5 Sifah Harnak Hi A Dong Te Lai Maw?
Mah Kong Hngalh Cu Zeicah A Biapit?
Sifah harnak a dong te lai tiah zumh awk a ruang a um ahcun nunnak le Pathian kan hmuh ning cu a ṭha deuh lai.
Ruah Dingmi A Kong
Mi tampi nih sifah harnak kha hloh an duh, asinain hloh khawhnak ṭhawnnak an ngei lo. Mah hi zohhmanh:
Siilei fimnak a ṭhangcho ko nain . . .
-
Lung zawtnak cu thihnak a chuahtertu bik a si.
-
Kum fatin cancer ruangah mi nuai tampi an thi.
-
Dr. David Bloom nih journal pakhat (Frontiers in Immunology) ah “Vawlei ah ṭih a nung tukmi, chawnh khawhmi zawtnak cu hlanliopi in a chuak lengmang i a chuak lengmang rih ko” tiah a ṭial.
Ram cheukhat cu an rum tuk ko nain . . .
-
Kum fatin ngakchia nuai tampi an thi, mah lakah tam deuh cu sifak ram ah a ummi an si.
-
Mi nuai tampi cu thianhhlimhnak a um lonak hmun ah khua an sa.
-
Mi tampi cu ti thiang an ngei lo.
Minung covo kong hngalhthiamnak cu a ṭhangcho ko nain . . .
-
Ram tampi le hmun tampi ah minung zuarnak a um lengmang ko nain cutin a tuahmi hna cu taza cuai an si lo. Mah cu “nawlngeitu pawl nih an hngalh hna lo ruangah le taza cuai awkah tehte an ngeih lo ruangah a si” tiah United Nations report nih a ti.
TAM DEUH IN HLATHLAI
jw.org ah Pathian Pennak cu Zeidah A Si? timi video kha zoh.
Baibal Chimmi
Pathian nih a kan zohkhenh.
Kan lungfahnak le kan ngaihchiatnak kha zei rel loin a um lo.
“Sifakmi kha anih nih cun a hrelh hna lo i an nganfahnak kha zei rel loin a um lo; annih kha a hlat hna lo i bawmhnak hal in an aunak kha a leh hna.”—SALM 22:24.
“Amah nih aan zohkhenh hna caah nan lungretheihnak vialte kha amah cungah chia dih ko u.”—1 PETER 5:7.
Sifah harnak cu a zungzal in a um lai lo.
Kan ca i Pathian tinhnak cu a tling lai tiah Baibal nih bia a kan kamh.
“Pathian [nih] . . . an mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo.”—BIATHLAM 21:3, 4.
Minung nih kan tonmi sifah harnak a chuahtertu thil vialte kha Pathian nih a hrawh lai.
Pathian nih a Pennak hmangin mah kha a tuah lai.
“Vancung Pathian nih pennak pakhat a ser lai i cu pennak cu zeitikhmanh ah a rawk lai lo; cu pennak cu midang sinah aa ṭhial lai lo; . . . cu pennak tu cu zungzal in a hmun lai.”—DANIEL 2:44.
