1-2. Phungchimtu 11:6 le Pennak kong thawngṭha chimnak cu zeitindah aa pehtlaih?

RAM cheukhat ah mi tampi nih thawngṭha kong an theih tikah tam deuh in hngalh an duh. Annih nih mah kong kha hngalh awkah an hngah. Asinain a dang ram cheukhat ahcun Pathian asiloah Baibal kong kha mi nih hngalh an duh tuk lo. Na umnak hmun i mi tam deuh nih thawngṭha kha zeitindah an lehrulh? Mi nih zei bantukin an lehrulh hmanhah a za cang a ti hlan tiang Jehovah nih phungchim rian kha ṭuan peng hna seh ti a kan duh.

² Jehovah nih phungchim rian zeitikah dah a dih lai timi kong he aa tlaiin ri a rak khiah cang, mah hnuah “donghnak cu a si lai.” (Matt. 24:14, 36) Mah caan a phanh hlanah “ngol hlah” timi bia kha zeitindah kan zulh khawh? *—Phungchimtu 11:6 rel.

3. Hi capar ah zei kong dah kan i ruah hna lai?

³ A hmasa capar ah hmualngei tein “mi tlaitu” si khawh awkah a kan bawm khomi a kong pali kan i ruah cang hna. (Matt. 4:19) Hi capar ah zei thil a can hmanhah phung kan chim khawh nakhnga thazaang a kan pe khomi a kong pathum kan i ruah hna lai. Kan nunnak ah (1) phungchim rianṭuannak kha pakhatnak ah chiah, (2) lungsaunak langhter le (3) zumhnak ṭhawnter cu zeicah a biapit timi kong kan i ruah hna lai.

4. Jehovah nih a kan pekmi rian kha zeicah pakhatnak ah kan chiah a herh?

⁴ Jesuh nih a zultu hna kha donghnak caan ah a cang hnga dingmi kong le mi pawl cu zei bantuk dah an si lai timi kong kha a chimh hna. Mah thil sining hna nih a zultu pawl kha phungchim  rianṭuannak kha pakhatnak ah chiah lo dingin a umter khawh hna ti kha a hngalh. Cun Jesuh nih a zultu pawl kha “ralring tein um ko u” tiah a ti hna. (Matt. 24:42) Noah chan ah mi pawl cu thil tampi ruangah an lungre a rak thei, cucaah Noah nih ralrin a pekmi hna kha an rak ngai lo. Tuchan zongah cu bantukin thil hna nih kan lung a kan vaivuanhter khawh. (Matt. 24:37-39; 2 Pet. 2:5) Cucaah Jehovah nih a kan pekmi rian kha pakhatnak ah chiah kan duh.

5. Lamkaltu 1:6-8 ningin phungchimnak rian cu khoika tiang dah chim a si lai?

⁵ Tuchan ah Pennak kong thawngṭha chimnak rian kha pakhatnak ah kan chiah a hau. A zultu pawl nih a thih hnuah phungchimnak rian kha an ṭuan peng lai i a nun lioah a tuahmi nakin tam deuh an tuah khawh lai tiah Jesuh nih a chimchung. (Johan 14:12) Jesuh a thih hnuah a zultu cheukhat cu nga tlaihnak rian an rak ṭuan ṭhan. Jesuh nih a thawhṭhan hnuah khuaruahhar thil pakhat a rak tuah i a zultu cheukhat kha nga tampi tlaih dingin a rak bawmh hna. Mah khuaruahhar thil a tuah hnuah phungchimnak le zultu siternak rian cu a dang zei rian nakhmanh in a biapi deuhmi a si ti kha Jesuh nih a hleiin a rak chim. (Johan 21:15-17) Jesuh nih van a kai hlanah a zultu pawl kha amah nih a rak thawkmi phungchimnak rian cu Israel ram leng tiang ah chim a si lai tiah a ti hna. (Lamkaltu 1:6-8 rel.) Kum tampi a rauh hnuah Jesuh nih lamkaltu Johan kha ‘Bawipa ni chungah’ * a cang dingmi thil kong kha langhnak in a rak hmuhsak. Johan hmuhmi khuaruahhar a simi langhnak pakhat cu vancungmi pakhat nih “vawleicung mi vialte, phun kip, ram kip, holh kip le mi kip” sinah “zungzal thawngṭha” a chimmi kha a si. (Biat. 1:10; 14:6) Jehovah nih liim a si cang tiah a ti hlang tiang vawleicung pumpi phungchimnak rian ah i tel hna seh ti a kan duh ti cu a fiang ko.

