1. Kan kum a hun upat tikah kan caah a ṭhami hmuitinh cu zeidah a si?

KAN kum a hun upat tikah kan no lio bantukin Jehovah rian kan ṭuan kho lai lo tiah kan thin a phang men lai. Kan no lio bantukin kan thazaang cu a ṭhawng lai lo nain kan ngeihmi fimnak le sining hna kha mino pawl nih Jehovah bupi ah hman awk a tlakmi an hung si nakhnga le rian tam deuh pek an si nakhnga cawnpiaknak caah kan hman khawh. Kum upa pakhat nih hitin a ti: “Ka kum a upat cang caah ka duh tlukin rian ka ṭuan kho ti lo. Cucaah sining a tlinhmi mino unaupa pawl nih rian an ṭuan khawh caah kaa lawm tuk.”

2. Hi capar ah zei kong dah kan i ruah hna lai?

² A hmasa capar ah mino pawl cu kum upa pawl he hawikom an si tikah zeitindah ṭhathnemhnak an hmuh timi kong kan i ruah cang hna. Hi capar ah toidornak, tangdornak, lawmhnak le siannak ti bantuk sining hna nih mino pawl he rianṭuanṭi awkah kum upa pawl a bawmh hna ning le Khrihfabu dihlak caah thluachuah a sining kong kha kan i ruah hna lai.

3. Filipi 2:3, 4 ningin toidornak timi cu zeidah a si i mah nih Khrihfa pakhat kha zeitindah a bawmh khawh?

³ Kum upa pawl nih mino pawl kha bawmh an duh hna ahcun an i toidor a hau. Aa toidormi nih cun amah nakin midang  kha a biapi deuhmi in a hmuh hna. (Filipi 2:3, 4 rel.) Mah sining a langhtermi kum upa pawl nih rian cheukhat kha Baibal he aa tlak in hmual ngei tein lam a phunphun in ṭuan khawh a si ti kha an hngalh. Cucaah a hlan i an rak tuahmi ningin mi kip nih an tuah khawh lai tiah an i ruahchan lo. (Pct. 7:10) An hngalhmi kong an chimh hnanak thawngin mino pawl kha an bawmh khawh hna. Asinain ‘vawlei thil sining cu aa thleng lengmang’ i thil sining thar he aa tlakin thlennak an tuah a hau ti zong kha an hngalh.—1 Kor. 7:31.

4. Peng zohkhenhtu hna nih Levi mi hna bantuk lungput kha zeitindah an langhter?

⁴ Aa toidormi kum upa pawl nih an kum a upat deuh tikah a hlan bantukin rian kan ṭuan kho ti lo ti kha an hngalh. Tahchunhnak ah, peng zohkhenhtu hna kong hi ruathmanh. Kum 70 an si tikah a dang rianṭuan awkah hal an si. Mah cu a har kho men. An unau pawl he rianṭuanṭinak tinvo sung kha an sunsak. Mah cu an duhmi rian a si i ṭuan peng zong an duh. Asinain mah rian kha mino unaupa pawl nih ṭuan cu a ṭha deuh ti kha an hngalhthiam. Cucaah kum 50 an si tikah an rianṭuannak ngol dingin hal a simi hlanlio Israel ram ah a ummi Levi mi hna bantuk lungput kha an rak langhter. Mah kum upa Levi mi hna cu zei rian an ṭuan poahah an i lawm. Mino pawl kha an si khawh chungin lungtho tein an bawmh hna. (Nam. 8:25, 26) Tuchan zongah peng zohkhenhtu pawl cu kum 70 an si tikah  Khrihfabu tampi sin i an tlawnmi rian kha an ngol ko nain rian pek an sinak Khrihfabu kha tampi an bawmh hna i thazaang an pek hna.

