1. Matthai 24:9 ningin vawlei nih a kan huat tikah zeicah kan khuaruah a har awk a si lo?

JEHOVAH nih midang dawt dingin le dawtmi si dingin a kan ser. Cucaah midang nih an kan huat tikah kan i nuam lo i ṭihnak hmanh kan ngei kho. Tahchunhnak ah, Europe ah a ummi unaunu Georgina nih hitin a ti: “Kum 14 ka si lioin Jehovah ka biak caah ka nu nih a ka huat tuk. Ka ngaih a chia i ka li a leng tuk, cucaah miṭha pakhat ka si lo ti tiang hmanh in ka hun ruah.” * Unaupa Danylo nih hitin a ti: “Jehovah Tehte ka si caah ralkap pawl nih an ka tuk, an ka nihsawh i an ka tlerhkhonh caah ka thin a phang i ka ning zong a zak.” Mi nih an kan huat tikah kan ngaih a chia ko lai nain mah cu khuaruahhar awk a si lo. Jesuh nih an in huat hna lai tiah a chimchung.—Matthai 24:9 rel.

2-3. Jesuh hnu a zulmi hna cu zeicah huat an si?

² Vawlei nih Jesuh hnu a zulmi kha a huat hna. Zeicah? Jesuh bantukin kannih cu “vawlei ta” kan si lo caah a si. (Johan 15:17-19) Cucaah minung cozah kha kan upat ko hna nain anmah biak asiloah anmah aiawhtu a simi hmelchunhnak hna biak kha kan duh lo. Jehovah lawng kha kan biak. Pathian cu minung cungah uk khawhnak nawl a ngeimi a si ti kha kan cohlan ko nain Satan le a “tefa” nih cun an cohlang lo. (Gen. 3:1-5, Gen. 3:15, NW) Pathian Pennak lawng nih minung buaibainak a tawnghtham khawh i cu Pennak nih a rauhhlan ah ralchanhtu vialte kha a hrawh cang hna lai timi kong kha kan chim. (Dan. 2:44; Biat. 19:19-21) Mah thawngpang cu aa  toidormi hna caah cun thawngṭha a si nain miṭhalo caah cun thawngpang chia a si.—Salm 37:10, 11.

³ Pathian i a dingmi a phunglam ningin kan nun ca zongah an kan huat. A hmaan, hmaan lo kong he aa tlaiin Pathian chimmi le hi vawlei mi hna nih an chimmi cu aa dang tuk. Tahchunhnak ah, Pathian nih a hrawhmi Sodom le Gomorrah khuami hna batukin atu ah mi tampi nih nupa sualnak tuah kha zei ah an rel ti lo. (Judas 7) Cu bantuk kong he aa tlaiin Baibal phunglam kha kan zulh caah mi tampi nih an kan nihsawh i an kan serhsat.—1 Pet. 4:3, 4.

4. Mi nih an kan huat tikah zei sining nih dah thazaang a kan ngeihter?

⁴ Mi nih an kan huat i an kan nihsawh tikah inkhawhnak ngeih awkah zeinihdah a kan bawmh khawh? A herhmi zumhnak ngeih awkah Jehovah nih a kan bawmh lai. ‘Mei bantuk a simi thal in kah kan si tikah’ phaw bantuk a simi kan zumhnak nih a hmih khawh. (Efe. 6:16) Asinain zumhnak ngeih lawngin a za lo. Dawtnak zong kan ngeih a hau. Zeicah? Dawtnak cu “a thin a tawi lo” caah a si. Dawtnak nih a inkhawh lomi zeihmanh a um lo. (1 Kor. 13:4-7, 13) Jehovah kan dawtnak, unau pawl kan dawt hnanak le kan ral an si hmanhah kan dawt hnanak nih huatnak inkhawh awkah a kan bawmh ning kong kha zohhmanh hna u sih.

5. Jesuh nih a Pa a dawt caah zeidah a tuah khawh?

⁵ A ral pawl nih thah dingin an tlaih lai zan ah Jesuh nih a zultu pawl kha hitin a ti hna: “Ka Pa ka dawt [caah] . . . ka Pa nih a ka fial bantukin ka tuah dih.” (Johan 14:31) Jesuh nih Jehovah kha a dawt caah harnak vialte kha a inkhawh. Kannih zong Jehovah kan dawtnak nih cutin tuah ve awkah a kan bawmh khawh.