6. Phungchimnak rian kha zeitindah pakhatnak ah kan chiah khawh?

 ⁶ Jehovah nih kanmah bawmh awkah a tuahmi thil vialte kha kan ruah ahcun phungchim rian kha pakhatnak ah kan chiah khawh lai. Tahchunhnak ah, Jehovah nih nammi cauk, electronic cauk, audio le video, Internet ti bantuk hna kha hmangin thlarau rawl tampi a kan pek. Kan website ah holhphun 1,000 lengin lamhruainak hmuh khawh a simi kong kha ruathmanh. (Matt. 24:45-47) Vawleicung mi pawl cu an bawmhmi ramkhel lei aa khat lo ca, an biaknak aa khat lo ca le cheukhat cu an rum i cheukhat cu an si a fah caah an i ṭhencheu. Asinain nuai riat leng a simi Pathian salle hna cu vawleicung pumpi unau rual in lungrual tein an um. Tahchunhnak ah, 2019, April 19 ah nicang Baibal kha vawleicung pumpi ah a ummi Jehovah Tehte Hna nih lungrual tein an i ruahṭi hna. Mah zanlei ah Jesuh a Thih Philhlonak ah aa pummi cu 20,919,041 an si. Mah a ṭha tukmi thil sining kan hmuh khawh caah le mah ah kan i tel khawh caah Pennak kong thawngṭha kha i manh lo ngaiin chim kan duh.

7. Phungchim rian kha pakhatnak ah kan chiah khawh nakhnga Jesuh nunning nih zeitindah a kan bawmh khawh?

⁷ Phungchim rian kha pakhatnak ah kan chiah khawhnak a dang lamkhat cu Jesuh nunning kan i zohchunhnak thawngin a si. Jesuh nih phungchimnak ah zeihmanh aa dawnhkhanhter lo. (Johan 18:37) Satan nih “vawleicung peng le ram vialte le an sunparnak vialte” kaan pek lai tiah a ti tikah a lem soi kho lo. Cun midang nih Siangpahrang ṭuan dingin an hnek tik zongah a rak al hna. (Matt. 4:8, 9; Johan 6:15) Thilri chawva ngeih duhnak lungthin a ngei lo i ṭih a nungmi ralchanhtu hna i ṭhihphaihnak zong kha a rak ṭih lo. (Luka 9:58; Johan 8:59) Kan zumhnak hneksak kan si tikah lamkaltu Paul ruahnak cheuhnak kha kan i cinken ahcun zumhfek tein kan um kho lai. Paul nih Khrihfa pawl kha Jesuh nunning i zohchunh dingin thazaang a pek hna, cucaah ‘an lung a dong lo i a ngol zong an ngol lo.’—Heb. 12:3.

