CAWN AWK CAPAR 41
“Harnak” Nganpi Chungah Zumhfek Tein Um Peng
“BAWIPA cu daw ko u! BAWIPA nih zumh awk tlakmi cu a huhphenh hna.”—SALM 31:23.
HLA 129 Zumhfek Tein Kan Um Lai
LANGHTERNAK *
1-2. (a) Vawlei hruaitu hna nih a rauhhlan ah zei kong dah an thanh lai? (b) Zei biahalnak a phi dah kan theih a hau?
VAWLEI hruaitu hna nih “a dai dih ko i a him dih ko” tiah thawng an thanhmi kha na mitthlam ah cuanter hmanh. Vawlei cu a him tuk cang tiah uangthlar ngaiin an chim. Vawlei hruaitu hna nih annih cu vawlei buaibainak vialte a tawngtham kho dihtu an si tiah ruat hna seh ti an kan duh. Asinain a hnuah a cang dingmi thil kha cu an kham kho lo. Zeicah? Baibal nih a chimchung bantukin ruahlopi in “rawhnak nih cun a den hna lai. An luat kho lai lo.”—1 Thes. 5:3.
2 Mah hi a phi theih a haumi a biapimi biahalnak an si: “Harnak” nganpi chungah zeidah a cang lai? Mah caan chungah Jehovah nih kan sinin zei tuah awkah dah aa ruahchan lai? Harnak nganpi chungah zumhfek tein um peng awkah atu in zeitindah kan i timhtuah khawh?—Matt. 24:21.
“Harnak” Nganpi chungah Zeidah a Cang lai?
3. Biathlam 17:5, 15-18 ningin Pathian nih “a Liannganmi Babilon” kha zeitindah a hrawh lai?
3 Biathlam 17:5, 15-18 rel. “A Liannganmi Babilon” cu hrawh a si cang lai. A hmasa ah kan theih cang bantukin vawlei hruaitu hna nih mah caan ah a cang dingmi thil kha an kham kho lai lo. Zeicah? “Pathian nih aa tinhmi tuah duhnak kha an lungthin chungah a chiah” lai caah a si. Mah aa tinhmi cu zeidah a si? Khrihfa ram i telin vawleicung pumpi i a hmaan lomi biaknak vialte hrawh kha a si. * Pathian nih aa tinhmi kha “ki pahra” a ngeimi “sahrang sen” lungthin chungah a chiah lai. Ki pahra nih “sahrang sen” a simi United Nations a bawmmi ramkhellei nawlngeitu dihlak kha a aiawh hna. (Biat. 17:3, 11-13; 18:8) Ramkhellei nawlngeitu hna nih a hmaan lomi biaknak an doh tikah mah cu harnak nganpi aa thawk cang timi hmelchunhnak a si lai. Mah cu vawleicung i a ngan ngaingaimi thil ṭihnung pakhat a si lai.
4. (a) Vawlei hruaitu hna nih a hmaan lomi biaknak an dohnak a ruang he aa tlaiin zeitindah an chim men lai? (b) Hlan i mah biaknak chungtel a simi hna nih zeidah an tuah lai?
4 Vawlei hruaitu hna nih a Liannganmi Babilon an dohnak a ruang kha cu kan hngal lo. Annih nih vawleicung biaknak hna cu daihnak um awkah dawnkhantu an si i cozah nih a tuahmi thil kip ah an i thlak zungzal tiah an ti men lai. Asiloah biaknak phu hna cu thilri chawva tam tuk an ngei tiah an ti men lai. (Biat. 18:3, 7) Vawlei hruaitu pawl nih a hmaan lomi biaknak an doh tikah an biaknak ah aa telmi kip in cun an hrawk men hna lai lo. Mah canah biaknak bu tu kha an hrawh dih men lai. Mah bu vialte hrawh a si dih tikah biaknaklei an hruaitu hna nih bia an kamh hna bantukin an tuahpiak khawh hna lomi kha an biaknak chungtel pawl nih an hmuh lai. Cucaah hlan i mah biaknak chungtel a simi hna nih an biaknak caah zeihmanh kan tuah a herh lo tiah an ti men lai.
