Mi Nih Zeicah Nunnak Kha An Upat Ti Lo?

AWNG

NUNNAK CAAH UPATNAK LANGHTER CU ZEICAH A BIAPIT?

Ngandamnak a hnorsuang khomi thil asiloah midang caah ṭih a nungmi thil na tuah tikah na nunnak asiloah midang nunnak na upat lo ti na langhtermi a si.

Kuak zuknak nih cancer zawtnak a chuahter leng ah kan pum nih cancer a doh khawh lo nakhnga zong a hnorsuan. Cuap cancer in a thimi minung zatuak ah 90 hrawng cu kuak an zuk ruang asiloah kuak khu an dawp ruang ah a si.
Kum fatin meithal i kahnak ruang ah mi tampi cu lungthinlei zawtnak an ngei. Stanford University report pakhat nih hitin a ti: “[Sianginn meithal kahnak] in a nung buin a luatmi hna cu pumsalei in hma an pu lo nain a hnu kum tampi tiang lungthinlei zawtnak an ngei kho men.”
Zu rit bu asiloah ritnak sii hman buin mawṭaw a mawngmi hna cu lampi le minung kalnak lam cung ah a kalmi hna ca hmanh ah ṭih an nung. Mi nih nunnak zei rel loin an ummi nih ṭhatlonak zeihmanh a tuah lomi hna kha a hnorsuan khawh hna.

NUNNAK NA UPAT KHA ZEITINDAH NA LANGHTER KHAWH?

Na ngan a dam nakhnga i zuam. Kuak zuknak, vape in kuak zuknak, zu tam tuk dinnak asiloah ritnak sii hmannak ti bantuk na nunnak caah ṭih a nungmi thil pawl kha ngol awkah i zuam. Mah bantuk thil na tuahmi nih na nunnak kha a hnorsuan i na chungkhar i telin na pawngkam ah a ummi mi tampi an nunnak na upat lo zong kha mah nih a langhter.

“Cucaah pum . . . a thurhhnawmhtertu paohpaoh kha i thenh u sih.”—2 Korin 7:1.

Himnak caah ralring tein um. Accident na ton nakhnga lo him tein mawng law na inn le na mawṭaw kha ṭha tein zohkhenh. Midang nih hma a putter khomi asiloah thihnak a chuahter khomi lentecelhnak ah i tel ding in an in hnek tikah al hna.

“Inn thar nan sak tikah nan inncung cu tlakdawn in nan kulh lai, cuka cun mi an tlak sual i nan inn cung ah thisen chuah mawhnak cu nan tlunter sual nakhnga lo.”—Deuteronomi 22:8. a

Midang cung ah zaangfahnak ngei. Nunnak a upatmi kan si ahcun miphun kip, ram kip le nunphung aa lo lomi mikip cung ah zaangfahnak kan langhter lai. Miphun thleidannak le huatnak cu vawleicung pumpi ah a ummi zaangennak le raldohnak hna a chuahtertu a hrampi an si.

“Lungthli in i uamnak le thinhunnak le ingpuannak kha hlaw hna u. I hua ti hlah u, i vawlpam ti hlah u. Huatnak lungthin ngei ti hlah u. Pakhat le pakhat cung ah zaangfahnak lungthin le nemnak lungthin ngei u.”—Efesa 4:31, 32.

JEHOVAH TEHTE HNA NIH ZEITINDAH UPATNAK KAN LANGHTER?

Jehovah Tehte Hna nih a tlarimi le a ṭhami nunning in nun awkah midang kha tha kan pek hna. Kuak, zu, ritnak sii ti bantuk ṭih a nungmi thil nih a lemmi hna hmanh kha an nunning i thlen khawh awkah Baibal cawnpiaknak program nih a bawmh hna.

Biakinn saknak rian ah kan him nakhnga dingrep hna kha kan zulh. Pumhnak le Baibal cawnpiaknak rian caah hmanmi inn pawl saknak rian ah mah lungtho tein aa telmi hna cu mah ah accident an ton nakhnga lo cawnpiak an si. Kan sakmi inn hna cu mahle hmunhma himnak caah chuahmi lamhruainak ning in sak a si maw, si lo ti kha atu le atu kan check.

Ṭih a nungmi thil a tongmi hna kha kan bawmh hna. A luancia thla 12 chung ah vawleicung pumpi ah ṭih a nungmi thil phun 200 a tongmi hna bawmh awk caah thawhlawm chung in dollar nuai 12 kan hman.

Nitlaklei Africa (2014) le Democratic Republic of Congo (2018) ah Ebola zawtnak a chuah lioah mah zawtnak in an i kilven khawh nakhnga kan cawnpiak hna. “Nawlngaihnak Nih Nunnak A Khamh Khawh” timi kong an sin chim awkah aiawhtu pawl kha kan thlah hna. Biakinn luhnak ah kut ṭawlnak kan chiahpiak hna i kut ṭawl a biapitnak kong le zawtnak i chawnh lo awkah tuah ding a simi a dang a biapimi a kong pawl zong kha kan chimh hna.

Sierra Leone i a ummi radio thawngthanhnak pakhat nih Ebola zawtnak hrial khawh awkah Jehovah Tehte Hna nih anmah bu lawng si loin Jehovah Tehte a si lomi hna zong kha an bawmh hna tiah a thanh.

2014, Liberia ah Ebola zawtnak a chuah lioah Biakinn ah chiahmi kut ṭawlnak

a Hlanlio Nichuah Laifang ah mi nih an chungkharmi le midang nunnak himnak biapi tuk ah an chiah ti kha mah nawlbia nih a langhter.

I HLAU!