Sianginn phu pakhat khual an tlawn lioah siangngakchia pa cheukhat cu siangngakchia pa pakhat nan tlaihhrem tiah sualpuh an si. An dihlak in Canada i a min a thangmi private sianginn ah a kaimi an si. Mah thil a can hnuah Leonard Stern nih Ottawa Citizen thawngzamhnak ah hitin a ti: “A fimmi, ca ṭha tein a cawngmi le a rummi sinak nih mino pawl kha thil ṭhalo tuah lo awkah a kham kho hna lo.”

Stern nih hitin a ti chap: “Nulepa nih timhnak sang bik an ngeihmi cu an fale ziazalei ah ṭhancho ding a si tiah nan ruah men lai. A tak ti ahcun nulepa nih an fale cathiam ding le rian ṭha hmuh ding kha biapi ah an chiah deuh.”

Sianginn fimcawnnak cu a biapi ti cu a hmaan ko. Asinain a ṭha bikmi vawlei fimcawnnak hmanh nih mi pakhat kha a ṭha lomi ruahnak le duhnak hloh awkah a bawm kho lo. A si ahcun ziazalei ah lam a hruai khomi fimcawnnak kha khoika ah dah na hmuh khawh?

Baibal cu thlalang bantuk a si. Baibal kan hlathlai tikah ri kan ngeihnak le kan derthawmnak kha fiang tein kan hmuh khawh. (Jeim 1:23-25) Asinain Baibal nih mah nakin tam deuh a kan bawmh khawh. A herhmi thlennak tuah awk le daihnak taktak a kan ngeihtermi ziaza hna kha ngeih awkah a kan bawmh. Mah ziaza ah ṭhatnak, zaangfahnak, lungsaunak, mahle mah i uk khawhnak le dawtnak hna aa tel. Dawtnak cu “zeizong vialte i rem ṭhipṭhep tein a funtomtu a si” tiah a ti. (Kolose 3:14) Dawtnak cu zeicah aa thleidan khun? Mah ziaza kong he aa tlaiin Baibal chimmi kha i cinken.

• “Dawtnak cu thlachiat a ruat i mi cungah zaangfahnak a ngei. Dawtnak cu a nah a chuak lo, a lung a puam lo i aa porhlaw lo. Dawtnak cu tla bulbal in khua a sa lo i amah zawn lawng aa ruat lo, a thin a tawi lo, palhnak kha aa cinken peng lo. Dawtnak cu midang sualnak cungah khan diriam in a um lo, biatak tu ah khan aa lawm. Dawtnak nih a inkhawh lomi zeihmanh a um lo, . . . inkhawhnak a ngeihmi cu donghnak an ngei lo. Dawtnak cu dongh a thiam lo.”—1 Korin 13:4-8.

• “A minung hawi a dawmi nih cun a minung hawi cungah ṭhatlonak a tuah bal lo.”—Rom 13:10.

• “Zeidang vialte nakin pakhat le pakhat lungtak tein i daw u, zeicahtiah dawtnak nih cun sualnak tampi kha a khuh khawh.”—1 Peter 4:8.

Aan dawtu hna he na umṭi tikah zeitindah na um? Na him i na sia a rem a si ko lo maw? Zeicahtiah nangmah ca ṭhatnak a duhmi an si caah fahnak an ka pe lai lo ti kha na hngalh caah a si.

Dawtnak nih mahca ṭhatnak hlawt awk le midang ṭhatnak caah nunnak hmanh thlen dingin a forh khawh. Tahchunhnak ah, George cu tupa a ngeih tikah a tupa pawng lawngte ah um a duh. Asinain George cu kuak nih a leemmi a si. A fanu vapa nih ngakchia pawngah kuak zuk kha a duh lo. Mah tikah George nih zeidah a tuah? Kuak a zuknak kum 50 hrawng a si cang nain a tupa  ruangah kuak zuk kha a ngol. Mah cu dawtnak hmual a si!   

Dawtnak cu cawn khawhmi ziaza a si. Fale nih dawtnak an ngeih nakhnga cawnpiak cu a bik in nulepa rian a si. An fale kha an cawm an zohkhenh hna, hma an in tik le an zawt tikah an thlop hna. Nulepa ṭha nih an fale kha bia an ruah hna i an cawnpiak hna. A hmaan, hmaan lo he aa tlaiin a hrampi phunglam kha an cawnpiak hna. Mah lengah an tuahsernak in fale caah zohchunhawk ṭha an chiah.

Nulepa cheukhat nih an rian tling tein an ṭuan lomi cu ngaihchiat awk ngai a si. Asinain mah ruangah an fale cu miṭha an si kho bal lai lo tinak a si maw? A si lo. A tlam a tling lomi chungkhar in a ṭhangmi hna i telin kum upa pawl hmanh an nunnak ah thlennak an tuah i tuanvo a la khomi le zumhawk a tlakmi an hung si. Aa thleng kho ti bal lai lo tiah an ruahmi cheukhat hmanh nih thlennak an tuah khawhnak kong kha a hnu capar ah kan theih hna lai.