4 Sifah Harnak Ton Dingin Ser Kan Si Maw?
Mah Kong Hngalh Cu Zeicah A Biapit?
Mah biahalnak a phi cu nunnak kan hmuh ning cungah huham a ngei.
Ruah Dingmi A Kong
Aa dawh tukmi thil hna a sertu Pathian nih zeicah sifah harnak hi umnak nawl a awnh hnga?
Biaknak a ngei lomi hna nih kan tonmi sifah harnak ruangah Pathian cungah an lung a hring. Kan tonmi sifah harnak nih (1) Pathian cu ṭhawnnak a ngei lo, (2) Pathian cu sifah harnak he aa tlaiin a zei a poi lo asiloah (3) Pathian a um lo ti kha a langhter tiah an zumh.
Mah cu sifah harnak kan tonnak a ruang an si taktak maw?
TAM DEUH IN HLATHLAI
jw.org ah Baibal Cu A Hmaanmi A Si Kha Zeitindah Kan Zumh Khawh? timi video kha zoh.
Baibal Chimmi
Pathian nih sifah harnak ton dingin a kan ser lo.
Pathian nih nuam tein nung hna seh ti a kan duh.
“Cucaah minung nih a ṭha bik a tuah khawhmi cu a nun rih lioah i lawmh le a ṭha bik a timi kha a tuah khawh chungin tuah kha a si ko. Kan dihlak in ei u sih law ding u sih law kan ṭuan man kha i nuamhpi u sih. Cucu Pathian laksawng a si ko.”—PHUNGCHIMTU 3:12, 13.
Pathian nih hmasa bik minu le mipa kha a tlingmi nunnak a pek hna.
Anmah asiloah an tefale kha sifah harnak ton dingin a ser hna lo.
“Thluachuahnak a pek hna i, ‘Tefa tampi in ngei u law nan tefa cu vawleicung khuazakip ah khat hna seh, cun annih nih vawlei cu uk hna seh.’ . . . , a ti.”—GENESIS 1:28.
Hmasa bik minu le mipa nih Pathian nawlngaih lo awkah an rak i thim.
A phichuak cu anmah cungah siseh, an tefa vialte cungah siseh sifah harnak tampi a chuak.
“Sualnak cu mipa pakhat thawngin vawleicung ah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna.”—ROM 5:12. *
Pathian nih minung kha mah tein i uk khawh dingin a kan ser lo.
Ti chungah kan nun khawh lo bantukin mahle mah i uk dingin ser kan si lo.
“[Minung nih] a nunchung i a kalnak lam zong hi amah nih aa ser khawhmi an si lo.” —JEREMIAH 10:23.
Pathian nih sifah harnak hi tonter a kan duh lo.
Pathian nih a si khawh chungin buaibainak hna hi hrial hna seh ti a kan duh.
“Ka nawlbia kha rak ngai u law, ti ka hei duh dah! Thluachuahnak cu nan caah, zeitikhmanh i a reu bal lomi tiva bantukin, a luan in a luang zungzal ko hnga.”—ISAIAH 48:18.
^ cat. 17 Baibal ah “sualnak” timi biafang kha ṭhatlonak ca lawngah si loin mi vialte nih ro kan comi thil sining pakhat ca zongah a hman.
Mah Kong Hna Zong Hi Na Duh Khawh Men
VENNAK INNSANG
Sifah Harnak Na Ton tikah Pathian cu Zeitindah a Um?
Sifah harnak kha Pathian nih zeitindah a hmuh ti hngalhthiam awkah mah Baibal caang hna nih aan bawmh khawh.
