1-2. (a) Minung caah Armageddon cu zeicah thawngṭha a si? (b) Hi capar ah zei kong dah kan i ruah hna lai?

MI CHEUKHAT nih nuclear raldohnak asiloah leiser ral ruangah vawlei hi a rawk lai tiah an zumh. Asinain mah cu Baibal cawnpiakmi a si lo. Mah canah Baibal nih a rauhhlan ah raldohnak a um lai i mah nih ṭhatnak a chuahter lai tiah a ti. Mah raldohnak cu Armageddon ti a si. Mah raldohnak he aa tlaiin Baibal chimmi nih nuamhnak a kan hmuhter lai. (Biat. 1:3) Armageddon raldohnak nih minung kha a hrawk hna lai lo, mah canah a khamh hna lai. Zeiti lam in dah?

² Armageddon raldohnak nih minung uknak a donghternak thawngin minung kha a khamh hna lai tiah Baibal nih a langhter. Mah raldohnak nih miṭhalo pawl kha hrawk in miding mi pawl lawng a nunter hnanak thawngin le vawlei kha a rawh nakhnga lo a huhphenhnak thawngin minung kha a khamh hna lai. (Biat. 11:18) Mah kong kha hngalhthiam deuh awkah biahalnak pali in i ruah hna u sih: Armageddon timi cu zeidah a si? Armageddon hlanah zeidah a cang lai? Armageddon ah khamh kan si nakhnga zeidah tuah a herh? Armageddon a naih chin bantukin zeitindah zumhfek tein kan um khawh?

3. (a) “Armageddon” timi biafang nih zeidah a chim duhmi a si? (b) Biathlam 16:14, 16 ningin Armageddon cu vawleicung ah a um taktakmi hmun a si lo tiah zeicah kan chim khawh?

³ Biathlam 16:14, 16 rel. “Armageddon” timi biafang cu Baibal ah voikhat lawng langhter a si i “Megiddo Tlang” tiah sullam a ngeimi Hebru biafang in a rami a si. (Biat. 16:16) Megiddo  cu hlanlio Israel khuapi pakhat a si. (Josh. 17:11) Asinain Armageddon cu vawleicung ah a um taktakmi hmun kha a chim duhmi a si lo. Jehovah doh awkah “vawleicung siangpahrang vialte” an i pumhmi kha a chim duhmi a si. (Biat. 16:14) Asinain hi capar ah “Armageddon” timi biafang kha vawleicung siangpahrang vialte an i pumh dih hnuah aa thawk colh hngami raldohnak ca zongah a hman. Armageddon cu langhternak hmun a si ti kha zeitindah kan hngalh khawh? Pakhatnak, Megiddo tlang cu a um taktakmi a si lo. Pahnihnak, Megiddo timi hmun cu a bit tuk caah “vawleicung siangpahrang vialte,” an ralkap pawl le an hriamnam pawl caah a za lai lo. Pathumnak, vawlei “singpahrang” hna nih vawleicung pumpi ah a ummi Pathian miphun an doh hna tikah Armageddon raldohnak cu aa thawk lai. Hi capar ah mah kong kha a langhter lai.

4. Pathian nih a liannganmi hmanung bik raldohnak kha Megiddo he zeicah a pehtlaihter?

⁴ Jehovah nih a liannganmi hmanung bik raldohnak kha Megiddo he zeicah a pehtlaihter? Baibal chan ah Megiddo le Jezreel Nelrawn pawngah ral tampi an rak i do. A caan ah Jehovah nih a miphun pawl kha raldohnak ah a bawmh hna. Tahchunhnak ah, “Megiddo ti pawngah” Sisera nih a hruaimi Kanaan ralkap tei awkah Israel Biaceihtu Barak kha Pathian nih a rak bawmh. Mah tikah Barak le profet Deborah nih khuaruahhar lam in teinak an hmuh caah Jehovah kha an lawmh. Hitin hla an sa: “Vancung khin arfi nih . . . Sisera cu a run tuk. Kishon tiva nih a fenh hna.”—Biac. 5:19-21.

