Aa tuai urmi vawlei ruangah a chuakmi lungretheihnak nih mi kha pumsalei le lungthinlei in a hnorsuan hna. Cu bantuk thil a tongmi hna nih thil sining cu a ṭha ṭhan lai tiah an i ruahchan lo. Zeitindah an lehrulh?

• Mi cheukhat nih cun hmailei kong ruah hmanh kha an duh lo.

• Mi cheukhat cu an lungretheihnak hloh awkah zu an ding i ritnak sii an hmang.

• Mi cheukhat nih cun nun man a phu lo tiah an ruah caah anmah le anmah i thah ding hmanhin khua an ruat.

• Na tonmi buaibainak cheukhat cu chikkhat ca lawng a si kho i naa ruahchan lomi lam in a ṭhatnaklei ah aa thleng kho.

• Na sining cu aa thlen lo hmanhah inkhawh awkah aan bawm khomi thil cheukhat na tuah khawh.

• Baibal nih minung buaibainak vialte zungzal in tawnghtham a si cang lai tiah bia a kan kamh.

Baibal nih hitin a ti: “Thaizing kong ah lungrethei in um hlah u, thaizing nih cun lungretheihnak cu a zaa in aa ngeih ve ko lai. Nikhat nih a chuahpimi harnak cung i a dang chonh chih lengmang hi a herh lo.”—Matthai 6:34.

Nikhat ca lawng kha ruat. Tuni ah na tuah dingmi thil kha tuah khawh lo tiangin thaizing kong ah lungrethei in um hlah.

A cang kho menmi thil ṭhalo kong he aa tlaiin thinphannak nih na lungretheihnak a zualter chin lai i a ṭha deuhmi hmailei caah naa ruahchannak zong a zorter lai.

Hlanlio Salm caṭialtu pa nih Pathian sinah hitin thla a cam: “Na bia cu ka ke caah meiinn a si, ka lam ah ceunak a si.” (Salm 119:105) Pathian Bia, Baibal cu cutin zeitindah a si ti kha ruat:

Zan ah meiinn nih khoika in dah kan kal lai ti kha a kan hngalhter. Cu bantukin Baibal ah a harmi biakhiahnak kan tuah tikah a kan bawm khomi a ṭha tukmi fimnak aa tel.

Ceunak nih kan lam kha a ceuh caah kan hmai ah zeidah a um ti kha kan hmuh khawh. Cu bantukin Baibal nih a ṭha deuhmi hmailei ruahchannak kha a kan hmuhsak khawh.