1. Kan sinin lungthin dihlak in biaknak kha hmuh awkah Jehovah cu zeicah aa tlak?

JEHOVAH cu a kan Sertu le Nunnak a kan Petu a si caah lungthin dihlak in biaknak kha kan sinin hmuh awkah aa tlak. (Biat. 4:11) Asinain zuamcawhnak kan tong. Jehovah kha kan dawt i kan upat ko nain thil cheukhat cu kan nunnak ah a biapi tukmi a hung si kho. Mah nih Jehovah lawng kha dawt awk le biak awkah a kan dawnh khawh. Mah cu zeitindah a si khawh ti kha kan hngalhthiam a hau. Lungthin dihlak in Jehovah biak timi nih zeidah a chim duhmi a si ti kha kan i ruah hmasa hna lai.

2. Exodus 34:14 ningin Jehovah kha lungthin dihlak in kan biak ahcun zeidah kan tuah lai?

² Jehovah cu ‘nahchuah’ a hmangmi Pathian a si. Mah cu lungthin dihlak in biak awkah a kan hal tinak a si. Cucaah amah lawng biak awk kha kan sinin aa ruahchan. Baibal nih lungthin dihlak in Pathian biak a ti tikah lungthin dihlak in Jehovah dawt kha a chim duhmi a si. Jehovah lawng kha kan biak ahcun amah zaka ah mi pakhat asiloah thil pakhatkhat airolh kha kan duh lai lo.—Exodus 34:14 rel.

3. Jehovah dawt awkah zeicah a ruang ṭha kan ngeih?

³ Jehovah dawt awkah a ruang ṭha kan ngei. Zeicah? Zeicahtiah mah cu Jehovah kong kan cawnmi cungah aa hngatmi a si caah a si. A ṭha tukmi a sining hna kha kan hun duh. A duhmi le a duh lomi thil kha kan hngalh i kan cohlan. Minung ca i aa tinhnak kha kan hngalhthiam i kan bawmh. A hawikom sinak nawl a kan awnhmi cu tinvo sung taktak a si. (Salm 25:14) A  kan Sertu kong kan cawnmi thil vialte nih amah he a kan naihter chin.—Jeim 4:8.

4. (a) Jehovah kan dawtnak a zor nakhnga Khuachia nih zeidah a hman? (b) Hi capar ah zei kong dah kan i ruah hna lai?

⁴ Hi vawlei cu Khuachia nih a uk i kan lung duhnak le pumsalei thadernak kha hmangin a kan lem. (Efe. 2:1-3; 1 Johan 5:19) Aa tinhnak cu lungthin dihlak in Jehovah kan biak khawh nakhnga lo kan duhnak ṭhencheuter kha si. Khuachia nih cutin a tuah khawhnak lam pahnih kong kha i ruah hna u sih. Pakhatnak, tangka duh awkah a kan lem. Pahnihnak, a ṭha lomi nuamhsaihnak i thim awkah a kan lem.

5. Tangka duh tuk kha zeicah kan hrial awk a si?

⁵ Kan dihlak in ei awk a za in ngeih, aa tlakmi hruk-aih awk le umnak inn ngeih kha kan duh. Asinain tangka duh tuk kha kan hrial a hau. Tuchan ah mi tampi cu “tangka a duhmi” an si i tangka nih a cawk khawhmi thil hna kha an duh. (2 Tim. 3:2, NW) Mah duhnak kha ngeih ve awkah a zultu pawl cu lem an si lai ti kha Jesuh nih a hngalh. Jesuh nih hitin a ti: “Ahohmanh bawi pahnih sal nan si kho lai lo; pakhat kha nan dawt deuh lai i pakhat kha nan huat deuh lai; pakhat sinah khan cun zumhawktlak tein nan um lai i pakhat tu kha cu zei ah nan rel lai lo. Pathian le tangka cu an rian nan ṭuan kep kho lai lo.” (Matt. 6:24) Jehovah a biak buin rum awkah a caan le thazaang tampi a hmangmi cu bawi pahnih sal ṭuan awkah aa zuammi a si. A lungthin dihlak in Jehovah kha a bia kho lai lo.

