CAWN AWK CAPAR 38
‘Ka Sinah Ra Tuah U, . . . Hrimhnak Kha Kaan Pek Hna Lai’
“Re a theimi le thil a ritmi vialte hna, ka sinah ra tuah u, dinhnak [hrimhnak, NW] kha kaan pek hna lai.”—MATT. 11:28.
HLA 17 Ka Duh Ko
LANGHTERNAK *
1. Matthai 11:28-30 ningin Jesuh nih zei biakamnak dah a tuah?
JESUH nih a bia a ngaimi mibupi kha hitin bia a kamh hna: “Ka sinah ra tuah u, dinhnak [hrimhnak, NW] kha kaan pek hna lai.” (Matthai 11:28-30 rel.) Mah cu biakamnak sawhsawh a si lo. Tahchunhnak ah, Jesuh nih kum saupi a zawmi nu caah a tuahmi kong kha ruathmanh.
2. Jesuh nih a zawmi nu caah zeidah a tuah?
2 Mah minu nih bawmhnak a herh tuk. Damnak hmuh awkah siibawi tampi sinah a kal. Kum 12 chung a zaw cang nain a dam hlei lo. Nawlbia ningin cun anih cu a thiang lomi a si. (Lev. 15:25) Jesuh nih a zawmi a damter khawh hna ti kha a theih tikah Jesuh kawl dingin aa thawh. Jesuh a hmuh tikah a puanki kha a tongh i a dam colh. Asinain Jesuh nih a zawtnak kha damter lawng si loin upatnak he a rak pehtlaih. Tahchunhnak ah, a chawnh tikah ka “fanu” tiah a auhnak thawngin a dawt le a upat kha a langhter. Mah minu cu hrimhnak le thazaang a hmu lai ti cu a fiang ko.—Luka 8:43-48.
3. Zei biahalnak dah kan i ruah hna lai?
3 Mah minu cu Jesuh sinah a kal ti kha philhhlah. Jesuh sin kal awkah fakpi in a rak i zuam. Tuchan zongah Jesuh sin kal awkah fakpi in kan i zuam ve a hau. Tuchan ahcun Jesuh nih a sinah a rami hna kha khuaruahhar lam in a damter hna lai lo. Asinain “ka sinah ra tuah u, dinhnak [hrimhnak, NW] kha kan pek hna lai” tiah a kan sawm peng rih. Hi capar ah biahalnak panga kan i ruah hna lai: Jesuh sinah zeitindah kan kal khawh? Jesuh nih “ka seihnam kha i bei u” tiah a ti tikah zeidah a chim duhmi a si? Jesuh sinin zeidah kan cawn khawh? A kan pekmi rian cu zeicah hrimhnak petu a si? Jesuh seihnam i bei buin zeitindah hrimhnak kan hmuh peng khawh?
“Ka Sinah Ra Tuah U”
4-5. Jesuh sinah kan kal khawhnak lam cu zei hna dah an si?
4 Jesuh sinah kan kal khawhnak lamkhat cu kan si khawh chungin Jesuh chimmi le tuahmi kong kan hlathlainak thawngin a si. (Luka 1:1-4) Mah cu ahohmanh nih a kan tuahpiak kho lo, kanmah theng nih mah kong kha kan hlathlai a hau. Tipil in awk le Khrih zultu si awkah bia kan khiahnak thawng zongin Jesuh sinah kan kal kho.
