1. Zumhfekmi hna cu Jehovah he zei bantuk pehtlaihnak dah an ngeih khawh?

JEHOVAH a biami chungkhar ah “sermi thil vialte hna nakin a cungnung deuhmi” Jesuh le vancungmi tampi zong an i tel. (Kol. 1:15; Salm 103:20) Jesuh nih vawleicung a um lioah zumhfekmi hna nih Jehovah kha an Pa in an hmuh khawh tiah a ti. A zultu pawl sin bia a chim tikah Jesuh nih Jehovah kha “ka Pa le nan Pa” tiah a ti hna. (Johan 20:17) Jehovah sinah kan pum kan i pek i tipil kan in tikah dawtnak a ngeimi unau hna i chungkhar kan hung si.—Mar. 10:29, 30.

2. Hi capar ah zei kong dah kan i ruah hna lai?

² Mi cheukhat nih Jehovah kha dawtnak a ngeimi Pa in hmuh awkah an i harh. Mi cheukhat nih cun an unau pawl sinah zeitindah dawtnak kan langhter lai ti kha an hngal lo. Hi capar ah Jesuh nih Jehovah kha dawtnak a ngeimi Pa in hmuh awk le amah he i naih awkah zeitindah a kan bawmh timi kong kan i ruah hna lai. Cun kan unau pawl kan pehtlaih hna tikah Jehovah kan i zohchunh khawh ning lam kong zong kan i ruah hna lai.

3. Bawipa thlacamnak nih Jehovah he zeitindah a kan naihter deuh?

³ Jehovah cu dawtnak a ngeimi Pa a si. Jesuh nih Jehovah kha amah nih a hmuh ningin hmu ve hna seh ti a kan duh. Cun zaangfahnak a ngei lomi le zeidah tuah awk a si timi kong lawng a kan chimtu in si loin zeitik caan paohah bia ruah khawh a simi, zaangfahnak le dawtnak a ngeimi nulepa in hmu hna seh ti zong a kan duh. Mah cu Jesuh nih a zultu pawl thlacam ning a fialmi hna ah kan hmuh khawh. Bawipa thlacamnak ah “kan Pa” timi bia in a thawk. (Matt. 6:9) Jesuh nih Jehovah kha “Lianngan Bik,” ‘Sertu’ asiloah “zungzal in a  hmunmi Siangpahrang” tiah auh dingin a kan fial. Zeicahtiah Baibal nih Jehovah kong a chim tikah mah biafang hna kha a hman caah mah cu a palhmi a si lo. (Gen. 49:25; Isa. 40:28; 1 Tim. 1:17) Asinain Jesuh nih “Pa” tiah auh dingin a kan fial.

4. Jehovah nih kanmah he i naih a duh ti kha zeitindah kan hngalh khawh?

⁴ Jehovah kha dawtnak a ngeimi Pa in hmuh awkah naa harh maw? Mi cheukhat nih cun an i harh. Dawtnak a ngeimi pa kan ngeih lo ahcun a kan dawtu pa pakhat kong mitthlam ah cuanter cu kan i harh men lai. Jehovah nih kan intuarnak a hngalhthiam dih timi kong hngalh cu zeitlukin dah hnemtu a si. Kanmah he i naih zong a duh. Cucaah Baibal nih hitin a kan forh: “Pathian cu naih u law aan naih ve hna lai.” (Jeim 4:8) Jehovah nih a kan dawt tuk i a ṭha bikmi Pa ka si lai tiah a kan ti.

5. Luka 10:22 ningin Jesuh nih Jehovah he i naih awkah zeitindah a kan bawmh khawh?

⁵ Jesuh nih Jehovah he i naih awkah a kan bawmh khawh. Jesuh nih Jehovah kha ṭha tein a hngalh i a sining kha tling tein aa zohchunh. Cucaah hitin a ti: “Keimah a ka hmutu paoh nih cun ka Pa kha an hmuh ve ko.” (Johan 14:9) Kum upa unaupa bantukin Jesuh nih kan Pa upat khawh ning le nawlngaih khawh ning, a lung a lawmhter lomi thil hrial khawh ning le a mithmai ṭha hmuh khawh ning kong kha a kan cawnpiak. Asinain Jesuh nih Jehovah cu zeitlukin dah zaangfahnak le dawtnak a ngeimi a si ti kha hngalhthiam awkah a hleiin a kan bawmh. (Luka 10:22 rel.) Tahchunhnak cheukhat in zohhmanh hna u sih.