5. Dan le Katie sinin zeidah na cawn khawh?

⁵ Kum 23 chung peng zohkhenhtu rian a ṭuanmi Dan kong hi ruathmanh. Dan cu kum 70 a si tikah a nupi Katie he special hmaikal in rian pek an rak si. An rian thar he aa tlaiin zeitindah thlennak an tuah? Dan nih atu cu a hlan nakin ka rian a tam deuh tiah a ti. Khrihfabu rian kha a zohkhenh, unaupa pawl kha bu rianṭuantu si awkah sining an tlinh nakhnga a bawmh hna i midang zong khuadang le thonginn ah tehte khaannak ah an i tel khawh nakhnga a cawnpiak hna. Kum upa hna, caantling rian nan ṭuan zong, ṭuan lo zongah midang kha tampi nan bawmh khawh hna. Zeitin in dah? Aa thlengmi thil sining he aa tlakin nun awk, hmuitinh chiah awk le na tuah khawh lomi nakin na tuah khawhmi tu ah lungthin na peknak thawngin a si.

6. Aa tangdormi si cu zeicah fim a si? Tahchunhnak pe.

⁶ Aa tangdormi nih cun ri a ngeihmi kha a hngalh. (Ptb. 11:2) Cun aa tangdormi a si caah a tuah khawhmi lengin aa ruahchan lo. Cucaah aa nuam peng i fakpi in rian a ṭuan peng. Aa tangdormi pakhat cu mawṭaw a mawngmi pakhat he kan tahchunh khawh. Chukcho a tammi lam ah mawṭaw a mawngh khawh peng nakhnga kiar a niam ah a thlen a hau. Duhsah tein a kal ko lai nain a hmailei ah a kal peng ko lai. Cu bantukin aa tangdormi pakhat zong nih zeitikah dah “kiar a niam ah thlen” a hauh ti kha a hngalh. Cucaah Jehovah rian kha a ṭuan khawh peng i midang zong a bawmh khawh hna.—Fil. 4:5.

7. Barzillai cu aa tangdormi a si ti kha zeinihdah a langhter?

⁷ Kum 80 a si ah Siangpahrang David nih siangpahrang inn ah um dingin a sawmmi Barzillai kong hi ruathmanh. Barzillai nih a kum ruangah thil tampi a tuah kho ti lo ti kha a hngalh. Cucaah amah aiawh ah mino Chimham kha kal dingin a rak fial. (2 Sam. 19:35-37) Barzillai bantukin kum upa pawl zong nih mino pawl kha lunglawm tein rianṭuannak caanṭha an pek ve hna.

8. Siangpahrang David nih biakinn saknak kong he aa tlaiin zeitindah tangdornak a langhter?

⁸ Siangpahrang David zong nih tangdornak kong he aa tlaiin zohchunhawk ṭha a chiah. Jehovah caah innsak kha a rak duh tuk. Asinain Jehovah nih mah rian kha mino Solomon nih a ṭuan lai tiah a rak chimh tikah David nih Jehovah biakhiahnak kha a cohlan i biakinn saknak caah a herhmi thil vialte kha a si khawh chungin a rak bawmh. (1 Chan. 17:4; 22:5) David nih Solomon cu “a no rih i a hmuhtonmi a tlawm” caah biakinn sak awkah a ṭha bikmi ka si tiah aa ruat lo. (1 Chan. 29:1) David nih hruaitu i a kum asiloah a hmuhtonnak cungah si loin biakinn saknak rian cu Jehovah thluachuah cungah aa hngatmi a si ti kha a hngalh. David bantukin tuchan ah kum upa pawl zong an rian aa thleng ko nain Jehovah rian kha fakpi in an ṭuan peng. Cun an rak ṭuanmi rian a ṭuanmi mino pawl kha Jehovah nih thluachuah a pek hna lai ti kha an hngalh.

9. Zung Ṭengnge Kawmiṭi chungtel pakhat nih zeitindah tangdornak a langhter?

⁹ Tuchan ah tangdornak a langhtermi unaupa Shigeo kong hi ruathmanh. 1976, kum 30 a si ah Zung Ṭengnge Kawmiṭi in rian a ṭuan. 2004 ah Zung Ṭengnge Kawmiṭi khuakhangtu a hung si. A hnuah a thazaang ri a ngeihmi kha a hngalh i a rian kha tlamtling tein a ṭuan kho ti lo. Mah kong he aa tlaiin thla a cam i mino unaupa pakhat caah mah rian ṭuan cu zeicah a ṭhat timi kong  kha a ruat. Shigeo cu khuakhangtu in rian cu a ṭuan ti lo nain Zung Ṭengnge Kawmiṭi chungtel pakhat in rian a ṭuan rih. Barzillai, Siangparhang David le Shigeo kong in aa toidormi le aa tangdormi pakhat nih cun mino hna i an hmuhtonnak cungah si loin an thazaang cung tu ah lungthin an pek lai. Cun a ral si loin a hawikom tu in a hmuh hna lai.—Ptb. 20:29.

