Mah lungthawh awk ngai a simi Baibal caang cu: “Acozah pakhatkhat nih misifak kha an hrem hna i dinnak le an hmuh awk a simi kha an pe hna lo, ti na hmuh tikah na khuaruahhar hlah; bawi paohpaoh cu an cung i a ummi bawi cio nih khan an huhphenh hna i cu hna zong cu anmah nakin a sang chin deuhmi bawi nih khan an huhphenh chin ve hna.”—Pct. 5:8.

Minung hmuhnak in cun mah Baibal caang hi nawl a ngeimi minung cozah a si tiah kan ruah men lai. Asinain thuk deuh in kan ruah ahcun Jehovah kong biatak a si ti kha kan hngalh. Mah nih a kan hnemh i thazaang a kan pek.

Phungchimtu 5:8 ah mi sifak kha a hrem i dinnak a pe hna lomi uktu kong kha a langhter. Uktu pakhat nih amah nakin a rian a sang deuhmi asiloah amah nakin nawl a ngei deuhmi pakhatkhat nih a ka zoh ti kha a hngalh a hau. Anmah nakin a rian a sang deuhmi hmanh an um men lai. Ngaihchiat awk ngai a simi cu minung cozah dihlak cu an ziaza a rawk ral i mi tam deuh cu mah a ding lomi an uknak ruangah sifah harnak an tong.

Asinain zei tlukin ruahchannak a um ti lomi a lawh hmanhah Jehovah nih minung cozah ah ‘anmah nakin a sang deuhmi bawi’ kha a zoh hna ti kan hngalh caah hnemhnak kan hmu kho. Cucaah Pathian sinah bawmhnak kan hal khawh i kan thilrit kha a sinah kan ṭhumh khawh. (Salm 55:22; Fil. 4:6, 7) Cun “vawleicung dihlak ah hin BAWIPA mit cu aa chok dih i amah lei i an lung soisel awk a um lomi hna cungah a ṭhawnnak kha a langhter” ti kha kan hngalh.—2 Chan. 16:9.

Cucaah Phungchimtu 5:8 nih minung cozah uktu i an dirhmun taktak le anmah nakin a sang deuhmi uktu an um ti kha a kan hngalhter. Mah nakin a biapi deuhmi cu mah Baibal caang nih Jehovah cu a sang bikmi le Nawl a Ngei Bikmi a si ti kha hngalh awkah a kan bawmh khawh. Atu ah Pathian nih Pennak Siangpahrang a simi a Fapa, Jesuh Khrih thawngin a kan uk. Thil vialte le kan dihlak a kan zohtu Lianngan Bik cu a dingmi le a tlarimi a si i a Fapa zong cutin a si ve.