1. Jesuh nih a zultu pawl kha him tein chiah awkah Jehovah kha zeicah a hal?

MINUNG pakhat in a nunnak a dih lai zan ah Jesuh nih a zultu pawl ton dingmi zuamcawhnak kong kha a rak ruah. A hawile pawl a dawt hnanak nih Jesuh kha a Pa sinah “mi ṭhalopa sin khan him tein chia ko hna” tiah nawl awkah a rak forh. (Johan 17:14, 15) Jesuh nih vancung ka kir ṭhan hnuah Satan Khuachia nih Jehovah biak a duhmi hna kha a ralchanh peng hna lai ti kha a hngalh. Cucaah Jehovah miphun pawl nih huhphenhnak an herh.

2. Jehovah nih kan thlacamnak a ngaih lai ti kha zeitindah kan zumh khawh?

² Jehovah nih a Fapa Jesuh kha a dawt caah a thlacamnak kha a rak ngaihpiak. Kannih zong Jehovah lunglawmhter awkah kan si khawh chungin kan i zuam ahcun Jehovah nih a kan dawt ve lai i bawmhnak le huhphenhnak hmuh awkah thla kan cam tikah a kan ngaihpiak ve lai. Dawtnak a ngeimi chungkhar Lu a si bantukin Jehovah nih a fale kha a zohkhenh peng hna lai. Mah cu a min he aa pehtlaimi a si caah a si.

3. Tuchan ah Jehovah huhphenhnak kha zeicah kan herh?

³ Hlannak in atu ah Jehovah huhphenhnak kha kan herh chinchin. Satan cu vancung in thlak a si i “a thin a linh in a lin ko.” (Biat. 12:12) Mi cheukhat nih an kan hremmi kha “Pathian rian ṭuan a si” tiah an ruah nakhnga Satan nih aa zuam. (Johan 16:2) Pathian a zum lomi hna nih vawlei mi hna he kan i thleidan caah an kan hremmi a si. Mi nih zeitin in an kan hrem hmanhah kan ṭih lo. Zeicah? Zeicahtiah Baibal nih hitin a ti: “Bawipa cu zumhawktlak a si ko. Aan ṭhawnter hna lai i mi ṭhalopa sin khan aan huhphenh ko hna lai.” (2 Thes. 3:3, NW) Jehovah nih zeitindah a kan huhphenh? A kan huhphenh ning lamhnih kha i ruah hna hmanh u sih.

4. Efesa 6:13-17 ningin huhphenh kan si nakhnga Jehovah nih zeidah a kan pek?

⁴ Jehovah pekmi ralthuam nih Satan dohnak in a kan huhphenh khawh. (Efesa 6:13-17 rel.) Mah thlarau lei ralthuam cu a ṭhawng tuk i hmual a ngei tuk. Asinain mah nih kan huhphenh seh ti kan duh ahcun mah ralthuam kha tling tein kan i hruk peng a hau. Mah ralthuam pakhat cio nih zeidah a aiawh? Mah kong kha kan i ruah hna lai.

5. Biatak taisawm cu zeidah a si, mah taisawm kha zeicah kan i sawmh awk a si?

⁵ Biatak taisawm nih Pathian Bia, Baibal ah kan hmuhmi biatak hna kha a chim duhmi a si. Mah taisawm kha zeicah kan i sawmh awk a si? Zeicahtiah Satan cu “lih vialte pa” a si caah a si. (Johan 8:44) Lih a chimnak cu kum thong tampi a si cang i “vawleicung mi vialte” kha a hlen hna. (Biat. 12:9) Asinain Baibal ah aa telmi biatak nih mah hlennak in a kan huhphenh. Biatak taisawm kha zeitindah kan i sawmh khawh? Jehovah kong biatak kan hlathlainak thawngin, “thlarau le biatak” in kan biaknak thawngin le zei thil paoh dingfel tein kan tuahnak thawngin a si.—Johan 4:24; Efe. 4:25; Heb. 13:18.