5. Barak raldohnak le Armageddon raldohnak cu zeiti lam in dah aa dan lai?

⁵ Barak le Deborah nih an hla kha hitin an donghter: “Cu bantukin na ral vialte cu, maw BAWIPA, rawk dih hna seh. Sihmanhselaw na hawikom hna cu, ni khi a ṭhawnnak in a chuah bantuk khi si hna seh.” (Biac. 5:31) Armageddon raldohnak zongah Pathian ral pawl cu hrawh an si lai i Pathian a dawmi hna cu khamh an si lai. Asinain a biapi tukmi aa dannak pakhat cu Armageddon raldohnak ah cun Pathian miphun nih ral an doh a hau lai lo. Hriamnam hmanh an ngei lai lo. Jehovah le vancung a ralkap pawl ‘dai tein i bochan’ cu an ‘ṭhawnnak’ a si lai.—Isa. 30:15; Biat. 19:11-15.

6. Armageddon raldohnak ah Pathian nih a ral pawl kha zeitindah a tei hna lai?

⁶ Armageddon raldohnak ah Pathian nih a ral pawl kha zeitindah a tei hna lai? Lam tampi a hman khawh. Tahchunhnak ah, lihninh, rial le ṭek hna kha a hman khawh men. (Job 38:22, 23; Ezek. 38:19-22) A ral pawl kha anmahle anmah i doh ding zongin a tuah khawh. (2 Chan. 20:17, 22, 23) Cun miṭhalo pawl thah awkah vancungmi pawl zong kha a hman khawh hna. (Isa. 37:36) Pathian nih zei bantuk lam a hman hmanhah teinak tling a hmuh lai. A ral vialte cu hrawh dih an si lai i miding vialte cu khamh an si lai.—Ptb. 3:25, 26.

7-8. (a) Vawlei hruaitu hna nih 1 Thesalon 5:1-6 ningin a um bal lomi zei bantuk thawng dah an thanh lai? (b) Mah thanhnak cu zeicah ṭih a nungmi lihbia a si?

⁷ “Bawipa Ni” a rat hlanah “a dai dih ko i a him dih ko” timi thanhnak. (1 Thesalon 5:1-6 rel.) 1 Thesalon 5:2 i “Bawipa Ni” timi nih “harnak nganpi” kha a chim duhmi a si. (Biat. 7:14, NW) Harnak nganpi aa thawk cang lai ti kha zeitindah kan hngalh khawh? Baibal nih a um bal lomi thawngthanhnak kong a kan chimh. Mah thawngthanhnak cu harnak nganpi aa thawk cang lai ti a langhtermi hmelchunhnak a si lai.

⁸ Mah cu “a dai dih ko i a him dih ko” timi thawngthanhnak a si. Vawlei hruaitu hna nih zeicah cutin an chim lai? Fiang tein cun kan  hngal lo. Biaknaklei hruaitu hna tah an i tel lai maw? An i tel men lai. Mah thawngthanhnak cu khuachia sinin a rami lihbia a si. Mah lihbia cu ṭih a nung tuk. Zeicahtiah mah nih mi pawl kha minung tuanbia lakah a ngan bikmi harnak aa thawk lioah kan him ko tiah a ruahter hna lai caah a si. Asinain ruahlopi in “rawhnak nih cun a den hna lai. . . . Nu cungah a tlungmi nau nganfah bantuk khi a si lai.” Zumhfekmi Jehovah salle hna he aa tlaiin tah zeitin? Harnak nganpi cu zeitik ah dah aa thawk lai ti kha a dikthliar in an hngalh lo caah harnak nganpi aa thawk tikah an khuaruah a har ko lai nain mah caah timhcia an si lai.

9. Pathian nih Satan vawlei kha zeitindah a hrawh lai?

⁹ Jehovah nih Noah chan lio bantukin Satan vawlei kha voikhat te ah a hrawk dih cikcek lai lo. Mah canah Satan vawlei cheubang pakhat kha a hrawh hmasa lai, mah hnuah a tangmi vialte kha a hrawh lai. Pakhatnak ah, a Liannganmi Babilon kha a hrawh lai. Mah cu a hmaan lomi Biaknak dihlak kha a si. Cun Armageddon raldohnak ah ramkhellei, ralkap le chawlehnak i telin Satan vawlei ah aa telmi vialte kha a hrawh hna lai. Mah a biapi tukmi pahnih kong kha atu i ruah hna u sih.

10. Biathlam 17:1, 6 le 18:24 ningin Jehovah nih a Liannganmi Babilon kha zeicah a hrawh lai?

¹⁰ ‘Hlawhhlangnu mi lianngannu dantatnak.’ (Biathlam 17:1, 6; 18:24 rel.) A Liannganmi Babilon nih Pathian min kha lam tampi in a chiahter. Pathian kong kha a hmaan loin a cawnpiak hna. Ramkhellei hruaitu pawl kha a bawmh hna. A nawlngeihnak kha a hman i a mi hna sinin a miak a lak. Pathian salle cheukhat i telin mi tampi kha a thah hna. (Biat. 19:2) Jehovah nih a Liannganmi Babilon kha zeitindah a hrawh lai?