8. Lungsaunak timi cu zeidah a si, mah cu atu ah a hleiin zeicah a herh?

⁸ Lungsaunak timi cu thil sining thlen awkah lungdai tein hngah khawhnak sining kha a si. Aa lo lomi thil sining ah lungsaunak kan ngeih a hau. A ṭha lomi thil sining kha donghter kan duh asiloah a ṭhami thil hmuh awkah caan saupi kan hngahmi a si kho men. Profet Habakkuk nih Judah ah a ummi zaangennak a dongh lai kha aa ngaih tuk. (Hab. 1:2) Jesuh zultu pawl nih Pennak cu a ra cang lai i Rom kuttang in a kan khamh lai tiah an i ruahchan. (Luka 19:11) Pathian Pennak nih ṭhatlonak kha hrawk sehlaw vawlei thar cu Pathian nawl a ngaimi minung in khat hna seh ti kan duh. (2 Pet. 3:13) Asinain Jehovah nih ri a khiahmi caan kha lungsau tein kan hngah a hau. Lungsaunak kan ngeih nakhnga Jehovah nih a kan cawnpiakmi a dang lam kong kha i ruah hna u sih.

9. Zei tahchunhnak nih dah Jehovah cu a lung a saumi a si kha a langhter?

⁹ Jehovah cu lungsaunak ah zohchunh awk ṭha bik a si. Pathian nih Noah kha lawng sak awk le ‘dinnak kong chim’ awkah a caan a za in a rak pek. (2 Pet. 2:5; 1 Pet. 3:20) Abraham nih Sodom le Gomorrah ah a ummi mi ṭhalo pawl ka hrawh hna lai timi Pathian biakhiahnak kong he aa tlaiin atu le atu biahalnak a tuah tikah Jehovah nih ṭha tein a rak ngaihpiak. (Gen. 18:20-33) Kum tampi chung Jehovah nih zumhawk a tlak lomi Israel mi hna cungah lungsaunak a rak langhter. (Neh. 9:30, 31) Mi pawl nih ‘an sualnak i ngaihchih’ in a sinah an kir nakhnga a caan a pek hnanak  thawngin tuchan ah Jehovah lungsaunak kha kan hmuh khawh. (2 Pet. 3:9; Johan 6:44; 1 Tim. 2:3, 4) Jehovah tuahsernak nih lungsau tein phungchim peng dingin le cawnpiak peng dingin a kan bawmh. Baibal ah a ummi tahchunhnak hna kha hmangin lungsaunak kan ngeih nakhnga zong a kan cawnpiak.

10. Jeim 5:7, 8 i lothlopa tahchunhnak nih zei kong dah a kan cawnpiak?

¹⁰ Jeim 5:7, 8 rel. Thlaici a tuhmi lothlopa tahchunhnak nih lungsaunak ngeih awkah a kan cawnpiak. Rawl kung cheukhat cu khulrang in an ṭhang ti cu a hmaan ko. Asinain thlaikung tam deuh, a hleiin thei a tlaimi thlaikung hna cu ṭuan a zat tiang hngah a hau. Israel ram ah thlaikung pawl ṭuan awkah thlaruk hrawng a rau. Lothlopa nih khuasik caan ruah a sur hmasa hnuah thlaici kha a vorh i fur a dih lai hmanung bik ruah a sur hnuah a theipar kha a zun. (Mar. 4:28) Lothlopa lungsaunak kha kan i zohchunh ahcun a fimmi kan si lai. Asinain mah cu a fawi men lai lo.

11. Lungsaunak nih phungchim rian ah zeitindah a kan bawmh lai?

¹¹ A tling lomi minung nih an ṭuanmi rian i a theipar kha zun colh an duh. Asinain thlaikung in a theipar zun kan duh ahcun thlaikung hna kha ṭha tein kan zohkhenh a hau. Vawlei cawh, thlaikung cin, belh phawi le ti toih zong a hau. Zultu siternak rian zongah thazaang chuah in i zuam peng a hau. Baibal kan cawnpiakmi hna kha duhdanhnak ngeih lo dingin le dawtnak ngeih dingin cawnpiak awkah a caan lak a hau. Lungsaunak kan ngeih ahcun phung kan chimmi ngaih an duh lo tikah kan lung a dong lai lo. Cheukhat nih ṭha tein an ngaih zongah lungsaunak kan ngeih a hau. Baibal kan cawnpiakmi kha a zumhnak ṭhanter awkah kan hnek kho lo. A caan ah Jesuh zultu pawl hmanh nih Jesuh cawnpiaknak kha an rak hngalthiam colh lo. (Johan 14:9) Kanmah nih phung kan chimh hna i kan cawnpiak hna asinain zumhnak an ngeih nakhnga a bawmtu hna cu Pathian a si ti kha i cinken hna u sih.—1 Kor. 3:6.

