1-2. Pakhat le pakhat cungah a fekmi dawtnak langhter awkah zei a ruang ṭha dah kan ngeih?

 PAKHAT le pakhat cungah a fekmi dawtnak langhter dingin a ruang ṭha hna kan ngei. Mah lak in cheukhat cu zei hna dah an si? Mah a phi kha phungthlukbia ah hitin a ti: “Felnak le zumhawktlakmi sinak kha i chuahtakter hna hlah. . . . Pathian le minung mithmuh ah mithmai ṭha le thangṭhatnak na hmuh lai.” “Zaangfah a thiammi na si tikah nangmahle nangmah ṭhatnak naa pek a si.” “Dinnak le zaangfahnak zulh aa zuammi nih cun nunnak le upatnak a hmuh lai.”—Ptb. 3:3, 4; 11:17; 21:21. b

² Mah Baibal caang ah a fekmi dawtnak kan langhter awk a sinak a ruang pathum kha an langhter. Pakhatnak, a fekmi dawtnak langhternak nih Pathian hmaiah a sunglawimi a kan siter. Pahnihnak, a fekmi dawtnak langhternak nih kanmah theng ṭhathnemhnak a kan pek. Tahchunhnak ah, midang he kan i hawikomnak a fek lai. Pathumnak, a fekmi dawtnak langhternak nih zungzal nunnak i telin a dang thluachuah tampi zong a kan hmuhter lai. Cucaah “pakhat le pakhat a fekmi dawtnak le zaangfahnak he i pehtlaih u” timi ralrin peknak bia kan ngaih awk a sinak a ruang ṭha a um.—Zek. 7:9, NW.

3. Hi capar ah zei biahalnak dah kan i ruah hna lai?

 ³ Hi capar ah biahalnak pali i a phi kha kan i ruah hna lai. Ahote cungah dah a fekmi dawtnak kan langhter awk a si? Ruth Baibal in a fekmi dawtnak kong zeidah kan cawn khawh? Tuchan ah a fekmi dawtnak zeitindah kan langhter khawh? A fekmi dawtnak a langhtermi hna cu zei ṭhathnemhnak dah an hmuh?

4. A fekmi dawtnak langhternak ah Jehovah kha zeitindah kan i zohchunh khawh? (Marka 10:29, 30)

⁴ A hmasa capar ah kan theih cang bantukin Jehovah nih a mah a daw i a biami hna cungah a fekmi dawtnak kha a langhter. (Dan. 9:4) “Pathian dawtmi fa” kan si caah amah kha i zohchunh kan duh. (Efe. 5:1) Cucaah unau pawl cungah a fekmi dawtnak kan langhter a hau.—Marka 10:29, 30 rel.

5-6. “Zumhawktlak” tein um timi nih zeidah a chim duh tawnmi a si?

⁵ A fekmi dawtnak sullam kha kan hngalhthiam deuh ahcun unau pawl cungah dawtnak kha kan langhter khawh deuh lai. Cucaah tam deuh in kan hngalhthiam khawh nakhnga a fekmi dawtnak le zumhawktlak tein umnak kha tahchunh hna hmanh u sih. Tahchunhnak pakhat kong hi ruathmanh.

 ⁶ Company pakhat ah kum tampi chung rian a ṭuanmi pakhat cu zumhawktlak tein a ummi rianṭuantu tiah auh khawh a si. Rian a ṭuan chung kum tampi ah company ngeitu kha a hmu bal men lai lo. Company dingrep hna zong a hna a tla zungzal men lai lo. A ṭuannak company kha a duh lo nain hmaan tein tangka a hmuh caah aa lawm. Cun mah nakin rian ṭha deuh a hmuh lo ahcun mah company ah pension a lak tiang a ṭuan a hau lai.

7-8. (a) A fekmi dawtnak langhter awkah mi pakhatkhat kha zeinihdah a forh? (b) Ruth Baibal chung i caang cheukhat kha zeicah kan i ruah hna lai?

