Zumhawk a tlakmi hna cu nulepa, hawile le rian-ngeitu hna sinin zumhnak an hmu. Dingrep an ngei, an biakam ningin an tuah i biatak an chim zungzal.

Thil sining tam deuh ah zalonnak zei tlukin dah na hmuh timi cu zei tlukin dah zumhawk a tlakmi na si timi cungah aa hngat.

“Nulepa zumhmi si awkah a ṭha bikmi lam pakhat cu an hmaika lawngah si loin an hmuh lonak zongah nutling, patling na si le ṭuanvo a la khomi na si kha langhternak thawngin a si.”—Sarahi.

BAIBAL PHUNGLAM: “Nanmahle nanmah kha ṭha tein i hneksak tuah u.”—2 Korin 13:5.

Zumhmi si na duh asiloah hlan bantukin zumhmi si ṭhan na duh ahcun a tanglei i a kong hna hi zul.

Dingfelmi si. Lihbia na chim ahcun ahohmanh nih an in zum ti lai lo. A hmaan ning tein bia a chimmi le palhnak a thup lomi na si ahcun midang nih an in zumh lai.

“Thil sining a ṭhat caan ah dinfel cu a fawite. Na caah a har hmanhah a dingfelmi na si ahcun midang nih an in zumh chinchin lai.”—Caiman.

BAIBAL PHUNGLAM: “A hmaanmi thil kha tuah kan duhmi a si zungzal.”—Hebru 13:18.

Bochan awk a tlakmi si. U.S. ah hlathlainak an tuah i rian peknak ah a ṭuanmi minung zatuak 78 nih bochan awk tlakmi sinak cu “rian hmuhnak caah a biapi bikmi a kong pathum lakah pakhat a si” tiah an ti. Atu in bochan awk a tlakmi na si ahcun na upat tikah ṭhatnak na hmu lai.

“Ka nu le ka pa nih chimh lengmang hau loin inn rian ka ṭuanmi kha an hmuh. Keimah lung tein ka ṭuan deuhdeuh tikah an ka zumh deuhdeuh ve.”—Sarah.

BAIBAL PHUNGLAM: “Kaan fialmi cu na tuah lai, ti cu ka hngalh ko, kaan fialmi nak tam deuh hmanh na tuah lai ti kha ka hngalh ko.”—Filemon 21.

A lung a saumi si. Pum a ṭhanmi cu hmuh khawh a si nain intuarnak le lungthin a ṭhanmi tu cu hmuh awkah a caan pek a hau.

“Nulepa le midang zumhmi si awkah voikhat i zuamnak lawngin a za lo. Ṭuanvo a la khomi na si kha na langhter zungzal lawngah an in zumh thluahmah lai.”—Brandon.

BAIBAL PHUNGLAM: “Lungsaunak kha nan i aih awk a si.”—Kolose 3:12.