1. Tipil in dingin mi pakhat bawmh cu tinvo sung a si ti kha 2 Korin 3:1-3 nih zeitindah a langhter? (A phaw hmanthlak zoh.)

BAIBAL na cawnpiakmi pakhat nan Khrihfabu ah tipil a inmi na hmuh tikah zeitindah na um? Mah nih aan nuamhter tuk lai ti cu a fiang ko. (Matt. 28:19) Baibal a cawnpiaktu na si ahcun tipil a in tikah na lung a cawlcang tuk lai i naa nuam tuk lai. (1 Thes. 2:19, 20) Tipil a ingkami zultu thar hna cu Baibal a cawnpiaktu “sin kuatmi thangṭhatnak ca” lawng si loin Khrihfabu dihlak caah an si.—2 Korin 3:1-3 rel.

2. (a) Zei a biapimi biahalnak kong dah kan ruah a hau, zeicah? (b) Baibal cawnpiaknak timi cu zeidah a si? (A tanglei fianternak zoh.)

² A luancia kum li lioah zatuak in thla fatin Baibal cawnpiaknak * 10,000,000 hrawng an tuahmi hmuh cu lunglawmh awk ngai a si. Cun mah kum li chungah zatuak in kum fatin 280,000 leng cu Jehovah Tehte pakhat in tipil an ing i Jesuh Khrih zultu thar an hung si. Baibal a cawngmi, mi nuai tampi kha tipil in awkah zeitindah kan bawmh khawh hna? Jehovah nih a Tehte an si nakhnga mi pawl kha caanṭha a pek peng rih hna. Cucaah kannih zong mi pawl nih tipil in awkah an ṭhancho colh khawh nakhnga kan si khawh chungin kan bawmh ve hna awk a si. A caan liam cu a rang tuk.—1 Kor. 7:29a; 1 Pet. 4:7.

3. Hi capar ah Baibal cawnpiaknak tuah ning kong he aa tlaiin zeidah kan i ruah hna lai?

 ³ Atu ah zultu siter cu a biapi tukmi a si caah Baibal kan cawnpiakmi hna nih tipil in dingin an ṭhancho khawh nakhnga zeidah kan tuah khawh timi kong he aa tlaiin Uktu Bu nih zung ṭengnge sinah an hal hna. Hi capar le a hnu capar ah hmuhtonnak a ngeimi hmaikal, missionary le peng zohkhenhtu hna sinin kan cawn khawhmi kong kha kan i ruah hna lai. * (Ptb. 11:14; 15:22) Baibal cawnpiaknak hmual ngei tein tuah khawh awkah Baibal cawnpiaktu le an cawnpiakmi hna nih an tuah khawhmi kong kha an fianter. Hi capar ah Baibal a cawngmi kip nih tipil in dingin an ṭhancho khawh nakhnga an tuah awk a simi a kong panga kha kan i ruah hna lai.

4. Kutka hram Baibal cawnpiaknak kong he aa tlaiin zeidah kan hngalh awk a si?

⁴ Unau tampi nih inn-ngeitu kha kutka hram ah Baibal cawnpiaknak an tuah hna. Mah cu Baibal hngalh duhnak an ngeih chin nakhnga a ṭhami biahram thawknak a si. Asinain mah biaruahnak cu zarh fatin a si hmanhah caan tawite chung lawng a si. An lung a thawh chin nakhnga unau cheukhat nih cun hngalh duhnak a ngeimi hna kha an phone number an hal hna i an chawnh hna asiloah Baibal caang tawi tein an ṭial i ca an kuat hna. Cuticun thla tampi chung mi pawl kha caan tawi tein bia an ruah men hna lai. Baibal a cawngmi pakhat cu Baibal hlathlainak tuah awkah a caan le thazaang tam deuh in a pek lo ahcun i pumpek in tipil in awkah a ṭhangcho taktak lai maw? A ṭhangcho lai lo.

