Baibal ah hram aa bunhmi fimnak ah nunnak a ṭhanchoter khomi khuaruahhar ṭhawnnak a um. Ricardo le Andres kong hi ruathmanh.

RICARDO: Fawi tein thil ka cawn khawh lio kum 15 ka si ah misual phu pakhat ah ka rak lut. Ka hawikom thar hna cu ka cungah huham an ngei tuk. Cucaah thong ah kumhra tlak dingin hmuitinh ka chiah. Mah cu hruh taktak a si tiah nan ruah ko lai. Asinain ka pawngkammi hna nih thong in a chuakmi kha an upat hna i an ṭihzah hna. Cucaah kei zong anmah bantuk si ka duh ve.

Misual phu i ka um lioah ritnak sii, nupa sualnak le zaangennak i telin sualnak a phunphun ka rak tuah. Zankhat cu kahdohnak ah kaa tel. Ka thi lai tiah ka ruah nain ka rak luat. Mah hnuah ka nunnak le ka hmuitinh kong kha ṭha tein ka hun ruah i thlennak tuah dingin bia ka khiah. Asinain thlennak cu zeitindah ka tuah lai? Bawmhnak khoika in dah ka hmuh khawh lai?

Ka chungkhat tam deuh cu an nunnak ah an i nuam lo. An nunnak cu buaibainak in a khat. Asinain ka pu pakhat i a chungkhar cu an i thleidang. Annih cu miṭha an si i Baibal phunglam ningin an nung ti kha ka hngalh. A tak ti ahcun Pathian min cu Jehovah a si ti kha anmah nih an ka chimh caah ka hngalhmi a si. Mah kahdohnak a dih tlawmpal ah Jehovah kha a min in ka auh i bawmhnak hmuh awkah thla ka cam. A thaizing ah Jehovah Tehte pakhat nih ka kutka a rak kingh tikah ka khuaruah a har tuk. Anih cu Baibal a ka cawnpiaktu a hung si.

Caan tlawmpal a rauh ah zuamcawhnak nganpi ka tong. Ka hawikom hlun pawl nih an sinah rat dingin atu le atu phone an ka chawnh. Mah cu a fawi lo nain ka rak al khawh hna. Baibal hlathlai peng dingin biakhiahnak ka tuah i cutin ka tuah caah kaa nuam tuk. Ka nunnak a ṭhangcho i lawmhnak taktak zong ka hmu.

Misual phu pakhat in upatnak hmuh awkah thong kumhra tlak ka duh tiah Pathian sinah thla ka rak cammi kha kaa cinken rih. Atu ahcun keimah na ka bawmh bantukin midang bawmh khawh ve hna awkah caantling rian kha a tlawm bik ah kumhra rak ka ṭuanter ko tiah thla ka cam cang. Pathian nih ka thlacamnak kha a ka leh. Atu ah caantling rian ka ṭuannak cu kum 17 a si cang. Thong cu ka tla bal lo.

Ka hawikom hlun pawl cu thong kum tampi an tla i cheukhat cu an thi cang. Cucaah Jehovah Tehte a simi ka chungkhat pawl cungah kaa lawm tuk. Annih cu midang he i lo loin Baibal phunglam ningin nun an duh. Misual phu chung i ahohmanh nakin annih kha ka upat deuh hna. A hleiin a ṭha bikmi lam in nun awkah a ka cawnpiaktu Pathian cungah kaa lawm tuk.

 ANDRES: Ritnak sii, tangka hlennak, mi thahnak le hlawhhlang rian a ṭuanmi an tamnak pawngkam ah a ṭhangmi ka si. Ka pa cu zu nih a leemmi le ritnak sii a hmangmi a si. Ka nu le ka pa cu atu le atu an i si i an i vel lengmang.

Ka ngakchiat lio tein zu ka ding i ritnak sii ka hmang. Lam cungah ka um, thil ka fir i ka firmi kha ka zuar ṭhan. Ka hun upat tikah ka pa cu keimah he i komh awkah aa zuam. Ritnak sii le upadi nih a awnh lomi thilri hna kha a thli tein zuar awkah a ka cawnpiak. Caan tlawmpal chungah tangka tampi ka hmuh khawh. Nikhat cu palik pawl kan inn ah an ra i an ka tlaih. Mi thah naa tim tiah thong kum nga an ka thlak.

Zingkhat cu Jehovah Tehte hna he Baibal cawn awkah thongtla pawl kan in sawm hna tiah loudspeaker in an aumi thawng kha ka theih. Cacaah kal dingin biakhiahnak ka tuah. Mah ah ka theihmi cu aa tlakmi a si caah Jehovah Tehte Hna he Baibal ka cawng. Baibal kong kha chim sawhsawh lawng si loin Pathian i a sangmi phunglam kong zong kha an ka chimh.

A bikin Baibal ka cawnmi a duh lomi thongtla pawl i tlerhkhonhnak ka ton tikah bawmhnak loin thlennak ka tuah kho lo ti kha ka hun hngalh. Cucaah thazaang le fimnak ngeih awkah thla ka cam i Jehovah nih a ka bawmh. An ka nihsawhmi kha ka inkhawh lengah a dang thongtla pawl zong Baibal kong ka chimh khawh hna.

Thong in chuah caan a phanh tikah chuah ka duh lo. Thonginn ah um rih ka duh. Thonginn ka chuah lioah thongtla tampi nih an kut an ka zaoh. Cheukhat nih “inn ah va ṭin cang, tuukhal pate” ti hmanhin panh tein an ka chawnh.

Pathian nih a ka pekmi fimnak kha rak cohlang hlah ning law ka nunnak cu zeidah a lawh lai ti kha ka ruat ngam lo. Pathian nih a ka dawt ca le ruahchan awk a um lomi in a ka hmuh lo caah kaa lawm tuk. *