Kan hmailei himnak a tlerhkhonhmi buaibainak hna hi minung nih an tawnghtham khawh lai tiah na ruat maw? Hmualngei tein tawnghtham khawh awkah lenglei hmuhnak lawng si loin buaibainak a chuahnak a ruang kha langhter khawh a hau.

Tahchunhnak ah, Tom cu a zaw i a thi. Zeicah a thih? A thih hlanah a zohkhenhtu siibawi pa nih “a zawtka ah a zawtnak a ruang kawl awkah ahohmanh an lung a chuak lo” tiah a ti. A hmasa i Tom a thloptu siibawi pawl nih fah daihnak sii lawng an rak pek.

Vawlei buaibainak zong cu bantukin tawnghtham awkah an i zuam tiah na ruat maw? Tahchunhnak ah, zaangennak tawnghtham awkah upadi an chuah. Himnak caah camera hna an bunh, palik pawl thazaang kha an chap. Mah lam hna cu ri pakhat tiang hmual a ngei ko nain mah nih zaangennak a chuahnak hrampi kha a tawngtham kho lo. Mah lengah mi pawl i an tuahsernak nih an lungput, an zumhnak le an duhnak hna kha a langhter.

Chawlehnak a zorchuknak Thlanglei American ram pakhat ah a ummi Daniel nih hitin a ti: “A hlan ahcun nunning sawhsawh tein kan nung. Mifir pawl ral kha kan ṭih lo. Asinain atu ahcun a himmi khuapi asiloah khuate pakhat hmanh a um ti lo. Chawlehnak a zorchukmi nih hakkauhnak, midang nunnak le thilri cungah upatnak ngeih lo ti bantuk mi tam deuh i an lungput taktak kha a langhter.”

Nichuah Laifang buainak ruangah a zam i a hnuah Baibal a hlathlaimi Elias nih hitin a ti: “Ka chuahkehnak khua i mino pawl cu an chungkharmi le ramkhellei le biaknaklei thil sining nih ralkap tlak awk le mi ralṭha si awkah i zuam dingin hnek an si. A dang phu hna zong cutin an si ve. Cucaah minung uktu hna kha zumh awkah kaa harh hna.”

Hlanlio fimnak aa telmi cauk pakhat nih hitin a ti:

• “Minung cu a no lio tein a ruahnak cu a ṭha lo.”—Genesis 8:21.

• “Lungthin hi zeizong vialte nakin a zer bik, Aho nih dah minung lungthin hi a hngalh khawh lai?”—Jeremiah 17:9.

• “Lai a nawntertu, nu le pa sualnak a tuahtertu, thil ṭhalo dangdang a tuahtertu, a firtertu, lih a chimtertu . . . ruahnak ṭhalo vialte cu a lungchung in a rak chuakmi an si.”—Matthai 15:19.

Kan lungthin chungah a ummi a ṭhalomi ruahnak thlop khawh ning lam kha mi nih an hmu rih lo. Mah ruahnak cu a ṭha lo chinchin ti kha a hmasa capar kan relnak thawngin kan hngalh khawh. (2 Timote 3:1-5) Tuchan ah a konglam pawl kha tampi hmuh khawh a si cang. Midang he i pehtlaih khawhnak thilri zong a tam tuk cang. A si ahcun vawlei a him nakhnga zeicah an tuah khawh lo? An tuah khawh lomi kha tuah dingin hal an si maw? A si kho lomi kha tuah awkah an i zuam maw?

Mi pawl i a ṭhalomi an ziaza kha thlen khawhnak lam a um hmanhah vawlei a him nakhnga cu an tuah kho lai lo. Zeicah? Minung cu ri kan ngeih caah a si.

A fiangmi biatak cu “minung nih a zulhmi a lam hi amah nih aa thimmi an si lo i . . . a kalnak lam zong hi amah nih aa ser khawhmi an si lo.” (Jeremiah  10:23) Mahle mah i uk dingin sermi kan si lo. Minung cu mahle mah i uk awkah ser kan si lo bantukin tichung le vawlei lenglei ah um ding zongin ser kan si lo.

Mah hi ruathmanh: Mah ningin nung, mah phunglam hna hi zul tiah pakhat le pakhat an i ti tikah mi nih an duh maw? Nau hrawh le thihdan peknak hna hi hitin na hmuh awk a si, fale kha hitin na cawnpiak hna awk a si tiah nawl an i pek tikah tah an duh maw? Mah hna cu mi a ṭhen cheutertu thil cheukhat lawng an si rih. Baibal chimmi cu cohlan awkah a har ko nain aa tlakmi a si. Minung cu mahle mah i uk khawhnak sining kan ngei lo i uknak nawl zong kan ngei lo. A si ahcun bawmhnak khoika in dah kan hmuh khawh?

Aa tlak bikmi a phi cu a kan Sertu sinah bawmhnak hal kha a si. A kan sermi kan si caah mi cheukhat nih an ruah bantukin Pathian nih a kan philh lo. Kan zawn a kan ruah ti kha a hlun tuk cangmi, fimnak aa telmi Baibal cauk ah kan hmuh khawh. Mah Baibal kan hngalhthiam deuh tikah kanmah le kanmah kan i hngalthiam deuh ve. Ngaihchiat awk ngai a simi minung tuanbia kong zong kan hun hngalh khawh. Cucaah German mifim pakhat nih “minung le cozah pawl nih tuanbia in zeihmanh an i cawn lo caah an ziaza zong aa thleng lo” tiah a chimnak a ruang kha kan theihthiam khawh.

Jesuh nih “fimnak cu a hmaan taktak ko ti kha a rak cohlangmi nih an langhter” tiah a ti. (Luka 7:35) Mah fimnak bia kha Isaiah 2:22 zongah hitin kan hmuh khawh: “Minung cu i bochan hna hlah.” Mah ruahnak cheuhnak nih a hmaan lomi le aa tlak lomi kha i ruahchan lo awkah a kan bawmh khawh. Zaangennak in a khatmi chaklei American ah a ummi Kenneth nih hitin a ti: “A ṭha deuhmi thil kan in tuahpiak hna lai tiah ramkhellei rian a ṭuanmi hna nih pakhat hnu pakhat in bia an i kam. Asinain an tuahpiak kho hna lo. Mah nih Baibal chimmi cu a hmaan ti kha a kan hngalhter.”

A hmasa ah langhtermi Daniel nih hitin a ti: “Mi nih ṭha tein a kan uk kho lo ti hi nikhat hnu nikhat ka hun hngalh chin. . . . Bank cauk le pension hna nih hmailei caah aamah a khang kho lo. Mah aamah khannak an zumh ruangah a lung a rawkmi kha ka hmuh bal hna.”

Baibal nih aa tlak lomi kha i ruahchan lo awkah a kan huhphenh khawh. Cu lengah aa tlakmi ruahchannak kong zong Baibal nih a langhter.