10. Khrihfabu chung i mino pawl kong he aa tlaiin kum upa pawl nih zeitindah an ruah awk a si?

¹⁰ Kum upa pawl nih mino pawl kha Jehovah sinin a rami laksawng in an hmuh hna i an tuahmi cungah an i lawm tuk. An thazaang a der deuh tikah thazaang a ṭhawngmi mino pawl nih Khrihfabu herhmi rian kha an ṭuan khawh i an bawmh khawh caah an i lawm tuk.

11. Kum upa pawl nih mino pawl bawmhnak an cohlan tikah ṭhathnemhnak an hmu ti kha Ruth 4:13-16 nih zeitindah a langhter?

¹¹ Baibal chung i Naomi cu mino pakhat sinin lunglawm tein bawmhnak a cohlangmi, zohchunhawk a ṭha tukmi kum upa pakhat a si. A hmasa ahcun Naomi nih a monu Ruth kha a miphun pawl sinah kir dingin a rak forh. Asinain Ruth nih Naomi kaltak kha a duh lo i Bethlehem ah a rak zulh. Naomi cu Ruth a sin a kal caah aa nuam tuk i Ruth bawmhnak zong kha a rak cohlan. (Ruth 1:7, 8, 18) Mah cu an pahnih caah a ṭha tukmi a si. (Ruth 4:13-16 rel.) Toidornak nih kum upa pawl kha Naomi nunning i zohchunh awkah a forh hna.

12. Lamkaltu Paul nih aa lawmhnak kha zeitindah a langhter?

¹² Lamkaltu Paul cu a hmuhmi bawmhnak caah a rak i lawm tuk. Tahchunhnak ah,  Filipi Khrihfa hna nih thilri laksawng an kuat caah aa lawmhnak kong kha a rak chim. (Fil. 4:16) Cun Timote nih a bawmh caah aa lawmhnak kong zong kha a chim. (Fil. 2:19-22) Mah lengah Rom i thong a tlak lioah thazaang pek awkah a sinah an rat caah Paul nih Pathian sinah lawmhnak bia a rak chim. (Lam. 28:15) Paul cu phungchim awk le Khrihfabu thazaang pek awkah meng a thongin khual a tlawngmi, a ṭhawng tukmi pakhat a si. Asinain aa tangdor i unau pawl sinin bawmhnak kha a cohlan.

13. Kum upa pawl nih mino pawl cungah an i lawmhnak kha zeitindah an langhter khawh?

¹³ Kum upa hna, Khrihfabu chung i mino pawl cungah nan i lawmhnak kha lam tampi in nan langhter khawh. Thlah le dawn, thil cawk asiloah a dang pumsalei herhmi kong he aa tlaiin bawmh na herh ahcun an bawmhnak kha lunglawm tein cohlang. Cun cu bantuk bawmhnak kha Jehovah langhtermi dawtnak in hmu. Aan bawmtu hna he zong nan hun i naih deuh lai. Cun na hawile kha Jehovah he an hun i naih deuh nakhnga bawmh i zuam hna law Khrihfabu bawmh awkah rian tampi a ṭuanmi mino pawl na hmuh hna tikah lawmhnak bia chim. Cun anmah he lungtho tein a caan hmangṭi law na hmuhtonnak kong kha chim hna. Cutin na tuah ahcun Khrihfabu ah a hnuhmi hna mino pawl caah Jehovah sinah naa “lawmhnak” kong kha na langhter khawh lai.—Kol. 3:15; Johan 6:44; 1 Thes. 5:18.