5. Jehovah nih harnak nganpi kong he aa tlaiin zei bia dah aa kam, zeicah?
5 Baibal nih a Liannganmi Babilon hrawhnak cu zei caan dah a rauh lai ti kha a chim lo. Asinain caan tawite lawng a rau lai ti kha kan hngalh. (Biat. 18:10, 21) Jehovah nih a hmaanmi biaknak le “a thimmi a mi hna” an luat khawh nakhnga mah harnak nganpi ‘caan cu ka tawiter’ lai tiah bia aa kam. (Mar. 13:19, 20) Asinain Jehovah nih Armageddon raltuknak le harnak nganpi aa thawk karah kan sinin zei tuah awkah dah aa ruahchan lai?
Jehovah i a Hmaanmi Biaknak kha i Tlaih Peng
6. A hmaan lomi biaknak in chuah lawngin zeicah a zat lo?
6 A hmasa capar ah kan i ruah cang bantukin Jehovah nih amah a biami hna cu a Liannganmi Babilon in an i ṭhen lai tiah aa ruahchan. Asinain a hmaan lomi biaknak in chuah lawngin a za lo. A hmaanmi biaknak kha fek tein i tlaih awk zongah bia kan khiah a hau. Cutin kan tuah khawh nakhnga a kong pahnih in i ruah hna u sih.
Harnak caan chung hmanhah hmunkhat ah i pumhṭi kha kan ngol awk a si lo (Catlangbu 7 zoh) *
7. (a) Jehovah i a dingmi a phunglam kha zeitindah fek tein kan i tlaih khawh? (b) Hebru 10:24, 25 ah a chim bantukin zeicah hmunkhat ah kan i pumhṭi awk a si, a hleiin atu ah zeicah a biapit?
7 Pakhatnak, Jehovah i a dingmi a phunglam kha fekte in i tlaih peng a hau. Vawlei i a ṭhalomi ziaza kha zeitikhmanh ah kan cohlan awk a si lo. Tahchunhnak ah, nulenu palepa sualnak le nupa sinak aa khatmi he i ṭhitumnak i telin zei bantuk nupa sualnak hmanh kha kan cohlang lo. (Matt. 19:4, 5; Rom 1:26, 27) Pahnihnak, Khrihfa unau pawl he Jehovah kha biak zungzal a hau. Zei bantuk hmun paohah cutin kan tuah. A si khawh ahcun kan Biakinn ah kan tuah, asinain a si khawh lo ahcun pumpak inn asiloah a dang hmun hna ah a thlite hmanhin kan tuah. “Bawipa ni cu a nai deuh chin lengmang ti kha kan hngalh” caah hmunkhat ah kan i pumhṭi a hau.—Hebru 10:24, 25 rel.
8. Hmailei ah kan thanhmi thawngpang cu zeitindah aa thlen men lai?
8 Harnak nganpi chungah kan thanhmi thawngpang cu aa thleng men lai. Atu ahcun Pennak kong thawngṭha kha kan chim i zultu siternak rian ah fakpi in kan i zuam. Asinain mah caan ahcun rial nganpi bantuk a simi thawngṭha kha ralṭha tein kan chim a hau men lai. (Biat. 16:21) Satan vawlei cu a rauhhlan ah hrawh a si cang lai timi kong kha kan thanh men lai. A caan a cut tikah kan chimmi thawngpang cu zeidah a si lai ti le zeitindah chim a si lai ti kha fiang tein kan hngalh lai. Hlawhtling tein phungchim rian ṭuan khawh awkah kum zakhat leng tiang kan rak hmanmi lam hna kha kan hmang rih lai maw? Asiloah a dang lam dah kan hman lai? Mah cu kan hngal lo. Zeiti lam in kan chim hmanhah Jehovah biaceihnak kong kha ralṭha tein thanh awkah tinvo sung kan hmu lai.—Ezek. 2:3-5.
9. Vawlei hruaitu hna nih kan thanhmi thawngpang kha zeitindah an lehrulh lai, asinain zeidah kan zumh khawh?
9 Vawlei hruaitu hna cu kan thanhmi thawngpang nih an thin a hunter hna lai caah kan phungchimnak kha a zungzal in ngolter awkah an i zuam lai. Atu ah phungchimnak rian ah bawmhnak kan hmuh nakhnga Jehovah kan i bochan bantukin mah caan zongah Jehovah bawmhnak kha kan i bochan a hau lai. Kan Pathian nih a duhnak tlinter awkah ṭhawnnak a kan pek lai ti kha kan zumh khawh.—Mik. 3:8.
