1-2. Baibal a cawngmi kha tipil in dingin a ṭhancho nakhnga ahote nih dah an bawmh khawh?

FIJI ah a ummi Amy nih hitin a ti: “Baibal hlathlainak in ka hngalhmi kong hna kha ka sunsak tuk. Mah cu biatak a si ti zong ka hngalh. Asinain unau pawl he caan ka hun hmanṭimi nih thlennak tuah dingin le tipil in dingin a ka bawmh.” Amy hmuhtonnak nih mah a biapimi biatak kong hi a kan cawnpiak: Baibal a cawngmi pakhat cu Khrihfabu unau pawl sinin bawmhnak a hmuh tikah tipil in dingin a ṭhangcho.

² Thawngthanhtu pakhat cio nih Khrihfa bu a karh nakhnga an bawmh khawh. (Efe. 4:16) Vanuatu ah a ummi hmaikal unaunu Leilani nih hitin a ti: “Khua mi pakhat cio nih ngakchia pakhat kha a ṭhan nakhnga an bawmh a hau. Zultu siternak kong he aa tlai zongin mah cu a hmaan tiah ka ruah. Mah nih mi pakhat kha Khrihfabu chungah a hnuh i biatak zong a hngalhter.” Cucaah nulepa, rualchan, hawikom le sianginn saya te nih ngakchia pakhat cu upa a hung si nakhnga an bawmh a hau. Ngakchia pakhat kha thazaang an peknak thawngin le a biapimi kong an cawnpiaknak thawngin an bawmh khawh. Cu bantukin unau pawl nih Baibal a cawngmi hna kha tipil in dingin an ṭhancho nakhnga ruahnak an cheuh khawh hna, thazaang an pek khawh hna i an caah zohchunhawk ṭha zong an chiah khawh.—Ptb. 15:22.

3. Ana, Dorin le Leilani chimmi kong in zeidah na cawn khawh?

³ Baibal cawnpiaktu nih a cawnpiakmi kha unau dang nih an bawmh tikah zeicah aa lawmh awk a si? Moldova ah a ummi special hmaikal unaunu Ana nih hitin a chimmi kha i cinken:  “Baibal a cawngmi nih bawmhnak tampi a herh caah Baibal cawnpiaktu nih mah a herhmi dihlak bawmh cu a fawi lo.” Mah ram ah special hmaikal a ṭuanmi Dorin zong nih hitin a ti ve: “Unau dang chimmi kong nih Baibal a cawngmi hna kha an lung a suk tawn hna, cheukhat cu ka ruah bal lomi kong hna an si.” Leilani nih hitin a ti: “Baibal a cawngmi nih unau pawl sinin dawtnak le zohkhenhnak a hmuh tikah mah nih kannih cu Jehovah miphun kan si ti kha a hngalhter.”—Johan 13:35.

4. Hi capar ah zei kong dah kan i ruah hna lai?

⁴ Asinain hitin na ruah men lai: ‘Kei cu cawnpiaktu ka si lo caah Baibal a cawngmi pakhat a ṭhancho nakhnga zeitindah ka bawmh khawh lai?’ Baibal cawnpiaknak ah sawm kan si tik le Baibal a cawngmi aa pumh tikah zeidah kan tuah khawh timi kong kha kan i ruah hna lai. Cun Baibal a cawngmi hna kha tipil in dingin an ṭhancho nakhnga Khrihfa upa pawl nih zeitindah an bawmh khawh hna timi kong zong kan i ruah hna lai.

5. Baibal cawnpiaknak ah sawm na si tikah zeidah na tuah awk a si?

⁵ Baibal cawnpiaknak ah cawnpiaktu cu a cawnpiakmi nih Baibal kong a hngalhthiam nakhnga a bik in rian a ngei. Baibal cawnpiaktu nih Baibal cawnpiaknak ah aan sawm ahcun nangmah le nangmah kha a hawi in naa hmuh awk a si. Na rian cu amah bawmh kha a si. (Pct. 4:9, 10) A hleiin Baibal cawnpiaknak ah bawmtu ṭha si awkah zeidah na tuah khawh?