5 Jesuh sinah kan kal khawhnak a dang lam pakhat cu bawmhnak kan herh tikah Khrihfa upa sinah kan kalnak thawngin a si. Jesuh nih a tuu pawl zohkhenh awkah “laksawng” a simi Khrihfa upa hna kha a hman hna. (Efe. 4:7, 8, 11; Johan 21:16; 1 Pet. 5:1-3) Anmah pawl sinah bawmhnak kan hal hmasa hna a hau. Asinain Khrihfa upa pawl nih kan ruahnak le kan herhmi kha an hngalh lai tiah kan i ruahchan awk a si lo. Julian timi unaupa nih a chimmi kong hi ruathmanh: “Ka dam lo caah Bethel in ka chuah a hau. Mah tikah ka hawi pakhat nih tuukhal lennak tuah awkah Khrihfa upa pawl sinah bawmhnak hal dingin ruahnak a ka cheuh. A hmasa ahcun mah cu ka herh lo tiah ka rak ruah. Asinain a hnuah bawmhnak ka hal hna tikah mah tuukhal lennak cu ka caah a ṭha bikmi laksawng a si.” Julian sinah a lengmi zumhfekmi Khrihfa upa pahnih bantukin Khrihfa upa hna nih “Khrih lungthin a ngeimi” si awk, Khrih ruahnak le a ziaza kha hngalh in i zohchunh awkah an kan bawmh khawh. (1 Kor. 2:16; 1 Pet. 2:21) Mah cu a kan pek khawhmi, a ṭha bikmi laksawng a si.
“Ka Seihnam Kha I Bei U”
6. Jesuh nih “ka seihnam kha i bei u” tiah a ti tikah zeidah a chim duhmi a si?
6 Jesuh nih “ka seihnam kha i bei u” tiah a ti tikah “Ka nawl ngai u” tiah a ti duhnak a si. Cun “Keimah he seihnam i beiṭi u law Jehovah rian kha kan ṭuanṭi lai” ti zongin a chim duhmi a si kho men. Zei a si hmanhah seihnam bei timi ah rianṭuannak aa tel.
7. Matthai 28:18-20 ningin zei rian dah pek kan si, zeidah kan zumh khawh?
7 Jehovah sinah kan pum kan i pe i tipil kan in lioah Jesuh sawmnak kha kan rak cohlan. Mah sawmnak cu mi vialte caah a si. Jesuh nih Pathian biak a duh taktakmi hna kha zeitikhmanh ah a dawn bal hna lo. (Johan 6:37, 38) Jehovah nih Jesuh a pekmi rian ah Khrih zultu dihlak cu i telnak tinvo sung kan hmu. Mah rian kan ṭuannak ah Jesuh nih a kan bawmh zungzal lai ti kha kan zumh khawh.—Matthai 28:18-20 rel.
“Ka Nawl Hi I Cawn Ve U”
Jesuh Bantukin midang kha hrimhnak pe hna (Catlangbu 8-11 zoh) *
8-9. Aa toidormi hna nih Jesuh kha zeicah naih an duh, zei biahalnak dah kan i hal awk a si?
8 Aa toidormi hna nih Jesuh kha naih an duh. (Matt. 19:13, 14; Luka 7:37, 38) Zeicah? Jesuh le Farasi mi an i dannak kong hi ruathmanh. Farasi mi hna cu dawtnak a ngei lomi le aa porhlawmi an si. (Matt. 12:9-14) Jesuh cu dawtnak a ngeimi le aa toidormi a si. Farasi mi hna nih mi nih hngalhmi le a biapimi si kha an duh. Jesuh nih mah cu a ṭhalomi a si tiah a ti. Cun a zultu pawl kha toidornak ngeih awk le sal si awkah a cawnpiak hna. (Matt. 23:2, 6-11) Farasi mi hna nih mi pawl kha ṭihnak an ngeih nakhnga an tlerhkhonh hna i an uk hna. (Johan 9:13, 22) Jesuh nih midang kha nem tein a chawnhbiak hnanak thawngin le dawtnak in a pehtlaih hnanak thawngin hrimhnak a pek hna.
9 Jesuh nunning kha naa zohchunh maw? Hitin i hal: ‘Midang nih lung a nemmi le aa toidormi in an ka hmu maw? Midang bawmh awkah a nautami rian kha lungtho tein ṭuan duhnak ka ngei maw? Midang kha zaangfahnak he ka pehtlai hna maw?’