5. Baibal kan cawnpiakmi hna bawmh khawh awkah Luka 14:27-33 ningin a hleiin Jesuh nih zeidah a chim?

⁵ Voikhat cu, Jesuh nih amah zultu si a duhmi hna nih an tuah dingmi kong he aa tlaiin tahchunhnak hmangin a chimh hna. Innsak aa timmi pa kong le raldoh awkah aa thawhmi siangpahrang pakhat kong kha a chim. Jesuh nih innsak aa timmi pa nih “a ṭhu hmasa i pei zeizat dah a dih lai ti kha a tuak hmasa cu” tiah a ti. Cun siangpahrang doh awkah aa thawhmi pa nih cun “a ṭhu hmasa lai i pei rak doh awkah ka thazang a za maw za lo ti kha a tuak hmasa lai cu” tiah a ti. (Luka 14:27-33 rel.) Cu bantukin Jesuh nih amah zultu si a duhmi hna nih a zultu an si khawh nakhnga tuah hna seh ti a duhmi kha ṭha tein an ruah a hau ti kha a hngalh. Cucaah Baibal kan cawnpiakmi hna kha kanmah he zarh fatin Baibal an cawn peng nakhnga tha kan pek hna a hau. Cutin zeitindah kan tuah khawh?

6. A ṭhangchomi Baibal cawnpiaknak ngeih awkah zeidah kan tuah awk a si?

 ⁶ Kutka hram Baibal cawnpiaknak kha sau deuh in tuah awkah i zuam. Na len fatin Baibal caang pakhat lawng si loin pahnih hrawng na ruah khawh. Inn-ngeitu nih sau deuh in len a duh ahcun hmun pakhatkhat ah ṭhut in Baibal i ruah chap dingin hal. Aan leh ning nih Baibal cawnpiak cu a caah zeitlukin dah a biapit ti kha a lang lai. Khulrang in a ṭhancho khawh nakhnga a duh ahcun Baibal cawnpiaknak kha zarhkhat ah voihnih tuah ding hmanh in na hal khawh. Asinain Baibal cawnpiaknak kha zarhkhat ah voikhat asiloah voihnih tuahnak lawngin a za lo.

7. Cawnpiaktu nih Baibal cawnpiaknak caah zeitindah ṭha tein aa timhtuah khawh?

⁷ Cawnpiaktu pakhat in Baibal cawnpiaknak na tuah hlan paohah ṭha tein naa timtuah a hau. Nan cawnmi cauk kha ṭha tein rel law Baibal caang pawl kha zoh hna. A biapimi a konglam hna kha fiang tein hngalh i zuam. A biatlangpi, a biatlangte, biahalnak, “rel” timi Baibal caang, hmanthlak le a konglam pawl fianter awkah aan bawm khomi video pawl kha ṭha tein ruat. Cun Baibal na cawnpiakmi kong le a sawhsawh tein zeitindah ka fianter khawh lai timi kong kha ruat. Cutin na tuah ahcun Baibal na cawnpiakmi nih fawi tein a hngalhthiam khawh lai i mah ningin a zulh khawh lai.—Neh. 8:8; Ptb. 15:28a.

8. Baibal kan cawnpiakmi hna caah thlacamnak kong he aa tlaiin lamkaltu Paul nih Kolose 1:9, 10 ah zeidah a kan cawnpiak?

⁸ Nangmahlei in ṭha tein i timtuah law Baibal na cawnpiakmi kong le a herhmi kong kha Jehovah sinah thlacam. Cun a lung a suk khomi lam in Baibal na cawnpiak khawh nakhnga Jehovah sinah thla cam. (Kolose 1:9, 10 rel.) Baibal na cawnpiakmi nih cohlan awk asiloah hngalhthiam awkah aa harhmi kong hna kha hngalh awkah i zuam. Na hmuitinh cu tipil in dingin a ṭhancho khawh nakhnga bawmh a si ti kha philhhlah.

9. Cawnpiaktu nih Baibal a cawnpiakmi kha hlathlainak tuah awkah zeitindah a bawmh khawh? Fianter.

⁹ Hmaan tein Baibal kan cawnpiakmi hna nih Jehovah le Jesuh nih an tuahmi thil kha an sunsak lai i tam deuh in hngalh an duh lai tiah kan i ruahchan. (Matt. 5:3, 6) Baibal cawnnak in ṭhathnemhnak a hmuh nakhnga Baibal a cawngmi nih a cawnmi kong ah lungthin a pek a hau. Cun Baibal cawnnak caah i timhtuah chung, a konglam pawl rel le a cawnmi ningin zulh cu zeitlukin dah a biapit ti kha a hleiin  hngalhter. I timhtuah chung awkah zeitindah na bawmh khawh? Nan cawn dingmi kong kha hmunkhat ah zohṭi u law zeitindah tuah ding a si ti kha hmuhsak. * A phi kawl ning kha hmuhsak law rinpiak, mah nih i cinken awkah a bawmh lai. Cun amah holh tein a phi pek awkah forh. Cutin a tuah tikah a cawnmi zeitlukin dah a hngalhthiam ti kha na hngalh lai. Asinain Baibal na cawnpiakmi kha cutin tuah awkah na forh khawhmi a dang a um rih.

