1. Dawtmi pakhat buchung chuahnak nih mi cheukhat kha zeitindah a hnorsuan khawh hna?

NA DAWTMI pakhat cu buchung in chuah a si maw? Mah cu ngaihchiat awk taktak a si. Hilda * timi unaunu nih hitin a ti: “Zumhfekmi ka vapa cu kan i umnak kum 41 a si ah a thi. Mah cu ka ton balmi lakah a har bikmi thil a si tiah ka ruah. Asinain ka fa, a nupi le a fale nih Khrihfabu an kaltak tikah ka caah a har chinchin.”

2-3. Salm 78:40, 41 ningin a salle nih an kaltak tikah Jehovah cu zeitindah a um?

² A chungkhar a simi vancungmi cheukhat nih an ralchanh tikah Jehovah cu zeitlukin dah a ngaih a chiat lai ti kha ruathmanh. (Judas 6) Cun a dawtmi a miphun Israel mi pawl nih atu le atu an ralchanhmi a hmuh tikah zeitlukin dah a lung a fah lai ti kha na mitthlam ah cuanter hmanh. (Salm 78:40, 41 rel.) Na dawtmi mi pakhat nih aan kaltak tikah kan dawtmi vancung kan Pa zong a lung a fak ve ti kha na zumh khawh. Na tonmi ngaihchiatnak kha a hngalhthiam. Na herhmi thazaang le bawmhnak kha zaangfahnak he aan pek lai.

³ Hi capar ah cu bantuk thil kan ton tikah Jehovah bawmhnak hmuh awkah zeidah kan tuah khawh timi kong kan i ruah hna lai. Cun cu bantuk zuamcawhnak a tongmi chungkhar hna kha zeitindah kan bawmh khawh hna timi kong zong kan i ruah hna lai. Asinain kan hrial awk a simi, a ṭha lomi ruahnak cheukhat kong kha i ruah hmasa hna u sih.

4. An fale nih Jehovah an kaltak tikah nulepa tampi cu zeitindah an um?

⁴ A sunglawimi an fanu le an fapa hna nih Jehovah an kaltak  tikah nulepa nih an fale biatak chungah an um peng khawh nakhnga thil tam deuh kan rak tuah awk a si tiah an ruah tawn. A fapa buchung chuah a si hnuah unaupa Luke nih hitin a ti: “Keimahle keimah sual kaa phaw. Mah kong he aa tlaiin mangchia hmanh ka manh. A caan ah ka lung a fak tuk i ka ṭap tawn.” Cu bantuk thil sining a tong vemi unaunu Elizabeth zong nih hitin a ruah ve: “Nu pakhat in zeidah ka tuah sualmi a um? Ka fapa kha biatak ka rak cawnpiak lo tiah ka ruah.”

5. Mi pakhat nih Jehovah a kaltak tikah aho palh dah a si?

⁵ Jehovah nih kan dihlak in zalonnak a kan pek ti kha kan i cinken a hau. A sullam cu a nawl kan ngai lai maw, ngai lai lo ti kha kan i thim khawh tinak a si. Ngakchia cheukhat nih cun zohchunhawk a ṭhami nulepa an ngei lo. Asinain Jehovah biak awk le a cungah zumhfek tein um awkah biakhiahnak an tuah. Mi cheukhat cu an nu le an pa nih Jehovah dawt awkah an cawnpiak ko hna nain a hnuah Jehovah kha an kaltak. Cucaah Jehovah kan bia lai maw, bia lai lo ti kha pakhat cio nih biakhiahnak kan tuah a hau. (Josh. 24:15) An fale nih Jehovah an kaltak caah nulepa cu an ngaih a chia tuk. Asinain mah cu nanmah palh a si tiah ruat hlah u.

6. Nulepa pakhat nih Pathian an kaltak tikah mino pakhat cu zeitindah a hnorsuan khawh?

⁶ A caan ah nulepa pakhat nih biatak le an chungkhar hmanh kha an kaltak. (Salm 27:10) Mah cu an nu le an pa a daw i a upatmi fale caah hrawktu a si kho. A pa buchung chuah a simi Esther nih hitin a ti: “Biatak in aa hlat sawhsawhmi a si lo ti kha ka hngalh caah ka ṭap tawn. Jehovah biak ti lo awkah biakhiahnak a tuahmi a si. Ka pa kha ka dawt tuk caah buchung chuah a si lioah zeidah a lawh hnga timi kong he aa tlaiin kan lungre a thei. Keimahle keimah hmanh harnak kaa pe.”