6. Baibal cawnpiaknak na zulh tikah Phungthlukbia 20:18 ah hmuhmi phunglam kha zeitindah na zulh khawh?

⁶ Baibal cawnpiaknak caah i timtuah. Hmasa bik ah a cawnpiaktu sinah Baibal a cawngmi kong kha tlawmpal in hal. (Phungthlukbia 20:18 rel.) Hitin na hal khawh: “Baibal a cawngmi i a hnulei sining cu zeidah a si? Zei kong dah na cawnpiak lai? Baibal a cawngmi nih na cawnpiakmi kong in zeidah i cawn seh ti na duh? Baibal cawn lioah ka tuah awk, ka tuah lo awk asiloah ka chim dingmi, ka chim lo dingmi hna a um maw? Baibal a cawngmi a ṭhancho nakhnga zeitindah thazaang ka pek khawh?” Cawnpiaktu nih Baibal a cawngmi pumpak kong cu aan chim lai lo ti cu a fiang ko, asinain aan chimhmi kong cu bawmtu a si kho. Missionary unaunu Joy nih amah a zulmi unaunu sinah Baibal a cawngmi kong kha a chimh. Joy nih hitin a ti: “A ka zultu unaunu nih mah ka chimhmi ruangah Baibal ka cawnpiakmi kha bawmh a duhter i cawnpiaknak kan tuah lioah a chim dingmi kong zong kha a hngalhter.”

7. Baibal cawnpiaknak ah sawm na si ahcun zeicah ṭha tein naa timhtuah awk a si?

⁷ Baibal cawnpiaknak ah sawm na si ahcun cawn dingmi kong i timhtuah chung cu a  ṭhami a si. (Ezra 7:10) A hmasa ah langhtermi unaupa Dorin nih hitin a ti: “A ka zultu ka hawi nih cawn dingmi kong caah aa timhtuah chungmi kha ka sunsak tuk. Cun Baibal cawnpiaknak ah hmualngei te zongin aa tel kho.” Mah lengah kan pahnih in ṭha tein kan i timhtuahmi kha Baibal a cawngmi nih a hmuh lai i a caah zohchunhawk ṭha a si lai. Nan i ruah dingmi kong kha ṭha tein naa timhtuah chung khawh lo hmanhah a biapimi a kong pawl kawl awkah a caan pe.

8. Baibal cawnpiaknak ah na thlacamnak hmual a ngeih nakhnga zeitindah na tuah khawh?

⁸ Baibal cawnpiaknak tuah tikah thlacamnak cu a biapi tukmi a si caah thlacam dingin fial na si ahcun na cam dingmi kong kha ruat. Cutin na tuah ahcun na thlacamnak cu hmual a ngei deuh lai. (Salm 141:2) Japan ah a ummi unaunu Hanae nih Baibal an cawnpiak lioah Baibal a cawnpiaktu a hawinu nih thla a campiakmi kha aa cinken rih. Hitin a ti: “Anih cu Jehovah he a ṭhami pehtlaihnak a ngeimi a si tiah ka ruah, cucaah kei zong amah bantuk si ka duh ve. A thlacamnak ah ka min a telhmi nih dawtmi ka si timi ruahnak zong a ka ngeihter.”

