1. Pathian nih hlanlio zumhfekmi a salle hna kha zeitindah thazaang a rak pek hna?

 BAIBAL nih zumhfekmi pa pawl kha thazaang a ṭhawngmi in a langhter tawn hna. Asinain a zungzal in cun kan thazaang a ṭhawng tiah an ruat lo. Tahchunhnak ah, thil sining cheukhat ah Siangpahrang David nih “tlang” bantuk in ka ṭhawng tiah a ruah nain a caan ah “ṭihnak” a ngei. (Salm 30:7) Pathian thiang thlarau nih Samson kha a thazaang a ṭhawnter. Asinain Pathian nih ṭhawnnak a pek lo ahcun “midang bantuk cio ka si ve ko lai” ti kha a hngalh. (Biat. 14:5, 6; 16:17) Mah zumhfekmi pa pawl thazaang an ngeihmi cu Jehovah thawng lawng in a si.

2. Lamkaltu Paul nih ka derthawm tikah ka ṭhawn a si tiah zeicah a ti? (2 Korin 12:9, 10)

² Lamkaltu Paul zong nih Jehovah pekmi thazaang a herh kha a hngalh. (2 Korin 12:9, 10 rel.) Kanmah bantuk in Paul zong a ngan a dam lomi a si ve. (Gal. 4:13, 14) A caan ah thil ṭha tuah zong kha aa harh. (Rom 7:18, 19) Cun a caan ah a lungre a thei i a cung ah zeidah a cang lai ti a phang. (2 Kor. 1:8, 9) Asinain Paul cu a thazaang a der tikah a hung ṭhawng. Zeitin in dah? Paul nih zuamcawhnak a inkhawh nakhnga a herhmi thazaang kha Jehovah nih a pek.

3. Hi capar ah zei kong dah kan i ruah hna lai?

³ Jehovah nih thazaang kaan pek hna lai tiah bia a kan kamh ve. (1 Pet. 5:10) Asinain zeihmanh tuah loin Pathian bawmhnak kan hmu lai tiah kan i ruahchan awk a si lo. Tahchunhnak  ah, mawṭaw kha a engine nih a kalter khawh. Asinain a mawngtu nih a kal duhnak hmun lei ah a kal khawh nakhnga a mawngh a hau. Mah bantuk in kan herhmi thazaang pek awkah Jehovah cu timhcia in a um ko nain ṭhathnemhnak hmuh awkah kanmah lei in kan tuah ve a hau. Thazaang ngeih awkah Jehovah nih zeidah a kan pek? Mah thazaang hmuh awkah zeidah kan tuah a herh? Mah biahalnak hna a phi kha profet Jonah, Jesuh nu Mary le lamkaltu Paul Jehovah nih a bawmh hna ning kong kan ruahnak thawng in kan hngalh khawh. Tuchan ah cu bantuk lam hna hmang in Jehovah nih a salle thazaang a pek hna ning zong kha kan i ruah hna lai.

4. Jehovah sinin zeitindah thazaang kan hmuh khawh?

⁴ Thazaang kan hmuh khawhnak lamkhat cu Jehovah sinah thla kan camnak thawng in a si. Jehovah nih “thil ti khawhnak ṭhawnnak” a kan peknak thawng in kan thlacamnak kha a kan leh. (2 Kor. 4:7) Baibal relnak le mah kong ṭha tein ruahnak thawng zong in thazaang kan ngei kho. (Salm 86:11) Jehovah nih a kan pekmi Baibal bia cu “a ṭhawng.” (Heb. 4:12) Jehovah sinah thla na cam i Baibal na rel ahcun na herhmi thazaang kha na hmuh lai. Mah tikah inkhawhnak na ngei lai i naa nuam lai asiloah pek na simi a harmi rian kha na liim khawh lai. Jehovah nih profet Jonah thazaang a pek ning kha ruat.

5. Profet Jonah nih zeicah thazaang a ngeih a herh?

⁵ Profet Jonah cu ralṭhatnak a ngeih a hau. Jehovah nih a fialnak hmun ah kal kha a ṭih. Cucaah tilawng aa cit i hmun dang ah a zaam. Mah ruang ah amah le tilawng cung ah a ummi hna cu an rak thi deng. Tilawng rianṭuantu pawl nih rili ah an thlak tikah ngapi nih a dolh. Cuticun Jonah cu ṭih a nungmi ngapi paw chung ah a phan. Jonah cu zeitindah a um lai tiah na ruah? A hmasa ahcun ka thi lai tiah a ruah men lai. Jehovah nih a ka hlawt ti zong in a ruah men lai. Cucaah Jonah cu a lungre a thei tuk ko lai.