12. Jehovah Tehte a si lomi kan chungkharmi hna sin phung kan chim tikah lungsaunak kha zeitindah kan langhter khawh?

 ¹² Jehovah Tehte a si lomi kan chungkharmi hna sin phung kan chim tikah lungsaunak langhter cu a har men lai. Phungchimtu 3:1, 7 ah kan hmuhmi Baibal phunglam nih a kan bawmh khawh. Hitin a ti: “Dai tein um caan a um, chim caan a um.” A ṭhami kan ziaza nih kan chungkhat pawl kha kan chimmi thawngṭha ngaih duh awkah a bawmh khawh hna. Cucaah Jehovah kong chimh hna awkah timhcia tein kan um zungzal a hau. (1 Pet. 3:1, 2) Kan chungkharmi hna i telin mi kip sinah teima tein phung kan chimh hna i kan cawnpiak hna ding a si.

13-14. Lungsaunak kong he aa tlaiin kan i zohchunh khawhmi zei hmuhtonnak dah a um?

¹³ Baibal chan le tuchan i zumhfekmi hna sinin lungsaunak ngeih awkah kan cawn khawh. Habakkuk nih ṭhatlonak kha donghter a duh ko nain lungsaunak ngeiin hitin a rak ti: “Ralvennak hmun ah khan ka va dir tuah lai.” (Hab. 2:1) Lamkaltu Paul nih phungchimnak rian kha “liim” ka duh tiah a ti. Asinain lungsau tein “thawngṭha” kha a rak chim peng.—Lam. 20:24.

¹⁴ Khrihfa a si lomi mi tampi an umnak hmun le Jehovah Tehte tlawmpal lawng an umnak hmun ah rianpek a simi Gilead tinṭan a dihmi nuva tuahkhat kong kha ruathmanh. Mi tlawmte lawng nih Baibal kha cawn an duh. Asinain Gilead tinṭan an kaiṭimi hna rianpek an sinak a dang ram ahcun mi tampi cu Baibal an cawng i Jehovah Tehte an hung si. An chimmi thawngṭha kha mi tampi nih ngaih an duh lo nain mah nuva hna nih lungsau tein phung an rak chim peng. Cu bantuk hmun ah kum riat chung phung an chim hnuah Baibal an cawnpiakmi pakhat cu tipil a hung ing, cucaah an i lawm tuk. Hlanlio le tuchan hmuhtonnak hna in zeidah kan hngalh khawh? Mah zumhfekmi hna cu an tha a thu lo asiloah an ngol lo, cun an lung a sau caah Jehovah nih thluachuah a pek hna. “An zumhnak le an lungsaunak thawngin Pathian nih bia a kamhmi hna a hmumi hna bantuk” kan si awk a si.—Heb. 6:10-12.

15. Thawngṭha chim ding timi kan biakhiahnak fehter awkah zeidah kan zumh a hau?

¹⁵ Kan chimmi thawngṭha kha kan zumh ahcun mi tam khawh chung tam sinah chim kan duh lai. Baibal ah a ummi Pathian biakam pawl kha kan zumh. (Salm 119:42; Isa. 40:8) Atu kan chan ah Baibal chimchungbia a tlinmi kha kan hmuh. Baibal ruahnak cheuhnak an hun zulh tikah an nunning a ṭhanchomi kha kan hmuh. Mah nih mikip nih Pennak kong thawngṭha theih an herh ti kha a kan hngalhter chin.