6. Jehovah nih Jesuh bia a ngaihpiak ning kong kha tahchunhnak pe.

⁶ Jehovah nih a fale kha an bia a ngaihpiak hna. Jehovah nih a Fapa a bia a ngaihpiak ning kong kha ruathmanh. Jehovah nih a Fapa vawleicung a um lioah a thlacamnak tampi kha a ngaihpiak. (Luka 5:16) Lamkaltu 12 a thim hna lio ti bantuk a biapimi biakhiahnak kong he aa tlaiin Jesuh thlacamnak zong kha a ngaihpiak. (Luka 6:12, 13) Jesuh nih a  lungre a theih tuk lio caan ah thla a cammi zong kha a ngaihpiak. Rawi a si hlan zongah a ton dingmi kong he aa tlaiin Jesuh nih a Pa sinah lungtak tein thla a rak cam. Jehovah nih Jesuh thlacamnak kha a ngaihpiak lawng si loin a dawt tukmi a Fapa thazaang pek awkah vancungmi pakhat zong kha a rak thlah.—Luka 22:41-44.

7. Jehovah nih kan thlacammi a ngaih ti hngalhnak nih zeitindah aan umter?

⁷ Tuchan zongah Jehovah nih a salle pawl thlacamnak kha a ngaihpiak hna i aa tlakmi caan le a ṭha bikmi lam in a leh hna. (Salm 116:1, 2) India ah a ummi unaunu hmuhtonnak kong hi ruathmanh. Anih cu a hleihluat tuk in thinphan a hmangmi a si i mah kong he aa tlaiin Jehovah sinah lungtak tein thla a cam. Hitin a ti: “Lungrethei le thinphang in kan um tikah zeidah kan tuah khawh timi kong he aa tlaiin 2019, May, JW Broadcasting^® cu ka caah aa tlak tukmi a si. Mah cu ka thlacamnak a phi a si.”

8. Jehovah nih Jesuh a dawt kha zei ti lam in dah a langhter?

⁸ Jehovah nih Jesuh kha a dawt i vawleicung i harnak a ton lioah a zohkhenh bantukin kannih zong a kan dawt i a kan zohkhenh ve. (Johan 5:20) Jesuh nih a herhmi thlaraulei, lungthinlei le pumsalei vialte kha a rak bawmh. Cun Jehovah nih a Fapa a dawtnak le a cungah aa lawmhnak kong zong kha a rak chim. (Matt. 3:16, 17) Jesuh nih vancung a Pa cu a sinah a um lai i a ka bawmh lai ti kha a hngalh caah lileng in a um bal lo.—Johan 8:16.

9. Jehovah nih a kan dawt ti kha zeitindah kan hngalh khawh?

⁹ Jesuh bantukin kan dihlak in Jehovah nih a langhtermi dawtnak kha lam tampi in kan hmuh. Mah hi ruathmanh: Jehovah nih a hawi sinak nawl a kan pek i kan lungre a theih tikah thazaang pe in a kan lawmhter khomi, dawtnak a ngeimi unau tampi zong a kan pek. (Johan 6:44) Jehovah nih kan zumhnak a fehter khomi thlarau rawl zong hmaan tein a kan pek. Cun kan nunnak caah a herhmi thilri zong a kan pek. (Matt. 6:31, 32) Jehovah nih a kan dawtnak kong kha kan ruah tikah amah kha kan dawt chin.

10. Jehovah nih kan unau pawl a pehtlaih hna ningin zeidah kan cawn khawh?

¹⁰ Jehovah nih kan unau pawl kha a dawt hna. Asinain anmah pawl dawt le kan dawt hna ti langhter cu a zungzal in cun a fawi men lai lo. Mah lengah nunphung le hnulei sining aa lo lomi in a rami kan si. Cun kan dihlak in midang lung a fahtermi palhnak kan tuah tawn hna. Asinain thlaraulei kan unau pawl dawt awkah fakpi in kan i zuam kho. Zeitindah? Kan unau pawl cung i dawtnak langhternak ah kan Pa kan i zohchunhnak thawngin a si. (Efe. 5:1, 2; 1 Johan 4:19) Jehovah sinin kan cawn khawhmi kong kha zohhmanh hna u sih.

