Ngakchia nih anmah lam a hruai kho i ruahnak a cheu khomi upa kha an herh hna. Nulepa cu a ṭha bik in lam a hruai khotu dirhmun ah nan um bantukin lamhruai awkah rian zong nan ngei. Asinain a dang upa pawl zong nih nan fale kha lam an hruai khawh hna i an bawmh khawh hna.

Ram tampi ah mino pawl cu upa pawl he pehtlaihnak an ngei tuk ti lo. Mah hi ruathmanh:

• Ngakchia cu sianginn ah an caan tam deuh an hmang, mah ah sayate le upa pawl nakin siangngakchia an tam deuh.

• Sianginn an ṭin hnu zongah inn ah mi an um lo. An nu le an pa cu rianṭuannak ah an um.

• United States i kum 8 le kum 12 kar ngakchia pawl nih nikhat ah suimilam 6 chung nuamhsaihnak media kha an hman. *

“Mino pawl nih lamhruainak le sersiamnak kha nulepa, saya/mah le a dang upa pawl sinin si loin . . . an ṭhirual pawl sinin an hmuh” tiah Hold On to Your Kids timi cauk nih a ti.

Na fale kha a caan pe hna.

BAIBAL PHUNGLAM: “A zulh awk a simi lam kha ngakchia cu cawnpiak law, a upat tikah mah cucu a pialtak ti lai lo.”​—Phungthlukbia 22:6.

Ngakchia nih an i chuahpimi sining ruangah nulepa lamhruainak hmuh kha an duh. A tak ti ahcun kumhra fai an hun si tik hmanhah ṭhirual pawl nakin nulepa ruahnak cheuhnak kha an sunsak deuh. “Tleirawl le mino a simi fale ruahnak le tuahsernak cungah nulepa cu huham nan ngei rih. Tleirawl an si lioah na chimmi paoh kha an cohlan lo hmanhah nulepa ruahnak kha hngalh an duh i nulepa chimmi kha ngaih an duh” tiah Dr. Laurence Steinberg nih You and Your Adolescent timi cauk ah a ṭial.

Na fa nih nangmah aan bochannak cungah caanṭha i lak. Na fa kha a caan pe. Na hmuh ning, na phunglam le na hmuhtonnak kong kha chim.

Lamhruaitu kha timhtuahpiak.

BAIBAL PHUNGLAM: “Mifim mi hna sinah i chawk ve lengmang law na fim lai, mihrut hna he i kom law a ping ah an in hruai lai.”​—Phungthlukbia 13:20.

Na fa caah zohchunhawk a ṭhami pakhatkhat kong kha na ruat kho lai maw? Na fa nih amah he caan a hmanṭi khawh nakhnga timhtuahpiak. Nulepa nawlngeihnak cu na hlawt awk a si lo ti cu a hmaan ko. Asinain na fa harnak a pe lo dingmi, na zumhmi upa pakhat i thapeknak nih na cawnpiaknak ah aan bawmh khawh. Baibal chan lioah a cuza cangmi Timote hmanh lamkaltu Paul he an i hawikomhnak in ṭhatnak tampi a hmu. Cu bantukin Paul zong Timote he an i hawikomhnak in ṭhatnak tampi a hmu ve.​—Filipi 2:​20, 22.

A luancia kumhrabu chungah chungkhar tampi cu ri pakhat tiang an rak i ṭhencheu cang caah pi le pu, ni le ṭang, cun a dang an rualchan pawl he hmun dangdang ah an um hna. Cutin nan si ve ahcun na fale nih an duhmi ziaza a ngeimi upa pawl sinin an cawn khawh nakhnga caanṭha serpiak hna.