14. Siangpahrang David nih a siannak kha zeitindah a langhter?

¹⁴ Siangpahrang David kong in kum upa pawl nih an langhter a herhmi a dang a biapimi sining kha kan hmuh. Biakinn saknak bawmh awkah tangka tampi le a ngeihmi thil mansung tampi kha a rak pek. (1 Chan. 22:11-16; 29:3, 4) Biakinn saknak caah a fapa Solomon cu rian a ngei bikmi a si ti kha a hngalh ko nain cutin a rak tuah. Jehovah bupi i biakinn saknak rian ah i tel dingin thazaang kan ngeih lo ahcun thawhlawm kan peknak thawngin mah rian kha kan bawmh khawh. Cun kum tampi chung kan rak ngeihmi hmuhtonnak in ṭhathnemhnak an hmuh nakhnga mino pawl kha kan bawmh khawh hna.

15. Lamkaltu Paul nih Timote kha zei a sunglawi tukmi laksawng dah a pek?

¹⁵ Lamkaltu Paul nih a langhtermi siannak kong hi ruathmanh. Timote kha amah he missionary rian ṭuanṭi awkah a sawm i phungchim ning le cawnpiak ning kha siang ngaiin a rak chimh. (Lam. 16:1-3) Timote kha phungchimtu le cawnpiaktu ṭha a si nakhnga zong a cawnpiak. (1 Kor. 4:17) Cun Timote nih midang phungchim awk le cawnpiak awkah Paul nih a cawnpiakmi kha a hman.

16. Shigeo nih midang kha zeicah a cawnpiak hna?

¹⁶ Tuchan ah kum upa pawl nih Khrihfabu chung i an ṭuanmi rian kha mino pawl an cawnpiak hna ahcun hman awkah kan tlak ti lai lo timi ṭihnak an ngei lo. Tahchunhnak ah, a hmasa ah langhtermi Shigeo nih kum tampi chung Zung Ṭengnge Kawmiṭi i mino pawl kha ṭha tein a rak cawnpiak hna. Rian a ṭuannak ram ah Pennak rian kha a rak bawmh khawh. Cucaah a caan a rauh deuh tikah amah aiawh in khuakhangtu rian a ṭuan dingmi, ṭha tein cawnpiakmi unaupa pakhat kha a rak hmuh khawh. Shigeo cu kum 45 leng Zung Ṭengnge Kawmiṭi in rian a ṭuan i a hmuhtonnak kha mino unaupa pawl bawmhnak caah a hman peng rih. Shigeo bantuk unaupa hna cu Pathian miphun pawl caah bawmtu taktak an si.

17. Luka 6:38 ningin kum upa pawl nih midang kha zeidah aan pek khawh hna?

 ¹⁷ Kum upa unau pawl nih Jehovah zumh le a cungah zumhfek tein um peng cu a ṭha bikmi nunnak lam a si ti kha an langhter. Na nunning in Baibal phunglam kong hlathlai le na nunnak ah mah ningin zulh cu a ṭha bikmi a si ti kha langhter. A hlan ahcun zeitindah thil tuah a si ti kha na hmuhtonnak hna in na hngalh, asinain aa thlengmi thil sining he aa tlaiin thlennak na tuah a hau ti zong kha na hngalh. Nai ah tipil a ingmi kum upa hna zong nih midang kha lam tampi in an bawmh khawh hna. Jehovah hngalhnak nih atu na nunnak ah zeitlukin dah aan nuamhter timi kong kha na chimh khawh hna. Mi nih na hmuhtonnak le na hngalhmi kong na chimmi kha ngaih an duh lai. Midang kha na hngalhmi kong na cawnpiak hnanak thawngin ‘thil na ṭhenh hna’ ahcun Jehovah nih thluachuah tampi aan pek lai—Luka 6:38 rel.

18. Kum upa pawl le mino pawl cu pakhat le pakhat zeitindah an i bawmh khawh?

¹⁸ Dawtmi kum upa hna, mino pawl he nan i naih deuh ahcun pakhat le pakhat nan i bawm kho deuh lai. (Rom 1:12) Kan dihlak in midang nih an ngeih lomi a sunglawi tukmi thil cheukhat kan ngei. Kum upa pawl cu an nunkhua a sau bantukin fimnak le hmuhtonnak zong an ngei. Mino pawl cu thazaang le ṭhawnnak an ngei. Mino pawl le kum upa pawl cu hawikom in rian an ṭuanṭi tikah kan dawtmi vancung kan Pa kha a thang an ṭhatter i Khrihfabu dihlak caah thluachuah an hmuhter.