3 Zeicah Miṭha Pawl Nih Sifah Harnak An Ton?
Mah Kong Hngalh Cu Zeicah A Biapit?
Miṭha pawl nih harnak an tonmi cu a ding lomi a lo. Cucaah mi cheukhat nih zeiti a si hmanhah sifah harnak ton ding a si ahcun miṭha si a hau lo tiah an ruah.
Ruah Dingmi A Kong
Minung nih thihnak le hrin ṭhannak cu kan tong lengmang lai tiah mi cheukhat nih an zumh. Ṭhatnak a tuahmi cu a ṭha deuhmi nunnak in hrin ṭhan an si i ṭhatlonak a tuahmi cu a harmi nunnak in hrin ṭhan an si tiah an ti. Mah zumhnak ningin cun miṭha pakhat hmanh “hlanlio a nunnak” ah ṭhatlonak a rak tuah ahcun sifah harnak a tong kho. Asinain . . .
-
Hrin ṭhan a si tiah ruahmi pakhat nih hlanlio a nunnak kha aa cinken ti lo buin cu bantuk sifah harnak hna a tonmi cu zei sullam dah a ngeih lai?
-
Hlanlio nunnak i kan tuahmi thil ruangah kan zawt asiloah accident kan ton ahcun zeicah atu ah kan dam nakhnga le accident pawl kan hrial khawh nakhnga kan i zuam lai?
TAM DEUH IN HLATHLAI
jw.org ah Zeicah Pathian Nih Sifah Harnak Hi Umnak Nawl A Awnh? timi video kha zoh.
Baibal Chimmi
Sifah harnak cu Pathian sinin a rami dantatnak a si lo.
Mah canah mi pakhat cu aa tlak lomi hmun ah aa tlak lomi caan i a um ruangah a si tawn.
“Tlikzuamnak ah hin khul a rangmi nih teinak an hmu zungzal lem lo i ralṭhami hi tuknak ah teitu an si zungzal lem lo. Mifim mi hi duhdim in an um zungzal lem lo i mifim mi hi mirum an si bal theng lo. Vanchiatnak hi mi zei cung paohah a tlung ko.”—PHUNGCHIMTU 9:11.
Ro kan comi sualnak nih sifah harnak a chuahter.
Mi nih “sualnak” timi biafang kha mi pakhat nih ṭhatlonak a tuah tikah an hman tawn. Asinain miṭha he, miṭhalo he mi vialte nih ro kan comi thil sining pakhat langhternak ca zongah Baibal nih a hman.
“Ka chuahka in miṭhalo ka si. Ka chuah ni in misual ka si.”—SALM 51:5.
Sualnak cu minung cungah hrawh khawhnak huham a ngei.
Sertu he kan i pehtlaihnak lawng si loin Pathian sermi thil hna he kan i pehtlaihnak zong a hrawh khawh. Mah nih pakhat cio cungah siseh, mi vialte cungah siseh sifah harnak tampi a chuahter.
“A ṭhami thil tuah ka duh tikah khan kaa thim khawhmi cu ṭhatlonak lawng kha a si ko.”—ROM 7:21.
“Atu caan tiangah hin cun sermi thil vialte cu nau nganfah bantukin an hrum an ai.”—ROM 8:22.
