Ṭuanvo a la khomi cu bochan awk a tlakmi an si. Pek an simi rian kha ṭha tein an ṭuan i amahle a caante ah an liim.

Ngakchiatete zong nih an thilti khawhnak ri a ngeih hmanhah ṭuanvo a la khomi si dingin an cawn khawh. “Ngakchia pakhat cu thla hlei nga a si lioin ṭuanṭi duhnak lungput a ngei cang. Thla hlei riat a si tikah cu bantuk lungput kha a ngei chinchin. Nunphung tampi ah kum nga le kum sarih hrawng a simi ngakchia pawl kha nulepa nih bawmhnak an hal tawn hna. Mah kum hrawng a simi ngakchia hna nih inn rian tampi bawmh kha an thiam cang” tiah Parenting Without Borders timi cauk ah a langhter.

Inn in a chuak i anmah tein a ummi mino pawl cu tangkalei buaibainak an ton tikah nulepa sinah an rak kir ṭhan tawn. Mah cu tangka hman ning, innlo zohkhenh ning le nifatin tuah tawnmi rian ṭuan ning kha nulepa nih an cawnpiak hna lo caah a si tawn.

Cucaah upa ṭuanmi rian hna ṭuan thiam awkah fale cawnpiak cu a ṭha bikmi a si. “Kum hlei riat chung midang hngatchan in nan umter hna hnuah anmah tein umter kha nan duh hna lai lo” tiah How to Raise an Adult timi cauk nih a ti.

Inn rian kha ṭuanter hna.

BAIBAL PHUNGLAM: “Rianṭuan harnak nih hin ṭhathnemnak a chuahpi.”​—Phungthlukbia 14:23.

Ngakchia nih nulepa kha bawmh an duh hna. Cucaah inn rian kha na ṭuanter khawh hna.

Nulepa cheukhat cu cutin tuah awkah an i cungcang. Sianginn an kai lio a si i ca tuah ding tampi an ngeih caah an fale kha inn rian ṭuanter an duh hna lo.

Asinain inn rian a ṭuanmi ngakchia cu sianginn ah ca an thiam deuh. Inn rian an ṭuanmi nih ṭuanvo lak khawh awk le rian liim khawh awkah a cawnpiak hna. Mah lengah “ngakchia kha an no lioah rian kan ṭuanter hna lo ahcun midang bawmh cu a biapi lo tiah an ruah lai. . . . An caah midang nih a kan ṭuanpiak ko lai tiin an i ruahchan lai” tiah Parenting Without ­Borders timi cauk nih a ti.

A cung i cherhchanmi ningin inn rian ṭuannak nih midang ca ṭhatnak tuah a duhmi le pek duhnak lungthin a ngeimi a siter hna lai. Cun chungkhar ah a biapimi dirhmun le rian kan ngei ti kha a hngalhter hna lai.

An palhnak caah ṭuanvo lak khawh awkah fale kha bawm hna.

BAIBAL PHUNGLAM: “Lungthin cheuhnak le cawnpiaknak kha ngai tuah, ni khatkhat cu na fim ve te ko lai.”​—Phungthlukbia 19:20.

Na fale nih palhnak an tuah tikah, (tahchunhnak ah, midang thil an hrawh sual tikah) thuhpiak hna dingin i zuam hlah. Ngaihthiam halnak le liamh ṭhannak in a chuakmi ṭhatnak kha na fale nih an hngalhthiam khawh lai.

Palhnak le sunghnak caah ṭuanvo lak a hau ti kha an hngalhthiam ahcun mah nih na fale kha

• a dingfelmi le palhnak a cohlangmi si awkah a bawmh hna lai

• midang kha sual phawt lo awkah a bawmh hna lai

• silhnalhnak bia chim lo awkah a bawmh hna lai

• a herh tikah ngaihthiam hal a hmangmi si awkah a bawmh hna lai