6. Dinnak ṭangphaw timi cu zeidah a si, mah ṭangphaw kha zeicah kan i benh awk a si?

⁶ Dinnak ṭangphaw timi nih Jehovah i a dingmi a phunglam kha a aiawh. Zeicah ṭangphaw kha kan i benh awk a si? Ṭangphaw nih ralkap pakhat a lungthin a huhphenh khawh bantukin dinnak ṭangphaw nih a kan huhphenh khawh ve. Cucaah hi vawlei thil ṭha lo nih a kan hrawk kho lo. (Ptb. 4:23) Jehovah nih an ka dawt lai i lungthin dihlak in ka rian an ṭuan lai tiah aa ruahchan. (Matt. 22:36, 37) Cucaah Satan nih vawlei duhmi thil le Jehovah huatmi thil kan tuahnak thawngin Jehovah rian kha lungthin dihlak in kan ṭuan nakhnga lo aa zuam. (Jeim 4:4; 1 Johan 2:15, 16) Cun aa zuamnak a hlawh a tlin lo ahcun Jehovah lung a lawmhter lomi thil kan tuah nakhnga a kan tlerhkhonh lai.

7. Dinnak ṭangphaw kha zeitindah kan i hruk khawh?

⁷ Dinnak ṭangphaw kha a hmaan, hmaan lo kong ah Jehovah phunglam kan cohlannak thawngin le mah phunglam ningin kan nunnak thawngin kan i hruk khawh. (Salm 97:10) Mi cheukhat nih cun Jehovah phunglam cu mi a khengkham tuk tiah an ruah men lai. Kan nunnak ah Baibal phunglam zulh kha kan ngol ahcun a rit tuk tiah a ruah caah raldohnak ah a ṭangphaw aa phoihmi ralkap pakhat bantuk kan si lai. Mah cu zeitlukin dah hruh a si. Asinain Jehovah kha kan dawt ahcun a nawlbia cu “kan caah a har” tukmi a si lai lo i kan nunnak ah khamhtu a si lai.—1 Johan 5:3.

8. Kedan caah daihnak thawngṭha chim thathawhnak kha i denh u timi cu zei sullam dah a si?

⁸ Paul nih kedan caah daihnak thawngṭha chim thathawhnak kha i denh u ti zongin a kan forh. A sullam cu Pennak kong thawngṭha chim awkah timhcia in kan um peng awk a si tinak a si. Midang sinah Baibal kong kan chim tikah kan zumhnak cu a fek chin. Vawleicung pumpi ah a ummi Jehovah miphun hna nih rianṭuannak, sianginn, chawlehnak hmunhma, innkhat hnu innkhat le dawr ah phung an chimmi, cun zumlotu an rualchan sin an len tik le an theihhngalhmi hna he bia an i ruah tikah thawngṭha chimnak caanṭha an kawlmi hmuh cu thazaang petu taktak a si. Ṭihnak lungput kan ngeih ruangah phungchim kha kan ngol ahcun raldohnak ah a kedan aa phoih i a ke fawi tein hma a pu khomi ralkap pakhat bantuk kan si lai. Cun raldohnak ah amahle amah kha aa huhphenh kho lai lo i an bawipa nih nawl a pekmi hna zong kha a zul kho lai lo.

9. Zumhnak phaw kha zeicah kan i ken a herh?

 ⁹ Zumhnak phaw timi nih Jehovah cungah zumhnak kan ngeihmi kha a chim duhmi a si. Jehovah nih a biakam vialte a tlinter dih lai ti kha kan zumh. Mah zumhnak nih ‘mei bantuk a simi thal in kah kan si tikah hmih khawh dingin’ a kan bawmh lai. Zeicah zumhnak phaw kha kan i ken a herh? Mah phaw nih zumhpialmi hna cawnpiaknak in hlen kan si nakhnga lo a kan huhphenh khawh i kan zumhnak ruangah nihsawh kan si tikah lungdongh lo awkah a kan bawmh khawh caah a si. Zumhnak kan ngeih lo ahcun midang nih Jehovah nawlngaih lo dingin an kan hnek tikah al dingin thazaang kan ngei lai lo. Phundang in cun sianginn asiloah rian kan ṭuannak ah kan zumhnak kha fek tein kan i tlaih caan paohah kan phaw kha kan i kenmi a si. (1 Pet. 3:15) Tangka tam deuh a kan hmuhter khomi rian pawl kan al tik paohah Jehovah rian kha a ṭha bik in kan ṭuanmi a si i kan zumhnak nih a kan huhphenhmi zong a si. (Heb. 13:5, 6) Cun ralchanhnak kan tong ko nain Jehovah rian kan ṭuan tik paohah kan zumhnak nih a kan huhphenhmi a si.—1 Thes. 2:2.

