LUNGRETHEIHNAK IN LUATNAK
Lungretheihnak A Um Lomi Nunnak Kan Ngei Kho
Baibal ah aa telmi fimnak nih a herh lomi lungretheihnak kha hrial awkah a kan bawmh khawh. Lungretheihnak vialte kha kanmah tein kan hlo kho dih lo. Asinain Sertu nih cun a hloh khawh. Kanmah bawmh awkah Jesuh Khrih kha rian a pek. Vawleicung a um lioah a tuahmi nakin a ṭha deuhmi thil hna kha a rauhhlan ah vawlei pumpi ah Jesuh nih a tuah cang lai. Tahchunhnak ah:
JESUH NIH A ZAWMI KHA A DAMTER HNA LAI.
“Zawtnak a phunphun in a zawmi vialte hna le harnak a phunphun a ingmi hna kha . . . a damter dih hna.”—MATTHAI 4:24.
JESUH NIH MI VIALTE KHA UMNAK LE RAWL A TIMHPIAK HNA LAI.
“Mi [Khrih uknak a cohlangmi hna] nih inn an i sak lai i an umnak hna lai, midang nih an hmankanh hna lai lo. Mitsur dum kha an i ser lai i a mitsur hang kha an din hna lai, midang nih an dinkanh hna lai lo.”—ISAIAH 65:21, 22.
JESUH UKNAK NIH VAWLEI PUMPI AH DAIHNAK LE HIMNAK A CHUAHTER LAI.
“A chan chungah dinnak kha karh sehlaw thlapa a ceu chung paoh cu rumnak kha hmun ko seh. A penmi ram cu rili pakhat in rili pakhat tiang a si lai i Zufrates tiva in van hram deng tiang a si lai. . . . A ral kha leidip lakah an bok lai.”—SALM 72:7-9.
JESUH NIH DINLONAK KHA A HLOH LAI.
“A dermi le sifakmi cungah zaangfahnak a ngei i retheimi kha an nunnak kha a khamh hna. Hremnak chung le serhsatnak chungin a khamh hna.”—SALM 72:13, 14.
JESUH NIH SIFAH HARNAK LE THIHNAK HMANH KHA A HLOH LAI.
“Thihnak a um ti lai lo, ngaihchiatnak le ṭahnak le fahnak zong a um ti lai lo.”—BIATHLAM 21:4.
