1. Jehovah miphun pawl nih zei bantuk harnak dah an ton khawh men?

A HAR tukmi thil sining na tong maw? Khrihfabu chung i unau pakhat nih na lung aan fahter men lai. (Jeim 3:2) Asiloah Jehovah na biak caah na rianṭuanṭi hawi le na sianginn kaiṭi hawi hna nih an in nisawh men lai. (1 Pet. 4:3, 4) Asiloah na chungkhar mi hna nih i pumh ti lo dingin le na zumhnak kong kha midang sin chim ti lo dingin an in thlauh men lai. (Matt. 10:35, 36) Mah cu na caah a har tukmi a si ahcun na lung a dong men lai. Asinain zei bantuk zuamcawhnak na ton hmanhah Jehovah nih tawnghtham khawhnak fimnak le inkhawhnak thazaang aan pek lai ti kha na zumh khawh.

2. Rom 15:4 ningin Baibal relnak nih kan cungah zei ṭhatnak dah a chuahter khawh?

² Baibal ah Jehovah nih a tling lomi minung nih a harmi thil sining an tawnghtham ning kong kha a dikthliar in a langhter. Zeicah? An sinin kan cawn khawh nakhnga caah a si. Cucaah Jehovah nih lamkaltu Paul kha mah kong ṭial dingin a forhnak a si. (Rom 15:4 rel.) Mah kong kan relnak thawngin hnemhnak le ruahchannak kan ngei kho. Asinain ṭhathnemhnak kan hmuh khawh nakhnga Baibal rel lawngin a za lo. Baibal nih kan nunnak le kan ruahnak a thlen nakhnga nawl kan awnh a hau. Kan tonmi zuamcawhnak tawnghtham ning kong he aa tlaiin lamhruainak hmuh kan duh ahcun zeidah kan tuah khawh? A tanglei thil pali hi kan tuah khawh: (1) Thlacam, (2) Mitthlam cuanter, (3) Ṭha tein ruah le (4) Mah ningin zulh. Mah thil pakhat cio ah zeidah aa tel timi kong kha i ruah hna u sih. * Cun Siangpahrang David le lamkaltu Paul cungah a cangmi kong in cawn awkah mah thil pali kha kan hman hna lai.

3. Baibal na rel hlanah zeidah na tuah awk a si, zeicah?

 ³ (1) Thlacam. Baibal na rel hlanah na relmi in ṭhathnemhnak na hmuh khawh nakhnga Jehovah sinah bawmhnak hal. Tahchunhnak ah, harnak tawnghtham ning kong he aa tlaiin ruahnak cheuhnak na herh ahcun lam aan hruai khomi Baibal phunglam na hmuh nakhnga Jehovah sinah bawmhnak hal.—Fil. 4:6, 7; Jeim 1:5.

4. Baibal ah an kong ṭialmi hna cu a um taktakmi in na hmuh khawh hna nakhnga zeinihdah aan bawmh khawh?

⁴ (2) Mitthlam cuanter. Jehovah nih a ṭha tukmi thil a simi mitthlam cuanter khawhnak sining a kan pek. Baibal ah an kong ṭialmi hna cu a um taktakmi in na hmuh khawh hna nakhnga an dirhmun ah i umter chun law zeidah a cang timi kong kha na mitthlam ah cuanter awkah i zuam. An hmuh ning in hmuh ve awk le an intuarmi ningin intuar ve awkah i zuam.

5. Ṭha tein ruah timi cu zeidah a si, zeitindah ṭha tein na ruah khawh?

⁵ (3) Ṭha tein ruah. Ṭha tein ruah timi cu relmi kong le mah ningin zulh khawh ning kong thukpi in ruah kha a si. Mah nih a kong pakhat kha thuk deuh in ruah awk le hngalhthiam chin awkah aan bawmh lai. Ṭha tein ruah loin Baibal rel cu hmanthlak peh dingmi peh loin cabuai cungah chiahmi bantuk a si. Asinain ṭha tein ruah cu a dihlak ṭha tein pehmi hmanthlak bantuk a si. Ṭha tein na ruah khawh nakhnga mah biahalnak hna hi naa hal kho: ‘A tonmi buaibainak tawnghtham awkah zeidah a tuah? Jehovah nih zeitindah a bawmh? Harnak hna inkhawh awkah a ka bawmh nakhnga mah kong kha zeitindah ka hman khawh?’