Pathian Miphun pawl Dohnak caah Timhcia tein Um
10. Luka 21:25-28 ah a chimchung bantukin harnak nganpi a tlun tikah mi tampi nih zeitindah an lehrulh lai?
10 Luka 21:25-28 rel. Harnak nganpi chungah mi nih a hmun tiah an ruahmi thil cu a rawh lai caah mi pawl cu an lau tuk lai. “Vansang au” in an um lai i minung tuanbia lakah a mui bikmi caan ah an nun caah ṭihnak in an khat lai. (Zef. 1:14, 15) Mah caan chungah Jehovah miphun hna caah nunnak cu a har chin men lai. Cun vawlei cheubang kan si lo caah harnak cheukhat zong kan tong men lai. Cun a herh taktakmi thil hmanh kan ngei men lai lo.
11. (a) Jehovah Tehte Hna cu zeicah vawlei hruaitu hna i an hmuitinh kan hung si lai? (b) Harnak nganpi kha zeicah kan ṭih awk a si lo?
11 An biaknak cu hrawh a si lai i Jehovah Tehte Hna biaknak cu hrawh a si lai lo caah mi pawl cu an thin a hung tuk lai. Zeitluk in dah an thin a hun ti kha Internet ti bantuk hna in midang kha an hngalhter hna lai. Hrawh a si lomi cu kan biaknak lawng a si lai caah vawlei hruaitu hna le an uktu a simi Satan nih an kan huat tuk lai. Vawleicung biaknak vialte hrawh dih ding timi an hmuitinh cu a tling lai lo. Cucaah kanmah cu an hmuitinh kan hung si lai. Mah hnuah Magog ram i Gog * nih a ṭuan dingmi rian kha vawlei hruaitu hna nih an ṭuan lai. Hmunkhat ah an i fonh lai i Jehovah miphun pawl doh awkah an thazaang dihlak kha an hman lai. (Ezek. 38:2, 14-16) Mah tikah harnak nganpi chungah zeidah a cang lai timi he aa tlaiin kan lungre a hung thei kho. A hleiin a cang dingmi kong kha a dikthliar in kan hngalh lo caah a si. Asinain a fiangmi pakhat cu: Harnak nganpi kha kan ṭih a hau lo. Jehovah nih kan nunnak khamh awkah lamhruainak a kan pek lai. (Salm 34:19) Kan “luatnak cu a nai cang” ti kha kan hngalh lai caah kan ‘dir lai i cunglei kha kan zoh lai.’ *
12. “Zumh awk a tlakmi le a fimmi sal” nih hmailei a cang dingmi caah zeitindah an kan timhtuahpiak?
12 “Zumh awk a tlakmi le a fimmi sal” nih harnak nganpi chungah zumhfek tein kan um khawh nakhnga an kan timhtuahpiak. (Matt. 24:45) A kan timhtuahpiakmi lam tampi lakah tahchunhnak pakhat in zohhmanh hna u sih: 2016-2018 ah amahle caante ah pengkomh civui program an kan tuahpiak. Mah civui i phungchimnak hna nih Jehovah ni a naih chin caah kan ngeih awk a simi sining hna kha ngeih khawh awkah a kan bawmh. Mah sining hna kha a tawinak in i ruah hna hmanh u sih.
Zumhawktlak sinak, Inkhawhnak le Ralṭhatnak Ngeih Chin awkah I Zuam Peng
“Harnak” nganpi in luat khawh awkah atu in i timtuah (Catlangbu 13-16 zoh) *
13. Zeitindah Jehovah cungah zumhawktlak tein kan um peng khawh, atu ah zeicah cutin kan tuah awk a si?
13 Zumhawktlak sinak: 2016 pengkomh civui a biatlangpi cu “Jehovah Cungah Zumhawktlak Tein Um Zungzal” ti a si. Mah program nih Jehovah he a ṭhami pehtlaihnak kan ngeih ahcun a cungah zumhawktlak tein kan um kho lai timi kong a kan cawnpiak. Lungtak tein thlacamnak le Baibal hlathlainak teima tein tuahnak thawngin Jehovah kan naih khawh timi kong zong a kan hngalhter ṭhan. Cutin tuahnak nih a harmi hneksaknak hna kha inkhawh awkah thazaang a kan pek. Satan vawlei donghnak a naih chin cang caah Pathian le a Pennak cungah zumhawktlak kan sinak a hneksakmi harnak tampi kan tong chin lai ti kha kan i ruahchan. Nihsawhnak zong kan tong peng rih men lai. (2 Pet. 3:3, 4) A ruang cu Satan vawlei kha zeiti lam hmanhin kan bawmh lo caah a si. Cucaah atu in zumhawktlak tein kan um peng ahcun harnak nganpi chungah zumhawktlak tein kan um kho lai.
