Lungṭhawnnak a ngeimi nih dawnkhantu thil le lungdonghtertu thil hna kha an tei khawh. Mah sining cu hmuhtonnak in a rami a si. Ngakchia cu atu le atu a tluk hnuah lam a kal khawh bantukin harnak tampi ton hnu lawngah nunnak ah hlawhtlinnak hmuh khawh a si.

Ngakchia cheukhat cu sunghnak, mawhchiatnak le harnak an ton tikah an lung a dong colh. Cheukhat nih cun a sung hmanh an pek. Asinain a tanglei i a kong hna hi an hngalhthiam a hau:

• A caan ah cun sunghnak cu ton hrimhrim dingmi a si.​—Jeim 3:2.

• A caan ah harnak zong an tong lai.​—Phungchimtu 9:​11.

• Chimhhrinhnak cu cawnnak caah a biapimi a si.​—Phungthlukbia 9:9.

Na fa nih lungṭhawnnak a ngeih ahcun nunnak he aa tlaimi buaibainak hna kha zumhnak he a tawnghtham khawh lai.

Na fa nih sunghnak a ton tikah.

BAIBAL PHUNGLAM: “Miṭha mi cu voi sarih tiang tlu hmanh sehlaw a tho ṭhan zau lai.”​—Phungthlukbia 24:16.

Na fa nih thil sining kha a hmaan ning tein a hmuhthiam nakhnga bawm. Tahchunhnak ah, camipuai a sungh ahcun zeidah a tuah lai? “Zeiti awk ṭha” tiin a lung a dong colh lai maw?

Lungṭhawnnak ngeih dingin cawnpiak awkah ṭhancho khawh ning lam kha hngalhter. Cutin a si ahcun buaibainak kha fahnak i pekter loin a tawnghtham khawh lai.

Caankhat te ah na fa i a buaibainak kha tawnghthampiak hlah. Amah tein a tawnghtham khawh nakhnga bawm. Hitin na hal khawh: “Mah nih aan cawnpiakmi kha hngalh awkah zeidah na tuah khawh?”

Harnak ton tikah.

BAIBAL PHUNGLAM: “Thaizing ah na nunnak cu zei a lawh lai hmanh na hngalh ṭung lo.”​—Jeim 4:​14.

Nunnak cu hngalh chung khawh a si lo. Tuni ah a rummi pakhat cu thaizing ah a si a fak kho; tuni ah a dam ngaimi pakhat cu thaizing ah a zaw kho. “Tlik zuamnak ah hin khul a rangmi nih teinak an hmu zungzal lem lo i ralṭhami hi tuknak ah teitu an si zungzal lem lo,” mah cu “a caan le hmuh chung khawh lomi thil” ruangah a si tiah Baibal nih a ti.​—Phungchimtu 9:​11, NW.

Nulepa in na fa kha harnak a ton nakhnga lo na si khawh chungin na huhphenh ko lai. Asinain nunnak buaibainak vialte in cun na kilveng kho lai lo.

Rian in phuahnak, tangkalei buaibainak hna ti bantuk cu na fa nih a tong rih lai lo. Asinain hawikom sunghnak le chungkharmi nih thihtaknak ti bantuk a dang buaibainak hna kha cu a tawnghtham khawh nakhnga na bawmh khawh. *

Na fa cu a ṭhatnaklei in mawhchiat a si tikah.

BAIBAL PHUNGLAM: “Lungthin cheuhnak . . . kha ngai tuah, ni khatkhat cu na fim ve te ko lai.”​—Phungthlukbia 19:20.

A ṭhatnaklei in mawhchiat cu nehsawh a si lo; Thlen a herhmi tuahsernak le lungput a hngalhtertu a si.

Chimhhrinnak cohlan awkah na fa kha na cawnpiak ahcun nan pahnih in ṭhatnak nan hmu lai. “A palhnak kha na remhpiak lo ahcun zeitikhmanh ah a palhnak in a cawng thiam lai lo. Buaibainak tam deuh a tong kho i nulepa nih tawnghthampiak zungzal a hau lai. Nulepa ca le fale caah lungnuam lo a hung si lai“ tiah John nih a chim.

A ṭhatnaklei in mawhchiatnak in ṭhatnak hmuh awkah na fa kha zeitindah na bawmh khawh? Sianginn ah siseh, kaadang ah siseh a ṭhatnaklei in mawhchiat a si tikah mah cu a ding lomi a si tiah ti hlah. Hitin hal:

• “Zeicah an in chimhhrinh tiah na ruah?”

• “Zeitindah na ṭhancho khawh?”

• “Mah bantuk thil na ton ṭhan ahcun zeidah na tuah lai?”

A ṭhatnaklei in mawhchiatnak nih na fa kha atu ah siseh, hmailei ah siseh ṭhatnak a pek lai.