10. Ni fatin Baibal rel cu zeicah a biapit, Baibal a cawngmi nih Baibal relnak cu a caah bawmtu a si nakhnga zeidah a tuah awk a si?

¹⁰ Mah lengah cawnpiaktu nih zarh fatin hlathlainak a tuahpi ahcun a cawnpiakmi cu ni fatin a nunnak ah ṭhathnemhnak a hmu lai. Cun Jehovah he bia i ruah zong a hau. Zeitindah? Jehovah sinah biachim le bia ngaihnak thawngin a si. Ni fatin Baibal a relnak thawngin Pathian bia kha a ngaih khawh. (Josh. 1:8; Salm 1:1-3) jw.org * ah taarmi “Baibal Relnak Caah Cazin” timi catlap hman ningcang kha hmuhsak. Mah nih Baibal rel awk, Jehovah kong he aa tlaiin Baibal cawnpiakmi kong ṭha tein ruah awk le a cawnmi ningin zulh awkah a bawmh lai ti cu a fiang ko.—Lam. 17:11; Jeim 1:25.

11. Baibal a cawngmi nih aa tlak ning tein thlacam awkah zeitindah a cawn khawh, a caah Jehovah sinah atu le atu thlacam cu zeicah a biapit?

¹¹ Baibal na cawnpiakmi kha Jehovah sinah ni fatin thlacam dingin tha pe. Baibal nan cawn hlan le nan cawn dih hnuah lungtak tein thla camṭi u. Baibal na cawnpiakmi nih na thlacamnak a ngaih tikah lungtak tein thlacam awk a si ti le Jehovah Pathian sinah Jesuh Khrih min in thlacam awk a si ti kha a hngalh lai. (Matt. 6:9; Johan 15:16) Baibal na cawnpiakmi kha (Jehovah bia ngaih a simi) ni fatin Baibal relnak le (Jehovah sinah biachim a simi) thlacamnak nih a hlan nakin Pathian he i naih deuh awkah a bawmh lai. (Jeim 4:8) Ni fatin cutin a tuah ahcun pumpeknak tuah dingin le tipil in dingin ṭhancho awkah a bawmh lai. Zeinihdah a bawmh khawh rih?

12. Cawnpiaktu nih a cawnpiakmi kha Jehovah he an i pehtlaihnak a ṭhancho nakhnga zeitindah a bawmh khawh?

¹² Baibal a cawngmi nih Baibal kha cawn sawhsawh lawng si loin lungtak tein a cawn a  hau. Zeicah? Baibal kan cawnpiakmi nih Jehovah kong kha cawng seh ti kan duh. Asinain a cawnmi nih a lung a suk lawngah a cawnmi ningin zulh a duh lai. Jesuh nih mi tampi nih a sinin cawn an duh nakhnga thil tampi a rak cawnpiak hna. Asinain mi nih a hnu an zulhnak a ruang cu an lung a suk hna caah a si. (Luka 24:15, 27, 32) Baibal na cawnpiakmi nih Jehovah kha a um taktakmi in a hmuh a hau, cun an i pehtlaihnak ṭhanchoter khawh a simi mi pakhat in le a Pa, a Pathian le a hawi zongin a hmuh a hau. (Salm 25:4, 5) Baibal cawnpiaknak na tuah lioah na cawnpiakmi kha Pathian i a ṭha tukmi sining ah lungthin pek dingin cawnpiak. (Exo. 34:5, 6; 1 Pet. 5:6, 7) Nan cawnmi kong kip ah Jehovah cu zaangfahnak a ngeimi Pathian a si timi kong kha chim. Cun dawtnak, nemnak le zaangfahnak ti bantuk Jehovah i a ṭha tukmi a sining hna kha sunsak awkah bawm. Jesuh nih “a ngan bik le a biapi bik nawlbia cu” “Pathian cu na lungthin dihlak in” na dawt lai ti hi a si tiah a ti. (Matt. 22:37, 38) Baibal na cawnpiakmi nih Jehovah kha lungtak tein a dawt nakhnga bawmh awkah i zuam peng.