7. An nulepa buchung chuahmi mino pakhat kong he aa tlaiin Jehovah nih zeitindah a ruah?

⁷ Mino hna, nan nu le nan pa cu buchung chuahmi an si ahcun nan caah kan ngaih a chia tuk. Mah cu na caah zeitlukin dah a har ti kha Jehovah nih a hngalh ti zong na zumh khawh. Aan dawt i zumhfek tein na biak peng caah aa lawm. Cun Khrihfabu i na unau a simi kanmah zong kan i lawm tuk. Na nulepa biakhiahnak ruangah rian na ngei lo ti kha i cinken. A hmasa kan chim cang bantukin Jehovah nih amah kan bia lai maw, bia lai lo timi kong ah zalong tein thimnak nawl a kan pek. Cun pakhat cio nih pumpeknak le tipil innak kan tuahmi ningin “kanmah le kan thil cio cu kanmahte nih kan i phorh awk a si.”—Gal. 6:5.

8. Zumhfekmi chungkhar mi hna nih an dawtmi pakhat Jehovah sinah a kir ṭhan lai caan an hngalh lioah zeidah an tuah khawh? (“ Jehovah Sinah Kir Ṭhan” timi rinli kulh ah zoh.)

⁸ Na dawtmi pakhat nih Jehovah a kaltak tikah nikhatkhat ah Jehovah sinah a kir ṭhante lai tiah naa ruahchanmi cu a phung a si ko. Jehovah sinah a kir ṭhan lai caan na hngah lioah zeidah na tuah khawh? Na zumhnak fehter peng awkah na si khawh chungin naa zuam kho. Cutin na tuah ahcun na innchungkhar mi hna le buchung chuahmi ca hmanhah zohchunhawk ṭha na chiah khawh lai. Na lungfahnak inkhawh awkah a herhmi thazaang zong  na ngei lai. Na tuah khawhmi thil cheukhat kong kha i ruah hna u sih.

9. Jehovah sinah zei ti lam in dah thazaang na hmuh khawh? (“ Na Dawtmi Pakhat Nih Jehovah A Kaltak Ahcun Aan Hnem Khomi Baibal Caang Hna” timi rinli kulh zong zoh.)

⁹ Na zumhnak a feh peng nakhnga na tuah khawhmi paoh kha tuah. Nangmah le na chungkhar mi zumhfek tein um peng cu a biapi tukmi a si. Cutin zeitindah na tuah khawh? Baibal na relnak le ruahnak lengah pumhnak ah hmaan tein naa pumhnak thawngin Jehovah sinah thazaang la. A pa le a unu biatak a kaltakmi Joanna nih hitin a ti: “Abigail, Esther, Job, Josef le Jesuh ti bantuk Baibal chung i an kong ṭialmi hna kong ka rel tikah lungdaihnak ka hmu. An nunning nih a ṭhami hmuhnak ngeih awkah a ka bawmh i thazaang a ka pek. Cun original hla pawl zongin thazaang ka hmu.”

10. Salm 32:6-8 nih kan lungretheihnak kha inkhawh awkah zeitindah a kan bawmh?

¹⁰ Na lungretheihnak kong dihlak kha Jehovah sinah chim. Na lungre a theih tikah a sinah thlacam loin um hlah. Kan dawtmi kan Pathian sinah a hmuh ningin thil na hmuh ve nakhnga le ‘na zulh awk hnga lam kha aan hmuhsak’ nakhnga bawmhnak hal. (Salm 32:6-8 rel.) Jehovah sinah na intuarnak kong taktak na chimh tikah na lung a fak tuk men ko lai. Asinain Jehovah nih na lungfahmi kha a hngalhthiam. Aan dawt tuk i a sinah na intuarnak kong dihlak chim awkah aan forh.—Ex. 34:6; Salm 62:7, 8.

11. Hebru 12:11 ningin dawtnak aa telmi Jehovah chimhhrinhnak kha zeicah kan zumh awk a si? (“ Buchung Chuahnak Nih Jehovah Nih A Kan Dawtnak Kha A Langhter” timi rinli kulh zongah zoh.)