6. Laodisia Khrihfabu sin i Jesuh chimmi bia in zeidah kan cawn khawh?

⁶ Laodisia khua i a ummi Khrihfa pawl cu an i porhlaw. Hitin an ti: ‘Kan rum ko, kan i zaa ko, zeihmanh kan bau lo.’ Asinain Jehovah le Jesuh hmuhnak ahcun ‘an si a fak, puan aih awk hmanh an ngei lo i an mit a caw.’ Jesuh nih an rum caah si loin Jehovah he  an i pehtlaihnak a hrawkmi rumnak kha an duh caah ruahnak a cheuh hna. (Biat. 3:14-17) Rum duhnak kha kan lungthin chungah a ṭhang ti kan hngalh ahcun kan ruahnak kha kan remh colh awk a si. (1 Tim. 6:7, 8) Cutin kan tuah lo ahcun thil dang zong kha kan hun duh lai i Jehovah nih kan biaknak kha a cohlang lai lo. Jehovah nih na “lungthin dihlak” in ra ka daw seh ti aan duh. (Mar. 12:30) Kan nunnak ah tangka cu zeitindah a biapi tukmi a hung si khawh?

7-9. Khrihfa upa David kong in zeidah na cawn khawh?

⁷ United State ah a ummi, rian aa zuammi Khrihfa upa David kong hi ruathmanh. Rian aa zuammi ka si tiah amahle amah kha aa ti. Rian a ṭuannak company nih a ṭha deuhmi rian le tangka tam deuh an pek. Mah tikah an ram i mah rian a ṭuanmi hna lakah a ṭha bikmi ka si tiah aa ruat. David nih hitin a ti: “Hlawhtlinnak ka hmuhmi cu Jehovah thluachuah ka hmuhmi a si tiah ka ruah.” Asinain mah hlawhtlinnak cu Jehovah sinin a hmuhmi a si taktak maw?

⁸ A rian nih Jehovah he an i hawikomhnak a hrawh ti kha David nih duhsah duhsah in a hun hngalh. Hitin a ti: “Pumh lio le phungchim vah lio hmanhah rian i buaibainak kong kha ka ruah. Tangka tampi ka hmuh, asinain ka lungre a thei chin i kan chungkhar ah buaibainak a hung um.”

⁹ David nih a caah a biapi deuhmi kong he aa tlaiin biakhiahnak ka tuah a hau ti kha a hun hngalh. Hitin a ti: “Ka sining remh awkah a ṭhami biakhiahnak ka tuah.” David nih a rian ṭuan caan kha thlen a duh, cucaah mah kong kha a rian bawi sinah a chimh. A phichuak cu zeidah a si? A rian in phuah a si. Mah tikah David nih zeitindah a lehrulh? Hitin a ti: “A thaizing ah manh caan hmaikal ṭuan dingin  form ka phih.” An paw an i cawm khawh nakhnga David le a nupi cu thianhhlimhnak rian an ṭuan. Tlawmpal ah David cu hmaanhmaan hmaikal a hung ṭuan i a hnuah a nupi zong a ṭuan ve. Mah nuva hna nih mi tampi nih ṭuan an duh lomi rian kha an ṭuan, asinain an ṭuanmi rian cu an caah a biapi bikmi a si lo. A hlanah an hmuhmi tangka nakin cheuhra cheukhat tluk a tlawm deuh nain thla fatin an herhmi kha a za in an ngei. Jehovah kha pakhatnak ah chiah an duh i Pennak pakhatnak ah a chiami hna cu Jehovah nih a zohkhenh hna ti kha an hngalh.—Matt. 6:31-33.

10. Kan lung kha zeitindah kan ven khawh?

¹⁰ Tangka tlawmte kan ngeih ah siseh, tampi kan ngeih ah siseh kan lung kha kan ven a hau. Zeitin in dah? Rumnak kha duh hlah. Na caah Jehovah rian nakin vawlei lei rian kha a biapi deuhmi siter hlah. Cutin na si kha zeitindah na hngalh khawh? Biahalnak cheukhat kha hitin naa hal kho: ‘Pumhnak asiloah phungchim kalnak ah vawlei lei ka rian kong he aa tlaiin ka ruat lengmang maw? Hmailei ah tangka tampi ka ngei lai lo ti kha ka lungre a thei tawn maw? Tangka le thilri chawva nih kan chungkhar ah buaibainak a chuahter maw? Jehovah rian ṭuan awkah caan tam deuh ka pek khawh nakhnga midang nih an duh lomi vawlei lei rian kha lungtho tein ṭuan ka duh lai maw?’ (1 Tim. 6:9-12) Mah biahalnak hna kan ruah lioah Jehovah nih a kan dawt ti le lungthin dihlak in amah a biami pawl hitin bia a kamhmi hna kha kan i cinken awk a si: “Kaan kaltak bal hna lai lo i kaan hlaw bal fawn hna lai lo.” Cucaah lamkaltu Paul nih “tangka hi duh tuk hlah u” tiah a ti.—Heb. 13:5, 6.

