MINO CAAH
9: Pumpak Sining
A SULLAM
Pumpak sining timi ah na min le na muisam lengin aa tel. Mah ah phunglam, zumhnak le ziaza ti bantuk aa tel. Pumpak sining timi cu na chunglei le na lenglei sining vialte kha a chim duhmi a si.
ZEICAH A BIAPIT
Pumpak sining na ngeih ahcun ṭhirual hneknak i ukter loin nangmah na zumhnak ningin fek tein na dir kho lai.
“Mi tampi cu dawr ah hmuhsakmi tunu bantuk an si. An i hruk ding kha anmah tein an i thim lo, midang nih an thimpiak hna.”—Adrian.
“A har caan hmanhah a hmaanmi thil kha ka hun dirkamh khawh. An tuahsernak le anmah he ka um lio i ka umtuning kha ka zoh tikah ahodah hawikom ṭha an si ti kha ka hngalh khawh.”—Courtney.
BAIBAL PHUNGLAM: “Hi vawlei kalning hin kal ve lengmang ti hlah u, . . . Pathian nih nan lungthin kha a dihumnak in in thleng hna seh.”—Rom 12:2.
TUAH KHAWHMI
Na ṭhatnak, na derthawmnak le na zumhnak hna kha i dothlat law atu ah zei bantuk minung dah ka si i zei bantuk minung dah si ka duh ti kha hngalh i zuam. A tanglei biahalnak hna hi hmangin i dothlat.
Ṭhatnak: Zei bantuk thiamnak asiloah sining ṭha dah ka ngeih? Ka ṭhatnak cu zei hna dah an si? (Tahchunhnak ah: A caan a hmaanmi, mahle mah aa uk khomi, rian aa zuammi le a siangmi ka si maw?) Zei bantuk thilṭha dah ka tuah?
RUAHNAK CHEUHNAK: Nangmahle nangmah a ṭhatnak in i hmuh awkah naa harh maw? Na nu le na pa asiloah na zumhmi na hawile kha zei zawn ah dah ka ṭhatnak nan hmuh, zeicah tiah hal hna.
BAIBAL PHUNGLAM: “Kan rian ṭuanmi cu kanmah cio nih a ṭhat, a chiat a cuaithlai ning kan thiam awk a si; cucaah tuah awk aa tlakmi thil kan tuah tikah, midang nih a ṭha, a ṭhalo ti hau loin, kan lung aa lawm kho lai.”—Galati 6:4.
Derthawmnak: Zei sining ah dah ṭhancho ka herh? Zei bantuk tukforhnak phun ah dah kaa thlahdorh tawn? Zei zawn ah dah mahle mah i uk khawhnak tam deuh in ka langhter khawh?
BAIBAL PHUNGLAM: “Kannih nih, sualnak kan ngei lo, kan ti ahcun kanmahle kanmah kan i hlen a si.”—1 Johan 1:8.
Zumhnak: Zei bantuk ziazalei phunglam dah ka zulh, zeicah? Pathian ka zum maw? Pathian a um ti kha zeinihdah a ka zumhter? Zei bantuk tuahsernak hna dah a ding lo tiah ka ruah, zeicah? Hmailei kong he aa tlaiin zeidah ka zumh?
BAIBAL PHUNGLAM: “Fimnak nih aan ven lai, hngalhthiamnak nih aan zohkhenh lai.”—Phungthlukbia 2:11.
Mah Kong Hna Zong Hi Na Duh Khawh Men
Biahalnak 10 A Phi Mino Pawl Biahalnak
Zeibantuk Minung Dah Ka Si?
Man na ngeihnak, na ṭhatnak, ri na ngeihnak le na hmuitinh hna nih hneknak na ton tikah a ṭhami biakhiahnak tuah khawh awkah aan bawmh lai.