6. Jonah 2:1, 2, 7 ning in Jonah nih ngapi paw chung a um lioah zeidah a tuah?

⁶ Ngapi paw chung a um lioah Jonah nih thazaang a hmuh nakhnga zeidah a tuah? Jehovah sinah thla a cam. (Jonah 2:1, 2, 7 rel.) Jonah nih Jehovah nawl kha a ngai lo nain aa ngaichih i thla a cam. Cun hlan ah a rak relmi Baibal caang hna zong kha ṭha tein a ruah. Zeicah cutin kan chim khawh? Jonah ṭhen 2 ah langhtermi a thlacamnak ah Salm ah hmuhmi bia tampi kha a telh. (Tahchunhnak ah, Jonah 2:2, 5 le Salm 69:1; 86:7 kha tahchunh.) Cucaah Jonah nih mah Baibal caang hna kha ṭha tein a hngalh ti cu a fiang ko. Mah nih Jehovah nih a ka bawmh lai timi zumhnak a ngeihter. Jehovah nih a nunnak kha a khamh hnuah Jonah cu a fialmi rian ṭuan awkah timhcia a rak si.—Jonah 2:10–3:4.

7-8. Taiwan ah a ummi unaupa pakhat nih a tonmi harnak inkhawh awkah zeitindah thazaang a rak hmuh?

⁷ Harnak tampi kan ton tikah Jonah kong nih a kan bawmh khawh. Tahchunhnak ah, Taiwan ah a ummi unaupa Zhiming b cu a zual tukmi zawtnak a ngei. Mah leng ah Jehovah a zumh ca zong ah a chungkhar nih fakpi in an ralchanh. Asinain thla a camnak thawng in le hlathlainak a tuahnak thawng in thazaang a hmu. Hitin a ti: “A caan ah buaibainak a chuah tikah ka lungre a thei tuk i pumpak hlathlainak ka tuah kho lai lo tiah ka ruah.” Asinain a lung a dong lo. Hitin a ti chap: “A hmasa bik ah, Jehovah sinah thla ka cam.  Earphone in Pennak hla ka ngai i a caan ah ka lung a daih tiang din tein hla ka si. Mah hnuah hlathlainak ka tuah.”

⁸ Pumpak hlathlainak nih Zhiming kha a ṭha tukmi lam in aa ruahchan lomi thazaang a ngeihter. Tahchunhnak ah, khuaihlainak an tuah lioah nurse pakhat nih na thisen a tlawm caah thi rawnh na hau lai tiah a ti. Zhiming nih khuaihlainak an tuah lai zan ah amah bantuk in a zawmi unaunu pakhat kong kha a rel. A relmi unaunu thisen cell cu amah nak hmanh in a tlawm deuh nain thirawnh kha a al i a rak dam ṭhan. Mah hmuhtonnak nih Zhiming kha zumhfek tein um awkah thazaang a ngeihter.

9. Na tonmi harnak ruang ah na lungre a theih ahcun zeidah na tuah khawh? (Hmanthlak zong zoh.)

⁹ Harnak na ton lioah Jehovah sinah thlacam naa harh maw? Asiloah hlathlainak tuah awkah na ba tuk maw? Jehovah nih na sining ṭha tein a hngalh ti kha philh hlah. Cucaah a sawhsawh tein thla na cam hmanh ah na herhmi aan pek lai kha zum. (Efe. 3:20) Pumsalei asiloah lungthinlei ruang ah ca rel le hlathlainak tuah naa harh ahcun Baibal awkhumhmi asiloah Baibal hrambunh in chuahmi cauk pawl awkhumhmi kha na ngaih khawh. Cun jw.org ah taarmi hla pakhat kha na ngaih khawh asiloah video pakhat kha na zoh khawh. Jehovah nih thazaang ngeihter aan duh. A sinah thla na cam tik le na thlacamnak a phi hngalh awkah Baibal, cauk le video pawl ah na kawl tikah cutin thazaang aan pek lai.

10. Khrihfa unau pawl nih zeitindah thazaang a kan pek khawh?

¹⁰ Kanmah thazaang pek awkah Jehovah nih unau pawl kha a hman khawh hna. Annih cu harnak kan ton tik asiloah a harmi rian, ṭuan kan i harh tikah “bawmtu ṭhahnem ngaingai” an si kho. (Kol. 4:10, 11) A hleiin “harnak”  kan ton caan ah hawikom kan herh. (Ptb. 17:17) Kan thazaang a der tikah kan unau pawl nih pumsalei, lungthinlei le thlaraulei in an kan bawmh khawh. Jesuh a nu Mary nih midang sinin thazaang a hmuh ning kha i ruahhmanh hna u sih.