⁷  Catlangbu 6nak ah a chimmi zumhawktlak tein um timi le a fekmi dawtnak i an i dannak cu lungthin kha a si. Baibal chan lio i zumhfekmi Pathian salle hna nih zeicah a fekmi dawtnak an langhter? Dawtnak langhter a hauh caah si loin cutin lungtak tein an langhtermi a si. David kong kha ruathmanh. A hawi Jonathan a pa nih thah a duh ko nain David nih Jonathan cungah a fekmi dawtnak a langhter. Jonathan a thih hnu kum tampi a rauh hnu hmanhah Jonathan fapa Mephibosheth cungah a fekmi dawtnak a rak langhter rih.—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Ruth Baibal in a fekmi dawtnak kong tampi kan cawn khawh. Ruth Baibal chung mi hna sinin a fekmi dawtnak kong zeidah kan cawn khawh? Khrihfabu ah mah dawtnak kha zeitindah kan langhter khawh? c

9. Jehovah nih dan a ka tat tiah Naomi nih zeicah a rak ruah?

⁹ Ruth Baibal ah Naomi, a monu Ruth le Boaz kong kha kan hmuh. Boaz cu Naomi vapa he rualchan an si i Pathian a ṭihmi Israel ram ah mangṭam a tlun caah Naomi, a vapa le a fapa pahnih cu Moab ram ah an rak i ṭhial. Mah ah a vapa cu a thi. A fapa pahnih zong nupi an ngeih hnuah an thi ve. (Ruth 1:3-5; 2:1) Mah thil sining ruangah Naomi cu a lung a rak dong tuk. Jehovah nih dan a ka tat ti hmanh in a rak ruah. Pathian kong he aa  tlaiin a intuarnak kha hitin a chim: “BAWIPA kut cu keimah doh ahcun pei a chuah cang fam cu.” “Lianngan Bik nih khaa ngaingai in ka cungah a tuah cang.” Cun “BAWIPA nih a ka hrem i Lianngan Bik nih ka cungah harnak a tlunter” ti zongin a rak ti.—Ruth 1:13, 20, 21.   

10. Naomi sualphawtnak bia kha Jehovah nih zeitindah a lehrulh?

¹⁰ Naomi sualphawtnak bia kha Jehovah nih zeitindah a lehrulh? Pathian nih Naomi kha a kaltak lo i a cungah zawnruahnak a rak langhter. “Hremnak nih mifim kha a hruhter khawh” ti kha Jehovah nih a hngalh. (Pct. 7:7, NW) Naomi nih Jehovah cu a pawngah a um ti a hngalhthiam nakhnga bawmhnak a herh. Pathian nih zeitindah a rak bawmh? (1 Sam. 2:8) Ruth nih Naomi cungah a fekmi dawtnak langhter dingin a rak timhtuah. Naomi cungah a fekmi dawtnak langhter awkah Ruth kha a rak forh. Lungdongh lo awk le Jehovah nih a dawt peng rih ti kha a hngalhthiam nakhnga Ruth nih zaangfahnak he a rak bawmh. Ruth sinin zeidah kan cawn khawh?   

11. Zaangfahnak a ngeimi unau pawl nih a lung a dongmi unau pawl kha zeicah an bawmh hna?

¹¹ A fekmi dawtnak nih a lung a dongmi hna bawmh awkah a kan forh. Ruth nih Naomi kha a kaltak lo bantukin tuchan zongah zaangfahnak a ngeimi unau pawl nih a lung a dongmi unau pawl kha an kaltak hna lo. Unau pawl kha an dawt hna i an si khawh chungin an bawmh hna. (Ptb. 12:25; 24:10) Lamkaltu Paul nih hitin tha a kan pek: “A ral a chiami kha ralṭhatnak pe hna u, thazaang a dermi kha bawm hna u, pakhat le pakhat lungsau thinfual in um u.”—1 Thes. 5:14.

12. A lung a dongmi unau pawl bawmh awkah na tuah khawhmi a ṭha bikmi lam cu zeidah a si?

¹² A lung a dongmi unau pawl bawmh awkah a ṭha bikmi lam pakhat cu an bia kan ngaihpiak hnanak thawngin le kan dawt hna ti kha kan zumhter hnanak thawngin a si. A sunglawimi a salle pawl bawmh awkah na tuahmi thil kha Jehovah nih a sunsak tuk. (Salm 41:1) Phungthlukbia 19:17 nih hitin a ti: “Misifak cungah zaangfahnak na ngeih ahcun BAWIPA kha chaw na coih bantuk a si. BAWIPA nih tling tein aan cham lai.”

13. Ruth le Orpah cu zeitindah an i lawh lo? Ruth nih Naomi cungah a fekmi dawtnak langhter dingin zeicah bia a rak khiah? (A phaw hmanthlak zoh.)