6. Rom 5:3-5 ningin vawlei mi hna huatnak kong he aa tlaiin Jehovah salle nih zeitindah an ruah?

⁶ Pathian an dawtnak nih Jehovah salle kha hremnak inkhawh awkah a bawmh zungzal hna. Tahchunhnak ah, lamkaltu pawl kha Judah i a sangmi biaceihnak zung nih phungchim ti lo awkah nawl an pek hna tikah Pathian an dawtnak nih ‘minung nakin Pathian nawl ngaih deuh’ awkah a rak forh hna. (Lam. 5:29; 1 Johan 5:3) Cu bantuk a fekmi Pathian an dawtnak nih unau pawl kha cozah nawlngeitu pawl nih an hrem hna tikah zumhfek tein um awk zongah a bawmh hna. Cucaah vawlei nih an kan huat tikah kan lung a dong lo i kan i nuam.—Lam. 5:41; Rom 5:3-5 rel.

7. Kan chungkharmi pawl nih an kan ralchanh tikah zeitindah kan lehrulh hna awk a si?

⁷ Kan chungkhar mi pawl nih an kan ralchanh tikah mah cu a hleiin in awkah a har. Jehovah kong cawn kan duh ti kha an hun hngalh tikah kan chungkhar mi cheukhat nih a ping ah an kal cang tiah an kan ruah men lai. Mi cheukhat nih cun an hrut cang tiah an kan ruah men lai. (Marka 3:21 he tahchunh.) Mah tikah a ral hmanh an kan ralchanh men lai. Mah cu khuaruahhar awk a si lo. Jesuh nih hitin a ti: “Nan ral ṭhalo bik hna cu nanmah innchungkhar chungmi lila an si lai.” (Matt. 10:36) Kan chungkharmi pawl nih zeitin in an kan hmuh hmanhah kan hua hna lo ti cu a fiang ko. Mah canah Jehovah kha kan dawt chin caah mi pawl zong kha kan dawt hna. (Matt. 22:37-39) Asinain mi pawl an i nuamh khawh nakhnga Baibal phunglam le nawlbia hna kha zulh loin kan um bal lo.

8-9. Ralchanhnak a tong ko nain zumhfek tein um peng awkah unaunu pakhat kha zeinihdah a bawmh?

⁸ A hmasa ah langhtermi Georgina cu a nu nih a ralchanh ko nain zumhfek tein a um  peng. Georgina nih hitin a ti: “Ka nu he Jehovah Tehte Hna he Baibal kan hun hlathlaiṭi. Asinain thlaruk a rauh hnuah, pumh ka duh tikah ka nu nih a hun ka ralchanh. Zumhpialmi hna he pehtlaihnnak a ngeih caah a si ti kha ka hngalh. Cucaah bia kan i ruah fatin an zumhnak cu a hmaan lomi a si tiah a ka ti lengmang. A ka nihsawh, ka sam in a ka hnuh, ka hngawng a ka dih i ka cauk pawl kha a ka hlonhpiak dih. Kum 15 ka si ah tipil ka ing. Jehovah ka biakmi kha ngolter a ka duh caah ka nu nih sualnak a tuahmi le ritnak siivai a hmangmi kumhra fai pawl an umnak inn ah a ka chiah. Nangmah aan dawtu le aan zohkhenhtu mi pakhatkhat nih aan ralchanh tikah mah cu a hleiin in awkah a har tukmi a si.”

⁹ Georgina nih zeitindah a tawnghtham? Hitin a ti: “Ka nu nih a ka ralchanh chungah Baibal kha a uk ningin ka rel dih. Atu cu biatak ka hmuh cang ti kha ka zumh i Jehovah he kan i naih deuh tiah ka ruah. Atu le atu thla ka cam i ka thlacammi kha a ka theihpiak. Mah inn ka um lioah unaunu pakhat nih a inn ah a ka auh i Baibal kan cawngṭi. Mah caan chungah kaa pum i unau pawl sinin thazaang ka rak hmu. Annih nih an chungkhar bantukin an ka hmuh. Aho an si hmanhah an kan ralchanhtu pawl nakin Jehovah cu a ṭhawng deuh ti kha fiang tein ka hngalh.”

10. Kan Pathian Jehovah nih zeidah a tuah zungzal lai tiah kan zumh khawh?

¹⁰ Lamkaltu Paul nih “Bawipa Khrih Jesuh thawngin kan ta a simi Pathian dawtnak he a kan ṭhen khotu ding” zeihmanh a um lo tiah a ti. (Rom 8:38, 39) Caankhat chung cu sifah harnak kan tong men ko lai nain Jehovah cu kanmah hnemh awk le thazaang pek awkah kan pawngah a um zungzal lai. Georgina hmuhtonnak in Jehovah nih Khrihfabu unau pawl hmang zongin a kan bawmh ti kha kan hngalh khawh.