6. Kan hlathlaimi ningin zeicah kan zulh awk a si?

⁶ (4) Mah ningin zulh. Jesuh nih nan hlathlaimi ningin nan zulh lo ahcun thetse cungah inn a sami pa bantuk nan si tiah a ti. Fakpi in a ṭuan ko nain aa zuamnak cu man a ngei lo. Zeicah? Thlichia le tilet a thawh tikah a inn cu a rawh lai caah a si. (Matt. 7:24-27) Cu bantukin thla kan cam, kan mitthlam ah kan cuanter i ṭha tein kan ruah ko nain kan hlathlaimi ningin kan zulh lo ahcun kan i zuamnak cu pakpalawng a si lai. Cun harnak asiloah hremnak kan ton tikah mah nih kan zumhnak kha a ṭhawnter lai lo. Asinain hlathlainak kan tuah tik le kan hlathlaimi ningin kan zulh tikah a ṭha deuhmi biakhiahnak kan tuah khawh, daihnak tam deuh kan hmu kho i kan zumhnak zong a fek chin. (Isa. 48:17, 18) Kan i ruah cangmi thil pali kha hmangin Siangpahrang David cungah a cangmi kong in kan cawn khawhmi kong kha zohhmanh hna u sih.

7. Zei Baibal tuanbia kong dah kan i ruah hna lai?

⁷ Na hawikom asiloah na chungkharmi pakhat nih na lung aan fahter bal maw? Cutin a si ahcun a pa a rawi i a pennak chuh aa zuammi Siangpahrang David fapa Absalom kong na hlathlainak thawngin ṭhathnemhnak na hmu kho.—2 Sam. 15:5-14, 31; 18:6-14.

8. Jehovah bawmhnak kha zeitindah na hmuh khawh?

⁸ (1) Thlacam. Mah kong kha ruat in ningcang loin pehtlaih na si caah zeitindah na intuar timi kong kha Jehovah sinah chim. (Salm 6:6-9) Cuset khaset tiin chim. Cun mah zuamcawhnak tawnghtham khawh ning kong he aa tlaiin zeidah tuah ding a si ti hngalh awkah Jehovah sinah bawmhnak hal.

9. David le Absalom karah zeidah a rak cang?

⁹ (2) Mitthlam cuanter. A cangmi kong kha ruat law Siangpahrang David a hnorsuan ning kong kha na mitthlam ah cuanter. David fapa Absalom nih mi nih an dawt nakhnga kum tampi chung rian a rak ṭuan. (2 Sam. 15:7) Absalom nih caan ṭha a si tiah a ruah  tikah Israel ram pumpi ah mingiatu pawl kha a thlah hna i mi pawl nih an siangpahrang in an cohlan nakhnga a rak timhtuah. David a hawikom ṭha le ruahnak a cheutu Ahithophel hmanh nih a rak zumh i ralchanhtu lei ah a rak ṭang. Absalom nih amahle amah kha siangpahrang ah aa ser i mah lioah a zawtnak a zual tukmi David kha tlaih awk le thah awkah a rak i zuam. (Salm 41:1-9) David nih Absolom thil tuahmi a hmuh tikah Jerusalem in a rak zam. A donghnak ah, Absalom ralkap pawl nih David ralkap pawl kha an rak doh hna. Ralchanhtu ralkap pawl cu an sung i David fapa Absalom cu thah a rak si.

10. Siangpahrang David nih zeitindah a rak lehrulh khawh?

¹⁰ David nih a cungah a cangmi thil ruangah zeitlukin dah a intuar timi kong kha na mitthlam ah cuanter ṭhan hmanh. Absalom kha a dawt i Ahithophel kha a zumh. Asinain an pahnih in David kha an rak rawi. A lung an fahter lengah thah hmanh an rak timh. David nih a dang a hawile zong Absalom sinah an ṭang tiah a ruah khawh i anmah a zumh hnanak zong a tlau kho. Cun keimah lawng ka si cang tiah a ruah khawh men, cucaah amah lawngin ram in zam awkah a rak i zuam kho men. Asiloah lungdong tuk zongin a um kho. Asinain David nih cutin a rak tuah lo. Mah canah a tonmi harnak hna kha a rak tei khawh. David nih zeicah cutin a rak tuah khawh?

11. David nih a harmi thil sining kha zeitindah a rak lehrulh?

¹¹ (3) Ṭha tein ruah. Mah kong in zei phunglam dah na cawn khawh? Mah biahalnak hi phi, “David kha buaibainak tawnghtham khawh awkah zeinihdah a bawmh?” David cu a thin a phang lo i a ṭha lomi biakhiahnak zong a rak tuah colh lo. Zeidah ka tuah lai timi kong he aa tlaiin biakhiahnak tuah khawh lo tiangin a thin a rak phang lo. Mah canah Jehovah sinah bawmhnak a rak hal. Cun a hawile zong kha bawmhnak a hal hna. Mah hnuah a tuah dingmi kong he aa tlaiin biakhiahnak a rak tuah colh. David cu a ngaih a chia tuk ko nain midang cungah zumhnak a ngei i a rak hua hna lo. Jehovah kha aa bochan peng i a hawile kha a zumh hna.