10. Khamhnak luchin timi cu zeidah a si, mah kha zeicah kan i chinh awk a si?

¹⁰ Khamhnak luchin timi cu Jehovah nih a  kan pekmi ruahchannak kha a si. Mah cu Pathian nih a duhnak a tuahmi paoh kha thluachuah a pek hna lai i kan thih hmanhah a kan thawhter ṭhan lai timi ruahchannak kha a si. (1 Thes. 5:8; 1 Tim. 4:10; Titas 1:1, 2) Luchin nih ralkap pakhat kha a lu a huhphenh khawh bantukin khamhnak ruahchannak nih kan ruahnak kha a huhphenh khawh ve. Zeiti lam in dah? Mah ruahchannak nih Pathian biakam cungah lungthin a kan pekter peng khawh i buaibainak kan ton tikah lungdongh lo dingin a kan bawmh khawh. Mah luchin kha zeitindah kan i chinh khawh? Pathian ruah ningin ruah peng ve awkah kan i zuamnak thawngin a si. Tahchunhnak ah, kan i ruahchanmi cu a fiang lomi thilri chawhva cungah si loin Pathian cung tu ah aa hngatmi a si.—Salm 26:2; 104:34; 1 Tim. 6:17.

11. Thlarau vainam timi cu zeidah a si, mah kha zeicah kan hman a herh?

¹¹ Thlarau vainam timi cu Pathian Bia, Baibal kha a si. Mah vainam cu hlennak vialte langhter khawhnak, a hmaan lomi cawnpiaknak le a ṭhalomi ziaza hna in mi pawl luatter awkah ṭhawnnak a ngei. (2 Kor. 10:4, 5; 2 Tim. 3:16, 17; Heb. 4:12) Pumpak hlathlainak le Pathian bupi sinin kan hmuhmi cawnpiaknak thawngin mah vainam kha aa tlak ningin hman awkah kan cawn. (2 Tim. 2:15) Jehovah nih ralthuam tling tein a kan pek lengah a ṭhawng tukmi a dang huhphenhnak phun zong a kan pek. Mah cu zeidah a si?

12. Zeidah kan tuah a herh rih, zeicah?

¹² Hmuhtonnak a ngeimi ralkap nih cun amah tein ralkap bu nganpi kha doh in ka tei kho hna lai lo ti kha a hngalh. Cun a dang ralkap pawl sinin bawmhnak ka herh ti zong kha a hngalh. Cu bantukin Satan le a mi pawl kha kanmah lawngin kan tei kho lo, cucaah unau pawl sinin bawmhnak kan herh. Jehovah nih kanmah bawmh awkah vawleicung pumpi ah a ummi ‘zumhnak ah kan unau’ a simi pawl kha a kan pek.—1 Pet. 2:17.

13. Hebru 10:24, 25 ningin pumhnak in zei ṭhathnemhnak dah kan hmuh khawh?

¹³ Bawmhnak kan hmuh khawh ning lamkhat cu kan i pumhnak thawngin a si. (Hebru 10:24, 25 rel.) Kan lung a dongh caan ah pumhnak nih thazaang a kan pek khawh. Unau pawl nih lungtak tein a phi an pekmi in thazaang kan hmu. Baibal ah hrambunh in an chimmi phungchimnak le hmuhsaknak hna nih Jehovah biak peng dingin a kan forh. Pumh hlan le pumh dih hnuah bia kan i ruahmi nih thazaang a kan ngeihter. (1 Thes. 5:14) Mah lengah pumhnak nih midang bawmhnak in lawmhnak hmuh awkah caan ṭha a kan pek. (Lam. 20:35; Rom 1:11, 12) Pumhnak nih a dang lam zongin a kan bawmh. Phungchim rian le cawnpiaknak zongah a thiam deuhmi si awkah a kan bawmh. Tahchunhnak ah, Cawnpiaknak Hriamnam hna kha hmualngei tein hman awkah kan cawn. Cucaah pumhnak caah ṭha tein i timtuah. Pumh lioah ṭha tein ngai. Pumh dih hnuah na hmuhmi cawnpiaknak ningin zul. Cutin na tuahnak thawngin “Khrih Jesuh ralkap zumhawktlak” na hung si lai.—2 Tim. 2:3.