9. Jeim 1:19 ningin Baibal cawnpiaknak ah bawmtu ṭha na si khawh nakhnga zeidah na tuah khawh?

⁹ Baibal cawnpiaknak tuah lioah cawnpiaktu kha bawm. Nigeria ah special hmaikal a ṭuanmi Omamuyovbi nih hitin a ti: “Baibal cawnpiaknak ka tuah lioah a ka zultu nih ṭha tein a ngaih. A ṭhami a phi kha a pek, asinain cawnpiaktu cu a tlaitu a si ti kha a hngalh caah bia tampi a chim lo.” Baibal cawnpiaknak tuah lioah zeitikah le zeitindah bawmh ding a si ti kha zeitindah na hngalh khawh? (Ptb. 25:11) Cawnpiaktu le a cawnpiakmi bia an i ruah lioah ṭha tein ngai. (Jeim 1:19 rel.) Mah lawngah bawmh dingin timhcia na si kho lai. Na chim hlanah na ruah hmasa lai ti cu a fiang ko. Tahchunhnak ah, bia tam tuk chim, cawnpiaktu nih a fianter lioah hnahnawhnak pek asiloah a kong dang chim ti bantuk kha na duh lai lo. Asinain tawi tein a phi na pekmi, tahchunhnak na chimmi asiloah biahalnak na tuahmi nih a biapimi kong kha fiang tein theihthiam awkah a bawmh khawh. A caan ah a kong tam tuk ka chim awk a si lo tiah na ruah men lai. Asinain na thangṭhat i a cungah siaherhnak na langhter ahcun Baibal a cawngmi kha ṭhancho deuh awkah na bawmh khawh lai.

10. Na hmuhtonnak nih Baibal a cawngmi kha zeitindah a bawmh khawh?

¹⁰ Na hmuhtonnak kha chim. Aa tlak ahcun Baibal a cawngmi kha biatak na cawn ning le zuamcawhnak na tei ning asiloah Jehovah bawmhnak na hmuh ning kong kha a tawinak in na chimh khawh. (Salm 78:4, 7) Mah cu Baibal a cawngmi nih hngalh a herhmi kong a si kho. Mah nih a zumhnak kha a fehter khawh asiloah tipil in dingin ṭhancho awkah a forh khawh. Cun mah nih a tonmi zuamcawhnak  tei khawh ning kong zong kha a hngalhter khawh. (1 Pet. 5:9) Brazil ah hmaikal a ṭuan liomi Gabriel nih Baibal a cawn lioah ṭhatnak a hmuh ning kong kha aa cinken rih. Hitin a ti: “Unau pawl hmuhtonnak ka theih tikah Jehovah nih kan tonmi zuamcawhnak a hmuh ti kha ka hngalh. Unau pawl nih zuamcawhnak an tei khawh caah kei zong ka tei khawh ve lai.”

11-12. Baibal a cawngmi pakhat aa pumh tikah zeicah lungtho tein kan conglawmh awk a si?

¹¹ Baibal a cawngmi pakhat cu tipil in dingin a ṭhancho nakhnga hmaan tein i pumh peng le mah in ṭhathnemhnak a hmuh a hau. (Heb. 10:24, 25) A hmasa bik aa pumhmi cu cawnpiaktu nih a sawmmi a si men lai. Asinain aa pumh tikah kan dihlak in Biakinn ah aa pumh peng nakhnga tha kan pek khawh. A hleiin zeitindah cutin kan tuah khawh?

¹² Baibal a cawngmi kha ṭha tein conglawmh. (Rom 15:7) Baibal a cawngmi nih pumhnak ah an ka conglawmh timi ruahnak a ngeih ahcun i pumh peng a duh deuh men lai. Lungnuam loin a um nakhnga lo ṭha tein conglawmh law midang he theihhngalhnak tuah. A cawnpiaktu Biakinn a phanh rih lo asiloah rian a ngeih ahcun amah kha bia ruah. A chimmi cungah lungthin pe law a cungah pumpak siaherhnak langhter. Lungtho tein na conglawmhmi nih Baibal a cawngmi kha zeitindah a bawmh khawh? Nai ah tipil a ing i atu ah bu rianṭuantu a simi Dmitrii hmuhtonnak kong kha i cinken. A hmasa bik aa pumh lio kong he aa tlaiin hitin a ti: “Biakinn a leng in ningzak ngaiin ka hngahmi kha unaupa nih a ka hmuh i Biakinn chungah a ka luhpi. Mi tampi nih an ka chawnh caah ka khuaruah a har tuk. Pumh kha ka duh tuk caah nifatin pumhnak um seh ti ka duh. Khoika hmanhah cu bantuk hmuhtonnak cu ka tong bal lo.”