¹¹ Khrihfa upa pawl biakhiahnak kha bawm  hna. Buchung chuah timi cu Jehovah timhtuahnak pakhat a si. Dawtnak aa telmi a chimhhrinnak cu sualnak a tuahmi i telin mi kip ca zongah a ṭha. (Hebru 12:11 rel.) Khrihfabu chung i mi cheukhat nih Khrihfa upa pawl nih mi pakhat kha buchung in chuah awkah a hmaanmi biakhiahnak an tuah lo tiah an ti men lai. Asinain cu bantuk mi hna nih palhnak a tuahmi kong kha a ṭhatlonaklei in chim an duh lo ti kha i cinken. A kong dihlak kha kan hngal lai lo. Cucaah biaceihtu kawmiṭi i Khrihfabu hna nih Baibal phunglam zulh awk le “BAWIPA caah” biaceihpiak awkah an i ralring tuk ti kha zum.—2 Chan. 19:6.

12. Chimhhrinnak kong he aa tlaiin Jehovah timhtuahnak an bawmh caah mi cheukhat nih zei ṭhathnemhnak dah an hmuh?

¹² Na dawtmi pakhat buchung chuah dingin Khrihfa upa pawl nih an tuahmi biakhiahnak na bawmhnak thawngin Jehovah sinah a kir ṭhan nakhnga na bawmh khawh. A hmasa ah langhtermi Elizabeth nih hitin a ti: “A upa cangmi kan fapa he pehtlaihnak tuah lo cu a har tuk. Asinain Jehovah sinah a kir ṭhan tikah buchung chuah awkah kaa tlak ko ti kha a cohlan. A hnuah, thil ṭha tampi ka cawn tiah a ti. Jehovah chimhhrinhnak kha ka sunsak tuk.” A vapa Mark zong nih hitin a ti chap: “A hnuah, kan fapa nih amah he hawikomhnak kan tuah lo caah kir ṭhan ka duh tiah a ka ti. Nawlngaih awkah Jehovah nih a kan bawmh caah kaa lawm tuk.”

13. A fakmi intuarnak tawnghtham awkah zeinihdah aan bawmh khawh?

¹³ Na intuarnak aan hngalhthiampiakmi na hawile he bia i ruah. A ṭhami ruahnak ngeih peng awkah aan bawm khomi Khrihfa nutling, patling a simi hna he i kom. (Ptb. 12:25; 17:17) A hmasa ah langhtermi Joanna nih hitin a ti: “Ka li a leng tuk. Asinain zumhawk a tlakmi ka hawile pawl he bia kan i ruahmi nih tampi a ka bawmh.” Asinain Khrihfabu i mi cheukhat nih intuarnak a zualter chinmi bia an chim ah tah zeitin?

14. Zeicah ‘pakhat le pakhat i ngaihthiam in i bawmh’ a herh?

¹⁴ Na unau pawl cungah na lungsau. Mikip nih a ṭhami bia an chim peng lai tiah kan i ruahchan awk a si lo. (Jeim 3:2) Kan dihlak in mitling lo kan si caah mi cheukhat nih an hngalh loin an chimmi bia asiloah na lung aan fahtermi bia an chim sual hmanhah khuaruahhar awk a si lo. Lamkaltu Paul nih ruahnak a kan cheuhmi hi i cinken: “Pakhat le pakhat lungsilonak nan i ngeih tikah pakhat le pakhat i ngaithiam u law i bawm u.” (Kol. 3:13) A rualchan buchung chuah a simi unaunu pakhat nih hitin a ti: “Thapek canah ka lung a kan fahtermi unau pawl kha ngaihthiam hna awkah Jehovah nih a ka bawmh.” Zumhfekmi chungkhar mi hna bawmh awkah Khrihfabu nih zeidah a tuah khawh?

15. Nai ah an dawtmi mi pakhat buchung chuah a simi hna kha zeinihdah a bawmh khawh hna?

¹⁵ Zumhfekmi chungkharmi hna kha ṭha tein  conglawmh hna. Unaunu Miriam nih a upa buchung chuah a si hnuah i pumh kha ka ṭih tiah a ti. “Mi nih an chim dingmi bia kha ka ṭih. Asinain a cangmi kong he aa tlaiin a ngaih a chiami unau tampi zong an um. Annih nih ka upa kong he aa tlaiin a ṭhatlonak kong zeihmanh an chim lo. Ka ngaihchiatnak an ka hrawmpi caah an cungah kaa lawm tuk.” A dang unaunu pakhat zong nih hitin a ti ve: “Kan fapa buchung chuah a si tikah kan dawtmi kan hawile nih an kan hnemh. Mi cheukhat nih cun zei hmanh chim awk kan thei lo tiah an kan ti. Mi cheukhat nih an ka ṭahpi i cheukhat nih cun thazaang a pemi ca an ka kuat. An tuahmi thil nih tampi a ka bawmh.”

