih thluachuah a pek hna. Nawlngaihnak nih nunnak a khamh ti kha Baibal le zumhfekmi a salle pawl hmuhtonnak in kan hngalh. (Ex. 14:1-4; 2 Chan. 20:17) Mah kong hna kha ruat. Cutin na tuah ahcun atu le hmailei ah bupi lamhruainak ningin zulh ding timi na biakhiahnak cu a fek chin lai. (Heb. 13:17) Cun a rauhhlan ah a ra dingmi harnak nganpi zong kha na ṭih lai lo.—Ptb. 3:25.

12. Luka 18:1-8 ah zumhnak le inkhawhnak aa pehtlaih ning kha zeitindah a langhter?

¹² Dinlonak nih a zultu pawl zumhnak a hneksak lai ti kha Jesuh nih a hngalh. Mah kha an inkhawh nakhnga bawmh awkah Luka cauk ah aa telmi bianabia pakhat kong kha a rak chimh hna. Mah cu a ding lomi biaceihtu sinah dinnak hmuh awkah a nawlmi nuhmeinu kong kha a si. Mah nuhmeinu nih ka nawl peng ahcun a ka bawmh lai ti kha a hngalh. A donghnak ah biaceihtu nih a nawlmi ningin a rak tuahpiak. Mah in zeidah kan cawn khawh? Jehovah cu a ding lomi a si lo. Cucaah Jesuh nih hitin a ti: “Pathian nih tah amah a mi hna chunzan hlan in a sinah bawmh hal awkah a au lengmangmi hna cu thiamcoh loin maw a um hna hnga?” (Luka 18:1-8 rel.) Cun hitin a ti chap: “Mi Fapa nih a rat tikah vawlei ah hin [mah bantuk, NW] zumhnak a hmute hnga maw?” Dinlonak kan ton tikah nuhmeinu bantukin a fekmi zumhnak kan ngei ti kha lungsau tein le teimak tein kan i zuamnak thawngin kan langhter a hau. Cu bantuk a fekmi zumhnak kan ngeih ahcun Jehovah nih tuan deuh asiloah hnu deuh ah a kan bawmh hrimrhim lai ti kha kan zumh lai. A caan ah kan i ruahchan lomi lam in kan thlacamnak kha a kan leh khawh.

13. Thlacamnak nih chungkhar pakhat kha zeitindah a bawmh hna?

¹³ Congo i Democratic Republic ah a ummi unaunu Vero hmuhtonnak kong hi ruathmanh. Ralkap phu pakhat dohnak ruangah Vero, zumlotu a vapa le kum 15 a simi an fanu cu an khua in an zam. Lam ah ralkap pawl nih an tlaih hna i kan in thah hna lai tiah an tlerhkhonh hna. Vero cu a ṭap, mah tikah a nu nih lungdaihnak a hmuh nakhnga a fa nu nih Jehovah min hmangin awthangpi in thla a cam. A thlacammi a dih tikah ral bawipa nih “thlacam thiam awkah ahonih dah aan cawnpiak?” tiah a hal. Unaunu nih “Matthai 6:9-13 chung  i thlacam ning kha hmangin thlacam awkah ka nu nih a ka cawnpiak” tiah a leh. Mah tikah ral bawipa nih “na nu le na pa he va ṭin u, nan Pathian Jehovah nih in huhphenh ko hna seh” tiah a ti.

14. Zeinihdah kan zumhnak kha a hneksak khawh, inkhawh awkah zeinihdah a kan bawmh lai?

¹⁴ Cu bantuk hmuhtonnak nih thlacam cu zeitlukin dah a biapit ti kha philh lo awkah a kan cawnpiak. Asinain na thlacamnak cu khulrang tein leh na si lo ah tah zeitin? Jesuh bianabia chung i nuhmeinu bantukin Pathian nih aan kaltak bal lai lo ti le a caan a zat tikah na thlacamnak cu lam khatkhat in leh na si lai ti kha zum law thlacam peng. A thiangthlarau hmuh awkah Jehovah sinah hal peng. (Fil. 4:13) Cun a rauhhlan ah Jehovah nih thluachuah tampi aan pek lai ti le na rak tonmi harnak vialte cu na philh dih cang lai ti kha hngal. Jehovah bawmhnak thawngin harnak hna kha zumhfek tein na inkhawh ahcun hmailei ah na ton dingmi thil caah na zumhnak cu a fek chin lai.—1 Pet. 1:6, 7.