¹³ A va le a fapale pahnih an thih hnuah Naomi cungah zeidah a cang timi kong hlathlainak thawngin a fekmi dawtnak kong kha kan hngalh chin khawh. Naomi nih “BAWIPA nih a mi kha a len cang i rawl a pek hna” ti kha a theih tikah an ram ah kir ṭhan dingin bia a khiah. (Ruth 1:6) A hmasa ahcun a monule pahnih ningin an zulh. Asinain lam ah a monule kha Moab ram ah kir ṭhan dingin voithum tiang a rak a forh hna. Mah tikah zeidah a rak cang? “Orpah nih cun a pi cu a  hnamh, sihmanhsehlaw Ruth tu nih cun aa tlaih peng.” (Ruth 1:7-14) Naomi chimmi bia ningin Orpah cu Moab ram ah a rak kir. Asinain Ruth tu cu inn ah kir ṭhan a ngah ko nain Naomi cungah a fekmi dawtnak a ngeih caah Naomi sinah zulh dingin bia a rak khiah. (Ruth 1:16, 17) Ruth nih cutin a tuahmi cu a herh caah si loin lungtak tein bia a khiahmi a si. Ruth nih Naomi cungah a fekmi dawtnak a langhter peng. Mah in zeidah kan cawn khawh?

14. (a) Tuchan ah dawtnak a ngeimi unau pawl nih zeidah an tuah? (b) Hebru 13:16 ningin zeitindah Pthian lung kan lawmhter khawh?

¹⁴ A fekmi dawtnak nih kan i ruahchanmi nakin tam deuh tuah awkah a kan forh. Hlanlio bantukin tuchan zongah unau tampi cu aa hmu bal lomi an si hmanhah pakhat le pakhat cungah a fekmi dawtnak an langhter. Tahchunhnak ah, leiser ral an ton tikah unau pawl zeitindah kan bawmh hna lai timi kong kha hngalh an duh. Cun Khrihfabu ah pakhatkhat nih harnak a ton ahcun an bawmh colh. Kumzabu pakhatnak i Masidonia unau pawl bantukin an i ruahchanmi nakin tam deuh an rak tuah. Mahca ṭhatnak hlaw in an rak bawmh hna i harnak a tongmi unau pawl kha “an pek khawh leng hmanh” in an rak pek hna. (2 Kor. 8:3) Unau pawl nih a fekmi dawtnak an langhtermi a hmuh tikah Jehovah cu aa lawm tuk.—Hebru 13:16 rel.

15-16. Ruth nih a lung a dong ti lo kha zeitindah a langhter?

¹⁵ Ruth nih Naomi a bawmh ningin a kong tampi kan cawn khawh. Cheukhat kong kha i ruah hna u sih.

¹⁶ Na lung dong hlah. Ruth nih Judah ram ah a zulh tikah a hmasa ahcun Naomi nih a rak duh lo. Asinain Ruth cu a lung a dong lo. A phichuak cu zeidah a si? “Naomi nih amah sinah kal aa tim hrimhrim ti kha a hmuh tikah zeihmanh a chim ti lo.”—Ruth 1:15-18.

17. Lungdongh colh lo awkah zeinihdah a kan bamwh khawh?

¹⁷ Kan cawn khawhmi: A lung a dongmi hna bawmh awkah lungsaunak ngeih le an cungah lungdongh lo a hau. Bawmh a herhmi unaunu pakhat nih a hmasa ahcun kan bawmhnak kha a al men lai. d Asinain a fekmi dawtnak nih kan si khawh chungin bawmh awkah a kan forh lai. (Gal. 6:2) A hnuah kan bawmhnak kha a cohlan lai tiah kan i ruahchan khawh.

18. Zeinihdah Ruth kha a ngaih a chiatter?

¹⁸ Na thin hung colh hlah. Naomi le Ruth cu Bethlehem an phanh tikah Naomi nih hlanlio a innpa pawl a hmuh hna tikah hitin a ti: “Khat tein ka rak kal i BAWIPA nih kutro in a ka kirpi ṭhan.” (Ruth 1:21) Ruth nih mah bia a theih tikah zeitindah a um lai ti kha na mitthlam ah cuanter hmanh. Naomi kha a si khawh chungin a bawmh. A ṭahpi, a hnemh i ni tampi chung khual an tlawngṭi. Mah hmanhah Naomi nih “BAWIPA nih kutro in a ka kirpi ṭhan” tiah a rak ti. A pawngah a dirmi Ruth bawmhnak kha zei ah a rak rel lo. Mah tikah Ruth cu a ngaih a chia tuk ko lai. Asinain Ruth nih Naomi kha a rak kaltak bal lo.

19. A lung a dongmi kha kaltak lo awkah zeinihdah a kan bawmh khawh?

¹⁹ Kan cawn khawhmi: Tuchan zongah a lung a dongmi unaunu pakhat kha kan si khawh chungin kan bawmh ko nain kan lung  a fahtermi bia a chim men lai. Asinain kan thin a hun colh awk a si lo. Bawmh a herhmi unaunu kha kaltak loin bawmh khawh ning lam kan hmuh nakhnga Jehovah sinah bawmhnak kan hal awk a si.—Ptb. 17:17.