11. Mary nih zeicah thazaang a ngeih a herh?

¹¹ Jehovah duhnak tuah awkah Mary nih thazaang a ngeih a hau. Vancungmi Gabriel nih a biapimi rian a pek lioah zeitluk in dah a lungre a theih lai ti kha ruathmanh. Va a ngei rih lo nain fa a pawi cang lai. Nau a ngei bal lo nain atu ahcun Messiah a si dingmi ngakchia kha a zohkhenh a hau cang. Nupa sinak a tuah bal lo nain fa ka pawi cang tiah an i hammi Josef kha a chimh a hau. Mah cu a caah a har tuk lai.—Luka 1:26-33.

12. Luka 1:39-45 ning in Mary nih a herhmi thazaang kha zeitindah a rak hmuh?

¹² Mary nih aa thleidangmi le a har tukmi rian liim awkah a herhmi thazaang kha zeitindah a hmuh? Midang sinah bawmhnak a hal hna. Tahchunhnak ah, pek a simi rian kong he aa tlaiin a dang lamhruainak pek awkah Gabriel kha a hal. (Luka 1:34) Mah hnu tlawmpal ah a chungkhat Elizabeth tlawn ding in Judah “tlangram i a ummi khua pakhat ah” a kal. Mah cu a caah a ṭha tukmi khualtlawnnak a si. Elizabeth nih Mary kha a thangṭhat. Mary nih a hrin rih lomi a fapa kong he aa tlaiin thazaang a pemi chimchungbia chim awkah Jehovah nih Elizabeth kha a hman. (Luka 1:39-45 rel.) Jehovah nih “a ṭhawngmi a ban kha a samh” tiah Mary nih a ti. (Luka 1:46-51) Jehovah nih Gabriel le Elizabeth hmang in Mary kha thazaang a rak pek.

13. Bolivia ah a ummi unaunu pakhat nih unau pawl bawmhnak a hal hna tikah zei ṭhatnak dah a hmuh?

¹³ Mary bantuk in unau pawl sinin thazaang na hmu kho ve. Bolivia ah a ummi unaunu Dasuri cu thazaang pek a a hau. A pa cu a zawtnak a zual tuk i siizung an um lioah Dasuri nih a pa kha ṭha tein a zohkhenh. (1 Tim. 5:4) Mah cu a fawimi a si lo. Hitin a ti: “Voi tampi ka pa kha ka zohkhenh kho ti lai lo tiah ka ruah.” Midang sinah bawmhnak a hal hna maw? A hmasa ah cun a hal hna lo. Hitin a ti: “Unau pawl kha hnahnawhnak pek ka duh hna lo. ‘Jehovah nih ka herhmi cu a ka bawmh ko lai’ tiah ka rak ruah. Asinain mahte lawng in um cu buaibainak mah lawng in tawnghtham awkah i zuam he aa lo ti kha ka hun hngalh.” (Ptb. 18:1) Dasuri nih a hawile sinah a kong cheukhat chim awkah biakhiahnak a tuah. Hitin a ti: “Unau pawl sinin thazaang tampi ka hmu. Siizung ah rawl an ka put i Baibal in tha an ka pek. Kanmah lawng kan si lo timi ruahnak cu hnemtu taktak a si. Kannih cu Jehovah i a nganmi chungkhar ah aa telmi kan si. Unau pawl nih kan herhmi kha bawmh an kan duh. Harnak kan ton tikah an kan ngaihchiatpi i anmah he Pathian biakṭi awkah tha an ka pek.”

14. Khrihfa upa pawl bawmhnak kha zeicah kan cohlan awk a si?

¹⁴ Jehovah nih tha a kan peknak lamkhat cu Khrihfa upa thawng in a si. Annih cu kanmah hrimhnak pek awkah Pathian nih a kan pekmi laksawng an si. (Isa. 32:1, 2) Cucaah na lungre a theih tikah Khrihfa upa pawl kha chim hna. An in bawmh tikah lunglawm tein cohlang. Anmah pawl hmang in Jehovah nih thazaang aan pek khawh.

15. Khrihfa dihlak nih zei ruahchannak dah kan ngeih?

¹⁵ Baibal ruahchannak cu thazaang kan hmuhnak hrampi a si. (Rom 4:3, 18-20) Khrihfa cheukhat cu vancung  ah zungzal nun ding timi ruahchannak an ngei i cheukhat tu cu aa dawh tukmi hi vawlei ah zungzal nun ding timi ruahchannak an ngei. Kan i ruahchannak nih harnak inkhawh awk, thawngṭha chim awk le Khrihfabu rian tampi ṭuan awkah thazaang a kan ngeihter khawh. (1 Thes. 1:3) Mah ruahchannak nih lamkaltu Paul kha thazaang a ngeihter.

