Mi tampi cu an herhmi thilri ngeih awkah nifatin fakpi in rian an ṭuan. Ngaihchiat awk ngai a simi cu vawleicung i buaibainak nih mah kha a harter chinchin. Zeicah?

• Hmun pakhat ah buaibainak a um tikah tirawl le inn man cu a hun fak chinchin.

• Harnak caan nih rian ngeih lonak kha a karhter i rianṭuan man zong a zorter.

• Leiser ral hna nih mi pawl i an chawlehnak, an inn asiloah an ngeihmi thilri hna kha a hrawh khawh. Mah nih mi tampi kha an si a fahter hna.

• Na tangka kha fimkhur tein na hman ahcun harnak caan caah ṭha tein naa timtuah kho lai.

• Na hmuhmi tangka, naa khonmi le na ngeihmi thilri hna cu man ngei lo ah an cang kho ti kha i cinken.

• Chungkhar lungrualnak le lawmhnak ti bantuk thil hna cu tangka nih a caw kho lo.

Baibal nih hitin a ti: “Rawl le fenh-aih kan ngeih ahcun cucu kan i zat awk a si ko.”—1 Timote 6:8.

Lungsinak kan ngeih ahcun kan herhmi thil kan ngeih tikah kan i lawm kho lai. A hleiin tangka tlawmte lawng kan ngeih tikah mah cu a biapi tukmi a si.

Lungsinak ngeih awkah nunning sawhsawh tein nun a hau. Na cawk khawh lomi thil kha cawk awkah naa zuam peng ahcun buaibainak tam chinchin na ngei lai.