11. Jesuh nih Jehovah ‘zaangfahnak’ kha zeitindah a langhter?

¹¹ Jehovah nih ‘zaangfahnak’ a langhter. (Luka 1:78) Zaangfahnak a ngeimi mi pakhat nih cun mi nih sifah harnak an inmi a hmuh tikah a lungre a thei i anmah bawmh khawhnak le hnemh khawhnak lam kha a kawl. Jesuh nih mi pawl a pehtlaih hna ningin Jehovah nih a dawt hna ti kha a langhter. (Johan 5:19) Voikhat cu Jesuh nih mibu a hmuh hna tikah “khaltu a ngei lomi tuu bantukin lungrethei le awlokchong in an um kha a hmuh hna caah a zaang an fak ngaingai.” (Matt. 9:36) Jesuh nih a dawt hna lawng si loin a bawmh  zong a rak bawmh hna. A zawmi kha a damter hna i “rethei le thilritmi vialte hna” kha hrimhnak a pek hna.—Matt. 11:28-30; 14:14.

12. Zaangfahnak kan langhter khawh ning kong kha tahchunhnak pe.

¹² Kan unau pawl cungah zaangfahnak kan langhter hlanah an tonmi zuamcawhnak kong kha kan ruah hmasa a hau. Tahchunhnak ah, unaunu pakhat cu a zual tukmi zawtnak a ngei men lai. A harnak kong kha a chim bal lo nain mi pakhat nih a bawmh ahcun aa nuam tuk men lai. A chungkhar pawl pumsalei herhmi kha a bawm kho hna maw? A caah rawl kan chuanpiak asiloah inn kan thianhpiaknak thawngin kan bawm kho lai maw? Unaupa pakhat cu a rian in phuah a si men lai. Rian a hmuh ṭhan hlan tiang tangka tlawmpal pek in kan bawm kho lai maw?

13-14. Jehovah bantukin zeitindah siannak kan langhter khawh?

¹³ Jehovah cu a siangmi a si. (Matt. 5:45) Zaangfahnak langhter awkah unau pawl nih bawmhnak an kan hal tiang kan hngah awk a si lo. Jehovah bantukin kanmah nih kan langhter hmasa khawh. Hal hau loin nifatin ni kha a tlanter. Cun lawmh a hngal lomi hna hmanh nih ni in ṭhathnemhnak an hmu. Kan herhmi thil a kan peknak thawngin Jehovah nih a kan dawtnak kha a langhter. Jehovah cu zaangfahnak le siannak a ngei tukmi Pathian a si caah kan dawt tuk.

¹⁴ Kan unau pawl nih Jehovah kha an i zohchunh i midang cungah siannak an langhter. Tahchunhnak ah, 2013 ah Super Typhoon Haiyan thlichia ruangah Philippine ah thil tampi a rak rawk. Unau tampi inn cu a rawk i thilri tampi zong an sung. Vawleicung pumpi ah a ummi unau pawl nih tangka asiloah innsaknak le remhnak caah an bawmh hna caah kumkhat a tlin hlanah inn 750 dengmang an rak sak khawh. COVID-19 pulrai chungah Jehovah Tehte Hna nih an unau pawl bawmh awkah fakpi in an i zuam. Thlaraulei kan unau pawl kan bawmh colhmi hna cu kan dawt hna ti kan langhtermi a si.

15-16. Luka 6:36 ningin kan Pa kan i zohchunh khawh ning a biapimi lam cu zeidah a si?

¹⁵ Jehovah cu zaangfahnak a ngeimi le  ngaihthiam a hmangmi a si. (Luka 6:36 rel.) Vancung kan Pa zaangfahnak kha nifatin kan hmuh. (Salm 103:10-14) Jesuh zultu pawl cu mitling lo an si. Asinain Jesuh nih an cungah zaangfahnak le ngaihthiamnak a langhter. Kan sualnak ngaihthiam kan si nakhnga a nunnak hmanh lungtho tein a kan pek. (1 Johan 2:1, 2) Jehovah le Jesuh nih an langhtermi zaangfahnak le ngaihthiamnak nih anmah he an in naihter maw?

¹⁶ Lungtak tein kan i “ngaihthiam” tikah thlaraulei kan chungkhar ah dawtnak a fek chin. (Efe. 4:32) A caan ah midang ngaihthiam cu a har tuk ko lai, cucaah kan i zuam a hau. Unaunu pakhat nih Vennak Innsang capar chung i “Pakhat Le Pakhat I Ngaithiam U” * timi capar nih cutin tuah awkah a ka bawmh tiah a ruah. Hitin a ti: “Mah capar nih midang ngaihthiamnak nih a ka bawmh ning kong kha hngalhthiam awkah a ka bawmh. Mah ah midang ngaihthiam timi cu palhnak an tuahmi kha a hmaanmi in ruah asiloah mah nih harnak aan pe lo a ti duhnak a si lo tiah a fianter. Asinain midang kha na ngaihthiam hna tikah na thin a hung ti lo i lungdai tein na um kho.” Cucaah kan unau pawl kan ngaihthiam hna tikah anmah kan dawt hna le kan Pa Jehovah kan i zohchunh ti kan langhtermi a si.

