Aa toidormi cu midang upat an thiam. An puarhrang lo i a hleikhun in pehtlaih ding zongin an i ruahchan lo. Mah canah midang cungah siaherhnak taktak an ngei i an sinin cawn duhnak lungput zong an ngei.

A caan ah toidornak cu thader a si tiah palh ngaiin an ruah tawn. A tak ti ahcun palhnak le ri ngeihnak i hngalh awkah a bawm khomi ṭhawnnak a si.

• Toidornak nih pehtlaihnak a ṭhatter. The Narcis­sism Epidemic timi cauk ah “a tak ti ahcun aa toidormi hna cu dawtu tampi an ngei i komh an fawi” tiah a ti.

• Toidornak nih na fa i hmailei a nunnak kha a ṭhatter. Toidor tein um awkah a cawnmi nih atu ah ṭhatnak a hmuhter lai lengah hmailei i rian a sawk tik zongah ṭhatnak tampi a pek lai. “A tlinlonak kha i hmu loin mahle mah a sang tuk ah aa ruatmi mino pakhat cu rian ca biahalnak a phit tikah awnnak a hmu kho lai lo. Asinain bia an halmi cungah lungthawhnak taktak a ngeimi mino nih cun rian a hmuh khawh deuh lai” tiah Dr. Leonard Sax nih a ṭial. *

Mahle mah a tlari tein i hmuh awkah thape.

BAIBAL PHUNGLAM: “Ahohmanh nih, zeihmanh si set ṭung loin, pa ka si ve tiin aa ruah ahcun amah le amah aa hlen a si.”​—Galati 6:3.

• A hmaan lomi phungthluk hna kha hrial. “Na saduhthah vialte a si kho dih,” “na duh ningin zeipaoh a si kho” timi bia hna cu forhfialtu ṭha si dawh an lo ko nain a taktak ah cutin a si tawn lo. Zulh awk a tlakmi hmuitinh hna chia in biatak tein an i zuam lawngah ngakchia nih hlawhtlinnak an hmuh lai.

• Cuset khaset tiin thangṭhat hna. “Na thiam tuk” tinak men in toidornak an hun ngei kho lai lo. Cuset khaset tiin thangṭhat an hau.

• Na fa nih social media a hman ning kha rikhiahpiak. Social media cu mah thilti khawhnak, hmuhmi hlawhtlinnak hna langhternak le mah pumpak thangṭhat kawlnak he aa pehtlai tawn. Mah cu toidornak he aa ralkahmi a si.

• Na fa kha ngaihthiam hal colh dingin thape. A palhnak kha aa hngalh i a phuan nakhnga na fa kha bawm.

 Lawmh a hngalmi si dingin cawnpiak.

BAIBAL PHUNGLAM: “Lunglawmhnak in khat u.”​—Kolose 3:​15.

• Sermi thil hna caah i lawm. Ngakchia nih kokek thil kha i hngatchan in kan nun caah mah kha an sunsak a hau. Thli kan dawp a hau, ti kan din a hau i rawl zong kan ei a hau. Khuaruahhar a simi kokek vawlei caah an i lawmhnak a karhter hngami tahchunhnak hna kha hmang.

• Mi cungah i lawm. Mikip cu lam khatkhat in kanmah nakin an ṭha deuh i an thiamnak le an thilti khawhnak cungah nahchuahnak ngei loin an sinin i cawn khawh a si ti kha na fale theihter hna.

• Lawmhnak bia chim. Na fa kha a kaa in “kaa lawm” tiah chim sawhsawh lawng si loin lungtak tein chim thiam awkah cawnpiak. Lawmh a hngalmi sinak nih aa toidormi a siter lai.

Na fa kha midang ca ṭhatnak tuah man a ngeih ning cawnpiak.

BAIBAL PHUNGLAM: “Toidornak lungthin tu kha ngei cio u law midang nakin ka ṭha deuh tiah zeitikhmanh ah vaa ruat hlah u. Cun midang duhning kha hmuh thiam i zuam u law nanmah duhnak lawng kha ruat hlah u.”​—Filipi 2:​3, 4.

• Na fa kha inn rian i bawmhter. Inn rian na ṭuanter lo ahcun “hi bantuk a nautami rian hi ka ṭuan awk a si lo” timi ruahnak a ngei lai. Inn rian kha biapi deuh ah a chiah a hau. Mah hnu lawngah lente aa celh khawh. Inn rian ṭuan cu midang bawmh a si lengah midang sinin lawmhnak le upatnak zong a hmuhter lai.

• Midang ca ṭhatnak tuah cu tinvo sung a si ti kha lungtak tein chim hna. Cutin tuahnak nih a puitlingmi a siter. Cucaah bawmh a herhmi kha a hngalh khawh hna nakhnga bawm. Zeitindah bawmh ding a si ti zong kha na fa he i ruahṭi u. Cun midang ca ṭhatnak a tuah tikah thangṭhat law bawm.