12. Jehovah nih David bawmh awkah zeidah a tuah?

¹² Jehovah nih David kha zeitindah a bawmh? Hlathlainak na tuahnak thawngin harnak inkhawh awkah Jehovah nih David herhmi thazaang a pek ning kong kha na hngalh lai. (Salm 3:1-8) Jehovah nih David biakhiahnak kha thluachuah a pek. Cun an siangpahrang kilven dingin ral an doh tikah zumhfekmi David hawile kha Pathian nih a rak bawmh hna.

13. Midang nih lam cheukhat in na lung an in fahter ahcun David kha zeitindah naa zohchunh khawh? (Matthai 18:15-17)

¹³ (4) Mah ningin zulh. Nangmah le nangmah ‘David kha zeitindah kaa zohchunh khawh?’ tiah i hal. Na tonmi buaibainak cu tawnghtham colh a hau men lai. Thil sining cungah i hngat in Matthai dal 18 chung i Jesuh ruahnak cheuhnak kha na zulh khawh. (Matthai 18:15-17 rel.) Asinain na thin a hun lioah biakhiahnak tuah colh hlah. Lungdaihnak aan pek nakhnga le mah kong tawnghtham awkah a herhmi fimnak aan pek nakhnga Jehovah sinah thlacam. Na hawile cungah zumhnak ngei law an in pekmi bawmhnak kha lungtho tein cohlang. (Ptb. 17:17) Asinain a biapi bikmi cu Jehovah nih Baibal in aan pekmi ruahnak cheuhnak zulh kha a si.—Ptb. 3:5, 6.

14. Zei thil sining hna nih dah 2 Timote 1:12-16; 4:6-11, 17-22 kha lungthin aan pekter khawh?

¹⁴ Nang cu na zumhnak ruangah chungkhar  ralchanhnak a tongmi na si maw? Asiloah Jehovah miphun pawl rianṭuannak an khenkham hnanak ram ah a ummi na si maw? Cutin na si ahcun 2 Timote 1:12-16 le 4:6-11, 17-22 na relnak thawngin thazaang tampi na hmu lai. * Mah Baibal caang hna hi Paul nih thong a tlak lioah a ṭialmi an si.

15. Zei caah dah Jehovah sinah thla na cam khawh?

¹⁵ (1) Thlacam. Mah a konglam pawl na rel hlanah na tonmi buaibainak le mah he aa tlaiin na intuar ning kong kha Jehovah sinah chim. Cuset khaset tiin chim. Cun Paul cungah a cangmi kong he aa tlaiin ṭha tein hngalhthiam awkah Jehovah sinah bawmhnak hal, mah nih na tonmi zuamcawhnak kong he aa tlaiin zeitindah lehrulh ding a si ti kha hngalh awkah aan bawmh lai.

16. Paul cungah zeidah a rak cang?

¹⁶ (2) Mitthlam cuanter. Paul dirhmun ah ka um tiah na mitthlam ah cuanter. Anih cu Rom ah thong a tla. Hlan zongah thong a rak tla bal ko nain atu tan cu thah ka si lai tiah a rak ruah. A hawile cheukhat nih an rak zamtak i pumsa lei zongin a tha a rak ba tuk.—2 Tim. 1:15.

17. Paul nih zeitindah a rak lehrulh khawh?

¹⁷ Paul nih a dang thimnak rak tuah ning law tlaihkhihnak ka tong hnga lo tiah hlanlio kong kha a ruah khawh men. Asia ah amah a rak zamtakmi pa hna cungah a thin a hung kho i a hawile cung zongah zumhnak ngeih ti loin a um kho. Asinain Paul nih cutin a rak tuah lo. Paul cu zeicah zumhnak le ruahchannak a rak ngeih khawh peng?

18. A tonmi harnak kha Paul nih zeitindah a rak lehrulh?

¹⁸ (3) Ṭha tein ruah. Mah biahalnak hi phi, “Paul nih amahle amah kha zeitindah aa bawmh?” Paul nih a rauhhlan ah ka thi cang lai ti kha a hngalh ko nain a biapi bikmi thil a simi Jehovah thangṭhatnak pek kha a rak philh lo. Midang thazaang pek khawh ning kong kha a rak ruah peng. Cun hmaan tein thla a camnak thawngin Jehovah kha aa bochan. (2 Tim. 1:3) Amah a zamtakmi hna kong kha a ruat zungzal lo. Mah canah dawtnak a ngeimi a hawile nih an bawmh caah aa lawmh tuknak kong tu kha a rak chim. Mah lengah Paul nih Baibal kha a hlathlai peng. (2 Tim. 3:16, 17; 4:13) A biapi bikmi cu Jehovah le Jesuh nih an ka dawt ti a zumhmi kha a si. Annih nih cun an ka kaltak bal lo i zumhfek tein rian a ṭuan caah thluachuah an ka pek lai ti kha a zumh.