11. Johan 15:12, 13 ah Jesuh chimmi dawtnak nih a zultu pawl kha zeitindah a bawmh hna? Tahchunhnak pe.

¹¹ Jesuh nih a thih lai zan ah a zultu pawl kha pakhat le pakhat i daw u tiah a ti hna. (Johan 15:12, 13 rel.) Mah zawnruat lo dawtnak nih vawlei mi hna huatnak inkhawh awk le lungrual tein um awkah a bawmh hna lai ti kha a hngalh. Thesalonika Khrihfabu hna kong kha ruathmanh. Khrihfabu dirh a si tlawmpal ah unau pawl cu hrem an rak si. Asinain unau  pawl cu zumhfek tein inkhawhnak le dawtnak langhternak ah zohchunhawk ṭha an si. (1 Thes. 1:3, 6, 7) Paul nih dawtnak langhter peng awk le “cu nak tam deuh” hmanhin langhter awkah tha a rak pek hna. (1 Thes. 4:9, 10) Unau pawl dawtnak nih a lung a dongmi hna hnemh awk le a thazaang a dermi hna bawmh awkah a forh hna. (1 Thes. 5:14) Paul nih a luancia kumkhat lioah a rak ṭialmi a pahnihnak a cakuat chung i lamhruainak kha an rak zulh. Cucaah Paul nih hitin a ti khawh hna: “Pakhat le pakhat nan i dawtnak le midang nan dawt hnanak kha a ngan chinchin.” (2 Thes. 1:3-5) An dawtnak nih a harmi thil le hremnak an tonmi kha inkhawh awkah a rak bawmh hna.

12. Raldohnak a um lioah ram ramkhat i unau pawl nih pakhat le pakhat cungah zeitindah dawtnak an rak langhter?

¹² A hmasa ah langhtermi Danylo le a nupi hmuhtonnak kong kha ruathmanh. An khua ah raldohnak a um lioah an i pum kho peng, an si khawh chungin phungchim an kal kho i unau pawl kha an ngeihmi rawl zong an pek khawh hna. Nikhat cu meithal aa putmi ralkap pawl kha unaupa Danylo inn ah an ra. Danylo nih hitin a ti: “Ka zumhnak hlawt awkah an ka fial. Ka al hna tikah an ka tuk i ka lu ah meithal kah ding bantukin an i umter. Kan inn in an chuah hlanah na nupi tlaihhrem awkah kan ra ṭhan lai tiah an ka tlerhkhonh. Asinain unau pawl nih a rannak in a dang khua ah tlanglawng in an kan kalter. Mah unau pawl dawtnak kha zeitikhmanh ah ka philh bal lai lo. Mah khua thar kan phanh tikah cuka ah a ummi unau pawl nih rawl an kan pek i rian le umnak inn kan hmuh khawh nakhnga an kan bawmh. Cucaah a dang ralzam in a ummi unau pawl caah dornak hmun kan pek khawh hna.” Cu bantuk hmuhtonnak nih Khrihfa dawtnak nih huatnak inkhawh awkah a kan bawmh ti kha a langhter.

13. Mi nih an kan huat hmanhah thiang thlarau nih Jehovah rian kan ṭuannak ah inkhawhnak ngeih awkah zeitindah a kan bawmh?

¹³ Jesuh nih a zultu pawl kha nan ral pawl kha va daw hna u tiah a ti hna. (Matt. 5:44, 45) Cutin tuah cu a fawi maw? A fawi lo. Asinain Pathian thiang thlarau bawmhnak thawngin cutin tuah khawh a si. Thlarau  nih a chuahtermi ziaza hna ah lungsaunak, zaangfahnak, toidornak le mahle mah i uk khawhnak lengah dawtnak zong aa tel. (Gal. 5:22, 23) Mah ziaza hna nih huatnak kha inkhawh awkah a kan bawmh. Ralchanhtu tampi cu zumtu a simi an vale, an nupile, an fale asiloah an innpa hna nih mah ziaza an langhter caah an lungput aa thleng ṭhan. Ralchanhtu tampi cu kan dawt tukmi unau hmanh an hung si. Cucaah Jehovah na biak ruangah aan huatu hna kha dawt awkah naa harh hna ahcun thiang thlarau hmuh awkah thlacam. (Luka 11:13) Pathian nih a ṭha bik in thil a tuah zungzal lai ti kha zum.—Ptb. 3:5-7.

14-15. A vapa nih a ralchanh ko nain dawtnak langhter awkah Yasmeen kha Rom 12:17-21 nih zeitindah a bawmh?

¹⁴ Nichuah Laifang ah a ummi Yasmeen kong hi ruathmanh. Jehovah Tehte pakhat a hung si tikah a vapa nih hlen a si cang tiah a ruah i Pathian a biakmi kha ngolter awkah aa zuam. Cun a nihsawh i biaknak lei hruaitu, an rualchan pawl le eihthiammi kha a tlerhkhonhter hna i chungkhar ṭhencheutertu a si tiah sual puh dingin a fial hna. A vapa nih Khrihfabu pumhnak an tuah lio hmanhah unau pawl kha nihsawh in a au hnawh hna. Yasmeen cu zaangfahnak ngei loin a pehtlaih caah a caan ah a ṭap tawn.