14. (a) Vawleicung i hruaitu a simi unaupa pawl he aa tlaiin zei thlennak dah a um lai? (b) Mah caan ah zeicah zumhawktlak tein kan um a hauh lai?
14 Harnak nganpi chungah atu ah hruaitu a simi unaupa pawl he aa tlaiin thlennak a um lai. Vawlei ah a tang rihmi chiti thuhmi dihlak cu Armageddon raltuknak ah i tel ve dingin van ah pumh an si lai. (Matt. 24:31; Biat. 2:26, 27) A sullam cu Uktu Bu pawl cu kanmah he vawlei ah an umṭi ti lai lo tinak a si. Asinain mibu nganpi cu ningcang tein an um lai i tuudang chungin sining a tlinhmi unaupa hna nih an hruai hna lai. Mah unaupa pawl kan bawmh hnanak thawngin le Pathian sinin kan hmuhmi lamhruainak kan zulhnak thawngin zumhawktlak tein kan um kha kan langhter a hau lai. Kan khamhnak cu mah cungah aa hngat lai.
15. Inkhawhnak ngeih chin awkah zeitindah kan tuah khawh, atu ah cutin tuah cu zeicah a biapit?
15 Inkhawhnak: 2017 pengkomh civui a biatlangpi cu “Na Lung Dong Hlah” ti a si. Mah program nih hneksaknak kan ton tikah inkhawhnak ngeih chin awkah a kan bawmh. Inkhawhnak kan ngeihmi cu a ṭhami thil sining cungah aa hngatmi a si lo ti kha kan hngalh. Jehovah i bochannak thawngin inkhawhnak kan ngei kho. (Rom 12:12) Jesuh nih bia a kan kamhmi hi zeitikhmanh ah kan philh awk a si lo: “A dongh tiangin inkhawhnak a ngeimi cu khamh an si lai.” (Matt. 24:13, NW.) Mah biakam a sullam cu zei bantuk zuamcawhnak kan ton hmanhah zumhfek tein kan um peng a hau tinak a si. Atu ah kan tonmi hneksaknak paoh kan inkhawh ahcun harnak nganpi a tlun hlan hmanhin kan zumhnak cu a fek kho lai.
16. Zeinihdah ralṭhatnak a kan ngeihter, atu in ralṭhatnak ngeih awkah zeitindah kan tuah khawh?
16 Ralṭhatnak: 2018 pengkomh civui a biatlangpi cu “Ralṭhatnak Ngei” timi a si. Mah civui phungchimnak nih ralṭhatnak kan ngeihmi cu kan thilti khawhnak cungah aa hngatmi a si lo ti kha hngalh awkah a kan bawmh. Inkhawhnak le ralṭhatnak taktak cu Jehovah i bochannak in a rami a si. Jehovah kan i bochannak kha zeitindah kan fehter khawh? Nifatin Baibal kan relnak thawngin le Jehovah nih hlanlio ah a salle pawl zeitindah a khamh hna timi kong kan ruahnak thawngin a si. (Salm 68:20; 2 Pet. 2:9) Harnak nganpi chung i vawlei hruaitu hna nih an kan doh tikah ralṭhatnak tam deuh in ngeih a hau lai i hlan nakin Jehovah kha i bochan deuh a hau lai. (Salm 112:7, 8; Heb. 13:6) Atu in Jehovah kha kan i bochan ahcun Gog nih a kan doh tikah a herhmi ralṭhatnak kan ngei kho lai. *
Khamh Na Si Lai Caan Kha I Ngaih
Jesuh le vancung a ralkap pawl nih a rauhhlan ah Armageddon raldohnak ah Pathian ral pawl kha an hrawh cang hna lai. (Catlangbu 17 zoh)
17. Armageddon kha zeicah kan ṭih awk a si lo? (A phaw hmanthlak zoh.)
17 A hmasa capar ah a langhter bantukin kan dihlak in ni hmanung bik caan ah kan nung. Asinain harnak nganpi chungin khamh kan si lai zong kha kan i ruahchan. Armageddon raldohnak nih hi vawlei ṭhalo hi a donghter lai. Asinain Armageddon kha kan ṭih awk a si lo. Zeicah? Zeicahtiah mah cu Jehovah raldohnak a si i kanmah nih kan doh a hau lo. (Ptb. 1:33; Ezek. 38:18-20; Zek. 14:3) Jehovah nih nawl a pek tikah Jesuh Khrih nih Pathian ralkapbu kha ral doh awkah a hruai hna lai. A tho ṭhanmi chihti thuhmi hna le vancungmi tampi cu Jesuh leiah an ṭang lai. Annih nih Satan, a khuachia pawl le vawlei i a ralkap pawl kha an doh hna lai.—Dan. 12:1; Biat. 6:2; 17:14.