10. Jesuh nih amah he rian a ṭuanṭimi hna caah zeidah a ser?
10 Jesuh nih amah he rian a ṭuanṭimi hna caah a daimi pawngkam a ser. Cun midang cawnpiak kha a duh. (Luka 10:1, 19-21) Jesuh nih a zultu pawl kha biahalnak tuah awkah a forh hna. An ruahnak kha hngalh a duh caah biahalnak a tuah hna. (Matt. 16:13-16) Ṭha tein zohkhenhmi thingkung bantukin a zultu pawl cu an ṭhangcho tuk. Jesuh cawnpiaknak in an cawn i ziaza ṭha hna an langhternak thawngin theiṭha tampi an tlai.
Naih a fawimi le komh a fawimi si
Lungthawhnak le zuamnak a ngeimi si
Aa toidormi le rian aa zuammi si *
11. Kanmah le kanmah zei bahalnak dah kan i hal awk a si?
11 Nawlngeihnak cheukhat na ngei maw? Na ngeih ahcun hitin i hal: ‘Sianginn asiloah inn ah midang kha zeitindah ka pehtlaih hna? Daihnak sertu ka si maw? Midang kha biahalnak tuah awkah ka forh hna maw? An ruahnak an chim tikah ṭha tein ka ngaihpiak hna maw?’ Zeitikhmanh ah Farasi mi bantuk si kan duh lai lo. Farasi mi pawl cu an cawnpiaknak a ngai lomi hna cungah an thin a hung i anmah he an ruahnak aa khat lomi hna kha puarhrangpi in an pehtlaih hna.—Mar. 3:1-6; Johan 9:29-34.
‘Hrimhnak Kha Nan Hmuh Lai’
12-14. Jesuh nih a kan pekmi rian cu zeicah hrimhnak petu a si?
12 Jesuh nih a kan pekmi rian cu kan caah zeicah hrimhnak petu a si? A ruang tampi a um nain tlawmpal in i ruah hna hmanh u sih.
13 A ṭha bikmi hruaitu kan ngeih hna. A Lianngan Bikmi Hruaitu Jehovah cu lawmh a hngal lomi le a salle cungah harnak pek a hmangmi bawi a si lo. Kan ṭuanmi rian kha a sunsak. (Heb. 6:10) Kan rian kan ṭuan khawh nakhnga a herhmi ṭhawnnak a kan pek. (2 Kor. 4:7; Gal. 6:5) Kan Siangpahrang Jesuh nih midang pehtlaih ning he aa tlaiin a ṭha bikmi zohchunh awk a chiah. (Johan 13:15) Khrihfa upa pawl nih kanmah zohkhenhnak ah “tuukhal ngan” a simi Jesuh kha i zohchunh dingin an i zuam. (Heb. 13:20; 1 Pet. 5:2) Kan cungah zaangfahnak an langhter i ralṭha tein an kan cawnpiak, tha an kan pek i an kan kilven.
14 A ṭha bikmi hawikom kan ngeih hna. Kannih cu midang nih an ngeih lomi hawikom ṭha le sullam a ngeimi nunnak kan ngei. Mah hi ruathmanh: A ziaza a ṭha tukmi an si nain anmah le anmah midang nakin kan ṭha deuh tiah aa ruat lomi unau pawl he rian ṭuanṭinak tinvo sung kan hmu. Annih cu thiamnak tampi a ngeimi an si ko nain an i toidor i midang kha anmah nakin a ṭha deuhmi in an hmuh hna. Rianṭuanṭi hawi lawng si loin hawikom zongin an kan hmuh. An kan dawt tuk caah kan caah an nunnak hmanh lungtho tein pek an duh.
15. Kan ṭuanmi rian kong he aa tlaiin zeitindah kan ruah awk a si?
15 A ṭha bikmi rian pek kan si. Mi pawl kha Jehovah kong biatak kan cawnpiak hna i Satan nih a hlorhmi lihbia hna kha kan langhter. (Johan 8:44) Satan nih mi pawl kha ruahchannak an ngeih nakhnga lo a hlen hna. Tahchunhnak ah, kan sualnak kha Jehovah nih a kan ngaithiam lo i dawt awkah kan i tlak lo tiah ruahter a kan duh. Mah cu lung a donghtertu a ṭhalo tukmi lihbia a si. A taktak ahcun Khrih sin kan kal tikah kan sualnak cu ngaihthiam kan si. Jehovah nih kan dihlak in a kan dawt tuk. (Rom 8:32, 38, 39) Jehovah i bochan dingin le an nunnak ṭhancho dingin midang kan bawmhmi hna cu zeitluk lunglawmh awk dah a si.