16. Salm 46:1-3 ningin Jehovah le Jesuh kan zumhnak nih phungchim ding timi kan biakhiahnak kha zeitindah a fehter?

¹⁶ Kan chimmi thawngṭha Hrampi a simi Jehovah zong kan zumh a hau, cun Pennak ah Siangpahrang in rian pek a simi Jesuh zong kha kan zumh a hau. (Johan 14:1) Zei bantuk thil sining kan ton hmanhah Jehovah cu kan dornak le kan thazaang a si zungzal lai. (Salm 46:1-3 rel.) Mah lengah Jesuh nih Jehovah pekmi ṭhawnnak le nawlngaihnak kha hmangin vancung in thawngṭha chimnak rian kha lam a hruai ti zong kha kan zumh.—Matt. 28:18-20.

17. Zeicah phung kan chim peng awk a si ti kha tahchunhnak pe.

¹⁷ A canah kan i ruahchan lomi lam in Jehovah nih kan i zuamnak cungah thluachuahnak a kan pek lai tiah kan zumh khawh. (Pct. 11:6) Tahchunhnak ah, mi thong tampi nih kan cauk pawl kan chiahnak cabuai le fawi tein ṭhial khawhmi cauk chiahnak leng hna kha nifatin  an hmuh. Mah phungchim ning cu hmual a ngei maw? A ngei. 2014, November  Kannih Pennak Rianṭuannak ah Jehovah Tehte Hna kong he aa tlaiin caṭial a duhmi sianghleiruun a kaimi mino pakhat kong kha a langhter. Mah mino nu nih Biakinn cu a hmu lo nain sianginn ah cabuai cungah cauk pawl chia in zapi lak phungchimnak an tuahmi kha a hmuh, cun ṭial a duhmi kong zong a hmuh. A donghnak ah mah mino nu cu tipil a ing i atu cu hmaanhmaan hmaikal pakhat a si cang. Cu bantuk hmuhtonnak nih Pennak kong thawngṭha hngalh le ngaih a duhmi an um rih ti kha a kan hngalhter caah phungchim peng dingin a kan forh.

18. Jehovah duhnak ningin Pennak kong chimnak rian cu liim a si lai tiah zeicah kan zumh khawh?

¹⁸ Pennak kong phungchimnak rian cu aa tlakmi caan ah a dih lai ti kha kan zumh. Noah chan ah zeidah a cang ti kha ruathmanh. Jehovah nih a tlingmi caan Uktu a si kha a rak langhter. Buanchukcho a tlun hlan kum 120 hrawngin Jehovah nih a cang dingmi kong kha bia a rak khiah cang. Kum tampi a rauh hnuah Jehovah nih Noah kha lawng sak dingin a fial. Buanchukcho a tlun hlan kum 40 asiloah 50 chung hrawng Noah cu fakpi in rian a rak ṭuan peng. Mi nih a chimmi bia kha an rak ngai duh lo nain Jehovah nih saram pawl kha lawng chungah luhter hna tiah a ti hlan tiang ralrin peknak bia kha a rak chim peng. A caan a phanh tikah Jehovah nih “innka cu a khar.”—Gen. 6:3; 7:1, 2, 16.

19. Ngol loin kan ṭuan ahcun hmailei ah zeidah kan i ruahchan khawh?

¹⁹ A rauhhlan ah, Jehovah nih Pennak kong thawngṭha chimnak rian kha a donghter cang lai. Cun Satan vawlei “innka cu a khar” lai i a dingmi vawlei thar in a airolh lai. Mah caan a phanh hlan tiang Noah, Habakkuk le a dang ngol loin a ṭuanmi hna kha kan i zohchunh hna awk a si. Phungchim rianṭuannak kha pakhatnak ah chiah, lungsaunak langhter in Jehovah le a biakam cungah kan zumhnak kha kan ṭhawnter awk a si.