19. Jehovah nih Paul kha zeitindah a rak bawmh?

¹⁹ Jehovah nih Paul kha Khrihfa pakhat na si caah hremnak na tong lai tiah ralrin a pek. (Lam. 21:11-13) Jehovah nih Paul kha zeitindah a rak bawmh? A thlacamnak a leh i thazaang a peknak thawngin a rak bawmh. (2 Tim. 4:17) Paul nih fakpi in rian kaa zuam caah thluachuah ka hmu lai ti kha a zumh. Jehovah nih Paul kha zumhfekmi a hawile hmangin bawmhnak a rak pek.

20. Rom 8:38, 39 kha i cinken buin Paul kha zeitindah kan i zohchunh khawh?

²⁰ (4) Mah ningin zulh. Nangmah le nangmah ‘Paul kha zeitindah kaa zohcunh khawh?’ tiah i hal. Paul bantukin kan zumhnak ruangah hremnak kan tong lai tiah kan i ruahchan awk a si. (Mar. 10:29, 30) Harnak lakah zumhfek tein kan um peng khawh nakhnga Jehovah sinah thlacam le hmaan tein Baibal hlathlai peng a hau. Kan tuah khawhmi lakah a biapi bikmi pakhat cu Jehovah thangṭhatnak pek a si ti kha kan i cinken zungzal awk a si. Jehovah nih a kan hlaw bal lai lo i a kan dawtnak zong ahohmanh nih an hrawk kho bal lai lo ti kha kan zumh khawh.—Rom 8:38, 39 rel; Heb. 13:5, 6.

21. Aya le Hector kha an tonmi zuamcawnhnak tei awkah zeinihdah a bawmh hna?

²¹ Zei bantuk thil sining kan ton hmanhah Baibal ah an kong ṭialmi hna sinin thazaang kan hmu kho. Tahchunhnak ah, Japan ah hmaikal a ṭuanmi Aya nih Jonah tuanbia nih zapi lak phungchimnak i tel ka ṭihmi kha tei khawh awkah a ka bawmh tiah a ti. A nu le a pa Jehovah a bia lomi, Indonesia ah a ummi mino Hector nih Jehovah kong hlathlai awk le a rian ṭuan awkah Ruth kong nih a ka forh tiah a ti.

22. Baibal drama asiloah “An Zumhnak Kha I Zohchunh” timi aa tlaimi capar in zeitindah ṭhathnemhnak na hmuh khawh?

²² Thazaang aan pe khomi Baibal tuanbia kong kha khoika ah dah na hmuh khawh? Video, aw lawng drama le “An Zumhnak Kha I Zohchunh” timi aa tlaimi capar nih Baibal tuanbia hna cu a um taktakmi an si ti kha hngalh awkah aan bawmh lai. * Ṭha tein timhtuahmi a kong hna na zoh hlan, na ngaih hlan asiloah na rel hlanah na zulh khawhmi a biapimi a kong hna hmuh awkah Jehovah sinah bawmhnak hal. An dirhmun ah ka um tiah na mitthlam ah cuanter. Cun mah zumhfekmi Jehovah salle nih an tuahmi kong le an harnak tei khawh awkah Pathian nih zeitindah a bawmh hna timi kong kha ṭha tein ruat. Cun mah ningin zulh awkah i zuam. Jehovah nih aan pekmi bawmhnak caah i lawm. Cun midang pawl thazaang pek awk le bawmh awkah caan ṭha na kawlnak thawngin naa lawmhnak kha langhter.

23. Isaiah 41:10, 13 ningin Jehovah nih zeidah a kan kamh?

²³ Satan ukmi hi vawlei i kan nun caah kan nunnak cu a har kho men. Cucaah a caan ah zeidah kan tuah lai ti kha kan hngal men lai lo. (2 Tim. 3:1) Asinain mah kong he aa tlaiin ṭih a hau lo. Jehovah nih kan tonmi harnak kha a hngalh. Bawmhnak kan herh tikah kaan bawmh hna lai tiah Pathian nih bia a kan kamh. (Isaiah 41:10, 13 rel.) Cucaah Jehovah nih a kan bawmh lai i kan tonmi buaibainak vialte inkhawh awkah Baibal in a herhmi thazaang a kan pek lai ti kha kan zumh khawh.