Jesuh Seihnam I Bei Buin Hrimhnak Hmuh Peng Khawh Ning
16. Jesuh nih phorh a kan fialmi thilrit cu a dang thilrit he zeitindah aa lawh lo?
16 Jesuh nih phorh a kan fialmi thilrit cu a dang thilrit he aa lo lo. Tahchunhnak ah, pawcawmnak caah chun nitlak rian a ṭuanmi mi tampi cu an tha a bat lawng si loin lungsi hnangamnak zong an hmu lo. Mah he i ralkah in kannih cu Jehovah le Khrih caah rian kan ṭuan tikah lungsi hnangamnak kan hmu. Chun nitlak rian kan ṭuan i zan ah Khrihfabu pumhnak kan i pumh tikah kan tha a ba tuk ko lai. Asinain pumh dih in inn kan ṭin tikah hrimhnak le thazaang kan hmu tawn. Baibal hlathlainak le phungchim kalnak ah fakpi in kan i zuam a hau. Asinain kan thazaang kan hmanmi nakin kan hmuhmi thluachuah cu a tam deuh.
17. Zeidah kan cohlan awk a si i zeidah kan i ralrin awk a si?
17 Kan dihlak in kan ngeihmi thazaang cu ri a ngei ti kha kan cohlan a hau. Cun kan thazaang kha fimkhur tein hman khawh awkah ralring tein kan um a hau. Tahchunhnak ah, thilri chawva ngeih dingin i zuamnak ah kan thazaang kha tampi kan hman khawh. A rum ngaimi minopa pakhat nih Jesuh kha hitin a hal: “Zungzal nunnak hmuh awkah zeidah ka tuah lai?” Mah mino pa cu Nawlbia ningin a nungmi a si. Marka Baibal ah Jesuh nih a ‘dawt’ tiah a ti caah mah pa cu miṭha a si lai. Jesuh nih mah mipa kha “va kal law na ngeihmi thil vialte kha va zuar law,” “cun ra law ka zul” tiah a ti. Mah mipa nih Jesuh hnu zulh kha a duh ko nain ‘a rumnak’ kha a kaltak kho lo. (Mar. 10:17-22) A phichuak cu Jesuh nih a seihnam bei dingin a sawmmi kha a al i “tangka” sal ah a cang ṭhan. (Matt. 6:24) Nangtah zeidah naa thim lai?
18. Zeidah kan tuah lengmang awk a si, zeicah?
18 Kan nunnak ah biapi bik in kan chiahmi kong ruah lengmang cu a ṭhami a si. Zeicah? Cutin kan ruah lawngah fimkhur tein kan thazaang kan hman le hman lo kha kan hngalh khawh lai. Mark timi minopa nih hitin a ti: “Kum tampi chung nunning sawhsawh tein ka nung tiah ka rak ruah. Hmaikal ka ṭuan ko nain tangka kong le nun nuam tein nun khawh ning kong lawng kha ka ruah. Ka nunnak hi zeicah mah tluk in a har ti kha ka dothlat tikah keimah duhnak kha hmasa bik ah ka chiah i mah hnu lawngah Jehovah caah ka caan le ka thazaang ka hman ti kha ka hun hngalh.” Mark nih a ruahnak le a nunning kha a thlen i Jehovah rian kha tam deuh in a hun ṭuan. Mark nih hitin a ti: “A caan ah tangka kong he aa tlaiin ka lungre a thei. Asinain Jehovah le Jesuh bawmhnak thawngin mah zuamcawhnak kha ka tei khawh.”