16. Lamkaltu Paul nih zeicah thazaang a ngeih a herh?

¹⁶ Paul nih thazaang a ngeih a hau. Korin Khrihfa hna sin a cakuat ah amah le amah kha a kuai a fawimi tlak um he aa tahchunh. Paul cu ‘khat lei khat lei in rial lengmangnak,’ ‘lung aw ṭawm in umnak,’ ‘ceite in ṭhuatnak’ hna a tong i “ral tampi” zong a ngei. (2 Kor. 4:8-10) Paul nih mah cakuat kha a voithumnak missionary khual a tlawn lioah a ṭialmi a si. Mah cakuat a ṭial hnuah a har deuhmi thil sining a rak tong. A phu ning in dohnak, tlaihnak le tilawng rawhnak hna a tong i thong zong a tla.

17. 2 Korin 4:16-18 ning in Paul kha harnak inkhawh awkah zeinihdah thazaang a ngeihter?

¹⁷ Paul nih aa ruahchannak cung ah lungthin a pek caah inkhawhnak ngeih awkah thazaang a ngei. (2 Korin 4:16-18 rel.) Korin Khirhfa hna sinah ka mihring sinak cu ‘duhsah tein a zor’ ko nain mah nih ka lung a ka donghter lo tiah a ti. Paul nih a hmailei kong ah lungthin a pek. Vancung ah zungzal nun ding timi aa ruahchannak cu a tonmi zei bantuk harnak nakhmanh in “a let tampi in” man a ngei deuh. Paul nih mah ruahchannak kong kha ṭha tein a ruah caah ‘nikhat hnu nikhat ka thar chin lengmang’ tiah aa ruah.

18. Tihomir le a chungkhar kha zei ruahchannak nih dah thazaang a ngeihter hna?

¹⁸ Bulgaria ah a ummi unaupa Tihomir cu hmailei aa ruahchannak ruang ah thazaang a ngei. A luancia kum tlawmpal lioah a naupa Zdravko cu accident in a thi. Cucaah Tihomir cu a ngaih a chia tuk. Inkhawhnak ngeih awkah a nupi le a fapa he thawhṭhannak kong kha an mitthlam ah an cuanter. Hitin a ti: “Tahchunhnak ah, Zdravko a thawhṭhan tikah khoika hmun ah dah kan hmuh lai, zei rawl dah kan chuanpiak lai, party kan tuah ahcun aho te dah kan sawm hna lai i donghnak caan kong he aa tlaiin zei kong dah kan chimh lai timi kong hna kha kan i ruah hna.” Tihomir nih ruahchannak cung ah lungthin an pekmi  nih inkhawhnak ngeih peng awk le Jehovah nih a naupa a thawhter ṭhan lai caan kha hngah peng awkah a kan bawmh tiah a ti.

19. Naa ruahchannak a feh nakhnga zeidah na tuah khawh? (Hmanthlak zong zoh.)

¹⁹ Naa ruahchannak kha zeitindah na fehter khawh? Tahchunhnak ah, vawlei ah zungzal nun ding timi ruahchannak na ngeih ahcun Paradis he aa tlaiin Baibal ah a langhtermi kong kha rel law ṭha tein ruat. (Isa. 25:8; 32:16-18) Vawlei thar cu zeidah a lawh lai ti kha ruat. Cun mah ah ahote dah na hmuh hna? Zei thawng dah na theih? Zeitindah na um? tiah na mitthlam ah cuanter. Paradis cu zeidah a lawh timi kong mitthlam cuanter khawh awkah kan cauk ah langhtermi hmanthlak asiloah Vawlei Thar Muithlam, A Nai Tuk Cang asiloah Na Mitthlam Ah Cuanter ti bantuk music video hna kha zoh. Vawlei thar kong mitthlam cuanter awkah a caan hmaan tein kan pek ahcun kan buaibainak hna cu “caan tawite” ca lawng an si lai. (2 Kor. 4:17) Jehovah pekmi ruahchannak nih thazaang aan ngeihter lai.

20. Kan tha a der tiah kan ruah tik hmanh ah zeitindah thazaang kan ngeih khawh?

²⁰ Kan thazaang a der tiah kan ruah hmanh ah “Pathian kan sinah a ṭan caah” thazaang kan ngei lai.” (Salm 108:13) Jehovah nih a sinin thazaang na hmuh nakhnga a herhmi thil aan pek. Cucaah pek na simi rian liim awk, harnak inkhawh awk asiloah i nuamh peng awkah Jehovah sinah lungtak tein thlacam law pumpak hlathlainak na tuahnak thawng in a lamhruainak kha kawl. Khrihfa unau pawl sinin na hmuhmi hnemhnak kha cohlang. Hmailei ruahchannak kong ruah awkah a caan hmaan tein pe. Cutin nan tuah ahcun “zeizong vialte kha lungsau thinfual in nan inkhawh nakhnga amah [Pathian] thazaang chung in a chuakmi thazaang nih” aan ṭhawnter hna lai.”—Kol. 1:11.