MINO CAAH
11: Teimami Sinak
A SULLAM
Tei a mami nih cun rian kha an hrial lo. Anmah pumpak herhmi le midang bawmhnak caah mi nih an nautatmi rian hmanh kha teima tein an ṭuan.
ZEICAH A BIAPIT
Duh zong, duh lo zongah nunnak ah rian ṭuan ding tampi a um. Rian ṭuan a huammi an tlawmnak, hi vawlei ah teima tein rianṭuannak nih ṭhatnak a chuahter.—Phungchimtu 3:13.
“Rian teima tein kan ṭuan tikah kan i uangthlar i kan lung a si. Mah nih rian kha a kan tlaihchanter chin. Rian fakpi in kan ṭuanmi nih minṭhatnak zong a kan hmuhter.”—Reyon.
BAIBAL PHUNGLAM: “Rianṭuan harnak [zuamnak] nih hin ṭhathnemnak a chuahpi.”—Phungthlukbia 14:23.
TUAH KHAWHMI
Rian he aa tlaiin a ṭhami hmuhnak ngeih awkah a tanglei a kong hna hi zul.
Rian ṭha tein ṭuannak ah i uangthlar. Inn rian a si ah, sianginn in pekmi rian a si ah, a dang rian a si ah na rian kha lungtak tein ṭuan. Rian na ṭuan tikah a rang deuh in le ṭha deuh in ṭuan khawhnak lam kha kawl. Na thiam deuhdeuh tikah na rian ah naa nuam deuhdeuh ve lai.
BAIBAL PHUNGLAM: “Amah a rian ah a thiammipa cu siangpahrang hna hmaiah a dirmi a si lai, mi sawhsawh hna hmai men ah a dirmi a si lai lo.”—Phungthlukbia 22:29.
A phichuak kha zoh. Thil sining tam deuh ah na rian ṭha tein na ṭuan tikah midang nih ṭhatnak an hmuh. Tahchunhnak ah, inn rian teima tein na ṭuan tikah na chungkharmi hna an thilrit kha na zanter deuh.
BAIBAL PHUNGLAM: “Pek leiah hin hmuh lei nakin lunglawmhnak a um deuh.”—Lamkaltu 20:35.
Tam deuh in ṭuan. A phung men in ṭuan loin tam deuh in ṭuan. Mah cu mi nih fial ruangah si loin nangmah lungtho tein na ṭuanmi a si caah nangmahle nangmah naa ukmi a si.—Matthai 5:41.
BAIBAL PHUNGLAM: “Hnekchom in i bawmhter cu kan duh lo, nangmah nih nangmah lungtho tein na ka bawmh kha ka duh deuh.”—Filemon 14.
A tlarimi si. Tei a mami cu a tha a thumi an si lo i rian aa hruhmipi zong an si lo. Rian an i zuam lengah dinh caan zong an sernak thawngin a tlarimi si an i zuam.
BAIBAL PHUNGLAM: “Tlawmte lawng hmanh ngeih ko i lungdai tein um hi kut a pahnih hnih in rian ṭuan zungzal ko i thlitu tlaih i zuamnak nak cun a ṭha deuh.”—Phungchimtu 4:6.