13. Na tuahsernak nih Baibal a cawngmi kha zeitindah a bawmh khawh?

¹³ Zohchunhawk ṭha chia. Na tuahsernak nih Baibal a cawngmi kha biatak ka hmuh cang timi zumhnak ngeih awkah a bawmh khawh. (Matt. 5:16) Moldova ah hmaikal a ṭuanmi Vitalii nih hitin a ti: “Khrihfabu chung i unau pawl an nunning, an ruahnak le an ziaza in ka cawn. Mah nih Jehovah Tehte Hna cu Pathian he a kalṭimi an si ti kha a ka zumhter.”

14. Na nunning nih mi pakhat kha ṭhancho peng awkah zeitindah a bawmh khawh?

¹⁴ Tipil in dingin sining a tlinh nakhnga Baibal a cawngmi nih a cawnmi ningin a zulh a hau. Mah cu a fawi lo. Asinain Baibal phunglam na zulhmi nih ṭhathnemhnak aan pek ning kha a hmuh tikah nangmah i zohchunh kha a duh men lai. (1 Kor. 11:⁠1) A ­hmasa ah langhtermi Hanae hmuhtonnak kong kha ruathmanh. Hitin a ti: “Unau pawl cu ka ­cawnmi ningin an nung. Thazaang pek khawh ning, ngaihthiam khawh ning le dawtnak langhter khawh ning kha ka hun hngalh. Annih nih midang kong kha a ṭhatnak lei in an chim zungzal. Cucaah anmah i zohchunh kha ka duh.”

15. Hmaan tein aa pummi, Baibal a cawngmi pakhat he zeicah hawikom ser a herh ti hngalh awkah Phungthlukbia 27:17 nih zeitindah a kan bawmh?

 ¹⁵ Baibal a cawngmi he hawikomnak ser. Baibal a cawngmi cu hmaan tein aa pumh peng hmanhah a cungah pumpak siaherhnak langhter peng. (Fil. 2:4) A kong hngalh deuh awkah i zuam. A ṭhanchomi na hmuh tikah zeitlukin dah naa lawmh timi kong kha na chimh khawh. Cun Baibal a cawnmi kong, a chungkhar le a rian kong zong kha na hal khawh. Asinain a ning a zahter khomi biahalnak hna kha hal hlah. Cu bantuk biaruahnak nih pakhat le pakhat aan naihter hna lai. Baibal a cawngmi he hawikom nan si ahcun tipil in dingin a ṭhancho nakhnga na bawmh khawh lai. (Phungthlukbia 27:17 rel.) Atu ah hmaanhmaan hmaikal pakhat a simi Hanae nih hmasa bik aa pumh lio kong he aa tlaiin hitin a ti: “Khrihfabu chungah hawikom kaa serh hna tikah i pumh lai kha kaa ngaih tuk, cucaah ka tha a bat hmanhah kaa pum. Ka hawikom thar pawl he kaa nuam tuk i mah nih kan zumhnak aa khat lomi hna he i hawikomhnak kha ngol awkah a ka bawmh. Jehovah le unau pawl he naih deuh in um kha ka duh. Cucaah tipil in dingin bia ka khiah.”

16. Baibal a cawngmi pakhat cu Khrihfabu ah aa nuamh khawh nakhnga bawmh awkah zeidah kan tuah khawh rih?

¹⁶ Thlennak a tuah i a ṭhangcho pengmi Baibal na cawnpiakmi nih Khrihfabu ka ngei timi ruahnak a ngeih nakhnga bawm. Khualdawtnak na langhternak thawngin cutin na tuah khawh. (Heb. 13:2) Moldova ah a ummi Denis nih Baibal a cawn lio kong kha a philh lo i hitin a ti: “Unau pawl nih ka nupi he atu le atu anmah he caan hmanṭi dingin an kan sawm. Jehovah nih a bawmh hna ning kong kha an kan chimh. Mah nih thazaang a kan pek i Jehovah biak kan duh ti le a nuammi hmailei nunnak hmuh kan duh ti kha zumh awkah a kan bawmh.” Baibal a cawngmi cu thawngthanhtu pakhat a hung si tikah phungchim rian ah nangmah he i tel ding zongin na sawm khawh. Brazil ah a ummi unaupa Diego nih hitin a ti: “Unau tampi nih phungchim rian ah anmah he i telṭi dingin an ka sawm. Mah cu an kong hngalh deuh awkah a ṭha bikmi lam a si. Cutin ka tuah tikah thil tampi ka cawn i Jehovah le Jesuh he kaa naih deuh ti zong in ka ruah.”

