MAH LE MAH I UPAT CU ZEICAH A BIAPIT?

• Hlathlainak pakhat nih anmah le anmah aa upat lomi hna cu lungretheihnak, lungdongh zawtnak le hmaan tein rawl ei duh lonak zawtnak an ngei kho tiah a ti. Cun midang nakin zu le ritnak sii zong hman an duh deuh men lai.

• Anmah le anmah aa upatmi hna cu midang he an i tahchunh lo. Annih cu an pawngkam ah a ummi hna he i rem awk le hawikom ṭha ser awkah an i fawih. Asinain anmah le anmah aa upat lomi hna nih cun midang ṭhatlonak kha an kawl i mah nih midang he an i pehtlainak kha a rawhter khawh.

• Mah le mah upatnak a ngeimi hna cu zuamcawhnak an ton tikah inkhawhnak an ngei. An tonmi harnak nih an hmuitinh phanh lo awkah a kham kho hna lo. Mah he i ralkah in mah le mah upatnak a ngei lomi hna nih an tuah khawh lomi thil hmete kha dawnkhantu nganpi in an hmuh. Cucaah fawi tein an lung a dong kho.

 MAH LE MAH I UPAT AWKAH ZEITINDAH NA TUAH KHAWH?

Tha aan pe khomi hawikom kha i thim. Na cung ah upatnak a ngeimi, zawnruahnak a ngeimi le thazaang aan pe khotu hna he a caan hmangṭi.

Midang kha bawm hna. Zeihmanh aan pe ṭhan kho ti lomi hna i telin midang cung ah zaangfahnak langhter in thilṭha na tuah ahcun peknak in hmuhmi lunglawmhnak taktak kha na hmuh lai. Midang nih na tuahmi an hngalh lo hmanh ah naa nuam kho lai.

Na fale nih anmah le anmah an i upat khawh nakhnga bawm hna. Na tuah khawhmi lam khat cu na fale nih buaibainak an ton tikah a si khawh chung in anmah tein tawnghtham ding in nawl awnh hna. Mah nih na fale kha buaibainak tei awk asiloah thawnghtham khawh awkah a bawmh hna lai. Cutin cawnnak nih atu le an upat tikah anmah le anmah upatnak a ngeihter khawh deuh hna lai.