17. Matthai 5:16 ningin vancung kan Pa kha zeitindah kan upat khawh?

¹⁷ Jehovah chungkhar si cu lunglawmh awk taktak a si. Pathian biaknak ah mi tam khawh chung tam i tel hna seh ti kan duh. Cucaah mi nih Jehovah asiloah a miphun kong he aa tlaiin a ṭha lomi ruahnak an ngeih nakhnga zeitikhmanh ah kan tuah awk a si lo. Mi nih Jehovah kong an cawn le biak an duh nakhnga ziaza ṭha langhter awkah kan i zuam peng.—Matthai 5:16 rel.

18. Ralṭha tein phungchim awkah zeinihdah a kan bawmh khawh?

¹⁸ A caan ah vancung kan Pa nawl kan ngaih caah mi cheukhat nih an kan nihsawh men lai asiloah a hrem hmanh an kan hrem men lai. Kan zumhnak kong midang sin chim awkah  kan ṭih ah tah zeitin? Jehovah le a Fapa nih an kan bawmh lai ti kha kan zumh khawh. Jesuh nih a zultu pawl kha zeitindah kan chim lai asiloah zeidah kan chim lai timi kong he aa tlaiin nan thinphang hlah u tiah a ti hna. Zeicah? Jesuh nih “a caan a phak tikah chim ding cu pek nan si te ko lai. Zeicahtiah nan chimmi bia cu nanmah bia a si lai lo; nan chung i bia a chimtu nan Pa Thlarau nih aan pekmi hna bia a si lai” tiah a ti hna.—Matt. 10:19, 20.

19. Ralṭha tein tehte a khaangmi mi pakhat kong kha tahchunhnak pe.

¹⁹ Robert kong hi ruathmanh. Baibal a cawn i Baibal kong hngalhnak tlawmpal lawng a ngeih lioah Thlanglei Africa biaceihnak zung ah a kal i biaceihtu pakhat sinah ralkap a tlak lonak a ruang kha a chimh. A unau pawl a dawt hna caah khoikalei hmanh ṭan a duh lonak kong kha biaceihnak zungah ralṭha tein a chim. Thlaraulei chungkhar i a dirhmun kha a sunsak. Biaceihtu nih “ahodah na unau cu an si?” tiah ruahlopi in a hal. Robert nih cutin a ka hal lai tiah aa ruahchan lo nain mah ni Baibal caang kha aa cinken. Mah cu Matthai 12:50 kha a si. Hitin a ti: “Vancung i a ummi ka Pa nih tuah hna seh ti a duhmi a tuahmi paoh cu, ka naule le ka far le ka nu an si ko.” Robert cu Baibal a cawngkami a si ko nain mah biahalnak le a dang aa ruahchan lomi biahalnak tampi leh awkah Jehovah thiang thlarau nih a bawmh. Jehovah cu Robert cungah aa uangthlar tuk lai ti cu a fiang ko. A harmi thil sining ah ralṭha tein tehte khaan khawh awkah amah kan i bochan tikah Jehovah cu kan cungah aa uangthlar ve.

20. Zei tuah awkah dah bia kan khiah awk a si? (Johan 17:11, 15)

²⁰ Cu bantuk dawtnak a ngeimi chungkhar kan ngeih caah kan i lawm tuk. A ṭha bikmi Pa le a kan dawmi unau tampi zong kan ngei hna. Mah caah kan i lawmh tuk awk a si. Satan le a khuachia pawl nih vancung kan Pa dawtnak cungah lunghrinnak kan ngeih nakhnga le kan lung aa rualnak a rawh nakhnga an i zuam. Asinain Jesuh nih kan chungkhar ah lungrualnak a um peng nakhnga zohkhenh dingin a Pa sinah bawmhnak a kan halpiak. (Johan 17:11, 15 rel.) Jehovah nih mah thlacamnak kha a ngaih. Jesuh bantukin vancung kan Pa nih a kan dawtnak le a kan bawmhnak cungah zeitikhmanh ah lunghrinnak kan ngeih awk a si lo. Thlaraulei kan chungkhar pawl he i naih chin awkah bia khiak hna u sih.