Na hnulei sining kong kha na kan chim kho lai maw?

1979 ah United States ah ka chuak. Kum thum ka si ah ka nu le ka pa cu an i ṭhen. Ka nu nih Judah phungphai ningin a ka zohkhenh i yeshivas tiah auhmi Judah sianginn ah a ka kaiter. Kum sarih ka si ah Israel ram ah kumkhat hrawng kan um i kibbutz tiah auhmi Judah miphun sianginn ah ka kai. Mah hnuah ka nu he Mexico ah kan i ṭhial.

Cuka ah Judah pumhnak inn a um lo nain Judah phungphai hna kha ka zulh peng rih. Sabbath Ni ah phazawngdaing ka van, Torah Baibal kha ka rel, siddur tiah auhmi thlacamnak cauk kha ka rel i thla ka cam. Sianginn ah ka khaanhawi pawl kha ka biaknak hi biaknak hrampi a si tiah ka ti tawn hna. Jesuh Khrih phungchimnak le cawnpiaknak kong a bik in a langhtermi Biakam Thar cauk kha cu ka rel bal lo. A tak ti ahcun ka nu nih mah ah aa telmi cawnpiaknak nih a iap sual lai ti kha a phan caah a ka relter duh lo.

Biakam Thar Baibal kha rel dingin zeicah bia na khiah?

Kum 17 hrawng ka si ah sianginn kai ka liim khawh nakhnga United States ah ka kir. Cuka ah Khrihfa ka si tiah aa timi, ka theihhngalhmi pakhat nih Jesuh loin cun ka nunnak cu a tlamtling lo tiah a ka ti.

“Jesuh a zummi hna cu lam a tlaumi an si tiah,” ka leh.

“Biakam Thar Baibal na rel bal maw?” tiah a ka hal.

“Ka rel bal lo,” tiah ka ti.

“Na hngalh lomi kong pakhat he aa tlaiin biachahnak tuah cu hruh a si lo maw?” tiah a ka ti.

A bia nih ka lung a ka suk tuk. Kan hngalh lomi a kong pakhat he aa tlaiin biachahnak tuah cu hruh a si ti kha keimah theng nih ka pom caah a si. Ningzak nawn in a Baibal kha inn ah kaa ṭinpi i Biakam Thar kha ka hun rel.

Na rel tikah zeitindah na um?

Biakam Thar cauk a ṭialtu hna cu Judah mi an si ti ka hngalh tikah ka khuaruah a har tuk. Ka rel deuhdeuh tikah Jesuh kha zaangfahnak le toidornak a ngei i midang bawmh a duhmi, mi cungah a miak a la lomi, Judah mi pakhat a si ti kha ka hun hngalh deuhdeuh. Library ah ka kal i Jesuh kong cauk hna kha ka hlan i ka rel. Asinain zei cauk hmanh nih Jesuh cu Messiah a si ti kha an ka zumhter kho lo. Hmun cheukhat ah Jesuh kha Pathian in a langhter, mah cu ka caah sullam a ngei lo. Mah lengah Jesuh nih aho sin ah dah thla a cam? Amahle mah sinah maw? Cun Baibal nih Pathian kha “zungzal in a nungmi na si” tiah a ti nain Jesuh cu a thi. *

Mah biahalnak hna i a phi kha zeitindah na hmuh?

Biatak timi cu a hnuhmai bia aa khat lai. Mah biatak kha kawl awkah bia ka khiah. Cucaah ka ṭah bu le lungtak tein Pathian sinah thla ka cam. Mah cu thlacamnak cauk hmang loin a voikhatnak thla ka cammi a si. Thla ka cam tlawmpal ah Jehovah Tehte nu pahnih nih ka innka kha an rak kingh. Baibal hlathlainak ah bawmtu a simi cauk pakhat an ka pek. A hnuah mah cauk in Baibal kong kha kan i ruah hna. Mah tikah an zumhnak cu Baibal ah hram aa bunh ti kha ka hung hngalh. Tahchunhnak ah, Jehovah Tehte Hna nih Jesuh kha an cohlan. Asinain Thumkomh pathian cheubang in a si lo. “Pathian Fapa,” * “Pathian nih a sermi vialte hram” * in an cohlan.

Tlawmpal a rauh hnuah Mexico ah ka kir ṭhan. Mah ah Jehovah Tehte Hna he Messiah kong he aa tlaimi chimchungbia hna kha ka hlathlai rih. Chimchungbia mah tluk in a tammi ka hmuh tikah ka khuaruah a har tuk. Asinain ka lung a hring rih ko. ‘Jesuh pakhat lawng hi maw mah chimchungbia hna he aa tlakmi a si? Jesuh nih fimzer ngaiin aa titermi tah a si kho lo maw?’ tiah ka ruah.

Na lunghrinnak cu zeitindah a tlau?

Ahohmanh nih i titer khawh a si lomi chimchungbia hna kha Jehovah Tehte Hna nih an ka hmuhsak. Tahchunhnak ah, profet Mikah nih Messiah cu Judah ram, Bethlehem khua ah a chuak lai tiah kum 700 hlanpi in a rak chimchung. * A chuahnak hmun he aa tlaiin aho nih dah a uk khawh lai? Isaiah nih Messiah cu misual mi hna sinah thah a si ve lai nain mirum mi hna sinah vui a si lai tiah a rak chimchung. * Mah chimchungbia vialte cu Jesuh ah a tling.

A lang bikmi thil pakhat cu Jesuh chuahkehnak cazin hi a si. Baibal nih Messiah cu Siangpahrang David hrinsor a si lai tiah a ti. * Hlanlio Judah mi nih mipi le pumpak in chuahkehnak cazin an ngei. Jesuh cu David hrinsor a si lo ahcun a ral pawl nih zapi theih in an thanh ko lai. Asinain Jesuh cu David hrinsor a si ti kha zeiti lam hmanhin an al kho lo. Mibu hmanh nih “David Fapa” tiah an rak auh. *

Jesuh a thih in kum 37 hnu, AD 70 ah Rom ralkap nih Jerusalem khua an hrawh lioah mah chuahkehnak cazin pawl cu a rawk dih ve. Cucaah chuahkehnak cazin he aa tlak khawh nakhnga Jesuh cu AD 70 hlanah a chuakmi a si lai.

Mah hngalhnak nih zei ṭhatnak dah aan pek?

Deuteronomi 18:18, 19 ah Pathian nih Israel mi lakah Moses bantuk profet a chuak lai tiah a ti. Pathian nih hitin a ti: “ka min in a chim laimi ka bia zei ah a rel lomi paoh cu keimah hrimhrim nih zei caah dah a tuah lonak kong kha ka hal lai.” Baibal kha a uk ningin ṭha tein ka hlathlai dih hnuah Nazareth khuami Jesuh cu mah profet a si ti kha ka hun zumh.