11. “Sahrang sen” timi cu zeidah a si, mah kha a Liannganmi Babilon dohnak ah Pathian nih zeitindah a hman lai?

¹¹ Jehovah nih “ki pahra” a ngeimi “sahrang sen” hmangin “hlawhhlangnu” kha a hrawh lai. Mah ṭih a nungmi sahrang nih UN kha a aiawh. Ki pahra nih UN a bawmmi cozah pawl  kha a aiawh hna. Pathian nih ri a khiahmi caan ah mah cozah pawl nih a Liannganmi Babilon kha an doh lai. Annih nih a chawva kha an chuh lai i a ṭhatlonak kha an langhternak thawngin “a ngeihmi vialte kha an chuh dih lai i taklawng in an chiah lai.” (Biat. 17:3, 16) Mah hrawhnak cu a rang tuk lai i nikhat ah a cangmi bantuk a si lai. Cucaah hlawhhlangnu a bawmmi hna cu an lau tuk lai. A hleiin “keimah cu bawiṭhutdan cung i a ṭhumi siangpahrang bawinu ka si. Nuhmei ka si lo, ngaihchiatnak cu ka ing bal lai lo” tiah i porhlaw ngaiin a rak chim tawn caah a si.—Biat. 18:7, 8.

12. Miphun hna kha Jehovah nih zei tuah dah a awnh hna lai lo, zeicah?

¹² Pathian nih a mi hrawh awkah miphun hna kha a awnh hna lai lo. A miphun nih a min kha uangthlar ngaiin an i lak i a Liannganmi Babilon in chuak u timi a nawlbia kha an zulh. (Lam. 15:16, 17; Biat. 18:4) Cun mi pawl zong kha a Liannganmi Babilon in chuah khawh awkah an bawmh hna. Cucaah Jehovah salle cu a Liannganmi Babilon nih “dantatnak a hmuh ding kha” an i hrawm ve lai lo. Asinain zumhnak hneksaknak cu an tong lai.

13. (a) Gog cu ahodah a si? (b) Ezekiel 38:2, 8, 9 ningin Armageddon raldohnak cu zeitik ah dah aa thawk lai?

¹³ Gog dohnak. (Ezekiel 38:2, 8, 9 rel.) Jehovah nih a hmaan lomi biaknak vialte a hrawh dih hnuah vawleicung ah biaknak pakhat lawng a um lai. Jehovah salle lawng an tang lai. Mah tikah Satan cu a thin a hung tuk lai i “thlarau thur” a simi, khuachia sinin a rami a hmaan lomi thawngpang kha a thanh lai. Mah thawngpang ruangah ram tampi in dirhmi phu nih Jehovah salle kha an doh hna lai. (Biat. 16:13, 14) Mah phu cu “Magog ram i a ummi . . . Gog” tiah auh a si. Gog nih Jehovah miphun a doh hna tikah aa thawk lai.—Biat. 16:16.

14. Gog nih zeidah a hun hngalh lai?

¹⁴ Gog nih “titsa hriamnam” a simi a ralkap ṭhawnnak kha aa bochan lai. (2 Chan. 32:8) Kannih cu Jehovah kha kan i bochan lai,  asinain mi pawl hmuhnak ahcun mihrut kan lo men lai. Zeicahtiah a rak ṭhawng tukmi a Liannganmi Babilon kha a pathian hna nih “sahrang” le “ki pahra” sinin an rak khamh kho lo. (Biat. 17:16) Cucaah Gog nih fawi tein teinak ka hmu lai tiah aa ruahchan lai. ‘Vawlei a khuhtu khuadawm bantukin’ Jehovah miphun kha a doh hna lai. (Ezek. 38:16) Asinain tlawmpal ah Gog nih rap ah ka tla cang ti kha a hun hngalh lai. Rili Sen ah hrawh a simi Faroah bantukin Gog nih Jehovah ka doh ti kha a hun hngalh lai.—Ex. 14:1-4; Ezek. 38:3, 4, 18, 21-23.