14. Zei bantuk bawmhnak dah kan hmuh rih?

¹⁴ A ṭhawngmi vancungmi nuai tampi sinin bawmhnak zong kan hmu. Vancungmi pakhat nih a tuahmi kong kha ruathmanh. (Isa. 37:36) Cun atu, a ṭhawng tukmi vancungmi hna nih an tuah laimi kong kha ruat. Minung asiloah khuachia nih Jehovah i a ṭhawng tukmi ralkapbu kha an tei kho hna lai lo. Jehovah cu a ṭhawng bikmi a si. Cucaah kan lei ah a ṭan ahcun a kan ralchanhtu pawl cu zeitlukin an tam hmanhah anmah nakin kan ṭhawng deuh  zungzal lai. (Biac. 6:16) Mah cu a hmaanmi a si ti kha kan zumh khawh. Na rianṭuanṭi hawi, na sianginn kaiṭi hawi asiloah zumlotu na rualchan pawl nih an chimmi le an tuahmi ruangah na lung a dongh ahcun mah kong kha ruat peng. Mah dohnak ah nangmah lawng na si lo ti kha i cinken law Jehovah lamhruainak kha zul peng.

15. Isaiah 54:15, 17 ningin Pathian miphun pawl nih phung an chimmi kha ahohmanh nih zeicah an ngolter khawh hna lo?

¹⁵ Satan ukmi vawlei ah mi nih a kan huatnak a ruang tampi a um. Zei bantuk ramkhel lei hmanh kha kan bawm hna lo i raldohnak zongah kan i tel lo. Pathian min kha kan thanh, Pennak lawng nih daihnak a chuahter khawh timi kong kha kan chim i a dingmi a phunglam kha kan zulh. Cun mi sinah hi vawlei uktu cu a ṭha lo tukmi mi hlen hmangmi le mithattu a si timi kong kha kan chim. (Johan 8:44) Cun Satan vawlei cu a rauhhlan ah hrawh a si cang lai timi kong zong kha kan thanh. Asinain Satan le a mi pawl nih phungchim rian kan ṭuanmi kha an kan ngolter kho bal lai lo. Cucaah kan si khawh chungin Jehovah kha kan thangṭhat peng. Satan cu a ṭhawng tukmi a si ko nain vawleicung pumpi i mi pawl sinah Pennak kong a phanh nakhnga lo a kham kho lai lo. Cutin Pennak kong a phanh khawhmi cu Jehovah nih a kan huhphenh caah a si.—Isaiah 54:15, 17 rel.

16. Harnak nganpi chungah Jehovah nih a salle pawl kha zeitindah a khamh hna lai?

¹⁶ Hmailei ah zeidah a cang lai? Harnak nganpi chungah Jehovah nih khuaruahhar a simi lamhnih hmangin a kan khamh lai. Pakhatnak, Pathian nih vawleicung siangpahrang hna kha a hmaan lomi biaknak a simi, a Liannganmi Babilon a hrawhter hna tikah zumhfek tein a ummi a salle pawl kha a khamh hna lai. (Biat. 17:16-18; 18:2, 4) Cun Armageddon ah a tang rihmi Satan vawlei a hrawh tikah a miphun pawl kha a khamh hna lai.—Biat. 7:9, 10; 16:14, 16.

17. Jehovah he naih tein umnak in zeitindah ṭhathnemhnak kan hmuh khawh?

¹⁷ Jehovah he naih tein kan um peng ahcun Satan nih a zungzal in harnak a kan pe kho lai lo. Anih cu zungzal in hrawh a si cang lai. (Rom 16:20) Cucaah ralthuam kha tling tein i hruk zungzal hna u sih. Satan le a vawlei kha nangmah lawng in doh i zuam hna hlah. Unau pawl kha bawm hna. Cun Jehovah lamhruainak kha zul. Cutin na tuah ahcun dawtnak a ngeimi na Pa nih aan ṭhawnter lai i aan huhphenh lai ti kha na zumh khawh lai.—Isa. 41:10.