Mi tampi nih sifah harnak cu Pathian nih a chuahtermi a si tiah an ruah caah Pathian biak kha an duh lo.

Biaknaklei hruaitu tampi nih kan tonmi sifah harnak cu Pathian ruangah a si tiah mi kha hlangfang tein asiloah aa hngal lomi lam in an cawnpiak hna. Tahchunhnak ah, mi cheukhat nih hitin an chim:

• Leiser ral cu Pathian sinin a rami dantatnak a si.

• Ngakchia an thihmi cu Pathian nih vancungmi tam deuh in a herh hna caah a si.

• Harnak tampi a chuahtermi raldohnak hna ah Pathian aa tel ve.

Biaknaklei hruaitu hna nih Pathian kong kha a hmaan loin an cawnpiak hna ti cu a si kho maw? Pathian nih a cohlan lomi an si ah tah zeitin?

Kan tonmi sifah harnak hi Pathian nih a chuahtermi a si lo.

A chuahtermi a si ahcun Baibal ah langhtermi Pathian sining hna he aa ralkah lai. Tahchunhnak ah:

“[Pathian] lam vialte cu biading an si. . . . Amah cu a ding i a dik.”—DEUTERONOMI 32:4.

“Pathian nih cun ṭhatlonak a tuah naisai lai lo i Lianngan Bik nih cun palhnak a tuah naisai lai lo.”—JOB 34:10.

“Lianngan Bik nih dinnak cu a merh lo.” —JOB 34:12.

Pathian nih a kong a hmaan loin mi a cawnpiakmi biaknak kha a cohlang lo.

Mah ah sifah harnak hi Pathian nih a chuahtermi a si tiah mi a cawnpiakmi biaknak, raldohnak le zaang-ennak ah aa telmi biaknak hna an i tel.

“Profet hna nih keimah min in lihbia kha an chim; keimah nih ka thlah hna lo, nawl zong ka pe hna lo, a chawnh zong ka chawn hna lo. Annih nih annih cu lih a simi langhnak le . . . anmah lung chung ruahnak menmen kha an chimh hna.”—JEREMIAH 14:14.

Jesuh nih zumhpialmi biaknak hna kha a mawhchiat hna.

“‘Bawipa, Bawipa,’ tiah a ka timi paohin vancung Pennak chungah an lut dih lai, tinak a si lo, sihmanhsehlaw vancung i a ummi ka Pa nih tuah hna seh ti a duhmi a tuahmi lawnglawng kha an lut lai. Cu Ni cu a phak tikah, mi tampi nih keimah cu, ‘Bawipa, Bawipa! Na min in Pathian bia kha kan chim i na min in khuachia kha tampi kan ṭhawl hna i khuaruahharnak tampi kan tuah,’ an ti lai. Khi tikah annih cu ka thawh hna lai i, ‘Nannih cu aho nan si kha kaan hngal bal hna lo. Kal ko u, ṭhatlonak a tuahtu hna,’ tiah ka ti hna lai.”—MATTHAI 7:21-23.