19. A hmaanmi hmuhnak ngeih cu zeicah a biapit tuk?
19 Mah thil pathum hi kan tuah ahcun Jesuh seihnam i bei buin hrimhnak kan hmu kho peng lai. Pakhatnak, a hmaanmi hmuhnak ngei peng. Jehovah rian kan ṭuan tikah amah duhmi lam in kan ṭuan a hau. Kannih cu rianṭuantu kan si i Jehovah cu kan rian Bawi a si. (Luka 17:10) A rian kha kanmah duh ningin kan ṭuan ahcun kan caah a har tukmi thil a si lai. A ṭhawng tukmi cawtum hmanh a bawipa nih a khinhmi hngawngkual kha i khinh duh loin a duhnak lei paohah a kal ahcun a ba lai i hma zong a pu kho. Jehovah lamhruainak kan zulh ahcun dawnkhantu a simi thil kha kan tei khawh lai i kan tuah kho lai lo tiah kan ruahmi thil hna kha kan tuah khawh lai. Pathian duhnak a tlin nakhnga ahohmanh nih an dawn kho lo ti kha philh hlah.—Rom 8:31; 1 Johan 4:4.
20. Jesuh seihnam i bei awkah zeinihdah a kan forh lai?
20 Pahnihnak, Lungthin tak tein ṭuan. Kan hmuitinh cu dawtnak a ngeimi kan Pa, Jehovah a thang ṭhatter kha a si. Jesuh chan lio i zultu cheukhat cu hakkauhnak le mah zawnruahnak lungput an ngeih caah Jesuh seihnam kha bei an duh ti lo. (Johan 6:25-27, 51, 60, 66; Fil. 3:18, 19) Mah he i ralkah in Pathian a daw i innpa cungah mahzawn ruat lo dawtnak a ngeimi hna cu vancung ah Khrih he rianṭuanṭi ding timi ruahchanhnak he Jesuh seihnam kha lunglawm tein an i bei. Anmah bantukin lungthin tak tein Jesuh seihnam kha kan i bei peng ahcun lunglawmhnak kan hmu ve lai.
21. Matthai 6:31-33 ningin Jehovah nih zei a tuah lai tiah dah kan i ruahchan khawh?
21 Pathumnak, a hmaanmi ruahchannak ngei. Mahca ṭhatnak hlaw in fakpi in i zuam a haumi nunnak kha kan i thim. Jesuh nih hremnak nan tong lai tiah ralrin a kan pek. Asinain kan tonmi zuamcawhnak paoh kha tei khawh awkah Jehovah nih thazaang a kan pek lai ti kha kan i ruahchan khawh. Inkhawhnak kan ngeih deuh tikah kan thazaang cu a hung ṭhawng chin lai. (Jeim 1:2-4) Jehovah nih a kan bawmh lai, Jesuh nih a kan hruai lai i unau pawl nih thazaang a kan pek lai ti zong kha kan i ruahchan khawh. (Matthai 6:31-33 rel; Johan 10:14; 1 Thes. 5:11) Kan tonmi harnak hna inkhawh awkah a herhmi zei paoh kan ngei.
22. Zei caah dah kan i lawmh?
22 Jesuh nih a damtermi nu cu a zawtnak in damter a si ni ah hrimhnak a hmu. Asinain zumhfek tein Khrih zultu a si lawngah hrimhnak a hmu zungzal kho lai. Mah minu nih zeidah a tuah lai tiah na ruah? Jesuh seihnam i bei awkah aa thim ahcun Jesuh he vancung ah rian an ṭuanṭi lai. Jesuh hnu zulh awkah a hlawtmi thil hna cu mah thluachuah he tahchunh ahcun zeihmanh an si lai lo. Vancung ruahchannak a ngeimi kan si ah, vawlei ruahchannak a ngeimi kan si ah “ka sinah ra tuah u” timi Jesuh sawmnak kha kan cohlan caah kan i lawm tuk.
HLA 13 Zohchunh Awk Tlak Khrih
^ cat. 5 Jesuh nih a sinah rat dingin a kan sawm. A sawmnak cohlannak ah zeidah aa tel? Hi capar ah mah biahalnak a phi kha a langhter lai. Cun Khrih he rianṭuanṭinak thawngin hrimhnak hmuh khawh ning kong zong a langhter lai.