11. Aa thimmi nuamhsaihnak ruangah mi pakhat cungah zeidah a cang kho?

¹¹ Jehovah nih a nuammi nunnak ngeihter a kan duh. A nuammi nunnak ngeih awkah nuamhsaihnak nih a kan bawmh khawh. A tak ti ahcun Baibal nih hitin a ti: “Minung nih hin a ṭha bik a tuah khawhmi cu zeidah a si ti ahcun, ei i din i a hmuhmi paoh kha i nuamhpi hi a si ko.” (Pct. 2:24) Asinain vawleicung i nuamhsaihnak tampi cu kan cungah a ṭhatlonak leiin huham a ngei kho. Mah nih mi tampi kha Baibal he aa ralchanhmi thil cohlan awk asiloah tlaihchan awk hmanhah a forh hna.

12. Nuamhsaihnak kha 1 Korin 10:21, 22 ningin zeicah ralring tein kan i thim awk a si?

¹² Jehovah kha lungthin dihlak in biak kan  duh, cucaah “Bawipa cabuai” le “khuachia cabuai” kha kan hman kep kho hna lo. (1 Korin 10:21, 22 rel.) Mi pakhat he rawl kan eiṭimi nih kan i hawikomhnak kha a langhter tawn. Zaangennak, khuachia thiamnak, ziaza rawhralnak asiloah a dang a ṭha lomi duhnak le lungput a hlorhmi nuamhsaihnak hna kha kan i thim ahcun Pathian a ral pawl he rawl kan eiṭimi le an timhtuahmi rawl kan eimi bantuk a si. A phichuak cu kanmahle kanmah harnak kan i pek lawng si loin Jehovah he kan i hawikomhnak zong a rawk lai.

13-14. Jeim 1:14, 15 ningin kan i thimmi nuamhsaihnak he aa tlaiin zeicah kan i ralrin awk a si? Tahchunhnak pe.

¹³ Zeitilam in dah nuamhsaihnak kha rawl he kan tahchunh khawh? Kan ei tikah zeidah kan ei lai ti kha kan i thim kho. Asinain rawl kan dolh hnu ahcun kan pum chungah zeitindah rian a ṭuan lai ti kha kan i thim kho ti lo. A ṭhami rawl nih kan ngan a damter khawh, asinain a ṭhalomi rawl nih cun a kan zawtter khawh. A kan hnorsuan ning cu kan hngal colh men lai lo, asinain caan tlawmpal hnuah kan hun hngalh lai.

¹⁴ Cu bantukin nuamhsaihnak kan i thim tikah kan lungthin chungah zeidah kan chiah lai ti kha kan i thim kho. Asinain kan i thimmi nuamhsaihnak cu kan ruahnak le kan intuarnak cungah huham a ngei lai. A ṭhami nuamhsaihnak nih hrimhnak a kan pek khawh, asinain a ṭhalomi nuamhsaihnak nih harnak a kan pek lai. (Jeim 1:14, 15 rel.) A ṭhalomi nuamhsaihnak cu kan cungah huham a ngei colh men lai lo, asinain duhsah duhsah in kan cungah huham a hung ngei lai. Cucaah Baibal nih hitin ralrin a kan pek: “Nanmah le nanmah i hleng hlah u; ahohmanh nih Pathian cu an deh kho lo. Mi nih a tuhmi cu a zun ko lai. A pumsa duhnak lo ah a tuh ahcun, thihnak kha a zun lai.” (Gal. 6:7, 8) Jehovah nih a huatmi thil a hlorhmi nuamhsaihnak vialte hlawt cu kan caah a biapi tukmi a si.—Salm 97:10.