20. Ruth cu zeicah thazaang a hun ngeih?

²⁰ A herh lio caan ah thapeknak bia chim. Ruth nih Naomi cungah a fekmi dawtnak a langhter ko nain amah Ruth theng zong thapeknak a herh. Cucaah Jehovah nih Ruth kha thazaang pek awkah Boaz kha a rak forh. Boaz nih Ruth kha hitin a ti: “BAWIPA nih na tuah ciami cu in rul sehlaw, BAWIPA, Israel Pathian, a thla tangah i dor awk i na rak fuhmi nih cun tampi in laksawng in pe ko seh.” Mah bia nih Ruth kha thazaang a pek tuk ko lai. Cucaah Ruth nih hitin a leh: “Ka hna na ka ngamter i . . . na salnu sinah hin bia nemnem na chim.” (Ruth 2:12, 13) A herh lio caan ah chimmi Boaz thapeknak bia ruangah Ruth cu thazaang a hun ngei.

21. Isaiah 32:1, 2 ningin Khrihfa upa pawl nih zeidah an tuah awk a si?

²¹ Kan cawn khawhmi: Midang cungah a fekmi dawtnak a langhtermi hna zong a caan ah thazaang peknak an herh ve. Boaz nih Ruth langhtermi zaangfahnak kha a hmuh tikah a rak thangṭhat bantukin tuchan Khrihfa upa pawl zong nih midang a bawmmi unau pawl kha an thangṭhat ve hna. Mah bantuk a herh lio caan ah chimmi thangṭhatnak bia nih unau pawl kha lungdongh lo awkah a bawmh hna.—Isaiah 32:1, 2 rel.

22-23. Naomi ruahnak cu zeitindah aa thlen, zeicah? (Salm 136:23, 26)

²² Boaz nih Ruth le Naomi kha siang ngaiin eidin pawl a rak pek hna. (Ruth 2:14-18) Boaz nih a langhtermi siannak kha Naomi nih zeitindah a lehrulh? Hitin a ti: “A nungmi cungah  siseh, a thimi cungah siseh, a zaangfahnak a ngol lomi BAWIPA nih cun amah cu thluachuahnak pe ko seh.” (Ruth 2:20a) Naomi ruahnak cu aa thleng cang. A hmasa ahcun lungfak ngaiin ‘Bawipa nih dan a ka tat’ tiah a ti ko nain atu ahcun lunglawm tein “a zaangfahnak a ngol lomi BAWIPA” tiah a ti. Naomi ruahnak cu zeicah aa thlen?

²³ Naomi nih Jehovah bawmhnak kha a hun hmuh. Judah ramlei a kir lioah Jehovah nih Ruth hmangin a rak bawmh. (Ruth 1:16) Cun an “sahlawh naih bik” a simi Boaz nih an siannak a langhter lio zongah Naomi nih Jehovah bawmhnak kha a rak hmuh. e (Ruth 2:19, 20b) Naomi nih ‘Jehovah nih zeitikhmanh ah a ka kaltak bal lo i kan sinah a um peng’ tiah a hun ruah ko lai. (Salm 136:23, 26 rel.) Ruth le Boaz nih an kaltak lo caah Naomi cu aa lawm tuk ko lai. An pathum in an i nuam tuk lai ti kha kan mitthlam ah kan cuanter khawh.

24. Unau pawl cungah zeicah a fekmi dawtnak kan langhter peng awk a si?

²⁴ A fekmi dawtnak kong he aa tlaiin Ruth Baibal cauk in zeidah kan cawn? A fekmi dawtnak nih a lung a dongmi unau pawl cungah lungdongh colh lo awkah a kan forh. Cun mahca ṭhatnak hlawt in bawmh awk zongah a kan forh. Khrihfa upa hna nih a fekmi dawtnak a langhtermi hna kha an herh lio caan ah thazaang an pek hna a hau. Bawmhnak a herhmi hna an thazaang a hun um ṭhanmi kan hmuh tikah kan i lawm tuk. (Lam. 20:35) A fekmi dawtnak kan langhter zungzal awk a sinak a biapi bikmi a ruang cu ‘a fekmi dawtnak tampi a langhtermi’ Jehovah kha zohchunh kan duh ca le a lunglawmhter kan duh caah a si.—Ex. 34:6: Salm 33:22.