16. Buchung chuah a tongmi rualchan pawl kha Khrihfabu nih zeitindah a hnemh i a bawmh peng khawh hna?

¹⁶ Zumhfekmi chungkhar mi hna kha bawm peng hna. A hlan nakin atu ah na dawtnak le thazaang peknak kha an herh deuh. (Heb. 10:24, 25) A caan ah buchung chuahmi chungkhar mi hna nih Khrihfabu i hawikomhnak in pheo kan si timi ruahnak an ngei. Cutin ruahter kan duh hna lo. A hleiin an nu le an pa biatak a kaltakmi mino pawl kha kan thangṭhat hna i thazaang kan pek hna a hau. A vapa cu buchung chuah a si i a chungkhar pawl kha a kaltak hna. Cucaah Maria nih hitin a ti: “Ka hawile cheukhat cu ka inn ah an ra, rawl an ka chuanpiak i ka fale he hlathlainak tuah awkah an ka bawmh. Ka lungfahnak kha an ka hrawmpi i an ka ṭahpi. Ka kong he aa tlaiin mi nih a hmaan lo ningin an chim tikah an ka kilven. Thazaang tampi an ka pek.”—Rom 12:13, 15.

17. A ngaih a chiami hna bawmh awkah Khrihfa upa pawl nih zeidah an tuah khawh?

¹⁷ Khrihfa upa hna, zumhfekmi chungkhar mi hna thazaang pek awkah caanṭha nan hmuhmi paoh kha hmang u. An dawtmi hna nih Jehovah a kaltakmi zumtukhat hna hnemh awkah a hleiin rian nan ngei. (1 Thes. 5:14) Thazaang pek awkah Khrihfabu pumhnak aa thawk hlan le a dih hnuah bia ruah hna u. An inn ah leng hna u law thlacamṭi u. Phungchim rianṭuannak ah kalṭi u asiloah chungkhar pumhnak ah sawm hna u. Khrihfa upa pawl nih a ngaih a chiami hna cungah zaangfahnak le dawtnak an langhter a hau.—1 Thes. 2:7, 8.

18. Pathian nih 2 Peter 3:9 ningin palhnak a tuahmi hna kha zeidah tuahter a duh hna?

¹⁸ Jehovah nih “pakhat tlau hmanh hi a duhmi a si lo i mi vialte hi sual ngaihchihnak ngei hna seh ti tu hi a duhmi a si.” (2 Peter 3:9 rel.) Mi pakhat nih sualnak ngan a tuah sual khawh ko nain a nunnak cu Pathian caah a sunglawi rih. Jehovah nih kan dihlak caah a dawt tukmi a Fapa nunnak a pek ti kha philhhlah. Jehovah nih mah mi hna kha a sinah an kir ṭhan nakhnga zaangfahnak he a bawmh hna. Jesuh chimmi fapa tlau tahchunhnak ah kan hmuh bantukin annih zong nih cutin tuah awkah an i thim lai tiah Pathian nih aa ruahchanh. (Luka 15:11-32) Biatak a kaltakmi mi tampi cu a hnuah an dawtmi vancung an Pa sinah an kir ṭhan. Mah tikah unau pawl nih lunglawm tein an conglawmh hna. A hmasa ah langhtermi Elizabeth cu a fapa buchung i a kir ṭhan tikah aa lawm tuk. Hitin a ti: “Ruahchannak ngeih peng awkah thazaang a kan pemi hna cungah kaa lawm tuk.”

19. Jehovah kha zeicah kan i bochan peng khawh?

¹⁹ Jehovah kha kan i bochan peng khawh. A ruahnak cheuhmi nih a kan bawmh zungzal lai. Anih cu amah a dawmi le a biami hna cungah dawtnak taktak a ngeimi, a siangmi le zaangfahnak a ngeimi Pa a si. Lungrethei in na um caan ah Jehovah nih aan kaltak bal lai lo ti kha zum. (Heb. 13:5, 6) A hmasa ah langhtermi Mark nih Jehovah nih “a kan kaltak bal lai lo” tiah a ti. “Harnak kan ton caan ah a kan kaltak bal lo.” Jehovah nih “thil ti khawhnak ṭhawnnak” aan pek zungzal lai. (2 Kor. 4:7) Cucaah na dawtmi pakhat nih Jehovah a kaltak hmanhah zumhfek tein na um kho peng i ruahchannak zong na ngei kho peng.