Mawhchiat ding kan si a si ahcun sifah harnak tlawmter deuh awkah ṭhawnnak kan ngeih a hau lai.

A tanglei i langhtermi sifah harnak a chuahnak a ruang he aa tlaiin minung nih zeitluk in dah rian kan ngeih?

• A Ding Loin Pehtlaihnak.

  Vawlei Pumpi Ngandamnak Bu (WHO) nih a cuza cangmi 4 ah 1 paoh cu an ngakchiat lioah lam khatkhat in a ding loin pehtlaihnak an tong i nu 3 ah 1 paoh cu pumsalei in fahnak pek asiloah tlaihhrem (asiloah a pahnih in) an tong tiah a ti.

• Thihnak.

  “2016 ah vawleicung pumpi i thahnak a tongmi cu 477,000 hrawng an si” tiah WHO nih an chuahmi cauk (World Health Statistics 2018) nih a ti. Mah kum chungah a ummi raltuknak le dohdalhnak ruangah thahnak a tongmi 180,000 zong an i tel.

• Damlonak.

  Caṭialtu Fran Smith nih mekazin pakhat (National Geographic) ah hitin a ṭial: “Mi nuai tampi nih kuak le khuhsii an hman ruangah a bik in thihnak a chuahter khomi zawtnak panga a simi lung zawtnak, zennak, thawchuah hmaanlonak, cuap zawtnak le thin cancer hna an ngei.”

• Zatlang Nun I Ruanlonak.

  “Sifahnak, nunning i dannak, miphun le nupa sinak i dannak, mipem sinak le nunphung thleidannak hna ruangah lungthinlei fahnak cu a karh chin” tiah lungthin kong a hlathlaitu Jay Watts nih a ti.

  TAM DEUH IN HLATHLAI

  jw.org ah Pathian nih Vawlei hi Zeicah A Ser? timi video kha zoh.

Tuchan vawlei ah kan tonmi sifah harnak tam deuh cu minung ruangah a si.

Harnak tam deuh cu a puarhrangmi uktu hna ruangah a chuakmi a si. Annih nih mi pawl kha ṭhatnak pek canah harnak tu an pek hna.

“Minung uknak nih harnak a chuahter.”—PHUNGCHIMTU 8:9, NW.

Sifah harnak cu a zor kho.

Baibal phunglam nih ngandamnak a ṭhatter lengah pakhat le pakhat i pehtlaihnak zong a ṭhatter.

“Lungdaihnak nih pum kha a ngan a damter, sihmanhsehlaw nahchuahnak cu khensar zawtnak bantuk a si.”—PHUNGTHLUKBIA 14:30.

“Lungthli in i uamnak le thinhunnak le ingpuannak kha hlaw hna u. I hua ti hlah u, i vawlpam ti hlah u. Huatnak lungthin ngei ti hlah u.” —EFESA 4:31.