Mahle mah i uk khawhnak ah a tanglei i sining hna aa tel:

• Hngah duhnak lungput

• Khuaruat loin thil tuah lonak

• Duh lomi rian liimnak

• Midang biapi deuh i chiahnak

Mahle mah aa uk khomi ngakchia nih lemsoinak hna le mit a hlang ngaimi lemsoinak phun hmanh kha an al khawh. Mahle mah aa uk kho lomi ngakchia cu

• an thin a tawi

• lungdongh zawtnak an ngei

• kuak, zu le ritnak siivai an hmang

• ngandamnak a pe lomi rawl an ei

Mahle mah aa uk khomi ngakchia cu an upat tikah damlonak le tangkalei buaibainak an tong tuk lo i upadi ṭha tein a zulmi an si tiah hlathlainak pakhat nih a ti. Mah hlathlainak i hruaitu a simi Pennsylvania Sianghleiruun i Professor Angela Duckworth nih “mahle mah i uk khawh ‘tuk’ ti a um lo” tiah a ti.

Al thiam hna dingin cawng.

BAIBAL PHUNGLAM: “‘A si,’ ‘A si lo,’ ti lawng kha chim ko u.”​—Matthai 5:​37.

Ngakchia nih mi hmaiah nuar hnawh in an nu le an pa kha an hneksak khawh hna. Nulepa nih an duhnak an zulh hna ahcun kan nuar hnawh hna caah kan duhmi kan ngah tiah an ruah lai.

Asinain nulepa nih an duhnak an zulh hna lo ahcun kan duhmi kan hmu kho zungzal lo ti kha ngakchia nih an hngalh lai. “Mah kong a hngalthiammi cu nuamhnak le lungsi hnangamnak a hmu bikmi an si. Ngakchia kha an duhmi paoh kan pek hna ahcun dawt si ti loin kan hrawhmi hna a si lai” * tiah Dr. David Walsh nih a ti.

An duhnak paoh zulh loin na al hna ahcun ngakchia cu an ṭhan tikah anmah theng nih al an thiam ve lai. Tahchunhnak ah, ritnak sii hman awk, i ṭhitum hlanah nupa sualnak tuah awk le a dang ziaza ṭhalo hna tuah awkah lem an si tikah an al khawh lai.

 Ngakchia kha a chuak khomi ṭhatnak le ṭhatlonak kong hngalh awkah bawm hna.

BAIBAL PHUNGLAM: “Mi nih a tuhmi cu a zun ko lai.”​—Galati 6:7.

Tuahsernak kip ah a phichuak a um i mahle mah i uk khawh loin thil tuahnak nih thil ṭhalo a tonter khawh ti kha ngakchia nih an hngalhthiam a hau. Tahchunhnak ah, thil pakhatkhat duh lo ruang men ah thinhun in a um ahcun midang nih an pheo khawh. A thin a hun hmanhah mahle mah i uk khawhnak a ngei i mi bia tan loin lungsau tein hngah duhnak a ngeih ahcun mi nih komh an duh deuh lai. Mahle mah i uk khawhnak ngeih dingin a cawn ahcun ṭhatnak tampi a hmu kho ti kha hngalhthiam awkah bawm.

Ngakchia kha a biapi deuhmi thil hngalh awkah cawnpiak hna.

BAIBAL PHUNGLAM: “A biapi deuhmi thil kha hngalh i zuam.”​—Filipi 1:​10, NW.

Mahle mah i uk khawh timi cu palhnak tuah loin um lawng a si lo. Tuah kan duh lomi a si hmanhah tuah awk a simi thil tuah zong aa tel. A biapimi le a biapi lomi thil thleidan thiam awkah cawnpiak cu a biapi tuk. A biapimi thil kha pakhatnak ah an chiah thiam a hau. Tahchunhnak ah, lente i celh nakin sianginn ca tuah kha biapi deuh ah an chiah awk a si.

Zohchunh awk ṭha chia.

BAIBAL PHUNGLAM: “Nan caah i zohchun awk kan tuahpiak cang hna: nan ca i ka tuah bantuk khan nannih zong nih nan tuah ve awk a si.”​—Johan 13:15.

Tlamtlinlonak le lungdonghnak hna na ton tikah na lehrulh ning kha na fale nih an hmuh lai. Mahle mah i uk khawhnak nih thil sining a ṭhatter deuh ti kha na tuahsernak in langhter. Tahchunhnak ah, na fa ruangah na thin a hun tikah thinhung ngaiin maw na lehrulh asiloah lungdai tein dah na lehrulh?