18. (a) Jehovah nih zei bia dah a kan kamh? (b) Biathlam 7:9, 13-17 nih hmailei kong he aa tlaiin zeitindah zumhnak aan ngeihter?
18 Jehovah nih hitin bia a kan kamh: “Sermi hriamnam zeihmanh nih khan nangmah cu aan pem kho lai lo.” (Isa. 54:17) Zumhfek tein Jehovah a biami “mibu nganpi” cu an nun buin “hremnak nganpi” in an luat lai. Cun Jehovah rian kha an ṭuan zungzal lai. (Biathlam 7:9, 13-17 rel) Baibal nih hmailei kong he aa tlaiin zumhnak a kan ngeihter. Jehovah nih “zumhawktlakmi cu a huhphenh hna” ti kha kan hngalh. (Salm 31:23) Jehovah a daw i a thangṭhatmi hna nih a min thianter a simi kha an hmuh tikah an i lawm tuk lai.—Ezek. 38:23.
19. A rauhhlan ah a ṭha tukmi zeibantuk hmailei nunnak dah kan hmuh lai?
19 Kuathnih Timote 3:2-5 hi Satan huham a um lomi vawlei thar ah a nung dingmi minung pawl kong ṭial si sehlaw zeitindah ṭial a si lai ti kha ruathmanh. (“ Vawlei Thar ah a Um Dingmi Hna Ziaza” timi rinli kulh ah zoh.) Uktu Bu chungtel a simi unaupa George Gangas * nih hitin a fianter: “Ahopaoh nih Jehovah an biak tikah vawlei cu a ṭha tukmi hmun a si cang lai. A rauhhlan ah vawlei thar ah nunnak tinvo sung na hmu lai. Jehovah bantukin caan saupi na nung ve lai. Zungzal in kan nung cang hna lai.” Mah cu a ṭha tukmi ruahchannak a si.
HLA 122 Fek Tein Dir, Ṭhial Khawh Si Hlah!
^ cat. 5 A rauhhlan ah mi kip cungah “harnak” nganpi a tlung cang lai ti kha kan hngalh. Mah cu kan caah zei sullam dah a ngeih? Mah caan ah Jehovah nih kan sinin zei tuah awkah dah aa ruahchan? Harnak nganpi chungah zumhfek tein um peng khawh awkah atu in zei sining hna dah ngeih dingin kan i zuam a herh? Hi capar ah mah kong kha kan i ruah hna lai.
^ cat. 3 BIAFANG FIANTERNAK: Khrihfa ram timi nih Khrih zultu kan si tiah aa ti nain a phunglam ningin Jehovah a bia lomi mi pawl kha a chim duhmi a si.
^ cat. 11 BIAFANG FIANTERNAK: Magog ram i Gog (a tawinak Gog) timi biafang nih harnak nganpi chungah hmunkhat ah i pumh in Jehovah miphun pawl a do hngami vawlei hruaitu phu pakhat kha a chim duhmi a si.
^ cat. 11 Armageddon aa thawk hlanah zeidah a cang lai timi kong a dikthliar kha Pathian Pennak Uknak timi cauk ṭhen 21 ah zoh. Armageddon chungah Jehovah nih a miphun pawl zeitindah a khamh hna lai timi kong le Magog ram i Gog dohnak kong a dikthliar kha Jehovah I A Thiangmi Biaknak—Dirh Ṭhannak timi cauk ṭhen 17 le 18 [Myanmar] ah zoh.
^ cat. 16 2019 pengkomh civui a biatlangpi cu “Dawtnak Cu Dongh A Thiam Lo”! timi a si. Mah nih dawtnak a ngeimi Jehovah kilvennak tangah himnak kan hmu kho zungzal ti kha a kan zumhter lai.—1 Kor. 13:8.
^ cat. 19 1994, December 1, Vennak Innsang chung i ‘A Tuahserhnak Nih A Zulh’ timi capar [Myanmar] ah zoh.