13. Jehovah i a ṭha tukmi sining kong cawn awkah Baibal a cawngmi pakhat bawmh khawh ning kong kha tahchunhnak pe.

¹³ Baibal na cawnpiakmi kha Jehovah na dawtnak a ruang kha chim. Mah nih Jehovah he hawikom si a hau ti le amah dawt awkah cawn a hau ti kha hngalh awkah a bawmh lai. (Salm 73:28) Tahchunhnak ah, a cawnmi cauk asiloah Jehovah dawtnak, fimnak, dinnak le ṭhawnnak kong he aa tlaiin Baibal chimmi kong nih a lung a suk maw? Baibal na cawnpiakmi kha mah cu vancung kan Pa kan dawt awk a sinak a ruang tampi lakah pakhat lawng a si ti kha hngalhter. Baibal a cawngmi kip nih tipil in dingin an ṭhancho khawh nakhnga an tuah dingmi thil cheukhat a um rih.

14. Baibal a cawngmi pakhat a ṭhancho khawh nakhnga Khrihfabu pumhnak nih a bawmh khawh timi kong he aa tlaiin Hebru 10:24, 25 nih zeidah a kan chim?

¹⁴ Kan dihlak in Baibal kan cawnpiakmi hna cu tipil in dingin ṭhangcho hna seh ti kan duh. Kan bawmh khawh hnanak a biapimi lamkhat cu Khrihfabu pumhnak ah i pumh dingin kan sawm hnanak thawngin a si. Hmuhtonnak a ngeimi cawnpiaktu hna nih Baibal kan cawnpiakmi hna cu an i pumh tikah an ṭhancho a rang deuh tiah an ti. (Salm 111:1) Cawnpiaktu cheukhat nih an cawnpiakmi hna kha Baibal hngalh cu hlathlainak lawngin si loin pumhnak zongin nan hmuh lai tiah an ti hna. Baibal na  cawnpiakmi he Hebru 10:24, 25 kha rel u law aa pumhnak thawngin a hmuhmi ṭhathnemhnak kong kha chim. Cun Biakinn ah Zei Hna Dah An Tuah? * timi video kha piahpiak. Baibal na cawnpiakmi kha a nunnak ah zarh fatin i pumh cu a biapi tukmi a si ti kha a hngalh nakhnga bawm.

15. Baibal kan cawnpiakmi kha hmaan tein aa pumh nakhnga tha pek awkah zeidah kan tuah khawh?

¹⁵ Baibal na cawnpiakmi cu aa pum bal lo asiloah a caan caan lawngah aa pumh ahcun zeidah na tuah khawh? Nai i naa pumhnak in na cawnmi thil cheukhat kong kha lungtho tein chim. Pumhnak kong he aa tlaiin na ruahnak kha a hngalh tikah cutin tuah a duh ve lai. Atu i nan cawn liomi Vennak Innsang asiloah Nunning le Rianṭuannak—Tuahchunhnak Cauk kha pe. A hnu pumhnak ah nan cawn dingmi kong kha hmuhsak law zei kong dah hngalh a duh bik ti kha hal. A hmasa bik aa pumhnak in a hmuhmi le a theihmi kong cu aa pumh balmi a dang biaknak nakin a ṭha deuh lai. (1 Kor. 14:24, 25) A dang aa zohchunh khawhmi zohchunhawk a ṭhami hna kha a hmuh hna lai i mah nih tipil in dingin ṭhancho awkah a bawmh lai.

16. Baibal a cawngmi hna tipil in dingin an ṭhancho khawh nakhnga zeidah kan tuah a hau, a hnu capar ah zei kong dah kan i ruah hna lai?

¹⁶ Baibal kan cawnpiakmi kha tipil in dingin ṭhancho awkah zeitindah kan bawmh khawh? Baibal kan cawnpiakmi hna kha zarh fatin hlathlainak tuah awk le an cawn dingmi caah i timhtuah chung awkah tha kan pek hnanak thawngin hlathlainak tuah cu zeitlukin dah a biapit ti kha an hngalh nakhnga kan bawmh khawh hna. Cun ni fatin Jehovah he bia an i ruah nakhnga le Pathian he an i pehtlaihnak a ṭhancho nakhnga tha pek zong kan duh hna. Mah lengah Baibal kan cawnpiakmi hna kha Khrihfabu pumhnak ah i pumh ding zongin forh kan duh hna. (“ Baibal A Cawngmi Nih Tipil In Dingin A Ṭhancho Nakhnga A Tuah Awk A Simi” timi cahmai 12 i rinli kulh kha zoh.) A hnu capar ah Baibal a cawngmi hna tipil in dingin an ṭhancho khawh nakhnga cawnpiaktu nih an tuah khawhmi thil panga kong kha kan i ruah hna lai.