15. Kan i nuamh nakhnga Jehovah nih zei laksawng dah a kan pek?

¹⁵ Jehovah miphun tampi nih Internet in zoh khawhmi TV program JW Broadcasting^® zoh kha an duh. Unaunu Marilyn nih hitin a ti: “JW Broadcasting nih aa nuam deuhmi si awkah a ka bawmh i mah ah aa telmi vialte cu ka caah an ṭhat dih caah a dihlak in ka zoh khawh. Ka li a len tik asiloah ka lung a dongh tikah thazaang a pemi phungchimnak asiloah Zinglei Pumhnak program hna kha ka kawl i ka zoh. Mah nih Jehovah le a bupi he a ka naihter deuh tiah ka ruah. JW Broadcasting nih ka nunnak kha a thlen dih cikcek.” Jehovah laksawng in ṭhatnak na hmu maw? JW Broadcasting cu thla fatin a thar chuah a si i mah ah aw khumhmi, video program le thazaang a pemi hla hna a um. Mah kha zeitik caan paohah na zoh khawh i na ngaih khawh.

16-17. Nuamhsaihnak caah kan hmanmi a caan kha zeicah kan uk awk a si, cutin zeitindah kan tuah khawh?

¹⁶ Nuamhsaihnak phun lawng kha si loin nuamhsaihnak caah kan hmanmi a caan zong kha kan i ralrin a hau. Kan i ralrin lo ahcun Jehovah rianṭuannak caah si loin nuamhsaihnak caah a caan tam deuh kan hman khawh. Mi tampi nih nuamhsaihnak caah a caan an hmanmi uk kha an i harh. Kum 18 a simi Abigail nih hitin a ti: “Ka rian a tam tuk ni ah ka ih lai ah TV ka zoh ahcun hrimhnak ka hmu. Asinain kaa ralrin lo ahcun TV zohnak caah suimilam tampi ka hman khawh.” Mino unaupa Samuel nih hitin a ti: “A caan ah Internet in video tawi tampi kha ka zoh. Pakhat te ka hun zoh i suimilam pathum asiloah pali tiang ka zohmi kha a hngalh hmanh kaa hngal lo.”

¹⁷ Nuamhsaihnak caah na hmanmi a caan kha zeitindah na uk khawh? Hmasa bik ah nuamhsaihnak caah a caan zeizat dah ka  hman ti kha hngalh awkah i zuam. Zarhkhat chungah nuamhsaihnak caah a caan na hmanmi kha i chingchiah. TV zohnak, Internet zohnak le phone in game celhnak caah a caan zeizat dah ka hman ti kha calendar ah i ṭial. Mah thil hna zohnak ah a caan tam tuk ka hman tiah na ruah ahcun cazin tuah awkah i zuam. A biapi deuhmi thil kha pakhatnak ah chiah dingin i timtuah law nuamhsaihnak caah a caan zeizat dah ka hman lai ti kha ri khiak. Cun cazin na tuahmi ningin na zulh khawh nakhnga Jehovah sinah bawmhnak hal. Cuticun pumpak Baibal hlathlainak, chungkhar pumhnak, Khrihfabu pumhnak, phungchimnak le cawnpiaknak ti bantuk Jehovah rianṭuannak caah na caan le na thazaang tam deuh na hman khawh lai. Mah tikah nuamhsaihnak caah a caan na hmanmi he aa tlaiin ka sual timi ruahnak zong na ngei ti lai lo.

18-19. Lungthin dihlak in Jehovah kan biak kha zeitindah kan langhter khawh?

¹⁸ Satan vawlei a dongh lainak kong le vawlei thar a rat lainak kong a ṭial hnuah lamkaltu Peter nih hitin a ti: “Ka u le ka nau hna, cu ni nan hngah lioah hin Pathian hmaiah a thiangmi le soi awk um lomi nan si nakhnga fakpi in i zuam u law amah he cun rem tein um u.” (2 Pet. 3:14) Mah ruahnak cheuhnak kan zulh tik, ziazalei le thlarau lei ah thianghlim tein kan um tikah lungthin dihlak in Jehovah kan biak ti kan langhtermi a si.

¹⁹ Satan le a vawlei nih kan nunnak ah Jehovah si loin a dang thil kha pakhatnak ah kan chiah nakhnga a kan lem peng lai. (Luka 4:13) Asinain zei bantuk zuamcawhnak kan ton hmanhah kan lungthin chungah Jehovah zaka ah mi pakhat asiloah thil pakhatkhat kha kan airolh lai lo. Jehovah kha amah lawng nih a hmuh awk a simi lungthin dihlak in biaknak kha pek awkah bia kan khiah.