Cheukhat unau pawl nih tuchan i sehlei fimthiamnak thilri hna kha an chungkhar mi le a dang unau pawl he pehtlaihnak caah an hman. Asinain nutling, patling a simi Khrihfa hna nih cun mah ruahnak cheuhnak hi an i cinken lai: “Mifim nih cun harnak a rat kha a hmuh tikah hrial khawh aa zuam, sihmanhsehlaw mihrut nih cun a pahchih thluahmah ko i a hnuah aa ngaihchih.”—Ptb. 27:12.

Jehovah nih kilven a kan duh ti kha kan hngalh. Cucaah ṭhennak a chuahtermi, buchung in chuahmi asiloah a hmaan lomi ruahnak a hlorhmi hna he i hawikomh kha kan duh lo. (Rom 16:17; 1 Kor. 5:11; 2 Johan 10, 11) Khrihfabu ah cu bantuk mi hna he aa kommi mi cheukhat nih Baibal nawlbia kha an zul men lai lo. (2 Tim. 2:20, 21) Hawikom kan i thim hna tikah mah kha kan i cinken peng ding a si. Asinain cakuatnak app kan hman tikah hawikom ṭha ralring tein i thim cu a har kho men.

Mi tampi aa telmi group cakuatnak kan hman tikah a ṭhami hawikom i thimnak kong he aa tlaiin i ralrin cu a hleiin a biapimi a si. Cheukhat Khrihfa hna nih mi tampi aa telmi group cakuatnak an hman tikah a ṭha lomi thil a chuak. Asinain unaunu asiloah unaupa pakhat nih minung a za leng asiloah a thong lengin aa telmi group cakuatnak a hman ahcun zeitindah aa ralrin khawh? An zumhnak a feh zong feh lo zongah mah group ah aa telmi hna dihlak ahodah an si taktak timi kong hngalh cu a si kho lomi a si. Salm 26:4 nih hitin a ti: “Hlen hmangmi kha ka kom hna lo i mi hrokhrol zong kha ka kom hna lo.” Mah nih kan hngalhmi hna sin lawngah cakuat cu fim a si ti kha a langhter.

Cakuatnak group cu mi tlawmte lawng an si hmanhah Khrihfa pakhat nih cun a caan le hngalh a duhmi kong kha ṭha tein a thleidan thiam a hau. An i chawnhmi kong asiloah mah caah a caan zei can an hman hmanhah an cakuat pawl kha leh duhnak lungput kan ngeih awk a si lo. Paul nih Timote kha ‘mi congoih a thiam i a kenkip ah aa vaa sawhmi’ pakhat cio kong he aa tlaiin ralrin a pek. (1 Tim. 5:13) Tuchan zongah mah electonic thilri kha cu bantuk lam in hman khawh a si ve.

Nutling, patling a simi Jehovah Tehte pakhat nih cun unau pawl sualphawtnak bia kha a ngai lai lo asiloah a chim lai lo, cun a dang Jehovah Tehte hna kong he aa tlaimi an biathli zong kha a phuang lai lo. (Salm 15:3; Ptb. 20:19) Cun a hleihluat tuk in chimmi asiloah a dik lomi thawngpang pawl zong kha a chim lai lo i a ngai lai lo. (Efe. 4:25) JW.ORG website le JW Broadcasting^® ah zumh khawh a simi thawngpang le a ṭha tukmi Baibal hrambunhmi kong hna tampi kan ngei.

Cheukhat Jehovah Tehte hna nih electornic cakuatnak kha thil zuarnak, cawknak, thanhlaar tuahnak le rian kawlnak caah an hman. Annih nih Jehovah biaknak caah si loin chawlehnak ca lawng ah an hman. “Tangka hi duh tuk hlah u” timi ningin a zulmi Khrihfa hna nih cun unau pawl hmangin zeitikhmanh ah chawlehnak an tuah lai lo.—Heb. 13:5.

Unau pawl an herhmi tangka kawlnak ca asiloah harnak a tongmi hna bawmhnak caah cakuatnak app hmannak kong he aa tlaiin tah zeitin? Unau pawl cungah dawtnak le siaherhnak kan ngeih caah bawmh le thazaang pek a herhmi unau pawl kha kan bawmh tawn hna. (Jeim 2:15, 16) Asinain mi tampi aa telmi group cakuatnak hmangin cutin a tuahmi hna nih zung ṭengnge asiloah Khrihfabu nih harnak a tongmi unau pawl bawmhnak caah an timhtuahmi rian kha hnahnawhnak an pek men lai. (1 Tim. 5:3, 4, 9, 10, 16) Kan dihlak in midang nih unau pawl zohkhenh awkah a hleiin thimmi kan si tiah kan ruat hna seh ti kan duh lo.

Pathian thang a ṭhattermi thil kha tuah kan duh. (1 Kor. 10:31) Cucaah cakuatnak app asiloah a dang sehlei fimthiamnak thilri ka hmang lai maw, hmang lai lo timi kong he aa tlaiin biakhiahnak na tuah tikah a chuak khomi ṭih a nungmi thil kong kha ruat law i ralring.