Caan saupi kan rak hngahmi Pathian Pennak (Pathian nih a dirhmi vawlei cozah) nih vawlei pumpi ah daihnak le lungrualnak a chuahter cang lai. Salm 72:7 ah bia a kan kamh bantukin ‘[daihnak, NW] a karh’ lai. Asinain Pathian Pennak nih zeitik ah dah a uk lai? Zeitindah a uk lai? Mah in zeitindah ṭhatnak na hmuh khawh?

Pathian Pennak a ra cang lai ti a langhtermi thil sining kong kha Baibal nih a chimchung. Mah thil sining ah ramkhat le ramkhat i dohnak, mangṭam, zawtnak, lihnin le zaangennak ti bantuk “hmelchunhnak” hna aa tel.—Matthai 24:3, 7, 12; Luka 21:11; Biathlam 6:2-8.

A dang chimchungbia nih hitin a ti: “Ni hmanung bik kha an phak tikah harnak caan a si lai ti kha philhhlah. Mi cu anmah zawn lawng aa ruatmi, a hak a kaumi, . . . an si lai, an nu le an pa kha an zomhtaih hna lai i an nawl an ngai duh hna lai lo; lawmh a hngal lomi le biaknak zeihmanh i a rel lomi an si lai; zaangfahnak an ngei lai lo, mi zawnruahnak an ngei lai lo, mi thangchiat duhmi an si lai, ruru-hranghrang in khua a sami an si lai i ṭih a nungmi an si lai; ṭhatnak kha an huat lai . . . porhlawtnak in an khat lai; Pathian nakin nuamhnak kha an duh deuh lai.” (2 Timote 3:1-4) A hlanah mah bantuk ziaza a langhtermi cu tlawmpal lawng an rak si. Asinain atu cu hmun kip ah hmuh an si cang.

1914 in mah chimchungmi bia hna cu a hung tling. Mah kum a dih hnuah vawlei aa thlen ning kong kha tuanbialei mifim, ramkhellei hruaitu le caṭialtu hna nih an langhter. Tahchunhnak ah, Denmark i tuanbialei mifim Peter Munch nih hitin a ti: “1914 ah a cangmi ralpi cu minung tuanbia a thlentertu bik a si. A nuam i a ṭhangchomi chan in, . . . leiser ral, thinphan thlalaunak le huatnak in a khat i hmunkip ah himnak a um lomi chan ah kan hun phan.”

A ṭhatnaklei in chim ahcun mah thil sining hna cu thlichia a hran dih in thlizil a hun hran lai bantuk a si. Mah thil hna nih vawlei pumpi cu Pathian Pennak nih a uk cang lai ti kha a langhter. Donghnak caan hmelchunhnak kong he aa tlaiin Jesuh nih hitin a chim chap: “Cun miphun vialte hna ca i tehte si awkah vancung Pennak kong thawngṭha hi khuazakip ah chim a si lai—cun cu hnu lawngah cun donghnak cu a si lai.”—Matthai 24:14.

Mah thawngṭha cu Jehovah Tehte Hna nih a bik in an chimmi a si. A bik in an chuahmi journal kha Vennak Innsang Jehovah Pennak Thanhnak tiah an auh. Mah ah vawlei le minung caah Pathian Pennak nih a tuah dingmi khuaruahhar thil kong kha a langhter.

A phi ah a biapimi mah a kong pali hi aa tel:

1. Pathian Pennak ah atu i ramkhellei hruaitu pawl hi an i tel lai lo.

2. Ramkhellei hruaitu hna nih an nawlngeihnak sungh kha an duh lai lo i Pathian Pennak kha hrut ngaiin an ralchanh lai.—Salm 2:2-9.

3. A minunghawi a namnehmi ram hna kha Pathian Pennak nih a hrawh cang hna lai. (Daniel 2:44; Biathlam 19:17-21) Mah hmanung bik raldohnak cu Armageddon tiah auh a si.—Biathlam 16:14, 16.

4. Pathian Pennak a cohlangmi hna cu Armageddon in an luat lai i daihnak in a khatmi vawlei thar ah an nung lai. Annih cu Baibal nih nuai tampi a simi “mibu nganpi” tiah a auh hna.—Biathlam 7:9, 10, 13, 14.

Pathian Pennak rammi si awkah a hmasa bik kehlan cu fimcawnnak a si. Pathian sinah Jesuh nih hitin thla a cam: “Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si.”—Johan 17:3.

Mi nih Pathian kha a um taktakmi pakhat in an hun hngalh tikah lam tampi in ṭhatnak an hmu. Lam pahnih in zohhmanh u sih: Pakhatnak, Pathian an zumhnak cu a hung fek. Langhtertu thil cungah aa hngatmi mah zumhnak nih Pathian Pennak cu a um taktakmi a si i a uknak a nai cang ti kha a zumhter hna. (Hebru 11:1) Pahnihnak, Pathian le an minunghawi kha an hun dawt deuh hna. Pathian an dawtnak nih lungtho tein a nawlngaih awkah a forh hna. Cun minunghawi an dawtnak nih Sui Nawlbia tiah auhmi Jesuh bia kha zulh awkah a forh hna. Hitin a ti: “Ka caah tuah hna seh ti na duhmi kha midang caah va tuah.”—Luka 6:31.

Dawtnak a ngeimi pa bantukin a kan Sertu nih kan caah a ṭha bikmi kha a duh. Baibal nih “nunnak taktak” tiah a auhmi kha hmuhter a kan duh. (1 Timote 6:19) Atu kan nunnak cu “nunnak taktak” a si lo. Mi nuai tampi cu nunnak caah fakpi in rian an ṭuan. “Nunnak taktak” kong kha kan hngalhthiam nakhnga Pathian Pennak nih a tuah dingmi khuaruahhar thil cheukhat kha zohhmanh u sih.