Ziazalei phunglam a ngeimi hna cu a hmaan, hmaan lo ṭha tein a thleidang khomi an si. Ziazalei phunglam timi cu chikkhat intuarnak cungah hram aa bunhmi a si lo. Midang nih an hmuh hna lo hmanhah an tuahsernak lam a hruai khomi a hrampi phunglam cungah fek tein hram aa bunh.

Ngakchia pawl cu sianginn kaiṭihawi, an ngaihmi hla le an zohmi video in siseh ziazalei phunglam he aa tlaiin a palhmi ruahnak nih a iap khawh hna. Cu bantuk huham iapnak nih a hmaan, hmaan lo kong he aa tlaiin na fale hmuhning cungah lunghrinhnak a chuahter khawh.

A hleiin kumhra fai hrawng an si lioah a si. Cu bantuk caan ah “mi tampi nih an cohlanmi ṭhirual hneknak le media hneknak hna kha ṭha tein an hngalhthiam a hau. Hawikom nih an duh lo hmanhah anmah phunglam le an duhmi ningin biakhiahnak an tuah thiam a hau” tiah Beyond the Big Talk timi cauk ah a langhter. Cucaah kumhra fai an si hlanin cawnpiak an hau ti cu a fiang ko.

Ziazalei phunglam kha chiahpiak hna.

BAIBAL PHUNGLAM: “Upa . . . cu chia le ṭha thleidan khawhnak a ngei cangmi an si.”​—Hebru 5:​14.

• A hmaan, hmaan lo a hngalhtermi biafang hna kha hmang. Nifatin tonmi thil sining hna kha hmuhsak hna law aa dannak tete kha hitin chim hna: “Mah cu dinfel a si, mah cu dinfel lo a si.” “Mah cu zumhawktlak a si, mah cu zumhawktlak lo a si.” “Mah cu a ṭha, mah cu a ṭha lo.” A caan a cut tikah na fa nih ziazalei phunglam kha a hun hngalh lai.

• Thil cheukhat kong he aa tlaiin a hmaan le a hmaan lonak a ruang kha fianter. Tahchunhnak ah, hitin hal hna: Dinfel cu zeicah a ṭhat? Hlenthawinak nih hawikomhnak kha zeitindah a hrawh khawh? Fir cu zeicah a ṭhat lo? Na fale i chiaṭha thleidannak lungthin a ṭhanchoter khomi lam in a konglam kha tuaktanpi hna.

• A ṭhami ziazalei phunglam zulh a ṭhatnak kha a hleiin langhter. Hitin na ti khawh: “A dingfelmi na si ahcun midang nih an in zumh lai” asiloah “zaangfahnak a ngeimi na si ahcun mi nih komh an in duh lai.”

Nan chungkhar ningin ziazalei na phunglam ningin nung u.

BAIBAL PHUNGLAM: “Zumhnak nunning khan a nungmi nan si maw? I hneksak tuah u.”​—2 Korin 13:5.

• Nan chungkhar ningin ziazalei na phunglam ningin nan nun a hau, mah lawngah hitin zumhnak he na chim khawh lai:

  • “Kan chungkhar cu hlen kan hmang lo.”

  • “Midang velh le hro kan hmang lo.”

  • “Bia ṭhalo chim kan hmang lo.”

Na fa nih ziazalei phunglam cu zulhphung men si loin nan chungkhar ningin nan zulhmi phunglam a si kha a hngalh lai.

• Na fa he nan chungkhar phunglam kong kha atu le atu i ruah u. Cawn awk caah nifatin tonmi thil sining hna kha hmang. Media asiloah sianginn ah an cawnmi phunglam le na phunglam kha tahchunh in na chimh khawh. “Zeidah na tuah lai?” “Mah thil sining hi kan chungkhar in zeitindah kan tawnghtham lai?” ti bantuk biahalnak hna kha hal.

Ziazalei na phunglam kha fehter.

BAIBAL PHUNGLAM: “Nan chiaṭha thleidannak lungthin kha thiang tein umter u.”​—1 Peter 3:​16.

• Ziaza ṭha a langhter tikah thangṭhat. Na fa nih ziaza ṭha a langhter tikah thangṭhat. A ruang zong kha chim. Tahchunhnak ah, “na dingfel, na caah kaa uangthar tuk” tiah na ti khawh. A palhnak a phuan ahcun na chimhhrin hlanah a dinfel caah lungtak tein thangṭhat.

• A ziaza ṭhalo kha remhpiak. Na fa kha a tuahsernak cungah ṭuanvo lakter. Ngakchia pawl nih zeidah a palh i zeitindah chungkhar phunglam an buar ti kha an hngalh a hau. Nulepa cheukhat nih cun an fale an ngaih a chia sual lai ti an phan caah an ziaza ṭhalo kha an chim hna lo. Asinain fale he an ziaza ṭhalo kong i ruahṭinak nih an chiaṭha thleidan khawhnak kha a ṭhancho nakhnga a bawmh hna lai.