Lungretheihnak timi cu kan tonmi thil sining kan pum nih a lehrulhmi kha a si. Kan thluak nih hormone pawl a chuahter. Cucaah kan lung a tur ning cu a hun rang. Kan thi a kai i ka thawchuah zong a hun rang. Kan taksa cu aa reng i kan hngalh hlanah kan pum cu lehrulh dingin timhcia a si cang. Kan lungretheihnak a dam ṭhan hnu lawngah kan pum cu “timhcia a sinak” in amah ning ah a hung um ṭhan.

Lungretheihnak timi cu harnak asiloah ṭih a nungmi thil sining tawnghtham awkah timhcia a kan sitermi lehrulhnak pakhat a si. Mah lehrulhnak cu kan thluak in aa thawk. A ṭhami lungretheihnak nih lehrulh colh awkah aan bawmh khawh. Camipuai, rian ca interview asiloah zaang lentecelhnak i kan i tel lioah lungretheihnak tlawmpal kan ngeihmi nih kan hmuitinh phanh awk le ṭha deuh in thil tuah awkah a kan bawmh khawh.

Asinain caan saupi tiang asiloah fak tuk in lungretheih cu ṭih a nung. Na pum cu atu le atu asiloah a zungzal in “timhcia” a si ahcun pumsalei le lungthinlei in aan hnorsuan khawh. Midang na pehtlaih hna ning i telin na thil tuah ning zong aa hun i thleng kho. Caan saupi lungretheihnak nih ningcang loin sii hmannak, a ṭha lomi lam in tawnghtham awkah i zuamnak hna a chuahter khawh. Lungdonghnak, lungthinlei le pumsalei in thabatnak, mahle mah i thah dingin khuaruahnak hmanh a chuahter khawh.

Lungretheihnak nih mi a hnorsuan hna ning cu aa lo cio lo nain mah nih zawtnak a phunphun a chuahter khawh. Kan pum cheubang a dihlak nawn in a hnorsuan khawh.