¹⁵ Biakinn ah Yasmeen kha unau pawl nih an hnemh i thazaang an pek. Khrihfa upa pawl nih Rom 12:17-21 kha zulh dingin an forh. (Rel.) Yasmeen nih hitin a ti: “Mah cu a har tuk. Asinain Jehovah sinah bawmhnak ka hal i Baibal chimmi ningin ka si khawh chungin ka zulh. Ka vapa nih coka ah hmunthur a hlonhmi pawl kha ka thianh. A ka nihsawh tikah nem tein ka leh. Cun a zawt tikah ṭha tein ka zohkhenh.”

16-17. Yasmeen kong in zeidah na cawn khawh?

¹⁶ A vapa cungah dawtnak a langhter caah Yasmeen cu thluachuah a hmu. Hitin a ti: “Biatak ka chim peng ti kha a hngalh caah ka vapa nih a hun ka zumh deuh. Biaknak kong kan i ruah tikah upatnak tein a hun ka ngaihpiak i kan inn ah daihnak a um ti kha a hun cohlan. Atu cu Khrihfabu pumhnak ah i pumh dingin tha a ka pek cang. Atu ah ka vapa he a ṭhami pehtlaihnak kan ngei deuh cang i kan chungkhar ah daihnak zong a um cang. Ka vapa nih biatak kha a cohlan lai i keimah he Jehovah a bia te lai tiah kaa ruahchan.”

¹⁷ Dawtnak nih “ruahchannak a ngeihmi le inkhawhnak a ngeihmi cu donghnak an ngei  lo” ti kha Yasmeen kong nih a langhter. (1 Kor. 13:4, 7) Midang cungah dawtnak kan langhter ahcun kan kong le Jehovah kong he aa tlaiin an ruahnak cu aa thleng kho. Mah nih Jehovah lung a lawmhter. Asinain an kan ralchanh peng hmanhah kan i nuam kho ko. Zeitin in dah?

18. An kan huat tikah zeicah kan i lawmh khawh?

¹⁸ Jesuh nih hitin a ti: “An in huat hna . . . tikah i lawm ko u.” (Luka 6:22) Huatmi si cu kan duh lo. Cun kan zumhnak ruang i hrem kan si tik zongah kan i nuam lo. Cu a si ah an kan huat tikah zeicah kan i lawmh khawh? A ruang pathum hi ruathmanh. Pakhatnak, kan inkhawh tikah Pathian mithmai ṭha kan hmu. (1 Pet. 4:13, 14) Pahnihnak, kan zumhnak cu man a ngei deuh i a fek deuh. (1 Pet. 1:7) Pathumnak, a sunglawi tukmi zungzal nunnak zong kan hmu lai.—Rom 2:6, 7.

19. Lamkaltu pawl cu fakpi in an tuk ko hna nain zeicah an rak i lawmh?

¹⁹ A thawhṭhan hnu tlawmpal ah Jesuh nih a rak chim bantukin lamkaltu pawl cu an rak i lawm taktak. Fakpi in an tuk hna i phungchim lo dingin nawl an pek ko hna nain an rak i lawm. Zeicah? “Jesuh min ruangah Pathian nih ningzah in awk nan i tlak tiah a ruah hna caah” a si. (Lam. 5:40-42) An ral pawl huat lai ṭih nakin an Bawipa dawt kha an duh deuh. Cun thawngṭha “an chimh lengmang” hnanak thawngin an dawtnak kha an rak langhter. Tuchan zongah unau tampi cu harnak an tong ko nain zumhfek tein an um zungzal. An rian le amah an dawtmi kha Jehovah nih a philh bal lai lo ti kha an hngalh.—Heb. 6:10.

20. A hnu capar ah zei kong dah kan i ruah hna lai?

²⁰ Hi vawlei a dongh hlan cu vawlei nih cun a kan huat ko lai. (Johan 15:19) Asinain kan ṭih a hau lo. A hnu capar ah Jehovah nih zumhfekmi a salle pawl cu ‘a ṭhawnter hna lai . . . i a huhphenh hna lai’ timi kong kha kan i ruah hna lai. (2 Thes. 3:3) Cucaah Jehovah le unau pawl kha daw zungzal hna u sihlaw kan ral pawl hmanh kha daw hna u sih. Mah ruahnak cheuhnak kha kan zulh ahcun kan lung aa rual lai, kan zumhnak a fek chin lai, Jehovah thang kan ṭhatter lai, cun huatnak nakin dawtnak cu a ṭhawng deuh ti kha kan langhter khawh lai.