17. Khrihfa upa hna nih Baibal a cawngmi hna kha zeitindah an bawmh khawh hna?

¹⁷ Baibal a cawngmi hna caah a caan pe. Khrihfa upa hna, dawtnak le siaherhnak nan  langhtermi nih Baibal a cawngmi hna kha tipil in dingin ṭhancho awkah a bawmh khawh hna. Pumhnak ah Baibal a cawngmi hna kha hmaan tein na chawn hna maw? A hleiin a phi an pek tikah an min kha naa cinken ahcun an cungah siaherhnak na ngei ti kha an hngalh lai. Thawngthanhtu pakhat nih Baibal cawnpiaknak a tuah tikah i tel ve dingin a caan na pe kho lai maw? Cutin na tuah ahcun na ruahnak lengin amah kha na bawmh khawh men lai. Nigeria ah a ummi hmaikal unaunu Jackie nih hitin a ti: “Baibal cawnpiaknak ah Khrihfa upa pakhat nih a ka zulh caah ka cawnpiakmi hna cu an khuaruah a har tuk. Baibal ka cawnpiakmi pakhat nih ‘kan pastor pa nih a kan leng bal lo. Mi rum le tangka a pe khomi hna sin lawngah a leng hna’ tiah a ka ti.” Atu ah anih cu aa pum cang.

18. Lamkaltu 20:28 ningin Khrihfa upa pawl nih pek an simi rian kha zeitindah tling tein an ṭuan khawh?

¹⁸ Cawnpiaktu kha cawnpiak law thazaang pe. Khrihfa upa hna, unau pawl nih Baibal cawnpiaknak rian i telin phungchim rian ah hmualngei tein an i tel khawh nakhnga bawmh awkah a biapimi rian nan ngei. (Lamkaltu 20:28 rel.) Baibal cawnpiaknak ah mi pakhat cu nangmah na um ruangah a ning a zah ahcun nangmah nih tlaih dingin hal. A hmasa ah langhtermi Jackie nih hitin a ti: “Khrihfa upa pawl nih Baibal ka cawnpiakmi hna kong he aa tlaiin an ka hal peng. Baibal cawnpiaknak ah zuamcawhnak ka ton tikah bawmtu a simi ruahnak an ka cheuh.” Khrihfa upa hna nih Baibal cawnpiaktu kha thazaang tampi an pek khawh. (1 Thes. 5:11) Jackie nih hitin a ti chap: “Khrihfa upa pawl nih thazaang an ka pekmi le rian kaa zuammi an sunsaknak kong an ka chimhmi kha ka duh. Mah bia nih ni linh lioah tikik hraikhat bantukin hrimhnak a ka pek. An ka thangṭhatmi nih mahle mah zumhnak a ka ngeihter i Baibal cawnpiaknak in lawmhnak hmuh chin awkah a ka bawmh.”—Ptb. 25:25.

19. Kan dihlak in zei bantuk lawmhnak dah kan ngeih khawh?

¹⁹ Atu ah Baibal cawnpiaknak kan ngeih lo hmanhah mi pakhat kha thlarau lei ah a ṭhancho nakhnga kan bawmh khawh ko. Bia tampi chim loin Baibal cawnpiaknak tuah lioah cawnpiaktu a bawm khomi a phi kha ṭha tein kan i timtuah kho. Biakinn i an i pumh tikah hawikom kan si kho i an caah zohchunhawk ṭha kan chiah khawh. Khrihfa upa pawl nih Baibal a cawngmi kha a caan an pek hnanak thawngin le cawnpiaktu kha an cawnpiak hna i an thangṭhat hnanak thawngin thazaang an pek khawh hna. Thil hmete a si hmanhah thil pakhatkhat kan tuah khawh tik le mi pakhat nih Jehovah kha dawt in a biakmi kan hmuh tikah kan i lawm tuk.