15. Jesuh nih teinak tling kha zeiti lam in dah a hmuh lai?

¹⁵ Khrih le vancung a ralkap pawl nih Pathian miphun kha an huhphenh hna lai i Gog le a ralkap pawl kha an hrawh dih cikcek hna lai. (Biat. 19:11, 14, 15) Asinain a hmaan lomi lihbia a karhter i Armageddon raldohnak a chuahtertu, Jehovah a ral ngan bik a simi Satan nih tah zeidah a ton lai? Jesuh nih Satan le khuachia pawl kha dong hngal lo khor chungah kum thongkhat chung a hren hna lai.—Biat. 20:1-3.

16. (a) ‘Pathian a hngalmi’ kan si kha zeitindah kan langhter khawh? (b) Jehovah a hngalmi hna nih Armageddon raldohnak ah zeidah an ton lai?

¹⁶ Biatak chungah kum tampi chung a um cangmi kan si ah, a umnak a sau rih lomi kan si ah Armageddon in khamh kan si nakhnga ‘Pathian kha hngalh’ in ‘Bawipa Jesuh kong thawngṭha ngaih’ a hau. (2 Thes. 1:7-9) Pathian nih a duhmi, a duh lomi le a phunglam hna kan hngalh tikah ‘Pathian a hngalmi’ kan si. Pathian kan dawt, a nawl kan ngaih i amah lawng kan biaknak thawng zongin Pathian kan hngalh kha kan langhter khawh. (1 Johan 2:3-5; 5:3) Cutin kan tuah ahcun Pathian nih a kan hngalh ve lai. Mah cu a mithmai ṭha kan hmu lai tinak a si. (1 Kor. 8:3) A phichuak cu Armageddon raldohnak in khamh kan si lai.

17. ‘Bawipa Jesuh kong thawngṭha ngaih’ timi nih zeidah a chim duhmi a si?

¹⁷ “Bawipa Jesuh kong thawngṭha” ah Baibal chung i Jesuh cawnpiaknak vialte aa tel. Mah  kha kan nunnak ah kan hman tikah thawngṭha kan ngaih kan langhtermi a si. Mah ah Jehovah rian pakhatnak ah chiah, a dingmi Pathian phunglam zulh le Pathian Pennak kong chim aa tel. (Matt. 6:33; 24:14) Cun a biapi tukmi rian a ṭuanmi, chiti thuhmi Khrih unau pawl bawmh zong aa tel.—Matt. 25:31-40.

18. Chiti thuhmi Khrih unau pawl nih an rak hmuhmi zaangfahnak kha zeitilam in dah an langhter ṭhan khawh lai?

¹⁸ A rauhhlan ah Chiti thuhmi Pathian salle nih “tuu dang” pawl langhtermi zaangfahnak kha an langhter ṭhan khawh cang lai. (Johan 10:16) Zeitin in dah? Armageddon raldohnak aa thawk hlanah 144,000 cu a thi kho lomi thlarau in vancung ah thawhter an si lai. Annih cu vancung ralkap ah an i tel ve lai, cun Gog kha an doh lai i Pathian miphun a simi, “mibu nganpi” kha an huhphenh hna lai. (Biat. 2:26, 27; 7:9, 10) Chiti thuhmi Jehovah salle vawleicung an um lioah bawmhnak caanṭha kan hmuhmi cu mibu nganpi lak ah aa telmi kan caah tinvo sung taktak a si.

19-20. Armageddon raldohnak a naih chin bantukin harnak lakah zeitindah zumhfek tein kan um peng khawh?

¹⁹ Hi harnak caan chungah Jehovah mi hna cu harnak kan tong. Asinain lunglawmhnak he kan inkhawh. (Jeim. 1:2-4) A kan bawm khomi pakhat cu lungthin tak tein thlacam zungzalnak a si. (Luka 21:36) Cun atu kan chan kong he aa tlaimi chimchungbia hna i telin Baibal kha nifate kan hlathlai awk a si i kan hlathlaimi kong kha ṭha tein kan ruah awk a si. (Salm 77:12) Mah thil hna kha kan tuah i phungchimnak ah kan si khawh chungin kan i tel ahcun kan zumhnak a fek chin lai i kan i ruahchannak cu a ṭhawng chin lai.

²⁰ A Liannganmi Babilon hrawh a si tik le Armageddon raldohnak a dongh tikah zeitluk in dah naa nuamh lai khi ruathmanh. Cun Pathian min le cungnung bik a sinak kha mi vialte nih an upat tikah zeitluk in dah naa nuamh lai ti zong khi ruathmanh. (Ezek. 38:23) Armageddon cu Pathian a hngalmi, a Fapa nawl a ngaimi le a dongh tiang zumhfek tein a ummi hna caah thawngṭha a si.—Matt. 24:13.