15. Matthai 17:19, 20 ningin Jesuh zultu pawl cu zei bantuk harnak dah an rak ton?

¹⁵ Jesuh nih a zultu pawl kha zumhnak nih harnak hna tei khawh awkah aan bawmh hna lai tiah a cawnpiak hna. (Matthai 17:19, 20 rel.) Voikhat cu Jesuh zultu pawl nih khuachia kha an rak ṭhawl kho lo. A hlan ahcun an rak ṭhawl khawh. Zeidah a cang? Jesuh nih zumhnak tam deuh nan ngeih a hau tiah a rak ti hna. Cun, zumhnak nan ngeih ahcun tlang bantuk a simi harnak hna hmanh kha nan tei khawh lai tiah a ti hna. Tuchan zongah cu bantuk harnak kan tong kho ve.

16. A tonmi ngaihchiatnak inkhawh awkah Geydi kha zumhnak nih zeitindah a bawmh?

¹⁶ Guatemala i unaunu Geydi kong hi ruathmanh. Nikhat cu an i pum i an ṭinlei ah a vapa cu thah a rak si. Cu bantuk ngaihchiatnak inkhawh awkah Geydi kha a zumhnak nih zeitindah a bawmh? Hitin a ti: “Jehovah sinah thla ka cam i ka thilrit kha ka khinh. Mah nih lungdaihnak a ka pek. Jehovah nih ka chungkhar le Khrihfabu i ka hawile hna hmangin a ka bawmh. Cun phungchim rianṭuannak ah i manh lo ngaiin ka ṭuanmi nih ka ngaihchiat a damter lengah thaizing caah lungretheih tuk in um lo awk zongah a ka bawmh. Mah thil ṭha lo ka ton hnuah cun hmailei ah zei bantuk hneksaknak ka ton hmanhah Jehovah, Jesuh le bupi bawmhnak thawngin ka tei khawh lai ti kha ka zumh.”

17. Tlang bantukin a nganmi harnak hna kan ton tikah zeidah kan tuah khawh?

¹⁷ Dawtmi pakhatkhat thihtaknak ruangah ngaihchia in na um maw? Baibal chung i thawhṭhannak kong na relnak thawngin thawhṭhannak naa ruahchannak kha na fehter khawh. Na chungkhar mi pakhat bu chung chuah ruangah ngaihchia in na um maw? Pathian chimhhrinhnak cu a ṭha bikmi a si ti  kha na zumh nakhnga hlathlainak tuah. Zei bantuk harnak na ton hmanhah mah kha na zumhnak fehternak caanṭha in hmu. Lungtak tein Jehovah sinah thlacam. Cun nangmah lawngin um loin unau pawl he naih tein um. (Ptb. 18:1) Na lungchung in na ngaih a chiat hmanhah inkhawhnak ngeih awkah aan bawm khomi thil hna kha tuah. (Salm 126:5, 6) Pumhnak le phungchimnak ah hmaan tein i tel law Baibal kha rel peng. Cun hmailei ah Jehovah nih aan pek dingmi thluachuah cungah lungthin pe. Jehovah nih aan bawmh ning kha na hmuh tikah amah na zumhnak cu a fek chin lai.

18. Na zumhnak a der ti na hngalh ahcun zeidah na tuah khawh?

¹⁸ Hlanlio asiloah atu ah na tonmi harnak hna ruangah na zumhnak a der ti kha na hngalh ahcun na lungdong hlah. Mah kha na zumhnak fehternak caanṭha in hmu. Hitin a chimmi Jesuh zultu pawl bantukin thlacam ve: “Kan zumhnak hi nganter deuh.” (Luka 17:5) Hi capar ah kan i ruahmi hmuhtonnak kong hna kha ruat. Miguel le Yurai bantukin Jehovah nih aan rak bawmhmi kong kha i cinken peng. Vero fanu le Anel bantukin a har tukmi thil sining na ton tikah Jehovah sinah lungtak tein thlacam. Cun Geydi bantukin Jehovah nih na chungkhar asiloah na hawile hmangin aan bawmh khawh ti kha philhhlah. Atu ah na tonmi harnak inkhawh awkah bawmh dingin Jehovah kha nawl na awnh ahcun hmailei ah na ton dingmi harnak hna zong kha inkhawh awkah Pathian nih aan bawmh lai ti kha na zumh chin lai.

19. Jesuh nih zeidah a zumh, zeidah na zumh khawh ve?

¹⁹ Jesuh nih a zultu pawl kha an zumhnak a der ti kha a hngalhter ko hna nain Jehovah bawmhnak thawngin hneksaknak hna kha hlawhtling tein an in khawh lai ti kha a zumh. (Johan 14:1; 16:33) A fekmi zumhnak an ngeih ahcun mibu nganpi cu a ra laimi harnak nganpi in an luat kho lai ti zong kha a zumh. (Biat. 7:9, 14) Nangtah mibu nganpi ah naa tel lai maw? Atu in na zumhnak a feh nakhnga an si khawh chungin naa zuam ahcun Jehovah bawmhnak thawgin naa tel kho ve lai.—Heb. 10:39.